I Gat Wanem As na God i Gat Wanpela Oganaisesen?

Dispela atikol i kamapim sampela askim em ating yu laik save long en, na i soim yu wanem hap bilong Baibel yu inap ritim bilong painim bekim. Ol Witnes Bilong Jehova bai amamas long toktok wantaim yu long ol dispela bekim.

1. I gat wanem as na God i oganaisim lain Israel?

God i oganaisim ol tumbuna bilong Abraham i kamap wanpela lain na i givim ol lo long ol. Em i kolim dispela lain olsem Israel na i givim wok long ol long lukautim lotu i tru na Tok bilong em, em ol Rait Holi. (Song 147:19, 20) Olsem na olgeta manmeri i kisim blesing long rot bilong dispela lain.—Ritim Stat 22:18.

God i makim lain Israel long kamap ol witnes bilong em. Taim ol i bihainim ol lo bilong God, dispela i helpim ol. (Lo 4:6) Sapos yumi kisim save long ol samting i bin painim lain Israel bilong bipo, yumi inap save gut moa long God tru.—Ritim Aisaia 43:10, 12.

2. I gat wanem as na God i oganaisim ol Kristen tru?

Bihain, Jehova i no orait moa long lain Israel, na em i kisim kongrigesen Kristen olsem senis bilong en. (Matyu 21:43; 23:37, 38) Bipo, lain Israel ol i witnes bilong God. Tasol long nau, ol Kristen tru i stap olsem ol witnes bilong Jehova.—Ritim Aposel 15:14, 17.

Jisas i skulim ol disaipel long autim tok na lainim ol man long Jehova, na kamapim ol disaipel long olgeta lain man. (Matyu 10:7, 11; 24:14; 28:19, 20) Dispela wok i go bikpela tru long nau. Em i namba 1 taim long Jehova i bungim planti milion manmeri bilong olgeta kantri long lotu i tru. (Revelesen 7:9, 10) God i oganaisim tu ol Kristen tru bambai ol i ken strongim na helpim narapela narapela. Maski ol i stap long wanem wanem hap, ol i save kisim wankain skul bilong Baibel long ol miting bilong ol.—Ritim Hibru 10:24, 25.

3. Long taim bilong yumi, oganaisesen bilong ol Witnes Bilong Jehova i kirap olsem wanem?

Oganaisesen bilong ol Witnes Bilong Jehova long nau i kirap mekim wok long yia 1870 samting. Wanpela liklik lain Baibel sumatin i kirap long kisim gen stretpela save long ol tok i tru bilong Baibel. Ol i save olsem Jisas i oganaisim kongrigesen Kristen bilong autim tok. Olsem na ol i kirapim wok bilong autim tok bilong Kingdom long olgeta hap. Long 1931 ol i kisim nem olsem Witnes Bilong Jehova.—Ritim Aposel 1:8; 2:1, 4; 5:42.

4. Olsem wanem ol Witnes Bilong Jehova i oganaisim wok bilong ol long nau?

Long taim bilong ol aposel, ol kongrigesen Kristen long planti hap i kisim helpim long wanpela lain gavening bodi em ol i luksave olsem Jisas em i Het bilong kongrigesen. (Aposel 16:4, 5) Long nau tu, ol Witnes Bilong Jehova i luksave olsem Jisas em i Lida bilong ol. (Matyu 23:9, 10) Na tu, ol i kisim helpim long wok bilong lain Gavening Bodi, em ol elda husat i givim ol tok bilong Baibel bilong strongim na stiaim winim 100,000 kongrigesen. Long olgeta kongrigesen, i gat ol elda, olsem wasman. Ol dispela man i lukautim gut lain bilong God.—Ritim 1 Pita 5:2, 3.

Ol Witnes Bilong Jehova i stretim gut wok bilong autim gutnius na kamapim ol disaipel. Bilong helpim ol manmeri long olgeta hap long stadi long Baibel, ol i save tanim tok, prinim na tilim ol buk na nius bilong Baibel long winim 500 tokples. Olsem ol aposel i bin mekim, ol i autim tok long ol haus. (Aposel 20:20) Ol i amamas long mekim Baibel stadi wantaim ol man i gat laik long kisim save long tok i tru. Nambawan samting long tingting bilong lain bilong Jehova em long amamasim God na helpim ol narapela, olsem na ol i stap olsem wanpela oganaisesen bilong ol manmeri i stap amamas.—Ritim Song 33:12; Aposel 20:35.

Bilong kisim sampela save moa, lukim sapta 19 bilong dispela buk, em ol Witnes Bilong Jehova i wokim. Tru Tru Baibel i Tok Wanem?