Nhlavutelo Eka Yohane

1 Nhlavutelo+ ya Yesu Kreste, leyi a yi nyikiweke hi Xikwembu,+ leswaku a komba mahlonga+ yakwe swilo leswi faneleke ku endleka hi ku hatlisa.+ Kutani u rhume ntsumi+ yakwe, a yi nyikela yi ri swikombiso+ eka hlonga ra yena Yohane,+ 2 loyi a nyikeleke vumbhoni malunghana ni rito leri Xikwembu xi ri humeseke+ ni le ka vumbhoni lebyi Yesu Kreste a byi nyikeleke,+ ku nga eka swilo hinkwaswo leswi a swi voneke. 3 Wa tsaka+ loyi a hlayaka swi twakala+ ni lava twaka marito ya vuprofeta+ lebyi, kutani va hlayisa swilo leswi tsariweke eka byona;+ hikuva nkarhi lowu vekiweke wu kusuhi.+

4 Yohane, emavandlheni+ ya nkombo lama nge mugangeni wa Asiya:

Onge mi nga va ni musa lowu nga faneriwiki ni ku rhula, leswi humaka eka “Loyi a nga kona ni loyi a a ri kona ni loyi a taka,”+ ni leswi humaka emimoyeni+ ya nkombo leyi nga emahlweni ka xiluvelo xa yena, 5 ni le ka Yesu Kreste, “Mbhoni yo Tshembeka,”+ “Mativula eka lava feke,”+ ni “Mufumi wa tihosi ta misava.”+

Eka yena loyi a hi rhandzaka+ naswona a hi ntshunxeke eswidyohweni swa hina hi ngati yakwe+— 6 loyi a hi endleke mfumo+ wa vaprista+ eka Xikwembu tlhelo Tata wa yena—​ina, ku vangama ni matimba a swi ve eka yena hi masiku.+ Amen.

7 Maswivo! Wa ta hi mapapa,+ naswona tihlo rin’wana ni rin’wana ri ta n’wi vona,+ swin’we ni lava va n’wi tlhaveke;+ kutani tinyimba hinkwato ta misava ti ta tiba hi gome hikwalaho ka yena.+ Ina, Amen.

8 “Hi mina Alfa na Omega,”+ ku vula Yehovha Xikwembu, “Loyi a nga kona ni loyi a a ri kona ni loyi a taka,+ wa Matimba Hinkwawo.”+

9 Mina Yohane, makwenu ni loyi a nga swin’we na n’wina enhlomulweni,+ emfun’weni+ ni le ku tiyiseleni+ swin’we na Yesu,+ ndzi ve exihlengeni lexi vuriwaka Patmosi hikwalaho ka ku vulavula hi Xikwembu ni ku nyikela vumbhoni mayelana na Yesu.+ 10 Ndzi ve+ esikwini ra Hosi+ hi ku huhuteriwa,+ kutani ndzi twa rito+ ra matimba endzhaku ka mina ri fana ni ra mhalamhala, 11 ri ku: “Leswi u swi vonaka swi tsale+ eka buku-nsongwa kutani u yi rhumela emavandlheni ya nkombo,+ le Efesa+ ni le Smirna+ ni le Pergamo+ ni le Tiyatira+ ni le Sarda+ ni le Filadelfiya+ ni le Lawodikiya.”+

12 Hiloko ndzi hundzuluka leswaku ndzi vona rito leri a ri vulavula na mina, loko ndzi hundzulukile, ndzi vona swo tlhoma timboni swa nsuku swa nkombo,+ 13 naswona exikarhi ka swo tlhoma timboni a ku ri ni un’wana wo fana ni n’wana wa munhu,+ a ambale nguvu leyi fikaka ehansi emilengeni, a tikhame xifuva hi vamba ra nsuku. 14 Ku tlula kwalaho, nhloko ya yena ni misisi ya yena a swi basile+ wonge i voya byo basa, wonge i gamboko, naswona mahlo ya yena wonge i langavi leri pfurhaka;+ 15 milenge ya yena a yi fana ni koporo+ yo tenga loko yi hisiwa ekheleni ra ndzilo; rito+ ra yena a ri kotisa mpfumawulo wa mati yo tala. 16 Kutani evokweni ra yena ra xinene a a tamele tinyeleti ta nkombo,+ enon’wini wa yena a ku huma banga ro leha ro kariha,+ leri tsemaka matlhelo mambirhi, nghohe yakwe a yi kotisa dyambu loko ri voninga hi matimba ya rona.+ 17 Kuteloko ndzi n’wi vona, ndzi wela emilengeni ya yena onge ndzi lo fa.

Hiloko a veka voko ra yena ra xinene ehenhla ka mina, a ku: “U nga chavi.+ Ndzi wo Sungula+ ni wo Hetelela,+ 18 ni loyi a hanyaka;+ a ndzi file,+ kambe, waswivo, ndza hanya hi masiku ni masiku,+ naswona ndzi ni swilotlelo swa rifu+ ni swa Hayidesi.+ 19 Hikokwalaho, tsala swilo leswi u swi voneke, ni swilo leswi endlekaka ni swilo leswi nga ta endleka endzhaku ka leswi.+ 20 Loko ku ri xihundla xo kwetsima xa tinyeleti ta nkombo+ leti u ti voneke ti ri evokweni ra mina ra xinene, ni xa swo tlhoma timboni swa nsuku swa nkombo:+ Tinyeleti ta nkombo ti vula tintsumi ta mavandlha ya nkombo, kasi swo tlhoma timbhoni swa nkombo swi vula mavandlha ya nkombo.+

2 “Tsalela ntsumi+ ya vandlha ra Efesa,+ u ku: Loyi a tameleke tinyeleti ta nkombo+ evokweni rakwe ra xinene, loyi a fambaka exikarhi ka swo tlhoma timboni swa nsuku swa nkombo,+ u vula leswi, 2 ‘Ndzi tiva swiendlo+ swa wena, ni ntirho ni ku tiyisela ka wena, ni leswaku a wu swi koti ku tiyiselela vanhu vo biha, naswona u ringa+ lava tivulaka vaapostola,+ kambe va nga ri vona, kutani u va kume va ri vahembi. 3 Nakambe u kombisa ku tiyisela,+ u kondzelerile hi mhaka ya vito+ ra mina naswona a wu karhalanga.+ 4 Nilokoswiritano, ndzi ni mhaka na wena, ya leswaku u lahle rirhandzu leri a wu ri na rona eku sunguleni.+

5 “ ‘Hikokwalaho, tsundzuka lomu u weke kona, kutani u hundzuka,+ u endla swiendlo swo sungula. Loko u nga endli tano, ndza ta eka wena,+ naswona ndzi ta susa xo tlhoma rivoni+ xa wena endhawini ya xona, handle ka loko wo hundzuka. 6 Kambe, leswi u nga na swona hileswaku u venga+ swiendlo swa mpambukwa wa Nikolasi,+ lowu na mina ndzi wu vengaka. 7 Loyi a nga ni ndleve a a yingise leswi moya+ wu swi byelaka mavandlha: Loyi a hlulaka+ ndzi ta n’wi pfumelela ku dya emurhini wa vutomi,+ lowu nga eparadeyisini ya Xikwembu.’

8 “Kutani tsalela ntsumi+ ya vandlha ra Smirna, u ku: ‘Lowo Sungula ni wo Hetelela,’+ loyi a a file ivi a hanya nakambe,+ u ri, 9 ‘Ndzi tiva nhlomulo ni vusiwana bya wena—kambe u fuwile+—ni swisandzu leswi tisiwaka hi lava vulaka leswaku vona i Vayuda,+ kasi a hi vona, kambe vona i sinagoga ya Sathana.+ 10 Mi nga chavi swilo leswi mi nga ta xaniseka+ ha swona ku nga ri khale. Maswivo! Diyavulosi+ u ta tama a hoxa van’wana va n’wina ekhotsweni leswaku mi ringiwa+ hi ku helela, ni leswaku mi va ni nhlomulo+ ku ringana masiku ya khume. Tikombiseni mi tshembekile ku ya fikela eku feni,+ kutani ndzi ta mi nyika harhi ya vutomi.+ 11 Loyi a nga ni ndleve+ a a yingise leswi moya+ wu swi byelaka mavandlha: Loyi a hlulaka+ a nge vavisiwi nikatsongo hi rifu ra vumbirhi.’+

12 “Kutani tsalela ntsumi ya vandlha ra Pergamo, u ku: Loyi a nga ni banga ro kariha ro leha, leri tsemaka matlhelo mambirhi,+ u ri, 13 ‘Ndza ku tiva laha u tshamaka kona, hileswaku, laha xiluvelo xa Sathana xi nga kona; kambe u tama u khoma vito+ ra mina swi tiya, naswona ripfumelo leri u nga na rona eka mina+ a wu ri landzulanga hambi ku ri emasikwini ya Antipasi, mbhoni ya mina,+ lowo tshembeka, loyi a dlayiweke+ kwahalano ka n’wina, laha Sathana a tshamaka kona.

14 “ ‘Nilokoswiritano, ndzi ni swilo switsongo na wena, leswaku kwalaho u ni lava khomeleleke swi tiya edyondzweni ya Balama,+ loyi a nga dyondzisa Balaka+ ku veka xikhunguvanyiso emahlweni ka vana va Israyele, ku dya swilo leswi nyikeriweke swifaniso swa hava ni ku endla vumbhisa.+ 15 Na wena, hilaha ku fanaka u ni lava khomeleleke swi tiya edyondzweni ya mpambukwa wa Nikolasi.+ 16 Hikokwalaho hundzuka.+ Loko u nga endli tano, ndza ta eka wena hi ku hatlisa, kutani ndzi ta lwa+ na vona hi banga ro leha ra nomu wa mina.+

17 “ ‘Loyi a nga ni ndleve a a yingise leswi moya wu swi byelaka mavandlha:+ Loyi a hlulaka+ ndzi ta n’wi nusela manna+ leyi fihliweke, naswona ndzi ta n’wi nyika ribye ro basa, eribyeni rero ku tsariwe vito+ lerintshwa leri nga tiviwiki hi munhu handle ka loyi a ri amukelaka.’+

18 “Kutani tsalela ntsumi ya vandlha ra Tiyatira,+ u ku: N’wana+ wa Xikwembu, loyi mahlo yakwe ma fanaka ni langavi leri pfurhaka,+ ni loyi milenge yakwe yi fanaka ni koporo yo tenga,+ u ri, 19 ‘Ndzi tiva swiendlo swa wena, ni rirhandzu+ ni ripfumelo ni vutirheli ni ku tiyisela ka wena, ni leswaku swiendlo+ swa wena swa sweswi swi tlula leswo sungula.+

20 “ ‘Nilokoswiritano, ndzi ni mhaka na wena, ya leswaku u tshika wansati yoloye Yezabele,+ loyi a tivulaka muprofeta wa xisati naswona u dyondzisa+ mahlonga+ ya mina ni ku ma hambukisa ma endla vumbhisa+ ni ku dya swilo leswi nyikeriwaka swifaniso swa hava.+ 21 Ndzi n’wi nyike nkarhi wo hundzuka,+ kambe a nga swi rhandzi ku hundzuka eka vumbhisa+ byakwe. 22 Waswivo, ku nga ri khale ndzi ta n’wi tlatlalata esangwini ra vavabyi, ni lava endlaka vuoswi na yena ndzi va tlatlalata enhlomulweni lowukulu, handle ka loko vo hundzuka eswiendlweni swa yena. 23 Naswona vana vakwe ndzi ta va dlaya hi ntungu lowu dlayaka, leswaku mavandlha hinkwawo ma ta tiva leswaku hi mina loyi a lavisisaka tinso ni timbilu, naswona ndzi ta mi nyika ha un’we-un’we hi ku ya hi swiendlo+ swa n’wina.

