Yu Save Long Dispela?
Wai na Baibel i kolim ol wankain tok gen na gen?
SAMPELA taim ol man bilong raitim Baibel i save kolim gen na gen wanpela hap tok na ol i yusim ol wankain tok. Skelim 3-pela samting we inap kirapim ol long mekim olsem:
Haptaim ol i bin raitim. Long taim bilong ol Israel bilong bipo, planti manmeri i no gat ol kopi bilong Lo. Planti taim lain Israel i save harim ol man i ritim tok bilong Lo taim ol i bung wantaim long haus lotu sel. (Lo 31:10-12) Ol i save sanap inap sampela aua namel long bikpela lain manmeri bilong harim ol tok ol i ritim, olsem na sampela samting inap pulim nabaut tingting bilong ol. (Neh. 8:2, 3, 7) Long kain taim olsem, pasin bilong kolim gen na gen ol bikpela tok inap helpim ol manmeri long tingim ol tok bilong ol skripsa na bihainim. Moa yet, pasin bilong kolim gen na gen sampela tok inap helpim ol long tingim ol liklik liklik samting long ol lo Jehova i givim long ol.—Wkp. 18:4-22; Lo 5:1.
Wei ol i raitim. Inap olsem 10 pesen bilong sampela hap bilong Baibel em ol song, olsem Buk Song, Song Bilong Solomon, na Krai. Sampela taim ol song i kamapim ol wankain tok em ol i kolim gen na gen, dispela i kamapim klia bikpela tok bilong song na i helpim ol manmeri i putim yau long tingim gut ol tok. Olsem, lukim tok i stap long Buk Song 115:9-11, em i tok: “Yupela Israel, yupela i mas trastim Jehova, em i olsem hap plang bilong yupela long pait na em i save helpim yupela. Yupela ol lain tumbuna pikinini bilong Aron, yupela i mas trastim Jehova, em i olsem hap plang bilong yupela long pait na em i save helpim yupela. Yupela ol manmeri i save pret long Jehova, yupela i mas trastim Jehova, em i olsem hap plang bilong yupela long pait na em i save helpim yupela.” Taim ol singa i kolim gen na gen ol dispela wankain tok, dispela inap helpim ol long tingim ol dispela gutpela tok long bel na tingting bilong ol.
Bilong kamapim klia ol bikpela samting. Sampela taim ol man bilong raitim Baibel i kolim gen na gen ol bikpela tok. Olsem, taim Jehova i tokim ol Israel olsem ol i no ken kaikai blut, em i tokim Moses long kolim gen na gen risen na ol i no ken mekim olsem. God i laik kamapim klia olsem laip bilong ol man na animal i stap long blut—blut i makim laip. (Wkp. 17:11, 14) Bihain, taim ol aposel na ol elda long Jerusalem i raitim pas na ol i kolim ol samting em ol Kristen i mas abrusim bilong stap gut long God, ol i kamapim klia gen olsem ol i mas sakim blut.—Apo. 15:20, 29.
Jehova i larim ol man i raitim Baibel i kolim ol wankain tok gen na gen, tasol dispela i no makim olsem em i mas kamap pasin bilong yumi long kolim ol wankain tok bilong Baibel gen na gen, nogat. Olsem, Jisas i tok: “Taim yupela i beten i stap, no ken kolim ol wankain tok gen na gen.” (Mat. 6:7) Na em i kamapim klia ol bikpela samting em yumi ken beten long en we i stret wantaim laik bilong God. (Mat. 6:9-13) So yumi laik abrusim pasin bilong kolim ol wankain tok gen na gen long ol beten bilong yumi, tasol yumi ken beten long ol wankain topik gen na gen.—Mat. 7:7-11.
I gat gutpela risen na Baibel i kolim ol wankain tok gen na gen. Dispela em wanpela bilong planti rot em Nambawan Bikpela Tisa bilong yumi i skulim yumi long hau yumi ken helpim yumi yet.—Ais. 48:17, 18.