Kisim Blesing Long Helpim Ol Man i Nidim Helpim

Planti man long olgeta hap bilong graun i nidim kaikai na haus. Sampela i laik bai ol gutpela samting i kamap long bihain. Hau bai ol wok yumi mekim bilong helpim ol i opim rot long God i ken orait long yumi na blesim yumi?

TOK OL SKRIPSA HOLI I MEKIM

“Man i mekim gutpela pasin long ol taranguman, em i larim Jehova i dinau long em, na em bai bekim gutpela pe long samting dispela man i mekim.” —PROVEP 19:17.

INSAIT BILONG DISPELA TOK HELPIM OL MAN I NIDIM HELPIM

Jisas i tok piksa long wanpela man em ol stilman i bin paitim em na stilim ol samting bilong em na lusim em bilong dai long rot. (Luk 10:29-37) Wanpela man i no save long dispela man i kisim bagarap i stop na helpim em. Em i mekim olsem maski em i bilong narapela lain.

Dispela man i givim marasin na mani samting long man i kisim bagarap, na tu, mekim isi bel bilong em na bel hevi i no daunim em.

Yumi kisim wanem skul long dispela tok piksa? Tok bilong Jisas i soim olsem yumi mas helpim ol narapela i nidim helpim sapos yumi inap. (Provep 14:31) Ol Skripsa Holi i skulim yumi olsem klostu nau God bai pinisim pasin bilong stap rabis na pen na hevi. Ating yumi laik save, God bai mekim dispela samting olsem wanem na long wanem taim? Neks atikol bai stori long ol blesing em Krieta bilong yu i gat pasin laikim i redim bilong yu.