Rot Namba 3
Holimpas Pasin Bilong Tenkyu
BAIBEL I TOK WANEM? “Maski wanem samting i kamap long yupela, yupela i mas tenkyu long God.”—1 Tesalonaika 5:18.
BILONG WANEM I HATWOK? Yumi stap namel long ol man i gat pasin antap na i no gat pasin bilong tenkyu, na ol dispela pasin inap kalap long yumi. (2 Timoti 3:1, 2) Na tu, yumi ting olsem yumi mas mekim planti wok moa antap long ol wok yumi holim pinis. Ol hevi o ol samting yumi yet i gat laik long mekim inap daunim yumi na yumi no gat taim long amamas long ol samting yumi holim pinis o tenkyu long ol samting ol narapela i mekim bilong helpim yumi.
YU INAP MEKIM WANEM? Lusim sampela haptaim long tingim ol gutpela samting nau yu gat. Tru ating yu pilim olsem yu gat planti hevi. Tasol tingim samting i painim King Devit. Sampela taim em i bin pilim olsem bel bilong em i bagarap olgeta na ol hevi i daunim em. Tasol maski i olsem, em i beten long God: “Mi tingting long ol samting yu bin mekim na long ol gutpela wok bilong yu.” (Song 143:3-5) Maski em i gat planti hevi, Devit i holimpas pasin bilong tenkyu na em i stap belgut.
Tingim ol samting ol narapela i bin mekim bilong helpim yu, na tok tenkyu long wok ol i mekim. Jisas i gutpela piksa tru long mekim olsem. Olsem: Taim gutpela pren bilong em Maria i kapsaitim gutpela sanda long het na lek bilong em, sampela i askim olsem: “Bilong wanem em i pinisim nating dispela sanda?”a Ol dispela man i pilim olsem ol i mas salim dispela sanda na mani ol i kisim long en ol i mas givim long ol rabisman. Jisas i tok long ol olsem: “Yupela larim dispela meri. Watpo yupela i givim hevi long en?” Na em i tok moa: “Samting dispela meri inap mekim, em i mekim pinis.” (Mak 14:3-8; Jon 12:3) Jisas i no tingim ol samting Maria i no bin mekim, nogat, em i kamapim olsem em i tenkyu long samting Maria i bin mekim.
Sampela i save amamas long famili, ol pren, o ol narapela gutpela samting bihain tasol long ol i no stap moa. Yu inap abrusim dispela pasin sapos yu tingim ol gutpela samting nau yu gat! Ating i gutpela yu raitim wanpela lista o tingim gut ol samting yu amamas long en.
“Olgeta gutpela samting” yumi gat i kam long God, olsem na i gutpela long yumi tok tenkyu long em long rot bilong beten. (Jems 1:17) Sapos yumi mekim olsem planti taim, dispela bai helpim yumi long holimpas pasin bilong tenkyu na kisim pasin bilong belgut.—Filipai 4:6, 7.
[Futnot]
a Long taim bilong ol aposel, pasin bilong kapsaitim sanda long het bilong wanpela man i kam long haus em pasin bilong mekim gut long man; pasin bilong kapsaitim sanda long lek i makim pasin daun.
[Piksa long pes 6]
Yu save tok tenkyu long gutpela pasin ol narapela i mekim long yu?