24 “ ‘Hambiswiritano, n’wina hinkwenu lava nga eTiyatira, hinkwenu lava nga riki na yona dyondzo leyi, n’wina lava nga swi tivangiki “swilo leswi enteke swa Sathana,”+ hilaha va vulaka hakona, ndza mi byela, ndzi ri: A ndza ha mi rhwexi ndzhwalo+ wun’wanyana. 25 Kambe, leswi mi nga na swona+ swi khomeni swi tiya kukondza ndzi fika. 26 Kutani loyi a hlulaka naswona a hlayisaka swiendlo swa mina ku fika emakumu+ ndzi ta n’wi nyika vulawuri ehenhla ka matiko,+ 27 vulawuri byo fana ni lebyi ndzi byi amukeleke eka Tatana, u ta risa vanhu hi nhonga ya nsimbi+ lerova va ta fayeleriwa va va swipetlu ku fana ni xibya xa vumba,+ 28 kutani ndzi ta n’wi nyika nyeleti ya nimixo.+ 29 Loyi a nga ni ndleve a a yingise leswi moya+ wu swi byelaka mavandlha.’+

3 “Kutani eka ntsumi+ ya vandlha ra Sarda tsala u ku: Loyi a nga ni mimoya+ ya nkombo ya Xikwembu ni tinyeleti+ ta nkombo, u ri, ‘Ndzi tiva swiendlo swa wena, leswaku u ni vito ra leswaku wa hanya, kasi u file.+ 2 Hiteka,+ u tiyisa+ swilo leswi saleke leswi a swi lunghele ku fa, hikuva ndzi kume swiendlo swa wena swi nga endliwi hi ku helela emahlweni ka Xikwembu+ xa mina. 3 Hikokwalaho, hambeta u anakanya leswi u swi amukeleke+ ni leswi u swi tweke, u tama u swi hlayisa,+ naswona u hundzuka.+ Hakunene, loko u nga pfuki,+ ndzi ta ta ku fana ni khamba,+ u nge wu tivi nikatsongo nkarhi lowu ndzi taka ha wona.+

4 “ ‘Nilokoswiritano, eSarda u na wona mavito+ ma nga ri mangani lama nga nyamisangiki+ tinguvu ta wona ta le handle, naswona ma ta famba na mina ma ambale leto basa,+ hikuva swa ma fanela.+ 5 Loyi a nga ta hlula,+ na yena u ta ambexiwa tinguvu ta le handle+ to basa; naswona a ndzi nge ri hlanguli nikatsongo vito ra yena ebukwini ya vutomi,+ kambe ndzi ta bumabumela vito ra yena emahlweni ka Tata+ wa mina ni le mahlweni ka tintsumi.+ 6 Loyi a nga ni ndleve a a yingise leswi moya+ wu swi byelaka mavandlha.’

7 “Kutani eka ntsumi+ ya vandlha ra Filadelfiya tsala u ku: Loyi a kwetsimaka,+ loyi a nga ni ntiyiso,+ loyi a nga ni xilotlelo xa Davhida,+ loyi a pfulaka lerova ku nga pfali munhu, loyi a pfalaka lerova ku nga pfuli munhu, u ri, 8 ‘Ndzi tiva swiendlo+ swa wena—waswivo, emahlweni ka wena ndzi veke nyangwa+ leyi pfulekeke, leyi ku nga riki na munhu la nga yi pfalaka—leswaku u ni matimba lamatsongo, naswona u hlayise rito ra mina, a wu tiendlanga la nga tshembekangiki evitweni+ ra mina. 9 Waswivo, lava va sinagoga ya Sathana lava tivulaka Vayuda,+ kasi a hi vona, vo hemba,+ ndzi ta va sindzisa—waswivo, ndzi ta va endla va ta va fika va nkhinsama+ emahlweni ka milenge ya wena ni ku va endla va tiva leswaku ndzi lo ku rhandza. 10 Leswi u hlayiseke rito leri yelanaka ni ku tiyisela+ ka mina, na mina ndzi ta ku hlayisa+ enkarhini wa ndzingo, lowu nga ta wela misava hinkwayo leyi akiweke, ku ringa lava tshamaka emisaveni.+ 11 Ndza ta hi ku hatlisa.+ Tama u khoma swi tiya leswi u nga na swona,+ leswaku harhi+ ya wena yi nga tekiwi hi munhu.

12 “ ‘Loyi a hlulaka—ndzi ta n’wi endla phuphu+ etempeleni+ ya Xikwembu+ xa mina, a nge humi nikatsongo eka yona naswona eka yena ndzi ta tsala vito ra Xikwembu xa mina ni vito ra muti wa Xikwembu xa mina, Yerusalema+ lontshwa la xikaka hi le tilweni eka Xikwembu xa mina, ni vito ra mina lerintshwa.+ 13 Loyi a nga ni ndleve a a yingise leswi moya+ wu swi byelaka mavandlha.’

14 “Naswona eka ntsumi ya vandlha ra Lawodikiya+ tsala u ku: Amen,+ mbhoni+ yo tshembeka+ ni ya ntiyiso,+ masungulo ya ntumbuluko wa Xikwembu,+ u ri, 15 ‘Ndzi tiva swiendlo swa wena, leswaku a wu titimeli naswona a wu hisi. Ndzi navela onge u ngo titimela kumbe u hisa. 16 Leswi u kufumelaka kambe u nga hisiki+ naswona u nga titimeliki,+ ndzi ta ku hlanta enon’wini wa mina. 17 Leswi u nge: “Ndzi fuwile,+ ndzi kume rifuwo naswona a ndza ha lavi nchumu nikatsongo,” kasi a wu tivi leswaku u dyisa mbitsi ni ku twisa vusiwana ni leswaku u xisiwana, u fe mahlo+ naswona u swerile, 18 ndzi ku tsundzuxa ku xava nsuku+ lowu tengisiweke hi ndzilo eka mina, leswaku u ta fuwa, ni tinguvu to basa ta le handle leswaku u ti ambala, leswaku tingana ta ku swela ka wena ti nga voniwi,+ ni murhi wo tota mahlo+ ya wena leswaku u ta vona.

19 “ ‘Hinkwavo lava ndzi nga ni xinakulobye eka vona ndza va tshinya ni ku va laya.+ Hikokwalaho hiseka, u hundzuka.+ 20 Waswivo, ndzi yime enyangweni+ naswona ndza gongondza. Loko mani na mani a twa rito ra mina kutani a pfula nyangwa,+ ndzi ta nghena endlwini ya yena ndzi dya na yena xilalelo, na yena a dya na mina. 21 Loyi a hlulaka+ ndzi ta n’wi pfumelela ku tshamisa na mina exiluvelweni+ xa mina, tanihi leswi na mina ndzi hluleke kutani ndzi tshamisa+ ni Tata wa mina exiluvelweni+ xa yena. 22 Loyi a nga ni ndleve a a yingise leswi moya+ wu swi byelaka mavandlha.’ ”+

4 Endzhaku ka swilo leswi ndzi languta, kutani waswivo, a ku ri ni nyangwa leyi pfulekeke etilweni, kutani rito ro sungula leri ndzi ri tweke a ri fana ni ra mhalamhala,+ ri vulavula na mina, ri ku: “Tlhandlukela haleno,+ ndzi ta ku komba swilo leswi fanelaka ku endleka.”+ 2 Endzhaku ka swilo leswi ndzi ve ematimbeni ya moya hi ku hatlisa: kutani waswivo, a ku ri ni xiluvelo+ endhawini ya xona etilweni,+ naswona a ku ri ni loyi a tshameke exiluvelweni.+ 3 Kutani loyi a tshameke a a languteka+ ku fana ni ribye ra yaspere+ ni ribye ra risima ra muhlovo wo tshwuka, naswona ku ni nkwangulatilo+ lowu rhendzeleke xiluvelo, lowu langutekaka ku fana ni emeralda.+

4 Kutani xiluvelo a xi rhendzeriwe hi swiluvelo swa 24, eswiluvelweni+ sweswo ndzi vona ku tshame vakulu+ va 24,+ va ambale tinguvu to basa ta le handle,+ va vehele tiharhi+ ta nsuku etinhlokweni ta vona. 5 Kutani exiluvelweni a ku humetela rihati+ ni marito ni ku dzindza ka tilo;+ naswona emahlweni ka xiluvelo a ku pfurha timboni+ ta nkombo ta ndzilo, tona ti vula mimoya+ ya nkombo ya Xikwembu. 6 Naswona emahlweni ka xiluvelo ku ni lwandle+ ro kota nghilazi leri fanaka ni kristala.

Exikarhi ka xiluvelo ni ku rhendzela xiluvelo ku ni swivumbiwa+ leswi hanyaka swa mune, leswi teleke mahlo emahlweni ni le ndzhaku. 7 Xivumbiwa lexi hanyaka xo sungula xi fana ni nghala,+ naswona xivumbiwa lexi hanyaka xa vumbirhi xi fana ni xinkunzana,+ xivumbiwa+ lexi hanyaka xa vunharhu xi ni xikandza xo fana ni xa munhu, naswona xivumbiwa+ lexi hanyaka xa vumune xi fana ni gama+ leri hahaka. 8 Loko ku ri swivumbiwa+ leswi hanyaka swa mune, xin’wana ni xin’wana xa swona xi ni timpapa+ ta tsevu; ti tele mahlo+ ematlhelweni ni le hansi ka tona. Kutani vusiku ni nhlikanhi swi vula swi nga wisi swi ku: “Wa kwetsima, wa kwetsima, wa kwetsima Yehovha+ Xikwembu, lowa Matimba Hinkwawo,+ loyi a a ri kona ni loyi a nga kona+ ni loyi a taka.”

9 Kutani rini na rini loko swivumbiwa leswi hanyaka swi yisa ku vangama ni xichavo ni ku nkhensa+ eka Loyi a tshamake exiluvelweni,+ Loyi a hanyaka hi masiku ni masiku,+ 10 vakulu+ va 24 va wa ehansi emahlweni ka Loyi a tshameke exiluvelweni kutani va gandzela+ Loyi a hanyaka hi masiku ni masiku, naswona va hoxa tiharhi ta vona emahlweni ka xiluvelo, va ku: 11 “Swa ku fanela, Yehovha, wena Xikwembu xa hina, ku amukela ku vangama+ ni ku xiximiwa+ ni matimba,+ hikuva u tumbuluxe swilo hinkwaswo,+ naswona hikwalaho ka ku rhandza+ ka wena swi ve kona, swi tumbuluxiwile.”+

5 Kutani evokweni ra xinene ra Loyi a tshameke exiluvelweni+ ndzi vona buku-nsongwa leyi tsariweke endzeni ni le handle,+ yi lemiwe+ swi tiya hi swilemo swa nkombo. 2 Ndzi vona ni ntsumi ya matimba yi huwelela hi rito lerikulu yi ku: “I mani loyi swi n’wi fanelaka ku pfula buku-nsongwa, a lemula swilemo swa yona?” 3 Kambe a a nga ri kona ni un’we etilweni ni la misaveni ni le hansi ka misava loyi a kotaka ku pfula buku-nsongwa kumbe ku languta endzeni ka yona. 4 Hiloko ndzi rila ngopfu hikuva a nga kumekanga ni un’we loyi a swi n’wi fanela ku pfula buku-nsongwa kumbe ku languta endzeni ka yona.+ 5 Kambe un’wana wa vakulu a ku eka mina: “Tshika ku rila. Waswivo! Nghala leyi nga ya nyimba ya Yuda,+ rimitsu+ ra Davhida,+ yi hlurile+ leswaku yi pfula buku-nsongwa ni swilemo swa yona swa nkombo.”

