Pas i Kam Long Nowe

EM MONINGTAIM na ples i kol. Mipela i lukluk i go ausait long windo bilong skelim weda bai olsem wanem. Mipela i amamas long lukim blupela skai i klia tru! Mipela bai stap na autim tok inap 3-pela de long Finnmarksvidda​—⁠em wanpela ples stret antap long ol maunten bilong Aktik Sekel.

Long Nowe, ples i save kol nogut tru long taim bilong winta, olsem na mipela i gat tupela tingting long go long hap not. Mipela i amamas long i go wantaim 3-pela Witnes Bilong Jehova em ol i save stap long dispela hap. Ol i save long wanem ol samting bai kamap na ol i givim ol gutpela tok bilong stiaim mipela.

I no gat planti rot long dispela hap. Olsem na gutpela rot bilong visitim ol man i stap long ol kain longwe ples olsem em long raun long motobaik bilong sno. Mipela i putim ol klos, kaikai, na sampela ekstra petrol long ol motobaik bilong sno, na motobaik i pulim tu ain trela long baksait. Taim mipela i stap longwe yet, mipela inap lukim wanpela bikpela ples stret i stap antap long maunten. San i lait na i mekim sno i lait gut tru olsem ol daimon. Dispela ples i luk nais tru!

Finnmarksvidda em i ples tru bilong ol kain animal olsem reindeer, moose, lynx, hare, fox, wolverine, na liklik lain bea. Tasol samting mipela i amamas tru long en em long lukim ol manmeri i stap long dispela longwe ples. Mipela i amamas tru long bungim lain Sami, em ol i save lukautim ol dia o wok long ol ples slip antap long maunten.

Long namba wan haus mipela i kamap long en, mipela i bungim sampela yangpela em ol i kam wantaim ol wanklas bilong ol long ski long ais. Ol i toktok wantaim mipela na askim long mipela i kam mekim wanem. Mipela i amamas long tokim ol long as na mipela i kam. Wanpela bilong ol i tok: “Orait, mekim gut wok bilong yupela!” Mipela i kalap gen long ol motobaik na mipela i ron antap long ol bikpela raunwara i kamap ais pinis na long ol bikpela ples nating em sno i karamapim. Mipela i wok long tingting, mipela bai lukim wanpela lain dia o nogat.

Taim mipela i draiv i go long wanpela liklik haus, wanpela man i tok gude long mipela. Em wanpela bilong ol liklik lain i sindaun long dispela hap. Taim em i lukim olsem ain trela bilong mipela i bruk, em i tok em bai stretim. Em i rileks tasol na stretim trela; ol man long dispela hap i no save hariap hariap long mekim wok. Pasin bilong em i mekim na mipela tu i rileks. Taim em i stretim pinis trela, mipela i tok tenkyu long em na kamapim sampela tok bilong Baibel i stori long as na God i larim pen na hevi i stap. Em i putim gut yau long ol tok mipela i kamapim. Paslain long mipela i lusim em, em i kisim buk Tru Tru Baibel i Tok Wanem? na ol nius Wastaua na Kirap! Em i smail na i tok: “Tenkyu tru long kam lukim mi.”

Mipela i bungim sampela man moa na toktok wantaim ol, na taim ples i kamap tudak, mipela i go bek long haus we mipela bai slip long en. I no longtaim mipela i lukim wanpela foks. Retpela gras bilong en i luk nais tru taim em i sanap long waitpela sno. Dispela foks i stop na i lukluk long mipela, na bihain em i wokabaut i go. Nau sno i stat long pundaun na mipela i no inap lukim gut ples. Tasol mipela i amamas tru taim mipela i lukim liklik haus mipela bai stap long en! Mipela i wokim paia insait long haus na ples i kamap hot liklik. Maski mipela i taiet tru bihain long longpela raun bilong mipela long dispela de, mipela i amamas stret.

Long neks de, mipela i putim gen ol kago long motobaik na draiv i go long ples daun, na ron antap long wara i kamap ais pinis na i go kamap long narapela haus long maunten. Long dispela hap mipela i bungim wanpela yangpela man na mipela i stori wantaim em long sampela gutpela tok bilong Baibel. Em i soim mipela long sotkat rot bilong i go bek long bikrot.

Nau em i laspela de bilong dispela raun bilong mipela. Taim mipela i kamap long Stabbursdalen Nesenel Pak, mipela i lukim naispela ples tru na i gat ol maunten i stap longwe em sno i karamapim na i luk nais tru taim san i lait. I no longtaim, mipela i lukim wanpela bikpela lain dia! Ol i stap isi tasol na kaikai gras em ol i digim long graun we ais i karamapim. Longwe liklik, mipela i lukim wanpela man i save mekim tok Sami i sindaun long motobaik bilong em. Em i was long ol dia bilong em. Dok bilong em i was long ol dia na i bungim ol gut wantaim. Inap liklik taim dok i lukluk i kam olsem long mipela. Tasol hariap tru em i tanim i go bek na was long ol dia. Mipela i go autim tok long dispela wasman bilong lain dia. Em i gat gutpela pasin pren na em i putim gut yau long tok bilong mipela.

Taim mipela i ron i go bek, mipela i tingim ol manmeri mipela i bin bungim insait long raun mipela i bin mekim inap 300 kilomita. Mipela i amamas tru olsem mipela i bin go lukim ol manmeri i stap long dispela ples i wait olgeta.

[Piksa Kredit Lain long pes 15]

© Norway Post