Askim Bilong Ol Rida

Wanem taim Jisas i kamap Hetpris?

Yumi save olsem Jisas i kamap Hetpris taim em i kisim baptais long 29 C.E. Hau na yumi save long dispela? Taim Jisas i kisim baptais, em i redi long mekim “laik” bilong God, i olsem em i givim em yet olsem sakrifais long alta bilong God. (Gal. 1:4; Hib. 10:5-10) Dispela alta i stap kirap long taim Jisas i kisim baptais, na tu, tempel long sait bilong bilip i bin kirap long dispela taim—dispela tempel i makim pasin bilong mekim lotu i tru long Jehova, em pasin we pe bilong baim bek man i as bilong en. Dispela alta em bikpela samting long tempel long sait bilong bilip.—Mat. 3:16, 17; Hib. 5:4-6.

Long sait bilong bilip, i olsem tempel i kamap, olsem na i mas i gat wanpela hetpris. Bilong inapim dispela wok, God i anointim Jisas “long holi spirit na givim strong long em” long kamap hetpris. (Apo. 10:37, 38; Mak 1:9-11) Tasol hau bai yumi ken save tru olsem God i makim Jisas olsem Hetpris paslain long em i dai na kirap bek? Eksampel bilong Aron na ol hetpris husat i mekim wok bihain long em bai helpim yumi long kisim bekim bilong dispela askim.

Olsem Lo i tok, ol hetpris tasol inap go insait long Rum Holi Tru long haus lotu sel, na bihain, ol tasol i save go insait long Rum Holi Tru bilong tempel. I gat keten i hangamap namel na brukim Rum Holi na Rum Holi Tru. Hetpris i save opim keten na go insait long Rum Holi Tru long De Bilong Karamapim Sin. (Hib. 9:1-3, 6, 7) God i anointim Aron na ol narapela hetpris paslain long ol i go “insait long keten” bilong haus lotu sel, na olsem tasol, paslain long Jisas i dai, God i makim em olsem Hetpris bilong tempel long sait bilong bilip, olsem na em inap “go insait long keten, na dispela keten i olsem bodi bilong em yet,” na em inap kisim laip long heven. (Hib. 10:20) Long dispela risen, aposel Pol i tok Jisas i kam olsem “hetpris” na em i “go insait long dispela haus sel i bikpela na gutpela moa, em ol man i no bin wokim long han,” na em i go long “heven.”—Hib. 9:11, 24.

Nupela kontrak i kamap, na dispela kontrak i kirap long mekim wok bilong en. Yu ting ol i kamap long narapela narapela taim?

Dispela 2-pela samting i bin kamap long wankain taim. Wai na yumi inap tok olsem? Taim Jisas i go long heven na givim pe bilong laip bilong em i gutpela olgeta bilong helpim yumi, em i mekim fes step—em i strongim nupela kontrak. Na tu, ol dispela samting long fes step i opim rot na kontrak i kirap mekim wok bilong en. Wanem ol samting i stap insait long dispela fes step?

Fes, Jisas i kamap long ai bilong Jehova; neks, Jisas i givim pe bilong sakrifais bilong em long Jehova; na neks, Jehova i orait long pe bilong blut bilong Jisas we em i bin kapsaitim. Nupela kontrak i kirap mekim wok bilong en bihain stret long ol dispela 3-pela samting i kamap.

Baibel i no tokaut long wanem taim stret Jehova i orait long pe bilong sakrifais bilong Jisas. Olsem na yumi no inap kolim taim stret em nupela kontrak i kamap na i kirap mekim wok. Tasol yumi save olsem Jisas i go antap long heven 10-pela de paslain long Pentikos. (Apo. 1:3) Insait long dispela sotpela haptaim, Jisas i givim pe bilong sakrifais bilong em long Jehova, na Jehova i orait long en. (Hib. 9:12) Dispela i kamap ples klia long Pentikos. (Apo. 2:1-4, 32, 33) Nupela kontrak i kamap na i kirap mekim wok.