Wanpela Lain i Save Stap Isi Ol i Sambai Long Gutnem Bilong Ol

LONG Disemba 2009 na Janueri 2010, tupela nambawan bikpela kot long Rasia i tokaut olsem lotu bilong ol Witnes Bilong Jehova i birua long gavman. I luk olsem samting i bin kamap bipo i wok long kamap gen. Taim gavman Soviet i bin bosim Rasia, planti tausen Witnes i kot, na kot i sutim tok giaman long ol olsem ol i birua bilong kantri. Ol i kalabusim planti Witnes, na tu, ol i salim planti i go wok kalabus long ol longwe hap. Taim dispela gavman i pundaun pinis, kot i tokaut olsem ol Witnes Bilong Jehova i no gat rong. Nupela gavman i stretim bek gutnem bilong ol.a Tasol nau i luk olsem sampela man i strong gen long krungutim gutnem bilong ol Witnes.

Long kirap bilong 2009, gavman i kirap mekim ol samting bilong pasim rot bilong ol Witnes Bilong Jehova long i stap fri long mekim lotu bilong ol. Long Februeri, ol ofisa bilong kot i mekim 500 wok painimaut long olgeta hap bilong kantri. I gat wanem as bilong dispela wok painimaut? Ol i mekim olsem bilong kamapim long ples klia ol lo em kot i tok ol Witnes i bin brukim. Long ol mun bihain, ol polis i go insait long ol miting bilong lotu ol Witnes i save mekim long ol Haus Kingdom na ol haus bilong ol yet. Ol i kisim ol buk na nius na ol samting bilong ol Witnes yet. Ol loya bilong ol narapela kantri em ol i bin helpim ol Witnes long kot, gavman i rausim ol dispela loya i go bek long kantri bilong ol na i tambuim ol long kam bek gen long dispela kantri.

Long Oktoba 5, 2009, ol man bilong kastam ol i pasim ol buk na nius bilong Baibel long boda klostu long St. Petersburg. Ol i bin prinim ol dispela buk na nius long Jemani, na ol i salim i go long planti kongrigesen i stap long Rasia. Wanpela spesel lain bilong kastam em ol i save kisim na holimpas ol samting i tambu na inap nogutim kantri, ol i glasim ol kontena i gat ol dispela buk na nius samting. Bilong wanem ol i mekim olsem? Wanpela pepa bilong gavman i tok, nogut ol dispela kontena i gat sampela nius samting “bilong kamapim kros pait namel long ol lotu.”

I no longtaim na dispela hevi ol i givim long ol Witnes i go bikpela. Ol Suprim Kot Bilong Federesen Bilong Rasia na Altay Ripablik (wanpela hap bilong Rasia) i tokaut olsem sampela buk na nius bilong ol Witnes, na dispela nius nau yu ritim, ol i bilong daunim gavman. Ol Witnes Bilong Jehova i apil long gavman, na ol narapela kantri i tokaut olsem ol i tingting planti long dispela tok bilong kot—tasol kot i no senisim tok bilong en! Dispela tok em kot i pasim i stap yet, na dispela i mekim na i tambu long kisim ol buk na nius bilong Baibel i kam insait long Rasia o tilim long ol man.

Orait ol Witnes bai mekim wanem long pasin bilong gavman long bagarapim gutnem bilong ol na pasim wok bilong ol? Na dispela tok ol Haus Kot i pasim, em bai mekim wanem long pasin bilong olgeta manmeri bilong Rasia long i stap fri long bihainim lotu bilong ol?

Samting Ol i Mekim Bilong Pasim Hevi

Long Fraide, Februeri 26, 2010, inap olsem 160,000 Witnes Bilong Jehova long Rasia ol i kirap tilim 12 milion liklik nius, nem bilong en Em Inap Kamap Gen? Wanpela Askim i Go Long Ol Manmeri Bilong Rasia. Long wanpela biktaun bilong Saibiria, em Usol’ye-Sibirskoye, sampela handret Witnes i bung long ol rot long 5:30 long moningtaim. Sampela bilong ol i bin go kalabus long Saibiria long 1951, long wanem, ol i bin holimpas bilip bilong ol. Maski em taim bilong bikpela kol tru (-40°C), ol i taitim bun long tilim 20,000 liklik nius ol i bin kisim.

