2 | ‘Rait Holi i Mekim Isi Bel Bilong Yumi’

BAIBEL I TOK: “Olgeta tok ol i bin raitim long bipo, ol i bin raitim bilong skulim yumi. Dispela tok i helpim yumi long sanap strong na i mekim isi bel bilong yumi long rot bilong Rait Holi. Na dispela i strongim yumi long wetim gutpela samting.”—Rom 15:4.

Dispela Skripsa i Makim Wanem?

Baibel i strongim yumi long rot bilong ol gutpela tok i mekim isi bel bilong yumi na dispela i helpim yumi taim yumi pilim olsem yumi no gutpela tumas. Na tu, Baibel i tokim yumi olsem pen na hevi yumi karim long tingting i no stap isi, klostu nau bai pinis.

Rot Dispela Skripsa Inap Helpim Yumi

Yumi olgeta i save pilim bel hevi o i no amamas long sampela taim; tasol long ol lain i gat sik dipresen o wari na tingting planti, dispela filing i save stap olgeta taim. Olsem wanem Baibel inap helpim yumi?

Baibel i gat planti gutpela tok we inap helpim yumi long rausim ol tingting olsem yumi no gutpela tumas na kisim gutpela tingting. (Filipai 4:8) Ol tok bilong en inap mekim isi bel na tingting bilong yumi na helpim yumi long kontrolim ol filings bilong yumi.—Buk Song 94:18, 19.
Baibel inap helpim yumi long daunim dispela tingting olsem yumi no gutpela.—Luk 12:6, 7.
I gat planti tok long Baibel i strongim yumi olsem yumi no stap wanpis, nogat. God em Krieta bilong yumi, em i kliagut long ol filings bilong yumi.—Buk Song 34:18; 1 Jon 3:19, 20.
Baibel i tok promis olsem God bai rausim olgeta samting nogut long tingting bilong yumi we i save mekim yumi bel hevi. (Aisaia 65:17; Revelesen 21:4) Taim bel na tingting bilong yumi i no stap isi na yumi pret, dispela tok promis inap strongim yumi long karim dispela hevi na yumi no givap.

Rot Baibel i Helpim Yumi Jessica

Ol Samting Sik Dispresen i Mekim Long Mi

“Taim mi gat 25 krismas, wantu mi no inap mekim ol nomal samting mi save mekim, na dokta i tok mi gat sik dipresen. Ol memori bilong ol samting nogut i bin painim mi long bipo i save kamap wantu long tingting na mi no inap kontrolim, na dispela i save givim hevi long mi. Ol dokta i helpim mi long kliagut olsem sik dipresen bilong mi i kamap bikos long tingting mi kisim olsem mi no gutpela, na dispela i olsem bikos long ol samting nogut i bin painim mi long bipo. Na tu, mi kisim marasin i stret long sik bilong mi, na mi mas toktok wantaim wanpela dokta bilong helpim mi long luksave long sik bilong mi na em i helpim mi long kisim stretpela tingting long mi yet.”

Rot Baibel i Helpim Mi

“Taim sik bilong mi i go bikpela, mi save pret nogut tru, tingting planti tru, na mi no inap slip. Planti taim long nait mi save pilim nogut tru bikos kain kain tingting i save kamap long het na mi no inap bosim dispela. Olsem Buk Song 94:19 i tok, God inap strongim na mekim isi bel na tingting bilong yumi taim kain kain tingting i pulap long het bilong yumi. So mi putim Baibel bilong mi na wanpela notbuk i gat ol skripsa bilong strongim mi i stap klostu long bet bilong mi. Taim mi hatwok long slip, mi save ritim sampela ves bilong Baibel na larim tok bilong God i mekim isi bel bilong mi.

“Baibel i strongim mi long rausim ol tingting kranki we i no stret wantaim save yumi bin kisim long pasin bilong God. Long pastaim, mi bilip olsem mi no gutpela na i no gat wanpela i laikim mi. Tasol mi kisim save olsem kain tingting olsem i no stret bikos Baibel i tok God em Papa i gat pasin laikim na pasin sori na em i save tingim tru yumi wan wan. Isi isi mi bosim tingting bilong mi na mi no larim tingting i bosim mi. Mi lain long tingim mi yet wankain olsem God i save tingim mi. Dispela em nambawan rot i helpim mi long daunim tingting i no stret mi bin gat olsem mi no gutpela.

“Mi wet long lukim dispela taim we ol memori bilong ol samting nogut i bin painim mi na ol tingting i no stret bai no kamap moa long tingting bilong mi. Mi save olsem long bihain bai i no gat moa sik bilong tingting, dispela i helpim mi long karim hevi bilong sik bilong tingting long nau, na luk fowed long taim bihain we sik dipresen bilong mi bai pinis.