6 Hiloko ndzi vona exikarhi ka xiluvelo+ ni swivumbiwa leswi hanyaka swa mune ni le xikarhi ka vakulu+ ku yime xinyimpfana+ onge hiloko xi tlhaviwile,+ xi ri ni timhondzo ta nkombo ni mahlo ya nkombo, laha mahlo ma vulaka mimoya+ ya nkombo ya Xikwembu leyi rhumiweke emisaveni hinkwayo. 7 Xikan’we-kan’we xi ya, xi yi teka evokweni ra xinene ra Loyi a tshameke exiluvelweni.+ 8 Loko xi teka buku-nsongwa, swivumbiwa swa mune leswi hanyaka, ni vakulu+ va 24 va wa ehansi emahlweni ka Xinyimpfana, un’wana ni un’wana a ri ni haripa+ ni nkambana wa nsuku lowu teleke murhi wa risuna, naswona murhi wa risuna+ wu vula swikhongelo+ swa vakwetsimi. 9 Kutani va yimbelela risimu lerintshwa,+ va ku: “Swa ku fanela ku teka buku-nsongwa u pfula swilemo swa yona, hikuva u tlhaviwile naswona hi ngati+ ya wena u xavele+ Xikwembu+ vanhu lava humaka eka tinyimba hinkwato ni tindzimi hinkwato ni vanhu hinkwavo ni matiko hinkwawo, 10 naswona u va endle va va mfumo+ ni vaprista+ eka Xikwembu xa hina,+ va ta va tihosi+ emisaveni.”

11 Kutani ndzi languta, hiloko ndzi twa rito ra tintsumi to tala leti rhendzeleke xiluvelo ni ra swivumbiwa leswi hanyaka ni vakulu, nhlayo ya tona a yi ri timiriyadi ta timiriyadi+ ni magidi ya magidi,+ 12 ti vula hi rito lerikulu ti ku: “Xinyimpfana lexi a xi tlhaviwile+ xi faneriwa hi ku amukela matimba ni rifuwo ni vutlhari ni ntamu ni ku xiximiwa ni ku vangama ni ku dzuneka.”+

13 Kutani ndzi twa xivumbiwa xin’wana ni xin’wana lexi nga etilweni ni la misaveni+ ni le hansi ka misava ni le lwandle, ni swilo hinkwaswo leswi nga eka swona swi ku: “Ku dzuneka ni ku xiximiwa+ ni ku vangama+ ni matimba a swi ve eka Loyi a tshameke exiluvelweni+ ni le ka Xinyimpfana+ hi masiku ni masiku.” 14 Hiloko swivumbiwa leswi hanyaka swa mune swi ku: “Amen,” kutani vakulu+ va wa ehansi va gandzela.+

6 Kuteloko Xinyimpfana+ xi pfula xin’wana xa swilemo+ swa nkombo hiloko ndzi languta, kutani ndzi twa xin’wana xa swivumbiwa+ leswi hanyaka swa mune xi vula hi rito ro fana ni ku dzindza ka tilo xi ku: “Tana!”+ 2 Hiloko ndzi languta, kutani waswivo, ku humelela hanci+ yo basa; ehenhla ka yona a ku tshame+ un’wana a ri ni vurha;+ hiloko a nyikiwa harhi,+ a huma a ri karhi a hlula,+ ni ku hetisa ku hlula ka yena.+

3 Kuteloko xi pfula xilemo xa vumbirhi, ndzi twa xivumbiwa+ lexi hanyaka xa vumbirhi xi ku: “Tana!” 4 Hiloko ku huma hanci yin’wana ya muvala wo tshwuka-xindzilo; kutani loyi a tshameke ehenhla ka yona a pfumeleriwa ku susa ku rhula emisaveni leswaku va dlayana; kutani a nyikiwa banga lerikulu.+

5 Kuteloko xi+ pfula xilemo xa vunharhu, ndzi twa xivumbiwa+ lexi hanyaka xa vunharhu xi ku: “Tana!” Hiloko ndzi languta, kutani waswivo, ku humelela hanci ya ntima; loyi a tshameke ehenhla ka yona a a tamele xikalo+ evokweni ra yena. 6 Hiloko ndzi twa rito wonge ri twakala exikarhi+ ka swivumbiwa swa mune leswi hanyaka+ ri ku: “Litara ya koroni hi denari,+ ni tilitara tinharhu ta maxalana hi denari; naswona u nga onhi mafurha ya mutlhwari ni vhinyo.”+

7 Kuteloko xi pfula xilemo xa vumune, ndzi twa rito ra xivumbiwa lexi hanyaka xa vumune+ ri ku: “Tana!” 8 Hiloko ndzi languta, kutani waswivo, ku humelela hanci yo kwalala; loyi a tshameke ehenhla ka yona u vuriwa Rifu. Naswona Hayidesi+ a yi n’wi landzela ekusuhi. Hiloko va nyikiwa matimba exiphen’wini xa vumune xa misava, leswaku va dlaya hi ku tirhisa banga+ ro leha, ni ku kayivela ka swakudya+ ni ntungu lowu dlayaka ni swivandzana+ swa misava.

9 Kuteloko xi pfula xilemo xa vuntlhanu, ndzi vona mimoya-xiviri+ ehansi ka altari,+ ya lava dlayiweke+ hikwalaho ka rito ra Xikwembu ni hikwalaho ka ntirho lowu a va ri na wona wa ku nyikela vumbhoni.+ 10 Naswona a yi huwelela hi rito lerikulu, yi ku: “Hosi leyi Lawulaka+ yo kwetsima ni ya ntiyiso,+ xana u ta yima ku fikela rini u nga avanyisi+ ni ku rihisela ngati+ ya hina eka lava va tshamaka emisaveni?” 11 Hiloko wun’wana ni wun’wana wa yona wu nyikiwa nguvu yo leha yo basa;+ kutani yi byeriwa ku wisanyana, kukondza ku helela nhlayo ya mahlonga-kulobye ni ya vamakwavo lava a va ri kusuhi ni ku dlayiwa+ ku fana na vona va dlayiweke.

12 Kutani ndzi languta loko xi pfula xilemo xa vutsevu, hiloko ku va ni ku tsekatseka lokukulu ka misava; kutani dyambu ri hundzuka ntima wonge i nguvu yo khwaxa+ ya voya, n’weti hinkwawo wu hundzuka wu kotisa ngati,+ 13 tinyeleti ta tilo ti wela emisaveni, ku fana ni nkuwa loko wu hohlota makuwa lamambisi hi ku ninginisiwa hi mheho leyikulu. 14 Kutani matilo ma suka ku fana ni buku-nsongwa loko yi songiwa,+ naswona ntshava yin’wana ni yin’wana ni xihlala xin’wana ni xin’wana swi susiwa etindhawini+ ta swona. 15 Hiloko tihosi ta misava ni lava va swiyimo swa le henhla ni tindhuna ta nyimpi ni vafuwi ni lava va matimba ni mahlonga hinkwawo ni vanhu hinkwavo lava ntshunxekeke va tifihla emabakweni ni le maribyeni lamakulu+ ya tintshava. 16 Kutani va byela tintshava ni maribye lamakulu hi ku phindhaphindha, va ku: “Hi weleni+ mi hi fihla emahlweni ka xikandza xa Loyi a tshameke exiluvelweni+ ni le ka vukarhi bya Xinyimpfana,+ 17 hikuva siku+ lerikulu ra vukarhi+ bya vona ri fikile, kutani i mani loyi a nga kotaka ku ri yimela?”+

7 Endzhaku ka sweswo ndzi vona tintsumi+ ta mune ti yime etinhleni+ ta mune ta misava, ti khome timheho ta mune ta misava swi tiya, leswaku ku nga vi na mheho leyi hungelaka emisaveni kumbe elwandle kumbe emurhini+ wun’wana ni wun’wana. 2 Kutani ndzi vona ntsumi yin’wana yi tlhandluka yi ta hi le vuhuma-dyambu,+ yi ri ni mfungho wa Xikwembu+ lexi hanyaka; hiloko yi huwelela hi rito lerikulu eka tintsumi ta mune leti pfumeleriweke ku onha misava ni lwandle, 3 yi ku: “Mi nga onhi misava kumbe lwandle kumbe mirhi, ku fikela loko hi ta va hi funghe+ mahlonga ya Xikwembu xa hina emimombyeni+ ya wona.”

4 Kutani ndzi twa nhlayo ya lava funghiweke, va 144 000,+ lava funghiweke eka nyimba+ yin’wana ni yin’wana ya vana va Israyele:+

9 Endzhaku ka swilo leswi ndzi languta, kutani waswivo, a ku ri ni ntshungu lowukulu,+ lowu a ku nga ri na munhu la kotaka ku wu hlaya, wu huma eka matiko+ hinkwawo ni tinyimba hinkwato ni vanhu+ hinkwavo ni tindzimi+ hinkwato, wu yime emahlweni ka xiluvelo+ ni le mahlweni ka Xinyimpfana, wu ambale tinguvu to leha to basa;+ wu tamele marhavi ya micindzu+ emavokweni ya wona. 10 Kutani wu huwelela hi rito lerikulu wu phikelela, wu ku: “Ku ponisiwa hi ku kolota Xikwembu+ xa hina, lexi tshameke exiluvelweni,+ ni le ka Xinyimpfana.”+

11 Kutani tintsumi+ hinkwato a ti yime ti rhendzela xiluvelo ni vakulu+ ni swivumbiwa+ leswi hanyaka swa mune, hiloko va wa hi swikandza swa vona emahlweni ka xiluvelo va gandzela Xikwembu,+ 12 va ku: “Amen! Ku dzuneka ni ku vangama ni vutlhari ni ku nkhensa ni ku xiximiwa ni matimba+ ni ntamu a swi ve eka Xikwembu xa hina hi masiku ni masiku. Amen.”+

13 Kutani un’wana wa vakulu+ a ndzi angula a ku: “Xana lava ambaleke tinguvu to leha to basa,+ i vamani naswona va huma kwihi?” 14 Hiloko ndzi n’wi byela xikan’we ndzi ku: “Hosi yanga, hi wena u tivaka.” Kutani a ku eka mina: “Lava hi lava humaka enhlomulweni+ lowukulu, naswona va hlantswe tinguvu ta vona to leha va ti endla to basa+ hi ngati+ ya Xinyimpfana. 15 Hi yona mhaka leyi va nga emahlweni+ ka xiluvelo xa Xikwembu; va xi endlela ntirho wo kwetsima+ nhlikanhi ni vusiku etempeleni ya xona; kutani Loyi a tshameke exiluvelweni+ u ta vamba ntsonga+ wa yena ehenhla ka vona. 16 A va nge he twi ndlala kumbe torha nikatsongo, naswona dyambu a ri nge he va hisi nikatsongo hambi wu ri mumu lowu vavulaka,+ 17 hikuva Xinyimpfana,+ lexi nga exikarhi ka xiluvelo, xi ta va risa,+ xi va kongomisa eminseledyaneni ya mati+ ya vutomi. Kutani Xikwembu xi ta sula mihloti hinkwayo ematihlweni ya vona.”+

8 Kuteloko xi+ pfula xilemo xa vunkombo,+ ku va ni ku miyela etilweni ku ringana kwalomu ka hafu ya awara. 2 Kutani ndzi vona tintsumi+ ta nkombo leti yimeke emahlweni ka Xikwembu, ti nyikiwa timhalamhala ta nkombo.

3 Kutani ku fika ntsumi yin’wana yi yima ealitarini,+ yi ri ni xibya xa nsuku xa murhi wa risuna; hiloko yi nyikiwa murhi wo tala wa risuna+ leswaku yi wu humesa swin’we ni swikhongelo swa vakwetsimi hinkwavo ehenhla ka alitari ya nsuku leyi a yi ri emahlweni ka xiluvelo. 4 Kutani musi wa murhi wa risuna wu tlhandlukela emahlweni ka Xikwembu wu huma evokweni ra ntsumi wu ri ni swikhongelo+ swa vakwetsimi. 5 Kambe ntsumi yi teka xibya xa murhi wa risuna xikan’we-kan’we, yi xi tata hi ndzilo+ lowu tekiweke eka lowa alitari, yi wu lahlela emisaveni.+ Hiloko ku va ni ku dzindza ka tilo+ ni marito ni rihati+ ni ku tsekatseka ka misava.+ 6 Kutani tintsumi ta nkombo+ leti tameleke timhalamhala+ ta nkombo ti tilunghisela ku ti yimba.

