Yu Save Long Dispela?

Papa bilong Josep em husat?

Josep em wanpela kapenta long taun Nasaret na em i waspapa bilong Jisas. Tasol yumi laik save, papa bilong Josep em husat? Gutnius Bilong Matyu i stori long lain tumbuna bilong Jisas na em i kolim wanpela man olsem Jekop, tasol Buk Luk i tok Josep “em i pikinini bilong Heli.” Bilong wanem Baibel i kolim narapela narapela nem bilong makim papa bilong Josep?—Luk 3:23; Matyu 1:16.

Matyu i tok: “Jekop em i papa bilong Josep.” Em i yusim wanpela tok Grik bilong soim olsem Jekop em i papa tru bilong Josep. Olsem na Matyu i kamapim stori bilong ol tumbuna bilong Josep, em lain famili bilong King Devit, bilong soim olsem Josep em i waspapa bilong Jisas, olsem na Jisas i gat rait long kamap King.

Tasol Luk i tok: “Josep em i pikinini bilong Heli.” Dispela tok “pikinini bilong” inap makim tu olsem em i tambu pikinini bilong em. Wankain tok i stap long Luk 3:27. Baibel i tok Sealtiel em i “pikinini bilong Neri,” tasol papa tru bilong Sealtiel em Jekonia. (Luk 3:27; 1 Stori 3:17; Matyu 1:12) Ating Sealtiel i marit long wanpela pikinini meri bilong Neri em Baibel i no kolim nem bilong en, olsem na Sealtiel i tambu pikinini bilong Neri. Olsem tasol, Baibel i tok Josep em i “pikinini” bilong Heli bikos em i maritim Maria, em pikinini meri bilong Heli. Na taim Luk i stori long lain famili bilong Jisas, em i tok Jisas “i kamap man bilong graun,” long wanem, Maria em meri i karim em. (Rom 1:3) Olsem na Baibel i stori long tupela lain famili bilong Jisas.

Long taim bilong ol man i raitim Baibel, ol i yusim wanem kain laplap na kala?

Long bipo, ol man long Midel Is i yusim gras bilong ol sipsip, ol meme, na ol kamel long wokim ol laplap. Long dispela taim, planti man i wokim ol laplap long gras bilong animal, olsem na Baibel i stori planti long ol sipsip, ol man i katim gras bilong ol sipsip, na ol klos ol i wokim long gras bilong ol sipsip. (1 Samuel 25:2; 2 King 3:4; Jop 31:20) Lain Isip na ol Israel i planim ol mekpas gras na ol i yusim long wokim ol laplap. (Stat 41:42; Josua 2:⁠6) Ating ol Israel long taim bilong ol man i raitim Baibel i no bin planim koten, tasol Baibel i tok ol man long Persia i bin yusim koten. (Esta 1:​6, NW) Ol silk laplap i gat bikpela pe, olsem na ating ol bisnisman tasol long hap bilong Is i save baim ol silk laplap.—Revelesen 18:​11, 12.

Buk Jesus and His World i tok: “Ol wul i gat kain kain kala, olsem waitpela, braunpela na ol arapela kala.” Tasol sampela taim ol man i save penim ol wul. Wanpela pepol kala ol i yusim long penim ol wul i gat bikpela pe em ol i kisim long wanpela kain sel bilong solwara. Na tu, ol man i yusim ol kain kain gras na diwai, ol lip, ol rop bilong diwai, na ol binatang long wokim ol kala olsem ret, yelo, blu na blak.