Husat Tru i Bosim Dispela Graun?

ATING yu no bungim yet wanpela lida bilong wanpela bikpela lain raskol. Olsem wanem? Dispela i makim olsem ol i no stap? Ol lida bilong ol lain raskol, ol i save gut long haitim pasin bilong ol o ol i stap kalabus na yusim ol narapela bilong mekim wok bilong ol. Tasol ol het tok bilong ol niuspepa em ol i stori long ol woa bilong drak, wok bisnis long ol pamukmeri, baim na salim ol man, ol i sampela bilong ol samting we i save kirapim yumi long tingim olsem ol dispela lida i stap tru na ol i stiaim ol man long mekim ol pasin nogut, na wok bilong ol i save kamapim ol samting nogut tru. Long rot bilong ol samting i kamap long dispela graun, yumi ken save olsem ol dispela lida bilong ol lain raskol ol i stap tru.

Baibel i kamapim olsem Satan em i wanpela man i stap tru, na olsem wanpela lida bilong lain raskol, em i save mekim laik bilong em i kamap tru long rot bilong ol “giaman mirakel” na “olgeta kain pasin nogut bilong giamanim ol man.” Tru tumas, Baibel i tok: “Satan yet i save giaman olsem em i ensel bilong lait.” (2 Tesalonaika 2:​9, 10; 2 Korin 11:14) Long rot bilong ol samting i kamap long dispela graun, yumi ken save olsem Devil i stap tru. Tasol planti man i hatwok long bilip olsem i gat wanpela spirit nogut i stap. Paslain long yumi skelim tok Baibel i mekim long Devil, i gutpela yumi tingim sampela bilip kranki i pasim planti man long bilip olsem Devil em i wanpela man i stap tru.

◼ “Olsem wanem wanpela God i gat pasin laikim inap wokim Devil?” Baibel i tok, pasin bilong God i gutpela na stretpela olgeta, tasol dispela tok i pait wantaim tingting olsem em i bin wokim wanpela man i gat pasin nogut tru. Tru tumas, Baibel i no tok God i wokim kain man olsem. Nogat tru. Baibel i tok: “God . . . i olsem wanpela bikpela strongpela ston i no save senis. Oltaim em i save bihainim tok bilong en na em i no save giaman. Na pasin bilong en i gutpela na stretpela tasol.”​—⁠Lo 32:4; Song 5:⁠4.

Wanpela samting yumi ken tingim em olsem: Yu ting wanpela man em God i wokim i gutpela olgeta, em inap mekim pasin i no stret? God i no wokim ol man olsem robot, nogat, em i larim ol yet i makim ol samting ol i laik mekim. Olsem na wanpela man i gutpela olgeta em inap makim olsem em bai mekim gutpela pasin o pasin nogut. Ol man na ol spirit i stap fri long makim ol samting ol i laik mekim, olsem na pasin na wok ol i mekim, dispela tasol bai soim olsem ol i stap gut long God o nogat.

Olsem na yumi ken save God i no inap larim ol man i stap fri long makim ol samting ol i laik mekim na long wankain taim em i pasim ol long mekim pasin nogut sapos ol i laik mekim olsem. Jisas i tok long Satan i mekim wok nogut long pasin bilong i stap fri, na em i tok: “Em i no holimpas tok i tru.” (Jon 8:44) Dispela tok i kamapim klia olsem dispela man husat i kamap Satan, pastaim em i wanpela gutpela spirit na em i bin “holimpas tok i tru.”a God Jehova i wokim ol man na ol ensel i stap fri long makim ol samting ol i laik mekim, long wanem, em i laikim tru ol na em i trastim ol.​—⁠Lukim blok “Yu Ting Man i Gutpela Olgeta Inap Mekim Sin?” long pes 6.

◼ “Devil i wokman bilong God” Sampela man i ting, Buk Jop long Baibel i sapotim dispela tingting. Wanpela buk i stori long Baibel i tok, dispela tok olsem Devil i “raun long olgeta hap” i makim wok bilong ol man bilong lukstil long Persia bilong bipo, em ol i bin raun long olgeta hap na kisim ol ripot i go bek long king bilong ol. (Jop 1:⁠7) Tasol sapos Devil i wokman bilong God long lukstil, orait bilong wanem em i mas tokim God olsem em i bin “raun long olgeta hap”? Buk Jop i no stori long Devil olsem em i wanpela wokman bilong God, nogat, em i kolim nem bilong Devil olsem Satan, mining bilong en “Birua.” Tru tumas, em i nambawan Birua bilong God. (Jop 1:⁠6) Orait, dispela tingting olsem Devil i wokman bilong God i kamap olsem wanem?