7 Kutani leyo sungula yi yimba mhalamhala ya yona. Hiloko ku va ni xihangu ni ndzilo+ swi pfangane ni ngati, swi lahleriwa emisaveni; kutani ku tshwa+ n’we-xa-nharhu xa misava, ku tshwa ni n’we-xa-nharhu xa mirhi, ku tshwa ni swimila+ hinkwaswo swa rihlaza.

8 Kutani ntsumi ya vumbirhi yi yimba mhalamhala ya yona. Kavaloko nchumu wun’wana wo fana ni ntshava+ leyikulu leyi pfurhaka ndzilo wu lahleriwa elwandle.+ Kutani n’we-xa-nharhu xa lwandle xi hundzuka ngati;+ 9 naswona ku fa+ n’we-xa-nharhu xa swivumbiwa swa le lwandle leswi nga ni mimoya-xiviri, ku tshoveka n’we-xa-nharhu xa swikepe.

10 Kutani ntsumi ya vunharhu yi yimba mhalamhala ya yona. Kavaloko nyeleti leyikulu leyi pfurhaka tanihi rivoni yi wa hi le tilweni,+ yi wela ehenhla ka n’we-xa-nharhu xa milambu ni minseledyana ya mati.+ 11 Vito ra nyeleti yoleyo i Absinta. Hiloko n’we-xa-nharhu xa mati xi hundzuka absinta, kutani vanhu vo tala va fa hi mati ya kona, hikuva a ma endliwe lama bavaka.+

12 Kutani ntsumi ya vumune yi yimba mhalamhala ya yona. Hiloko ku biwa n’we-xa-nharhu xa dyambu ni n’we-xa-nharhu xa n’weti ni n’we-xa-nharhu xa tinyeleti, leswaku n’we-xa-nharhu xa swona xi hundzuka ntima+ ni siku ri nga voningeriwi ku ringana n’we-xa-nharhu+ xa rona, ni vusiku hi ku fanana.

13 Hiloko ndzi languta, kutani ndzi twa gama+ leri hahaka empfhukeni+ ri vula hi rito lerikulu ri ku: “Khombo, khombo, khombo+ eka lava tshamaka emisaveni hikwalaho ka ku biwa ka timhalamhala letin’wana hi tintsumi tinharhu leti nga ekusuhi ni ku yimba timhalamhala ta tona!”+

9 Kutani ntsumi ya vuntlhanu yi yimba mhalamhala+ ya yona. Hiloko ndzi vona nyeleti+ leyi weke hi le tilweni yi wela emisaveni, kutani yi nyikiwa xilotlelo+ xa mugodi wa khele+ ro enta. 2 Hiloko yi pfula mugodi wa khele ro enta, musi+ wu tlhandlukela ehandle ka mugodi ku fana ni musi wa khele lerikulu ra ndzilo,+ kavaloko dyambu ri hundzuka ntima,+ na wona moya wu hundzuka, hi musi wa mugodi. 3 Kutani ku huma tinjiya+ emusini ti ya emisaveni; kutani ti nyikiwa matimba, matimba yo fana ni lama nga ni swipame+ swa misava. 4 Kutani ti byeriwa leswaku ti nga onhi swimila swa misava ni xilo xihi ni xihi xa rihlaza ni murhi wihi ni wihi, kambe ti ya ntsena eka vanhu lava nga riki na mfungho wa Xikwembu emimombyeni ya vona.+

5 Kavaloko tinjiya ti nyikiwa mpfumelelo, ku nga ri wa ku va dlaya, kambe wa ku va xanisa+ tin’hweti ta ntlhanu, naswona ku xanisiwa ka vona a ku fana ni nxaniso wa xipame+ loko xi luma munhu. 6 Emasikwini wolawo vanhu va ta lava rifu+ kambe a va nge pfuki va ri kumile, naswona va ta navela ku fa kambe rifu ri ta tshamela ku va balekela.

7 Naswona xiyimo xa tinjiya a xi fana ni xa tihanci+ leti lungheleke nyimpi; kutani etinhlokweni ta tona a ku ri ni leswi vonakaka wonge i tiharhi to fana ni nsuku, swikandza swa tona a swi fana ni swikandza swa vanhu,+ 8 kambe a ti ri ni misisi yo fana ni misisi+ ya vavasati. Meno ya tona a ma fana ni ya tinghala;+ 9 a ti ri ni swisirhelelo swa xifuva+ leswi fanaka ni swisirhelelo swa xifuva swa nsimbi. Mpfumawulo wa timpapa ta tona wu fana ni mpfumawulo wa makalichi+ ya tihanci to tala leti tsutsumelaka enyimpini.+ 10 Nakambe, ti ni micila ni mindzhombo yo fana ni ya swipame;+ naswona emicileni ya tona ti ni matimba yo vavisa vanhu tin’hweti ta ntlhanu. 11 Ti ni hosi, ku nga ntsumi ya khele ro enta.+ Hi Xiheveru vito ra yona yi vuriwa Abadoni, kambe hi Xigriki vito ra yona i Apoliyoni.+

12 Khombo rin’we ri hundzile. Waswivo! Ka ha ta makhombo+ man’wanyana mambirhi endzhaku ka swilo leswi.

13 Kutani ntsumi+ ya vutsevu yi yimba mhalamhala+ ya yona. Hiloko ndzi twa rito+ rin’wana ri huma etimhondzweni ta alitari+ ya nsuku leyi nga emahlweni ka Xikwembu 14 ri byela ntsumi ya vutsevu leyi tameleke mhalamhala, ri ku: “Ntshunxa tintsumi+ ta mune leti bohiweke+ enambyeni lowukulu wa Yufrata.”+ 15 Kavaloko tintsumi ta mune ti ntshunxiwa, leti a ti lunghekele nkarhi ni siku ni n’hweti ni lembe, leswaku ti dlaya n’we-xa-nharhu xa vanhu.

16 Kutani nhlayo ya mavuthu ya vagadi va tihanci a yi ri timiriyadi timbirhi ta timiriyadi: Ndzi twe nhlayo ya vona. 17 Kutani leyi i ndlela leyi ndzi ti voneke ha yona tihanci exivonweni, ni lava tshameke ehenhla ka tona: a va ri ni swisirhelelo swa xifuva swo tshwuka-xindzilo ni swa wasi wonge i yakinta ni swa xitshopana xa xivavula; naswona tinhloko ta tihanci a ti fana ni tinhloko ta tinghala,+ emilon’wini ya tona a ku huma ndzilo ni musi ni xivavula.+ 18 Hi makhombo lamanharhu ku dlawe n’we-xa-nharhu xa vanhu, hi ndzilo ni musi ni xivavula lexi humaka emilon’wini ya tona. 19 Hikuva matimba ya tihanci ma le milon’wini ni le micileni ya tona; hikuva micila ya tona yi fana ni tinyoka+ naswona yi ni tinhloko, kutani ti vavisa ha yona.

20 Kambe vanhu lavan’wana hinkwavo lava nga dlayiwangiki hi makhombo lawa a va hundzukanga emintirhweni ya mavoko+ ya vona, leswaku va nga gandzeli madimona+ ni swifaniso swa hava swa nsuku ni swa silivhere+ ni swa koporo ni swa ribye ni swa ntsandze, leswi nga voniki, swi nga twiki naswona swi nga fambiki;+ 21 a va hundzukanga eku dlayeni ka vona hi vomu+ ni le swiendlweni+ swa vona swa vungoma ni le ka vumbhisa bya vona ni le ku yiveni ka vona.

10 Kutani ndzi vona ntsumi+ yin’wana ya matimba yi xika hi le tilweni, yi ambale papa,+ naswona yi ri ni nkwangulatilo enhlokweni ya yona, xikandza xa yona a xi fana ni dyambu,+ naswona milenge+ ya yona a yi fana ni tiphuphu leti pfurhaka, 2 kutani evokweni ra yona a yi tamele buku-nsongwa leyitsongo leyi pfulekeke. Hiloko yi veka nenge wa yona wa xinene elwandle, kambe lowa ximatsi yi wu veka emisaveni,+ 3 kutani yi huwelela hi rito lerikulu ku fana ni nghala+ loko yi vomba. Kuteloko yi huwelela, ku dzindza ka tilo+ ka vunkombo ku humesa marito ya kona.

4 Loko ku dzindza ka matilo ka vunkombo ku vulavula, a ndzi lava ku tsala; kambe ndzi twa rito ri huma etilweni+ ri ku: “Lemela swilo+ leswi vuriweke hi ku dzindza ka matilo ka vunkombo, u nga swi tsali.” 5 Hiloko ntsumi leyi ndzi yi voneke yi yime elwandle ni le misaveni yi tlakusela voko ra yona ra xinene etilweni,+ 6 kutani yi hlambanya hi Loyi a hanyaka+ hi masiku ni masiku,+ loyi a tumbuluxeke tilo ni swilo leswi nga eka rona ni misava+ ni swilo leswi nga eka yona ni lwandle ni swilo leswi nga eka rona,+ yi ku: “A ku nge he hlweriwi;+ 7 kambe emasikwini ya ku pfuma ka ntsumi+ ya vunkombo, loko yi ri kusuhi ni ku yimba mhalamhala+ ya yona, xihundla xo kwetsima+ xa Xikwembu hi ku ya hi mahungu lamanene lawa xi ma vuleke eka mahlonga ya xona va nga vaprofeta+ xi ta hetisisiwa hakunene.”

8 Kutani rito+ leri ndzi ri tweke ri huma etilweni ri tlhela ri vulavula na mina, ri ku: “Famba, u ya teka buku-nsongwa leyi pfulekeke leyi nga evokweni ra ntsumi leyi yimeke elwandle ni le misaveni.”+ 9 Hiloko ndzi ya eka ntsumi ndzi yi byela leswaku yi ndzi nyika buku-nsongwa leyitsongo. Kutani yi ku eka mina: “Yi teke u yi dya+ hinkwayo, yi ta endla khwiri ra wena ri bava, kambe enon’wini wa wena yi ta tsokombela ku fana ni vulombe.” 10 Hiloko ndzi teka buku-nsongwa leyitsongo evokweni ra ntsumi ndzi yi dya hinkwayo,+ enon’wini wa mina a yi tsokombela ku fana ni vulombe;+ kambe loko ndzi yi dyile hinkwayo, khwiri ra mina ri bava. 11 Kutani va ku eka mina: “U fanele ku tlhela u profeta malunghana ni vanhu ni matiko ni tindzimi ni tihosi to tala.”+

11 Kutani ndzi nyikiwa rihlanga ro fana ni nhonga,+ hiloko a ku eka mina: “Suka u yima u pima vukwetsimelo bya tempele+ ya Xikwembu ni alitari ni lava gandzelaka eka yona. 2 Kambe loko ku ri xivava lexi nga ehandle+ ka vukwetsimelo bya tempele, xi vekele etlhelo, u nga xi pimi, hikuva xi nyikiwe matiko,+ naswona ma ta kandziyela muti+ wo kwetsima hi mikondzo ku ringana tin’hweti+ ta 42. 3 Kutani ndzi ta vanga leswaku timbhoni ta mina timbirhi+ ti profeta+ masiku ya 1 260 ti ambale tinguvu to khwaxa.”+ 4 Tona ti fanekiseriwa hi mirhi+ yimbirhi ya mitlhwari ni swo tlhoma timboni+ swimbirhi naswona ti yime emahlweni ka Hosi ya misava.+

5 Loko mani na mani a lava ku ti vavisa, emilon’wini ya tona ku huma ndzilo wu lovisa valala+ va tona; naswona loko mani na mani a lava ku ti vavisa, u fanele ku dlayiwa hi mukhuva lowu. 6 Tona ti ni matimba yo pfala tilo+ leswaku mpfula yi nga ni+ hi masiku lawa ti profetaka ha wona, naswona ti ni matimba ya ku hundzula mati ma va ngati+ ni ku ba misava hi makhombo ya mixaka hinkwayo hi ku phindha-phindha hilaha ti navelaka hakona.

