1 | Beten ‘Putim Olgeta Hevi Long Han Bilong Em’

BAIBEL I TOK: “God i save wari long yupela, olsem na yupela i mas putim olgeta hevi bilong yupela long han bilong em.”—1 PITA 5:7.

Dispela Skripsa i Makim Wanem?

Jehova God i tokim yumi long beten long em na kamapim olgeta wari i stap long tingting na bel bilong yumi long em. (Buk Song 55:22) Maski yumi gat bikpela o liklik hevi, yumi ken beten na tokim God long en. Sapos em i bikpela samting long yumi, em i bikpela samting tu long Jehova. Beten em nambawan rot bilong helpim tingting bilong yumi i stap isi.—Filipai 4:6, 7.

Rot Dispela Skripsa i Helpim Yumi

Taim yumi gat sik bilong tingting, ating yumi pilim olsem yumi stap wanpis tru. Ol narapela i no inap kliagut long ol samting yu pilim. (Provep 14:10) Tasol taim yumi beten na tokim God long ol filings bilong yumi, em bai putim gut yau na kliagut long ol samting yumi pilim. Jehova i lukim yumi na em i save long olgeta pen na hevi yumi karim, na em i laik bai yumi beten long em na tokim em long olgeta hevi bilong yumi.—2 Stori 6:29, 30.

Taim yumi toktok wantaim Jehova long long rot bilong beten, dispela i strongim yumi olsem em i save tingim tru yumi. Yumi inap pilim wankain olsem man bilong raitim song, em i beten olsem: “Yu lukim pinis ol pen na hevi mi karim; na yu save long bikpela bel hevi mi gat.” (Buk Song 31:7) Taim yumi save olsem Jehova i lukim ol hevi yumi karim, dispela i helpim yumi long strong yet long karim ol hevi long dispela taim nogut. Tasol em i no lukim tasol ol hevi bilong yumi, nogat. Em i winim ol narapela bikos em i kliagut long ol hevi yumi karim na helpim yumi long kisim bel isi na strongim yumi long rot bilong Baibel.

Rot Baibel i Helpim Yumi Julian

Ol Samting Pasin Bilong Wari na Tingting Planti i Mekim Long Mi

“Mi save wari na tinging planti na kisim kain kain tingting we i mekim na mi no stap isi (obsessive-compulsive disorder). Pasin bilong wari na tingting planti i save kamap long taim mi no tingting long en. Maski mi stap orait, wantu i no gat as na tingting bilong mi i senis na mi tingting planti na wari tru. Moa yet taim mi stap wantaim ol narapela manmeri, tingting bilong mi i no stap isi. Mi wari tumas long ol i gat wanem tingting long mi.

“Ol pren bilong mi husat i save long sik bilong mi, ol i save helpim mi. Mi mas tok stret olsem sampela taim ol i mekim ol tok we i no helpim mi. Tasol mi tenkyu olsem ol i traim bes long helpim mi.

“Sampela taim sik bilong mi long tingting planti na wari, na sik bilong tingting (obsessive-compulsive disorder) i mekim na mi hatwok long beten. Mi mas bosim gut tingting na bai mi inap tingting gut na toktok wantaim Jehova taim mi beten. Tingting bilong mi i save senis senis wantu na planti taim dispela i mekim na mi paul long toktok. Taim mi hatwok long kontrolim tingting bilong mi, em hatwok long tokim Jehova long ol tingting na filings bilong mi.”

Rot Baibel i Helpim Mi

“Long stadi bilong mi long Baibel, mi kisim save olsem i no gat wok long mekim longpela beten o kolim kain kain tok bilong bilasim beten na bai God i orait long en. Sampela taim mi hatwok long kamapim ol filings bilong mi, mi save beten tasol olsem: ‘Jehova, plis helpim mi.’ Maski i olsem, mi pilim olsem Jehova i kligut long mi na givim mi samting mi nidim long dispela taim. Na tu, mi go kisim helpim long dokta long dispela sik. Mi amamas long tok olsem dispela tupela samting i helpim mi na sik bilong mi i wok long kamap orait liklik. Maski mi mas taitim bun long askim Papa bilong mi long heven long helpim mi, mi mekim bikos mi save em i laikim mi na em i laik helpim mi.”