Bilong tokaut long dispela wok bilong 3-pela de, ol Witnes Bilong Jehova i singautim ol nius ripota long Moscow, em nambawan biktaun long Rasia, long kam long wanpela kibung. Wanpela man ol i singautim bilong mekim tok, em Mista Lev Levinson, wanpela saveman bilong lain Human Rights Institute. Inap sotpela taim em i toktok long gavman Natsi bilong Jemani na Soviet Yunion i bin givim bikpela hevi na mekim nogut long ol Witnes Bilong Jehova, na em i toktok long gavman i bin tokaut olsem ol Witnes i no gat rong. Na em i tok: “Presiden Yeltsin i putim tok olsem, olgeta lotu em gavman Soviet i bin mekim nogut long ol, ol i ken stap orait gen. Na olgeta samting bilong ol i bin lus, ol i mas kisim bek. Aninit long gavman Soviet, ol Witnes Bilong Jehova i no gat haus bung o graun samting bilong ol yet, tasol ol i kisim bek gutnem bilong ol.”

Nau ol i laik bagarapim gen gutnem bilong ol Witnes. Mista Levinson i tok: “Long dispela kantri yet we ol i bin mekim tok sori, ol i laik kirap na mekim nogut gen long dispela lain, na i no gat as tru na ol i mekim olsem.”

Planti Man i Laik Ritim Nius

Yu ting wok bilong tilim dispela liklik nius i kamap gutpela? Mista Levinson i tok: “Taim mi wokabaut i go long kibung bilong [ol nius ripota], mi lukim sampela manmeri i sindaun wetim tren na ol i ritim wanpela liklik nius ol Witnes Bilong Jehova i wok long tilim long dispela de long olgeta hap bilong Rasia. . . . Ol manmeri i sindaun ritim na ol i putim tingting i go long tok ol i ritim.”b Tingim ol dispela samting i kamap.

Wanpela lapun meri i stap long wanpela hap bilong ol Muslim long sentral Rasia i kisim dispela nius na em i laik save long wok bilong en. Ol i tok nius hia i toktok long human raits na pasin bilong i stap fri long Rasia, na em i tok: “Gutpela tru sampela lain i kamapim long ples klia ol dispela bikpela tok! Long dispela samting, Rasia i mekim gen wankain pasin olsem long taim bilong Soviet Yunion. Tenkyu tru. Yupela mekim gutpela wok!”

Ol i laik givim nius long wanpela meri long Chelyabinsk, na em i tok: “Mi kisim pinis wanpela nius na mi ritim pinis. Mi wanbel tru wantaim yupela. Mi no save long narapela lotu i save wok gut wantaim bilong sambai long bilip bilong en olsem yupela i mekim. Mi laikim pasin bilong yupela long bilas, na oltaim yupela i save toktok wantaim ol man long gutpela pasin. I klia tru olsem yupela i bilip strong long lotu bilong yupela. Mi lukim olsem God i stap wantaim yupela.”

Long St. Petersburg, wanpela man i tok em i kisim pinis nius, na ol i askim em sapos em i laikim tok bilong nius. Em i tok: “Yes, mi laikim. Taim mi ritim, skin bilong mi i kirap, na mi krai. Bubu meri bilong mi i bin kalabus [long taim bilong Soviet Yunion] na em i stori planti long mi long ol lain i bin kalabus wantaim em. Planti ol i raskol, tasol sampela i no gat asua na ol i kalabus long bilip bilong ol. Mi ting olgeta man i mas save long dispela samting i bin kamap, olsem na yupela i mekim samting i stret.”

Wanem Samting Bai Kamap Bihain Long Rasia?

Ol Witnes Bilong Jehova i amamas long ol i bin i stap fri long Rasia insait long 20 yia i go pinis. Tasol ol i save, pasin bilong i stap fri inap pinis kwiktaim. Dispela pasin nau i kamap long krungutim gutnem bilong ol, em i makim olsem taim nogut bilong daunim sampela lain i laik kamap gen long Rasia o nogat, em yumi no save. Bihain bai yumi save.

Tasol ol Witnes Bilong Jehova i tingting strong long mekim yet wok bilong ol long autim tok bilong Baibel long gutaim bai kamap na ol man i ken bilip na wet long en, maski wanem samting bai kamap. Dispela spesel nius i kamapim tingting bilong ol: “Maski ol i laik daunim mipela, ol i no inap. Mipela bai wok yet long autim tok long pasin isi na rispek long God Jehova na Tok bilong em, em Baibel. (1 Pita 3:15) Mipela i no lusim dispela wok taim mipela i kisim nogut tru aninit long gavman bilong Natsi Jemani, na mipela i no lusim wok long taim kantri bilong mipela i laik daunim tru mipela, na nau tu mipela i no inap lusim dispela wok.—Aposel 4:18-20.”