7 Loko ti hetile ku nyikela vumbhoni, xivandzana lexi tlhandlukaka xi huma ekheleni+ ro enta xi ta lwa nyimpi na tona, xi ti hlula, xi ti dlaya.+ 8 Kutani mitsumbu ya tona yi ta va endleleni yo anama ya muti lowukulu lowu hi mianakanyo ya moya wu vuriwaka Sodoma+ na Egipta, laha Hosi ya tona yi beleriweke+ kona na yona. 9 Kutani vanhu ni tinyimba ni tindzimi ni matiko+ va ta languta mitsumbu ya tona ku ringana masiku manharhu ni hafu,+ a va nge pfumeli leswaku mitsumbu ya tona yi latiwa eka sirha-bako. 10 Lava tshamaka emisaveni va tsaka+ ha vona, va tiphina, naswona va ta rhumelelana tinyiko,+ hikuva vaprofeta lavambirhi a va xanisa lava tshamaka emisaveni.

11 Kutani endzhaku ka masiku+ manharhu ni hafu moya wa vutomi lowu humaka eka Xikwembu wu nghena eka vona,+ hiloko va yima hi milenge ya vona, lava va va vonaka va weriwa hi ku chava lokukulu. 12 Kutani va twa rito+ lerikulu ri huma etilweni ri ku eka vona: “Tlhandlukelani haleno.”+ Kavaloko va tlhandlukela etilweni va ri epapeni, va ri karhi va voniwa hi valala va vona. 13 Kutani hi nkarhi wolowo ku va ni ku tsekatseka lokukulu ka misava, n’we-xa-khume+ xa muti xi wa; kutani vanhu va 7 000 va dlayiwa hi ku tsekatseka koloko ka misava, lavan’wana hinkwavo va tshuka ivi va vangamisa Xikwembu xa tilo.+

14 Khombo+ ra vumbirhi ri hundzile. Waswivo! Ku ta khombo ra vunharhu hi ku hatlisa.

15 Kutani ntsumi ya vunkombo yi yimba mhalamhala+ ya yona. Kavaloko ku twakala marito lamakulu etilweni, ma ku: “Mfumo wa misava se i mfumo wa Hosi+ ya hina ni wa Kreste+ wa yona, kutani u ta va hosi hi masiku ni masiku.”+

16 Kutani vakulu+ va 24 lava tshameke eswiluvelweni swa vona emahlweni ka Xikwembu va wa hi swikandza+ swa vo-​na va gandzela Xikwembu,+ 17 va ku: “Ha ku nkhensa,+ Yehovha Xikwembu, wena wa Matimba Hinkwawo,+ Loyi a nga kona+ ni loyi a a ri kona, hikuva u teke matimba+ ya wena lamakulu naswona se u hosi.+ 18 Kambe matiko ma sungule ku kariha, kutani vukarhi bya wena byi fika, ni nkarhi lowu vekiweke wa leswaku vafi va avanyisiwa, ni ku nyika mahlonga ya wena, va nga vaprofeta,+ tihakelo+ ta vona swin’we ni vakwetsimi ni lava chavaka vito ra wena, lavatsongo ni lavakulu,+ ni ku lovisa+ lava onhaka misava.”+

19 Kavaloko ku pfuriwa vukwetsimelo bya tempele ya Xikwembu leyi nga etilweni,+ kutani ku vonaka areka+ ya ntwanano wa xona evukwetsimelweni+ bya tempele ya xona. Kavaloko ku va ni rihati ni marito ni ku dzindza ka tilo ni ku tsekatseka ka misava ni xihangu lexikulu.

12 Kutani ku vonaka xikombiso+ lexikulu etilweni, wansati+ a ambale dyambu, naswona ehansi ka milenge yakwe ku ri ni n’weti, enhlokweni yakwe a ri ni harhi ya tinyeleti ta 12, 2 naswona a a tikile. Kutani a huwelela a ri eku lun’weni+ kakwe ni maxangu yakwe ya ku veleka.

3 Kavaloko ku vonaka xikombiso xin’wana etilweni, kutani, waswivo, i dragona+ le-​yikulu ya muvala wo tshwuka-xindzilo, yi ri ni tinhloko ta nkombo ni timhondzo ta khume ni swidlodlo swa nkombo etinhlokweni ta yona; 4 ncila+ wa yona wu koka n’we-xa-nharhu xa tinyeleti+ ta tilo, kutani yi ti lahlela emisaveni.+ Hiloko dragona yi yima yi nga suki emahlweni ka wansati+ loyi a a lava ku veleka,+ leswaku, loko a veleka, yi mita+ n’wana wakwe.

5 Kutani a veleka n’wana,+ wa xinuna, loyi a nga ta risa matiko hinkwawo hi nhonga ya nsimbi.+ Kavaloko n’wana wakwe a tekeriwa eka Xikwembu ni le xiluvelweni+ xa xona. 6 Wansati a balekela emananga,+ laha Xikwembu xi n’wi lunghiseleke ndhawu kona, leswaku va n’wi phamela+ kona ku ringana masiku ya 1 260.+

7 Kutani ku tlhekeka nyimpi etilweni: Mikayele+ ni tintsumi ta yena va lwa ni dragona, dragona yona yi lwa yi ri ni tintsumi ta yona 8 kambe a yi hlulanga, naswona ndhawu ya vona a ya ha kumekanga etilweni. 9 Hiloko dragona+ leyikulu yi lahleriwa ehansi, nyoka+ ya khale, leyi vuriwaka Diyavulosi+ na Sathana,+ leyi xisaka misava hinkwayo leyi akiweke;+ yi lahleriwa ehansi emisaveni,+ ni tintsumi ta yona ti lahleriwa ehansi na yona. 10 Kutani ndzi twa rito lerikulu etilweni ri ku:

“Sweswi ku ponisa+ ni matimba+ ni mfumo wa Xikwembu+ xa hina ni vulawuri bya Kreste+ wa xona se swa tirha, hikuva muhehli wa vamakwerhu u lahleriwe ehansi, yena loyi a va hehlaka vusiku ni nhlikanhi emahlweni ka Xikwembu xa hina!+ 11 Va n’wi hlule+ hikwalaho ka ngati ya Xinyimpfana+ ni hikwalaho ka rito ra ku nyikela ka vona vumbhoni,+ naswona a va kalanga va rhandza mimoya-xiviri+ ya vona hambiloko va langutane ni rifu. 12 Tsakani hikwalaho ka swona, n’wina matilo na n’wina lava tshamaka eka wona!+ Khombo+ eka misava ni lwandle,+ hikuva Diyavulosi u xikele eka n’wina, a hlundzukile swinene, hi ku tiva leswaku u ni nkarhi wo koma.”+

13 Kuteloko dragona yi vona leswaku yi lahleriwe ehansi emisaveni,+ hiloko yi xanisa wansati+ la velekeke n’wana wa xinuna. 14 Kambe wansati a nyikiwa timpapa timbirhi ta gama+ lerikulu, leswaku a hahela emananga+ endhawini yakwe; kwalaho hi lomu a nga phameriwa+ kona ku ringana nkarhi ni minkarhi yimbirhi ni hafu+ ya nkarhi ekule ni nyoka.+

15 Kavaloko nyoka yi kampfula mati+ hi nomu wa yona endzhaku ka wansati, ma fana ni nambu, leswaku yi n’wi nwerisa hi nambu wolowo.+ 16 Kambe misava yi pfuna+ wansati, kutani misava yi pfula nomu wa yona yi mita nambu lowu dragona yi wu kampfuleke hi nomu wa yona. 17 Hiloko dragona yi karihela wansati,+ kutani yi suka yi ya lwa nyimpi ni lava saleke va mbewu yakwe, lava hlayisaka swileriso swa Xikwembu naswona va nga ni ntirho wa ku nyikela vumbhoni+ mayelana na Yesu.

13 Kutani yi yima yi ku tserhe, esaveni+ ra lwandle.

Hiloko ndzi vona xivandzana+ xi tlhandluka xi huma elwandle,+ xi ri ni timhondzo+ ta khume ni tinhloko+ ta nkombo, naswona xi ri ni swidlodlo swa khume etimhondzweni ta xona, kambe xi ri ni mavito lama sandzaka+ etinhlokweni ta xona. 2 Xivandzana lexi ndzi xi voneke a xi fana ni yingwe,+ kambe milenge ya xona a yi fana ni ya bere,+ kasi nomu wa xona a wu fana ni nomu wa nghala.+ Kutani dragona+ yi nyika xivandzana matimba ya xona ni xiluvelo xa xona ni vulawuri+ bya xona lebyikulu.

3 Kavaloko ndzi vona yin’wana ya tinhloko ta xona onge yi tlhaviwe+ yi fa, kambe phokola ra xona leri dlayaka ri hola, kutani misava hinkwayo yi landzela xivandzana yi xi xixima. 4 Kutani yi gandzela dragona hikuva yi nyike xivandzana matimba, yi tlhela yi gandzela xivandzana hi marito lama nge: “I mani la fanaka ni xivandzana, naswona i mani loyi a nga lwaka na xona?” 5 Kutani xi nyikiwa nomu lowu vulavulaka swilo+ leswikulu ni swisandzu, xi nyikiwa+ ni matimba ya ku tirha tin’hweti+ ta 42. 6 Kavaloko xi ahlamisa nomu xi sandza+ Xikwembu, ni ku sandza vito ra xona ni vutshamo bya xona, ku nga lava tshamaka etilweni.+ 7 Hiloko xi pfumeleriwa+ ku lwa nyimpi ni vakwetsimi, ni ku va hlula,+ kutani xi nyikiwa matimba ehenhla ka tinyimba hinkwato ni vanhu hinkwavo ni tindzimi hinkwato ni matiko hinkwawo. 8 Hinkwavo lava tshamaka emisaveni va ta xi gandzela; lava ni un’we wa vona vito ra yena ri nga tsariwangiki eka buku-nsongwa+ ya vutomi ya Xinyimpfana lexi tlhaviweke,+ hi mpfhuka misava+ yi va kona.

9 Loko mani kumbe mani a ri ni ndleve, a a yingise.+ 10 Loko mani kumbe mani a kunguhateriwe vukhumbi, u ya evukhumbini.+ Loko mani kumbe mani a ta dlaya hi banga, u fanele ku dlayiwa hi banga.+ Laha hi lomu ku kombisiwaka kona ku tiyisela+ ni ripfumelo+ ra vakwetsimi.+

11 Kutani ndzi vona xivandzana+ xin’wana xi tlhandluka xi huma emisaveni,+ xi ri ni timhondzo timbirhi to fana ni ta xinyimpfana, kambe xi sungula ku vulavula wonge i dragona.+ 12 Xi tirhisa vulawuri hinkwabyo bya xivandzana+ xo sungula emahlweni ka xona. Kutani xi endla misava ni lava tshamaka eka yona va gandzela xivandzana lexo sungula, lexi phokola ra xona leri dlayaka ri holeke.+ 13 Hiloko xi endla mahlori+ lamakulu, lerova xi endla hambi ndzilo leswaku wu xika hi le tilweni wu ta emisaveni emahlweni ka vanhu.

14 Naswona xi hambukisa lava tshamaka emisaveni, hikwalaho ka mahlori lawa xi pfumeleriweke ku ma endla emahlweni ka xivandzana, xi ri karhi xi byela lava tshamaka emisaveni leswaku va endla xifaniso+ xa xivandzana, lexi a xi ri ni phokola+ ra banga kambe xi hlakarheleke. 15 Kutani xi pfumeleriwa ku nghenisa ku hefemula exifanisweni xa xivandzana, leswaku xifaniso xa xivandzana xi vulavula xi tlhela xi endla leswaku ku dlayiwa hinkwavo lava nga ta ka va nga xi gandzeli xifaniso+ xa xivandzana hi ndlela yihi ni yihi.

