Ol Man I Askim . . .

Bai Yumi Les Long i Stap Oltaim Oltaim Long Paradais?

▪ Baibel i tok promis olsem yumi inap i stap oltaim oltaim long Paradais long graun. (Song 37:29; Luk 23:43) Orait, yu ting bai yumi les long i stap long gutpela ples tru i go inap oltaim oltaim?

Em gutpela askim yumi ken tingim, a? Ol saveman i bin kisim save olsem taim man i les tru long i stap bilong em, bel bilong em i no stap isi, em bai bel hevi, na em i no tingting gut na mekim ol samting. Ol man husat i ting i stap bilong ol i no gat as bilong en, o ol i les long ol samting ol i mas mekim long olgeta de, ol bai les tru long i stap bilong ol. Orait yu ting i stap bilong ol manmeri long Paradais bai i no gat as bilong en? Bai ol man i les long ol wok ol i mekim long olgeta de?

Pastaim yu mas tingim olsem God Jehova, em As bilong ol tok bilong Baibel, em yet i tok promis long givim laip i stap oltaim long yumi. (Jon 3:16; 2 Timoti 3:16) Nambawan gutpela pasin bilong God em pasin laikim. (1 Jon 4:8) Jehova i save laikim yumi tru na em i bin givim yumi olgeta gutpela samting nau yumi holim.—Jems 1:17.

Man Bilong Wokim yumi em i save, bilong i stap amamas yumi mas i gat ol wok i gat as bilong en. (Song 139:14-16; Saveman 3:12) Long Paradais ol wokman bai i no inap pilim olsem ol i wanpela robot i wok tasol. Wok ol i mekim bai helpim ol yet na famili bilong ol. (Aisaia 65:22-24) Sapos yu gat wanpela gutpela wok bilong mekim fultaim na yu amamas long mekim, yu ting bai yu les long i stap laip?

Tingim tu olsem God Jehova i no ken larim olgeta kain man i stap long Paradais. Em i laik givim laip i stap oltaim olsem presen long ol manmeri i save bihainim pasin bilong Pikinini bilong em, Jisas. (Jon 17:3) Taim Jisas i stap long graun, em i amamas long mekim laik bilong Papa bilong em. Long tok na pasin bilong em, em i skulim ol disaipel olsem amamas bilong givim samting i winim amamas bilong kisim samting. (Aposel 20:35) Long Paradais bai kamap bek long graun, olgeta man bai bihainim tupela nambawan bikpela lo—laikim God na laikim ol narapela. (Matyu 22:36-40) Piksaim long tingting olsem yu sindaun namel long ol manmeri i laikim yu na ol i laikim wok bilong ol! Yu ting bai yu les long i stap wantaim ol?

Bai yumi mekim wanem samting moa long Paradais? Long olgeta de bai yumi inap lain na kisim sampela nupela save moa long Man Bilong Wokim yumi. Ol saveman i bin kisim planti gutpela save long ol samting Jehova i bin wokim. (Rom 1:20) Tasol long nau yumi gat liklik save tasol long ol dispela samting. Inap planti tausen yia i go pinis, gutpela man Jop i tingim bek ol save em i bin kisim long ol samting God i bin wokim, na tok bilong em i stret yet long taim bilong yumi. Jop i tok: “Dispela olgeta samting God i mekim ol i kamap, na yumi save lukim na pilim long en, em i soim yumi liklik hap tasol bilong bikpela strong bilong God. . . . Sapos God i kamapim olgeta strong bilong en long yumi, bai yumi no inap tru long mekim wanpela tok. Nogat tru.”—Jop 26:14.

Maski yumi stap longpela taim tru, yumi no inap kisim save long olgeta samting bilong God Jehova na ol wok bilong em. Baibel i tok God i bin putim laik long bel bilong yumi long i stap oltaim oltaim. Tasol em i tok tu olsem “God i no larim yumi i save tru long olgeta samting em yet i mekim long bipo yet i go inap long bihain tru.” (Saveman 3:10, 11) Yu ting bai yu les long kisim ol nupela save long ol samting bilong Man Bilong Wokim yu?

Long nau tu, ol man i save mekim ol wok bilong helpim ol narapela na bilong givim biknem long God, ol i no save les long i stap bilong ol. Na yumi ken bilip tru olsem sapos yumi mekim wankain wok, bai yumi no inap les long i stap bilong yumi—maski yumi stap laip i go inap oltaim oltaim.

[Picture Credit Lines on page 27]

Earth: Image Science and Analysis Laboratory, NASA-Johnson Space Center; Galaxy: The Hubble Heritage Team (AURA/​STScI/​NASA)