3 | Hau Ol Eksampel Long Baibel Inap Helpim Yu

BAIBEL I STORI LONG . . . Ol bilipman na meri em ol i gat ‘ol wankain filings olsem yumi.’—JEMS 5:17.

Dispela Skripsa i Makim Wanem?

Baibel i pulap long ol stori tru bilong ol man na meri em ol i gat kain kain filings. Taim yumi ritim stori bilong ol, ating yumi inap lukim wanpela i gat wankain filings olsem bilong yumi.

Rot Dispela Skripsa Inap Helpim Yumi

Yumi olgeta i laik bai ol arapela i kliagut long filings bilong yumi. Moa yet taim yumi karim hevi bilong sik bilong tingting. Taim yumi ritim stori bilong ol man long Baibel, yumi inap kisim save olsem ol tu i gat ol wankain tingting na filings olsem bilong yumi. Dispela inap helpim yumi long luksave olsem i no yumi tasol i gat kain hevi olsem, na yumi no pilim olsem yumi stap wanpis taim yumi karim hevi bilong tingting planti na wari na tingting i no stap isi.

Baibel i gat tok bilong planti manmeri em ol i pilim olsem i no gat wanpela inap helpim ol. Sampela taim yu pilim olsem, ‘Mi no inap moa’? Moses, Elaija na Devit, ol tu i bin pilim olsem.—Namba 11:14; 1 King 19:4; Buk Song 55:4.
Baibel i tokim yumi long wanpela meri, nem bilong em Hana, em i bin “pilim nogut tru” bikos em i no gat pikinini, na narapela meri bilong man bilong em i save mekim ol tok bilas i daunim em tru.—1 Samuel 1:6, 10.
Baibel i tokim yumi long wanpela man, nem bilong em Jop, em yumi inap kliagut long filings bilong em. Maski em i gat strongpela bilip, em i karim hevi bilong bel na tingting i bagarap tru na em i tok: “Mi les tru long laip bilong mi; mi no laik i stap laip moa.”—Jop 7:16.

Taim yumi kisim save long hau ol dispela man em Baibel i stori long ol i bin karim hevi bilong tingting i no stret em ol i bin holim, yumi tu inap kisim strong yumi nidim bilong karim hevi bilong yumi.

Rot Baibel i Helpim Yumi Kevin

Ol Samting Em Sik Bilong Mi Long Tingting i Save Senis Senis i Mekim Long Mi

“Taim mi gat klostu 50 krismas, dokta i tok mi gat sik bilong tingting we i save mekim na filings bilong mi i save senis senis (bipolar disorder). Sampela taim mi pilim olsem mi inap stretim wanem wanem hevi i painim mi. Tasol sampela taim mi pilim olsem mi no laik stap laip moa.”

Rot Baibel i Helpim Mi

“Wanpela man long Baibel em mi inap kliagut long filings bilong em, em aposel Pita. Em i mekim ol popaia we i mekim na em i pilim olsem em i no gutpela. Tasol em i no holim dispela tingting i stap, nogat, Pita i lusim haptaim long stap wantaim ol pren bilong em husat i tingim em tru. Long ol de we sik bilong mi i go bikpela, ol tingting i no stret mi holim i save daunim mi tru na mekim mi pilim olsem mi no gutpela. Olsem Pita, mi lain long lusim haptaim long stap wantaim ol pren bilong mi, em ol i laik helpim mi na bai mi no ken givap.

“Narapela man long Baibel em stori bilong em i mekim isi bel bilong mi, em King Devit. Planti taim em i bel hevi long ol samting i kamap long laip bilong em na em i rigret long ol popaia em i bin mekim long bipo. Mi kliagut long filings bilong em bikos sampela taim mi save mekim ol samting o mekim ol tok we bihain mi rigret long en. Tok bilong Devit long Buk Song 51 i mekim isi bel bilong mi. Long ves 3, Devit i tok: ‘Mi save mi mekim rong pinis, na mi no inap lusim tingting long sin bilong mi.’ Dispela i kamapim klia hau mi save pilim taim sik bilong mi i daunim mi tru, bikos long kain taim olsem mi hatwok long holim stretpela tingting long mi yet. Tasol mi inap pilim tu tok Devit i mekim long ves 10: ‘Wokim nupela klinpela bel insait long mi. Na putim nupela tingting insait long mi na bai mi ken sanap strong.’ Mi tu i save mekim wankain tok long God long helpim mi long kisim stretpela tingting long mi yet. Na tok bilong ves 17 i mekim isi bel bilong mi. Em i tok: ‘O God, yu no save givim baksait long man em bel bilong em i bagarap na em i pilim nogut tru long sin em i bin mekim.’ Tok bilong dispela ves i mekim gut bel bilong mi olsem God i laikim mi.

“Taim mi tingim tingim stori bilong ol dispela man long Baibel na ol samting God i givim mi long nau, dispela i strongim mi long bilip na wet long ol gutpela samting bai kamap bihain. Mi bilip tru olsem ol tok promis bilong Baibel bai kamap tru na dispela i helpim mi long karim hevi bilong sik bilong mi na mi no givap.”