16 Hiloko xi sindzisa vanhu+ hinkwavo, lavatsongo ni lavakulu, ni vafuwi ni swisiwana, ni lava ntshunxekeke ni mahlonga, leswaku va nyikiwa mfungho evokweni ra vona ra xinene kumbe emombyeni+ wa vona, 17 ni leswaku ku nga vi na munhu la kotaka ku xava kumbe ku xavisa handle ka munhu la nga ni mfungho, ku nga vito+ ra xivandzana kumbe nhlayo ya vito+ ra xona. 18 Laha hi lomu vutlhari byi tirhaka kona: Loyi a nga ni ku twisisa a a kumisise nhlayo ya xivandzana, hikuva i nhlayo ya munhu;+ naswona nhlayo ya xona i 666.+

14 Hiloko ndzi languta, kutani waswivo, a ku ri ni Xinyimpfana+ xi yime eNtshaveni ya Siyoni,+ xi ri ni lava 144 000+ va tsariwe vito ra xona ni vito ra Tata+ wa xona emimombyeni ya vona. 2 Kutani ndzi twa mpfumawulo wu huma etilweni wu fana ni mpfumawulo wa mati+ yo tala, ni mpfumawulo wa ku dzindza lokukulu ka tilo; naswona mpfumawulo lowu a ndzi wu twa a wu kotisa wa vayimbeleri lava fambisanaka ni haripa,+ loko va chaya tiharipa ta vona. 3 Va yimbelela+ leswi fanaka ni risimu+ lerintshwa emahlweni ka xiluvelo ni le mahlweni ka swivumbiwa+ leswi hanyaka swa mune ni le mahlweni ka vakulu;+ naswona a ku na munhu loyi a a kota ku tivisisa risimu rero loko va nga ri lava 144 000,+ lava xaviweke+ emisaveni. 4 Lava hi lava va nga tinyamisangiki hi vavasati;+ entiyisweni, i tinghwendza.+ Lava hi vona lava hambetaka va landzela Xinyimpfana ku nga khathariseki leswaku xi ya kwihi.+ Lava va xaviwe+ evanhwini leswaku va va swirhangana+ eka Xikwembu ni le ka Xinyimpfana, 5 naswona a ku kumiwanga mavunwa emilon’wini+ ya vona; a va na xisolo.+

6 Kavaloko ndzi vona ntsumi yin’wana yi haha empfhukeni,+ yi ri ni mahungu lamanene+ lama nga heriki leswaku yi ma vula tanihi marungula lama tsakisaka eka lava tshamaka emisaveni, ni le ka matiko hinkwawo ni tinyimba hinkwato ni tindzimi hinkwato ni vanhu+ hinkwavo, 7 yi vula hi rito lerikulu yi ku: “Chavani Xikwembu+ mi xi vangamisa,+ hikuva nkarhi wa ku avanyisiwa hi xona wu fikile,+ gandzelani Loyi a endleke+ tilo ni misava ni lwandle ni minseledyana ya mati.”+

8 Kutani ku landzela ntsumi yin’wanyana, ya vumbirhi, yi ku: “U wile! Babilona+ Lonkulu u wile,+ yena loyi a nwiseke matiko hinkwawo vhinyo+ ya vukarhi bya vumbhisa+ bya yena!”

9 Kutani ku landzela ntsumi yin’wanyana, ya vunharhu, yi vula hi rito lerikulu yi ku: “Loko mani kumbe mani a gandzela xivandzana+ ni xifaniso+ xa xona, naswona a amukela mfungho emombyeni wa yena kumbe evokweni+ ra yena, 10 u ta nwa ni vhinyo ya ku hlundzuka ka Xikwembu leyi cheriwaka yi nga timuriwanga exinwelweni xa vukarhi+ bya xona, naswona u ta xanisiwa+ hi ndzilo ni xivavula+ emahlweni ka tintsumi to kwetsima ni le mahlweni ka Xinyimpfana. 11 Kutani musi wa ku xanisiwa ka vona wu tlhandluka hi masiku ni masiku,+ naswona a va wisi vusiku ni nhlikanhi, vona lava gandzelaka xivandzana ni xifaniso xa xona, ni un’wana ni un’wana la amukelaka mfungho+ wa vito ra xona. 12 Laha hi lomu ku kombisiwaka kona ku tiyisela ka vakwetsimi,+ lava hlayisaka swileriso swa Xikwembu+ ni ripfumelo+ eka Yesu.”

13 Kutani ndzi twa rito ri huma etilweni ri ku: “Tsala: Va tsaka vafi+ lava felaka evun’weni ni Hosi+ ku sukela enkarhini lowu ku ya emahlweni.+ Ina, ku vula moya, a va wise emintirhweni ya vona, hikuva swilo leswi va swi endleke swi famba swin’we na vona.”

14 Hiloko ndzi languta, kutani waswivo, a ku ri ni papa ro basa, naswona ehenhla ka papa ku tshame un’wana la fanaka ni n’wana wa munhu,+ a ri ni harhi+ ya nsuku enhlokweni ya yena naswona a tamele rihwevo ro kariha evokweni ra yena.

15 Kutani ku humelela ntsumi yin’wana hi le vukwetsimelweni bya tempele, yi huwelela hi rito lerikulu eka loyi a tshameke epapeni yi ku: “Nghenisa rihwevo ra wena u tshovela,+ hikuva nkarhi wa ku tshovela wu fikile, naswona ntshovelo+ wa misava wu wupfe+ hi ku helela.” 16 Hiloko loyi a tshameke epapeni a tlhotlhometa rihwevo ra yena emisaveni, kavaloko misava yi tshoveriwa.

17 Nakambe ntsumi yin’wanyana yi humelela hi le vukwetsimelweni bya tempele leyi nge tilweni,+ na yona yi tamele rihwevo ro kariha.

18 Nakambe ku humelela ntsumi yin’wanyana hi le alitarini, yi ri ni matimba ehenhla ka ndzilo.+ Yi huwelela hi rito lerikulu eka loyi a tameleke rihwevo ro kariha, yi ku: “Nghenisa rihwevo ra wena ro kariha u hlengeleta swichocho swa vhinya ya misava,+ hikuva madiriva ya yona se ma wupfile.” 19 Hiloko ntsumi+ yi tlhotlhometa rihwevo ra yona emisaveni yi hlengeleta vhinya+ ya misava, kutani yi yi hoxa exikamelweni xa vhinya lexikulu xa ku hlundzuka ka Xikwembu.+ 20 Kavaloko xikamelo xa vhinya xi pyanyeteriwa ehandle ka muti,+ ngati yi huma exikamelweni xa vhinya yi tlakuka ku fika ematon’wini ya tihanci,+ ku ringana mpfhuka wa tistadiya ta 1 600.+

15 Kutani ndzi vona xikombiso+ xin’wana etilweni, lexikulu, xo hlamarisa, xa tintsumi+ ta nkombo leti tameleke makhombo+ ya nkombo. Lawa i yo hetelela, hikuva ku hlundzuka+ ka Xikwembu ku hetisisiwa+ hi ku tirhisa wona.

2 Kutani ndzi vona leswi fanaka ni lwandle+ ra xinghilazi leri pfanganeke ni ndzilo, naswona lava koteke ku hlula+ eka xivandzana ni le xifanisweni+ xa xona ni le ka nhlayo+ ya vito ra xona a va yime ekusuhi ni lwandle ra xinghilazi,+ va tamele tiharipa+ ta Xikwembu. 3 Kutani va yimbelela risimu ra Muxe+ hlonga ra Xikwembu ni risimu ra Xinyimpfana,+ va ku:

“Yikulu naswona ya hlamarisa mintirho+ ya wena, Yehovha Xikwembu, xa Matimba Hinkwawo.+ Tindlela+ ta wena ti lulamile naswona i ta ntiyiso, wena Hosi leyi nga riki na makumu.+ 4 Kunene, i mani la nga ta ka a nga ku chavi,+ Yehovha,+ a vangamisa vito+ ra wena, hikuva hi wena ntsena u tshembekeke?+ Hikuva matiko hinkwawo ma ta ta ma ta gandzela emahlweni ka wena,+ hikuva swileriso swa wena swo lulama swi kombisiwile.”+

5 Kutani endzhaku ka swilo leswi ndzi languta, kavaloko ku pfuriwa vukwetsimelo bya ntsonga+ wa vumbhoni+ etilweni,+ 6 kutani tintsumi+ ta nkombo leti tameleke makhombo+ ya nkombo ti humelela hi le vukwetsimelweni, ti ambale ntsembyana+ wo basa, lowu vangamaka, naswona ti tikhame swifuva swa tona hi mavamba ya nsuku. 7 Xin’wana xa swivumbiwa+ leswi hanyaka swa mune xi nyika tintsumi leta nkombo minkambana ya nkombo ya nsuku leyi teleke ku hlundzuka ka Xikwembu,+ lexi hanyaka hi masiku ni masiku.+ 8 Kavaloko vukwetsimelo byi tala hi musi hikwalaho ka ku vangama ka Xikwembu+ ni hikwalaho ka matimba ya xona, naswona a nga kona la koteke ku nghena evukwetsimelweni ku nga si hela makhombo+ ya nkombo ya tintsumi ta nkombo.

16 Kutani ndzi twa rito+ lerikulu ri huma evukwetsimelweni ri ku eka tintsumi ta nkombo: “Fambani mi ya chulula minkambana ya nkombo ya ku hlundzuka+ ka Xikwembu emisaveni.”

2 Kavaloko leyo sungula+ yi ya chulula nkambana wa yona emisaveni.+ Kutani vanhu lava a va ri ni mfungho wa xivandzana+ ni lava a va gandzela xifaniso+ xa xona va huma swilondza+ leswi vavaka swa khombo.

3 Kutani leya vumbirhi+ yi chulula nkambana wa yona elwandle.+ Hiloko ri hundzuka ngati+ yo fana ni ya munhu loyi a feke, kutani mimoya-xiviri hinkwayo leyi hanyaka yi fa, ina, swilo leswi nga elwandle.+

4 Kutani leya vunharhu+ yi chulula nkambana wa yona emilambyeni+ ni le minseledyaneni ya mati. Kavaloko yi hundzuka ngati.+ 5 Kutani ndzi twa ntsumi leyi ungamelaka mati yi ku: “Wena, Loyi a nga kona ni loyi a a ri kona,+ Mutshembeki,+ u lulamile, hikuva u endle swiboho+ leswi, 6 hikuva va halate ngati ya vakwetsimi ni ya vaprofeta,+ kutani u va nyike ngati+ va nwa. Swi va lulamerile.”+ 7 Kutani ndzi twa alitari yi ku: “Ina, Yehovha Xikwembu, xa Matimba Hinkwawo,+ swiboho swa wena swa vuavanyisi+ i swa ntiyiso naswona swi lulamile.”

8 Kutani leya vumune+ yi chulula nkambana wa yona edyambyini; hiloko dyambu ri pfumeleriwa ku vavula+ vanhu hi ndzilo. 9 Kavaloko vanhu va vavuriwa hi mumu lowukulu, kambe va sandza vito+ ra Xikwembu, lexi nga ni matimba+ eka makhombo lawa, naswona a va hundzukanga leswaku va xi vangamisa.+

10 Kutani leya vuntlhanu yi chulula nkambana wa yona ehenhla ka xiluvelo xa xivandzana.+ Hiloko mfumo wa xona wu hundzuka ntima,+ kutani va tixenha tindzimi ta vona hikwalaho ka switlhavi swa vona, 11 kambe va sandza+ Xikwembu xa tilo hikwalaho ka switlhavi swa vona ni hikwalaho ka swilondza swa vona, naswona a va hundzukanga emintirhweni ya vona.

12 Kutani leya vutsevu+ yi chulula nkambana wa yona enambyeni lowukulu wa Yufrata,+ kavaloko mati ma phya,+ leswaku ku lunghiseleriwa ndlela ya tihosi+ ta le vuhuma-dyambu.

