BEKIM OL ASKIM BILONG BAIBEL
Yumi inap stap laip oltaim?
Wanem samting inap mekim na yumi no dai moa?
Namba 1 man Adam i bin stap laip inap planti handret yia. Tasol bihain em i kamap lapun na i dai. Kirap long bipo yet na i kam, ol man i bin traim kain kain rot bilong ol i no ken go lapun. Tasol i no gat wanpela i bin abrusim dai. Bilong wanem? Adam i bin go lapun na dai, long wanem, em i mekim sin taim em i brukim lo bilong God. Yumi kamap lapun, long wanem, yumi kisim sin long Adam na pe bilong dispela sin em dai.—Ritim Stat 5:5; Rom 5:12.
Bilong yumi ken kisim laip oltaim, yumi mas i gat wanpela man bilong baim bek yumi long sin. (Jop 33:24, 25) Pe bilong baim bek man em pe ol i save baim bilong lusim kalabusman i go fri, olsem tasol, yumi mas i gat pe bilong baim bek yumi long lusim kalabus bilong indai. (Kisim Bek 21:29, 30) Jisas i bin givim dispela pe taim em i dai bilong helpim yumi.—Ritim Jon 3:16.
Yumi inap mekim wanem bilong kisim laip oltaim?
I no olgeta man bai kamap fri long olkain sik na pasin bilong go lapun. Planti man husat i sakim tok bilong God olsem Adam i bin mekim, ol bai i no inap kisim laip oltaim. Ol manmeri em God i lusim sin bilong ol, ol tasol bai kisim laip oltaim.—Ritim Aisaia 33:24; 35:3-6.
Yumi mas mekim sampela samting bilong God i ken lusim sin bilong yumi. Yumi mas kisim save long God long rot bilong stadi long Baibel. Baibel i skulim yumi long ol tok bilong helpim sindaun bilong yumi, na tu, em i skulim yumi long wanem samting yumi inap mekim bilong God i ken orait long yumi na yumi inap kisim laip oltaim.—Ritim Jon 17:3; Aposel 3:19.