Ol Bisket Bilong Ol Dok Bilong Mi
NICK i save stap long Oregon long Amerika, em i tok: “Long kirap bilong 2014, mi stat long kisim tupela dok bilong mi na mipela i save wokabaut long namel bilong taun, em ples we mi stap long en. Planti taim ol Witnes i save sanap long dispela hap bilong taun wantaim ol litresa kat bilong ol. Ol i bilas gut na ol i save smail na gritim olgeta manmeri i wokabaut i go i kam.
“Ol Witnes i mekim gutpela pasin long ol manmeri, na tu, long ol dok bilong mi. Wanpela taim Elaine, husat i sanap klostu long litresa kat, i givim sampela bisket long tupela dok bilong mi. Bihain long dispela, taim mipela i save wokabaut i kam klostu long kat bilong ol Witnes, ol dok bilong mi i save laik tru long go long ol Witnes bilong kisim ol bisket.
“Sampela mun i kam na i go. Ol dok i save enjoim stret ol dispela bikset, na mi save amamas long toktok wantaim ol Witnes inap liklik haptaim. Tasol mi no laik toktok longpela taim wantaim ol. Mi gat winim 70 krismas na mi gat tupela tingting long ol bilip bilong ol Witnes. Mi bel hevi long planti lotu Kristen, olsem na mi save stadi long Baibel long mi yet.
“Namel long dispela haptaim, mi lukim ol narapela Witnes long ol narapela hap bilong taun na ol tu i sanap wantaim ol litresa kat bilong ol. Ol i save mekim gutpela pasin tu. Oltaim ol i yusim Baibel long bekim ol askim bilong mi na dispela i kirapim mi long trastim ol moa.
“Wanpela taim Elaine i askim mi, ‘Yu ting ol animal em presen i kam long God?’ Mi tok, ‘Yes, mi bilip tru olsem!’ Elaine i soim mi tok bilong Aisaia 11:6-9. Kirap long dispela taim, mi laik kisim sampela save moa long tok bilong Baibel, tasol mi no laik kisim wanpela pablikesen bilong ol Witnes long ritim.
“Long ol de bihain, mi amamas tru long stori gut wantaim Elaine na man bilong em, Brent, maski mipela i stori inap liklik haptaim tasol. Ol i kirapim mi long ritim Buk Matyu i go long Buk Aposel bilong mi ken save gut long samting ol Kristen i mas mekim. So mi mekim olsem. Bihain liklik, mi tok orait long Brent na Elaine i ken stadi wantaim mi long Baibel. Dispela em long namel bilong yia 2016.
“Mi luk fowed long ol Baibel stadi bilong mi long olgeta wik na long ol miting long Haus Kingdom. Mi pilim olsem mi kisim blesing na mi amamas long lainim tok i tru bilong Baibel. Winim 1-pela yia bihain, mi baptais na kamap wanpela Witnes. Nau mi gat 79 krismas na mi tenkyu tru olsem mi painim lotu i tru. Jehova i blesim mi taim em i larim mi i stap insait long bikpela lain famili bilong em long olgeta hap bilong graun.”