13 Kutani ndzi vona marito+ manharhu lama huhuteriweke lama nga basangiki yo languteka ku fana ni mitlambya+ ma huma enon’wini wa dragona+ ni le non’wini wa xivandzana+ ni le non’wini wa muprofeta+ wa mavunwa. 14 Entiyisweni, i marito lama huhuteriweke+ hi madimona, ma endla mahlori,+ naswona ma ya etihosini+ ta misava+ hinkwayo leyi akiweke, ku ti hlengeletela nyimpi+ ya siku+ lerikulu ra Xikwembu xa Matimba Hinkwawo.+

15 “Maswivo! Ndzi ta ku fana ni khamba.+ Wa tsaka loyi a tshamaka a hitekile,+ a hlayisa tinguvu takwe ta le handle, leswaku a nga fambi a nga ambalanga kutani vanhu va hlalela tingana+ takwe.”

16 Hiloko ma ti hlengeletela endhawini leyi vuriwaka Har–​Magedoni+ hi Xiheveru.

17 Kutani leya vunkombo yi chulula nkambana wa yona emoyeni.+ Kavaloko ku twakala rito+ lerikulu evukwetsimelweni ri huma exiluvelweni, ri ku: “Swi endlekile!” 18 Kutani ku va ni rihati ni marito ni ku dzindza ka tilo, ku va ni ku tsekatseka+ lokukulu ka misava loku nga si tshamaka ku humelela hi mpfhuka vanhu va va kona emisaveni,+ a ku ri ku tsekatseka+ ka misava lokukulu ngopfu, loku hlanganisaka ndhawu leyikulu. 19 Kutani muti+ lowukulu wu avana wu va swiphemu swinharhu, miti ya matiko yi wa; hiloko Babilona Lonkulu+ a tsundzukiwa emahlweni ka Xikwembu, leswaku a nyikiwa xinwelo xa vhinyo ya vukarhi bya ku hlundzuka ka xona.+ 20 Nakambe, xihlala xin’wana ni xin’wana xi baleka, naswona tintshava ti nga ha kumeki.+ 21 Kutani xihangu+ lexikulu lexi ribye rin’wana ni rin’wana ra xona ri nga ni ntiko wa kwalomu ka talenta xi xikela evanhwini hi le tilweni, hiloko vanhu va sandza+ Xikwembu hikwalaho ka khombo ra xihangu,+ hikuva khombo ra xona a ri ri rikulu hi ndlela leyi nga tolovelekangiki.

17 Kutani yin’wana ya tintsumi ta nkombo leti a ti tamele minkambana+ ya nkombo yi fika yi vulavula na mina, yi ku: “Tana, ndzi ta ku komba ku avanyisiwa ka nghwavava+ leyikulu leyi tshameke ematini+ yo tala, 2 leyi tihosi ta misava ti endleke vumbhisa+ na yona, kasi lava tshamaka emisaveni va dakwisiwe hi vhinyo ya vumbhisa+ bya yona.”

3 Kavaloko yi ndzi teka hi matimba ya moya+ yi ndzi yisa emananga. Kutani ndzi vona wansati a khandziye xivandzana+ xa muvala wa ribungu lexi teleke mavito+ lama sandzaka, lexi a xi ri ni tinhloko+ ta nkombo ni timhondzo ta khume. 4 Naswona wansati a a ambale nguvu ya xivunguvungu+ ni ya ribungu,+ a a tisasekise hi nsuku ni maribye ya risima ni tiperela,+ evokweni rakwe a a tamele xinwelo+ xa nsuku lexi teleke swilo leswi nyenyetsaka ni swilo leswi nga basangiki+ swa vumbhisa+ byakwe. 5 Kutani emombyeni wakwe a a tsariwe vito ra xihundla,+ leri nge: “Babilona Lonkulu, mana wa tinghwavava+ ni wa swilo leswi nyenyetsaka swa misava.”+ 6 Kavaloko ndzi vona leswaku wansati u dakwe hi ngati+ ya vakwetsimi ni hi ngati ya timbhoni ta Yesu.+

Kuteloko ndzi n’wi vona ndzi hlamala hi ku hlamala+ lokukulu. 7 Hiloko ntsumi yi ku eka mina: “Ha yini u hlamala? Ndzi ta ku byela xihundla xa wansati+ ni xa xivandzana lexi n’wi rhwaleke, lexi nga ni tinhloko ta nkombo ni timhondzo+ ta khume: 8 Xivandzana lexi u xi voneke,+ a xi ri kona, kambe a xa ha ri kona, naswona xi ta tlhandluka xi huma ekheleni+ ro enta ku nga ri khale, kutani xi ta ya eku lovisiweni. Kutani lava tshamaka emisaveni, kambe mavito ya vona ma nga tsariwangiki eka buku-nsongwa ya vutomi+ hi mpfhuka misava+ yi va kona, loko va vona leswaku xivandzana lexi a xi ri kona, kambe a xa ha ri kona, kasi xi ta tlhela xi va kona, va ta hlamala swinene.

9 “Laha hi lomu ku twisisa loku nga ni vutlhari ku tirhaka kona:+ Tinhloko+ ta nkombo ti vula tintshava+ ta nkombo, leti wansati a tshamaka ehenhla ka tona. 10 Naswona ku ni tihosi ta nkombo: ta ntlhanu ti wile,+ yin’wana yi kona,+ leyin’wanyana a yi si fika,+ kambe loko yi fika yi ta fanela ku tshama nkarhinyana wo koma.+ 11 Kutani xivandzana lexi a xi ri kona, kambe xi nga ha riki kona,+ na xona i hosi ya vunhungu, kambe xi huma eka leta nkombo, naswona xi ya eku lovisiweni.

12 “Kutani timhondzo ta khume leti u ti voneke ti vula tihosi+ ta khume, leti nga siki amukelaka mfumo, kambe ti ta amukela vulawuri bya ku va tihosi nkarhi wun’we ni xivandzana. 13 Tona ti ni miehleketo yin’we, kutani matimba ni vulawuri bya tona ti swi nyika xivandzana.+ 14 Ti ta lwa ni Xinyimpfana,+ kambe, leswi xi nga Hosi ya tihosi+ ni Mufumi wa vafumi, Xinyimpfana xi ta ti hlula.+ Nakambe, lava vitaniweke, lava hlawuriweke naswona va tshembekeke, lava nga na xona, va ta ti hlula na vona.”+

15 Kavaloko yi ku eka mina: “Mati lawa u ma voneke, lawa nghwavava yi tshameke eka wona, ma vula vanhu ni mintshungu ni matiko ni tindzimi.+ 16 Kutani timhondzo+ ta khume leti u ti voneke, ni xivandzana,+ ti ta venga nghwavava,+ ti yi hlakata ni ku yi swerisa, ti dya tinyama ta yona hinkwato ni ku yi hisa hi ndzilo+ yi hela. 17 Hikuva Xikwembu xi swi nghenise etimbilwini ta tona leswaku ti endla miehleketo+ ya xona, ku nga ku endla miehleketo ya tona yin’we hi ku nyika xivandzana+ mfumo wa tona, ku fikela loko marito ya Xikwembu ma hetiseka.+ 18 Kutani wansati+ loyi u n’wi voneke u yimela muti lowukulu lowu nga ni mfumo ehenhla ka tihosi ta misava.”+

18 Endzhaku ka swilo leswi ndzi vona ntsumi yin’wana yi xika hi le tilweni, yi ri ni matimba+ lamakulu; kutani misava yi voningiwa hi ku vangama+ ka yona. 2 Kavaloko yi huwelela hi rito+ ra matimba, yi ku: “U wile! Babilona Lonkulu u wile,+ u hundzuke vutshamo bya madimona ni kaya ra mimoya+ hinkwayo leyi nga basangiki ni kaya ra tinyenyana+ hinkwato leti nga basangiki ni leti vengiwaka! 3 Hikuva matiko hinkwawo ma nwisiwe+ vhinyo ya vukarhi bya vumbhisa byakwe, naswona tihosi ta misava ti endle vumbhisa+ na yena, ni vaxavisi+ lava famba-fambaka va misava va fuwisiwe hi vukulu bya vulovolovo+ byakwe byo pfumala tingana.”

4 Kutani ndzi twa rito rin’wana ri huma etilweni ri ku: “Humani eka yena, vanhu+ va mina, loko mi nga lavi ku hlanganyela na yena eswidyohweni+ swa yena, ni loko mi nga lavi ku amukela xiphemu xa makhombo ya yena. 5 Hikuva swidyoho swa yena swi tlhandlekelane ku ya fika ehenhla etilweni,+ naswona Xikwembu xi tsundzuke+ swiendlo swa yena swa ku kala vululami. 6 N’wi nyikeni hilaha a nyikeke+ hakona, naswona eka yena endlani hi mpimo lowu andzisiweke kambirhi, ina, hi nhlayo leyi andzisiweke kambirhi ya swilo leswi a swi endleke;+ exinwelweni+ lexi a chelaka mpfangano eka xona, n’wi+ cheleleni mpfangano hi mpimo lowu andzisiweke kambirhi.+ 7 Mpimo lowu a tivangamiseke ni ku hanya ha wona evulovoloveni byo pfumala tingana, n’wi xaniseni mi n’wi kolorisa+ hi mpimo wa kona. Hikuva embilwini ya yena u tshamela ku vula a ku, ‘Ndzi tshama ndzi ri hosi ya xisati,+ a ndzi noni,+ naswona a ndzi nge pfuki ndzi kolorile.’+ 8 Hi yona mhaka leyi makhombo+ ya yena ma nga ta n’wi fikela hi siku rin’we, rifu ni ku kolola ni ndlala, naswona u ta hisiwa hi ndzilo+ a hela, hikuva Yehovha Xikwembu, la n’wi avanyiseke, u ni matimba.+

9 “Kutani tihosi+ ta misava leti endleke vumbhisa na yena ni ku hanya hi vulovolovo byo pfumala tingana ti ta n’wi rila, ti tiba hi gome hikwalaho ka yena,+ loko ti languta musi+ wa ku tshwa ka yena, 10 ti yime ekule hikwalaho ko chava ku xaniseka kakwe, ti ku,+ ‘Khombo, khombo, eka wena muti+ lowukulu, wena Babilona muti wa matimba, hikuva ku avanyisiwa ka wena ku fike+ hi nkarhi wun’we!’

11 “Nakambe, vaxavisi+ lava famba-fambaka va misava va n’wi rila naswona va kolola ha yena,+ hikuva a ka ha ri na munhu la tamaka a xava nhundzu ya vona leyi teleke, 12 nhundzu+ yo tala ya nsuku ni silivhere ni ribye ra risima ni tiperela ni tinguvu ta ntsembyana wa risima ni ta xivunguvungu ni ta silika ni ta ribungu; ni hinkwaswo swa ntsandza wa risuna ni mixaka hinkwayo ya swilo swa timhondzo ta tindlopfu ni mixaka hinkwayo ya swilo swa ntsandza wa risima ngopfu ni ya koporo ni ya nsimbi ni ya mavula;+ 13 na yona sinamoni ni xilungi xa le Indiya ni murhi wa risuna ni mafurha yo nun’hwela ni makha ni vhinyo ni mafurha ya mutlhwari ni mapa lamanene ni koroni ni tihomu ni tinyimpfu, ni tihanci ni tigolonyi ni mahlonga ni mimoya-xiviri+ leyi nga vanhu. 14 Ina, mihandzu leyinene leyi moya-xiviri wa wena a wu yi navela+ yi sukile eka wena, ni swilo leswi rhandzekaka hinkwaswo ni swilo swo vangama swi ku loverile, naswona vanhu a va nge he pfuki va swi kumile.+

15 “Vaxavisi+ lava famba-fambaka va swilo leswi, lava fuwisiweke hi yena, va ta yima ekule hi ku chava ku xaniseka kakwe naswona va ta rila va kolola,+ 16 va ku, ‘Khombo, khombo—muti+ lowukulu, lowu ambaleke nguvu ya ntsembyana wa risima ni ya xivunguvungu ni ya ribungu, ni ku hlovisiwa ngopfu hi swin’wetsin’wetsi swa nsuku ni ribye ra risima ni perela,+ 17 hikuva rifuwo lerikulu swonghasi ri lovisiwile+ hi nkarhi wun’we!’