Long taim bilong ol aposel, sampela rait em ol i no hap bilong Baibel, olsem “Book of Jubilees” na “Common Rule” bilong lain Kumran, i tok long Devil olsem em i paitim tok i go i kam wantaim God, tasol em i stap aninit yet long God. Long buk bilong em Mephistopheles, saveman J. B. Russell i tok, Martin Luther, wanpela bikman bilong lotu Protestan, em i tok long Devil olsem em i tul bilong God, “olsem wanpela baira samting em God i yusim bilong wokim gaden bilong Em.” Russell i tok i olsem Luther i laik tok “dispela baira i amamas long bagarapim ol gras nogut,” tasol em i stap yet long strongpela han bilong God, olsem inapim laik bilong God. Ol tok bilong Luther​—⁠bihain tisa bilong lotu, em John Calvin bilong Frans i orait long en⁠—​i bagarapim tingting bilong planti man long stretpela pasin. Olsem wanem wanpela God i gat pasin laikim i ken larim pasin nogut i stap, na tu, em i gat laik long dispela pasin i kamap? (Jems 1:13) Dispela bilip na ol samting nogut tru i wok long kamap long nau i mekim na planti man i no bilip long God na long Devil.

◼ “Devil i makim pasin nogut i stap long bel bilong man” Sapos yumi tingim olsem Devil i makim tasol pasin nogut i stap long bel bilong man, dispela bai mekim na yumi no inap kliagut long sampela stori bilong Baibel. Olsem long Jop 2:​3-6, God i bin toktok wantaim husat? Yu ting em i toktok wantaim ol pasin nogut i stap insait long Jop, o em i toktok long em yet? Na tu, yu ting pastaim God inap litimapim gutpela pasin bilong Jop, na bihain Em i larim samting nogut i traim Jop? Sapos yumi ting God i mekim dispela kain pasin, orait i olsem yumi ting God i wanpela Man nogut, na i no wanpela Man “i stretpela olgeta.” (Song 92:15) Tasol dispela i no olsem, nogat, God i nolaik tru long ‘bagarapim bodi bilong Jop.’ Tru tumas, yumi ken save tru olsem Devil i no makim pasin nogut i stap long bel bilong man o pasin nogut bilong God, nogat. Devil i wanpela spirit husat i mekim em yet i kamap nambawan Birua bilong God.

Husat Tru i Bosim Dispela Graun?

Long nau, planti man i ting pasin bilong bilip long Devil em i tingting tumbuna. Tasol sapos yumi tingim ol pasin nogut i wok long kamap long nau, yumi save tru olsem Devil i as bilong en, na i no gat narapela rot bilong eksplenim gut dispela samting. Tru tumas, pasin bilong sakim dispela tingting olsem i gat Devil i stap i mekim na planti man i sakim God na olgeta stretpela lo.

Charles-Pierre Baudelaire, em man bilong raitim ol stori husat i bin stap olsem 100 yia i go pinis, em i tok: “Nambawan bikpela trik bilong Devil em long kirapim yumi long kisim tingting olsem em i no stap.” Long rot bilong haitim ol pasin bilong em, Devil i mekim na ol man i gat tupela tingting long God. Sapos Devil i no stap tru, orait i olsem God i as bilong ol pasin nogut, a? Dispela em tingting Satan i laik ol man i mas kisim.

Olsem wanpela lida bilong lain raskol, Devil i save haitim ol pasin tru bilong em bambai em i ken kamapim laik bilong em. Em i gat wanem laik? Baibel i tok: “Ol dispela man i no bilip, god bilong dispela graun i pasim tingting bilong ol. Olsem na lait bilong gutnius bilong Krais, husat i stap olsem piksa bilong God, em i no inap lait long ol.”​—⁠2 Korin 4:⁠4.

I gat wanpela bikpela askim i stap yet. God bai mekim wanem long dispela man husat i mekim ol pasin hait na kamapim olgeta pasin nogut na pen na hevi i stap long nau? Bai yumi skelim dispela askim long atikol i kamap bihain long dispela.

[Futnot]

[Rait long pes 5]

Yu ting Devil i wokman bilong God o birua bilong God?

[Blok/​Piksa lon pes 6]

Yu Ting Man i Gutpela Olgeta Inap Mekim Sin?

God i wokim man i gutpela olgeta, tasol dispela i no makim olsem em inap mekim olgeta samting. Tru God i wokim Adam i gutpela olgeta, tasol em i mas bihainim ol lo Jehova i bin putim. Olsem: Em i no inap kaikai graun, o ol liklik ston, long wanem, em bai kisim bagarap long dispela. Sapos em i no bihainim lo bilong graviti na em i kalap i go daun long wanpela maunten, em inap dai o em inap kisim bikpela bagarap.

Na olsem tasol, man o ensel i gutpela olgeta i no inap kalapim ol stretpela lo em God i putim, long wanem, em bai kisim bagarap. Olsem na taim man o ensel i mekim wok nogut long pasin bilong i stap fri, planti taim em bai mekim ol rong na sin.​—⁠Stat 1:29; Matyu 4:⁠4.