Yumi Kamap Olsem Wanem?

Buk Stat em fes buk bilong Baibel i stori long graun na ples antap i kamap olsem wanem, em i tok: “Bipo bipo tru God i mekim kamap skai na graun na olgeta samting i stap long en.” (Stat 1:1) Bihain long God i wokim ol diwai na gras samting na ol animal, em i wokim namba 1 man na meri, em Adam na Iv. Ol i narapela kain long ol animal bikos ol inap kamapim sampela pasin bilong God, na tu, ol i stap fri long mekim ol disisen bilong ol yet. Olsem na ol i gat wok long makim wanem pasin ol i laik bihainim. Sapos ol i bihainim tok bilong God, ol inap insait long samting God i tingting pinis long mekim em bilong tupela long stap olsem namba 1 papamama bilong wanpela famili i stap bel isi na gutpela olgeta long graun inap oltaim oltaim.

Tasol wanpela ensel i painim rot bilong yusim ol man bambai em i ken inapim laik bilong em yet. Long dispela rot em i kamap Satan, mining bilong en “Birua.” Long rot bilong wanpela snek, Satan i giamanim Iv, na i tokim em olsem laip bilong em bai gutpela moa sapos em i no larim God i bosim em. Adam na Iv i bihainim tok bilong Satan na ol i no pas gut moa wantaim Man Bilong Wokim ol. Tupela tumbuna bilong yumi i bin sakim tok bilong God, olsem na ol i lus long kisim laip oltaim na long rot bilong tupela yumi kisim sin, na dai.

Wantu tasol God i tokaut long samting em i tingting long mekim bilong stretim dispela hevi na opim rot bilong ol tumbuna pikinini bilong Adam i ken kisim laip oltaim. God i tok profet olsem “lain” o pikinini—em wanpela man—bai bagarapim Satan na pinisim tu olgeta pen na hevi em Satan, Adam, na Iv i bin kamapim. (Stat 3:15) Dispela pikinini em i husat? Sampela haptaim i mas lus bambai ol man i ken save long dispela pikinini.

Insait long dispela haptaim, Satan i traim strong long pasim samting God i tingting pinis long mekim. Planti manmeri tru i insait long mekim ol pasin nogut. God i tingting strong long bagarapim ol man nogut long rot bilong bikpela tait. Em i tokim stretpela man Noa long wokim wanpela sip bilong lukautim em yet na famili bilong em, wantaim ol animal em God i tokim em long bringim i go insait long sip.

Wanpela yia bihain, Bikpela Tait i pinis, na Noa na famili bilong em i kam ausait long sip long klinpela graun. Tasol dispela pikinini long tok profet i no kamap yet.

—I kam long Stat sapta 1-11; Jut 6, 14, 15; Revelesen 12:9.