“Ni valawuri hinkwavo va swikepe ni vanhu hinkwavo lava endzaka kun’wana ni kun’wana+ hi swikepe, ni vatluti ni hinkwavo lava tihanyisaka hi lwandle, va yimela ekule+ 18 va huwelela va langute musi wa ku tshwa ka yena, va ku, ‘Hi wihi muti lowu fanaka ni muti lowu lowukulu?’+ 19 Kutani va tichela ritshuri etinhlokweni+ va huwelela, va rila va kolola,+ va ku, ‘Khombo, khombo—muti lowukulu, lowu hinkwavo lava nga ni swikepe elwandle+ va fuweke+ hikwalaho ka vukosi bya wona, hikuva wu lovisiwe+ hi nkarhi wun’we!’

20 “Tsaka ha wona, Wena tilo,+ na n’wina vakwetsimi+ na n’wina vaapostola+ na n’wina vaprofeta, hikuva Xikwembu xi mi avanyisele wona xi humesa nxupulo!”+

21 Kavaloko ntsumi ya matimba yi tlakula ribye ro fana ni ribye lerikulu ro sila+ kutani yi ri lahlela elwandle,+ yi ku: “Babilona muti lowukulu wu ta cukumetisiwa xisweswo hi xihatla, wu lahleriwa ehansi, kutani a wu nge he kumiwi nakambe.+ 22 Naswona mpfumawulo wa vayimbeleri lava fambisanaka ni haripa ni wa swiyimbeleri ni wa vachayi va switiringo ni wa vayimbi va timhalamhala a wu nge he twakali eka wena nakambe,+ ku hava la tivaka ntirho wihi ni wihi la nga ta pfuka a kumekile eka wena nakambe, naswona ku hava mpfumawulo wa ribye ro sila lowu nga ta pfuka wu twakarile eka wena nakambe, 23 ku hava ku vonakala ka rivoni loku nga ta pfuka ku voningile eka wena nakambe, naswona ku hava rito ra muteki ni ra mutekiwa leri nga ta tshuka ri twakarile eka wena nakambe;+ hikuva vaxavisi+ va wena lava famba-fambaka a va ri vanhu+ va swiyimo swa le henhla va misava, hikuva matiko hinkwawo ma xisiwile hi swiendlo swa vungoma+ bya wena. 24 Ina, eka wona ku kumiwe ngati+ ya vaprofeta+ ni ya vakwetsimi+ ni ya hinkwavo lava dlayiweke emisaveni.”+

19 Endzhaku ka swilo leswi ndzi twa leswi fanaka ni rito lerikulu ra ntshungu lowukulu etilweni.+ Wu ku: “Dzunisani Yah!+ Ku ponisiwa+ ni ku vangama ni matimba i swa Xikwembu+ xa hina, 2 hikuva ku avanyisa ka xona i ka ntiyiso, ku lulamile.+ Hikuva xi avanyise nghwavava leyikulu leyi onheke misava hi vumbhisa bya yona, kutani xi rihisele ngati ya mahlonga ya xona evokweni+ ra yona.” 3 Hiloko va vula ra vumbirhi xikan’we-kan’we, va ku: “Dzunisani Yah!+ Kutani musi wa wona wu hambeta wu tlhandluka hi masiku ni masiku.”+

4 Kavaloko vakulu+ va 24 ni swivumbiwa+ leswi hanyaka swa mune va wa ehansi va gandzela Xikwembu lexi tshameke+ exiluvelweni, va ku: “Amen! Dzunisani Yah!”+

5 Nakambe, ku huma rito exiluvelweni, ri ku: “Dzunisani Xikwembu xa hina, n’wina mahlonga+ ya xona hinkwenu, lava mi xi chavaka, lavatsongo ni lavakulu.”+

6 Kutani ndzi twa leswi fanaka ni rito ra ntshungu lowukulu ni leswi fanaka ni mpfumawulo wa mati yo tala ni leswi fanaka ni mpfumawulo wa ku dzindza lokukulu ka tilo. Wu ku: “Dzunisani Yah,+ hikuva Yehovha Xikwembu xa hina, xa Matimba Hinkwawo,+ se i hosi.+ 7 A hi tsakeni hi tsakisisa, hi n’wi vangamisa,+ hikuva nkhuvo wa vukati+ bya Xinyimpfana wu fikile+ naswona nsati wa xona u tilunghisile.+ 8 Ina, u pfumeleriwe ku ambala nguvu ya ntsembyana wa risima, yo vangama, leyi baseke, hikuva nguvu ya ntsembyana wa risima yi yimela swiendlo swo lulama swa vakwetsimi.”+

9 Kutani yi ku eka mina: “Tsala: Va tsaka lava rhambiweke+ exilalelweni xa nkhuvo wa vukati bya Xinyimpfana.”+ Nakambe, yi ku eka mina: “Lawa i marito ya ntiyiso ya Xikwembu.”+ 10 Kutani ndzi wa ehansi emahlweni ka milenge ya yona leswaku ndzi yi gandzela.+ Kambe yi ku eka mina: “Tivonele! U nga endli sweswo!+ Mina ndzo va hlonga-kuloni swin’we ni vamakwenu lava nga ni ntirho wa ku nyikela vumbhoni hi Yesu.+ Gandzela Xikwembu;+ hikuva ku nyikela vumbhoni hi Yesu hi swona swi huhutelaka ku profeta.”+

11 Kavaloko ndzi vona matilo ma pfuleka, kutani waswivo, ku humelela hanci+ yo basa. Loyi a tshameke ehenhla ka yona u vuriwa wo Tshembeka+ ni wa Ntiyiso,+ naswona u avanyisa ni ku lwa hi ku lulama.+ 12 Mahlo ya yena i langavi ra ndzilo,+ naswona enhlokweni ya yena ku tele swidlodlo.+ U tsariwe vito+ leri nga tiviwiki hi munhu kambe ro tiviwa hi yena, 13 naswona u ambale nguvu ya le handle leyi xuviweke hi ngati,+ kutani vito leri a vitaniwaka ha rona i Rito+ ra Xikwembu. 14 Nakambe, mavuthu lawa a ma ri etilweni a ma n’wi landzela hi tihanci to basa, naswona a ma ambale nguvu ya ntsembyana wa risima, yo basa, leyi tengeke. 15 Kutani enon’wini wa yena a ku huma banga+ ro leha ro kariha, leswaku a khemba matiko ha rona, naswona u ta ma risa hi nhonga ya nsimbi.+ U pyanyetela ni xikamelo+ xa vhinya xa vukarhi bya ku hlundzuka ka Xikwembu+ xa Matimba Hinkwawo. 16 Kutani engubyeni ya yena ya le handle, hileswaku endzhumbini wa yena, u tsariwe vito leri nge, Hosi ya tihosi ni Mufumi wa vafumi.+

17 Ndzi vona ntsumi nakambe yi yime edyambyini, yi huwelela hi rito lerikulu yi byela tinyenyana+ hinkwato leti hahaka empfhukeni yi ku: “Tanani haleno, hlengeletanelani xilalelo lexikulu xa Xikwembu, 18 leswaku mi dya tinyama+ ta tihosi ni tinyama ta tindhuna ta nyimpi ni tinyama ta vavanuna+ va matimba ni tinyama ta tihanci,+ ni ta lava va ti gadeke, ni tinyama ta hinkwavo, ta lava ntshunxekeke ni ta mahlonga ni ta lavatsongo ni lavakulu.”

19 Kutani ndzi vona xivandzana+ ni tihosi+ ta misava ni mavuthu ya tona va hlengeletanile leswaku va lwa nyimpi+ ni loyi a gadeke hanci+ swin’we ni vuthu ra yena. 20 Kavaloko xivandzana+ xi khomiwa, swin’we ni muprofeta+ wa mavunwa la endleke mahlori+ emahlweni ka xona, lawa a hambukiseke ha wona lava amukeleke mfungho+ wa xivandzana ni lava gandzelaka xifaniso+ xa xona. Hi vumbirhi bya vona va lahleriwa etiveni ra ndzilo leri pfurhaka xivavula+ va ri karhi va hanya. 21 Kambe lavan’wana hinkwavo va dlayiwa hi banga ro leha ra loyi a gadeke hanci,+ ku nga banga leri a ri huma enon’wini+ wa yena. Tinyenyana+ hinkwato ti xurha+ hi tinyama ta vona.+

20 Kutani ndzi vona ntsumi yi xika hi le tilweni yi ri ni xilotlelo xa khele ro enta+ ni nketana leyikulu evokweni ra yona. 2 Kavaloko yi khoma dragona,+ nyoka+ ya khale, ku nga Diyavulosi+ na Sathana,+ yi n’wi boha ku ringana malembe ya 1 000. 3 Kutani yi n’wi lahlela ekheleni+ ro enta, yi ri pfala yi ri tiyisa, leswaku a nga ha tshuki a hambukisa matiko kukondza ku hela malembe ya 1 000. Endzhaku ka swilo leswi, u fanele ku ntshunxiwa nkarhinyana.+

4 Kavaloko ndzi vona swiluvelo,+ ku ri ni lava tshamiseke eka swona, kutani va nyikiwa+ matimba ya ku avanyisa. Ina, ndzi vona mimoya-xiviri ya lava dlayiweke hi xihloka hikwalaho ka vumbhoni lebyi va byi nyikeleke malunghana na Yesu ni hikwalaho ka ku vulavula hi Xikwembu, lava nga gandzelangiki xivandzana+ kumbe xifaniso+ xa xona, lava nga amukelangiki mfungho emimombyeni ya vona ni le mavokweni+ ya vona. Kutani va hanya nakambe, va va tihosi+ na Kreste ku ringana malembe ya 1 000. 5 (Vafi+ lavan’wana hinkwavo a va hanyanga nakambe ku fikela loko ku hele malembe ya 1 000.)+ Loku i ku pfuka ko sungula+ ka vafi. 6 Va tsaka+ naswona va kwetsima+ hinkwavo lava nga ni xiphemu eku pfukeni ko sungula ka vafi; rifu+ ra vumbirhi a ri na matimba+ eka vona, kambe va ta va vaprista+ va Xikwembu ni va Kreste, naswona va ta va tihosi swin’we na yena ku ringana malembe wolawo ya 1 000.+

7 Kutani hi ku hatlisa loko ku hele malembe ya 1 000, Sathana u ta ntshunxiwa ekhotsweni rakwe, 8 naswona u ta huma a ya hambukisa matiko lama nga etinhleni ta mune ta misava, yena Gogo na Magogo, leswaku a ma hlengeletela nyimpi. Nhlayo ya vona a yi kotisa sava ra lwandle.+ 9 Kutani va ya endhawini yo anama ya misava, va rhendzela mixaxa ya vakwetsimi+ ni muti+ lowu rhandzekaka. Kambe ndzilo wu xika hi le tilweni wu va lovisa.+ 10 Kavaloko Diyavulosi+ loyi a a va hambukisa a lahleriwa etiveni ra ndzilo ni xivavula, leri xivandzana+ ni muprofeta wa mavunwa havambirhi a va ri eka rona;+ kutani va ta xanisiwa vusiku ni nhlikanhi hi masiku ni masiku.

11 Kavaloko ndzi vona xiluvelo lexikulu xo basa ni loyi a tshameke eka xona.+ Misava ni tilo swi nyamalala+ emahlweni ka yena, kutani ndhawu ya swona a ya ha kumekanga. 12 Kavaloko ndzi vona vafi, lavakulu ni lavatsongo,+ va yime emahlweni ka xiluvelo, kutani ku pfuriwa tibuku-nsongwa. Kambe ku pfuriwa buku-nsongwa yin’wanyana; i buku-nsongwa ya vutomi.+ Vafi va avanyisiwa hi ku landza swilo leswi tsariweke eka tibuku-nsongwa hi ku ya hi swiendlo+ swa vona. 13 Kutani lwandle ri humesa vafi lava nga eka rona, rifu ni Hayidesi swi humesa vafi+ lava nga eka swona, kavaloko munhu ni munhu a avanyisiwa hi ku ya hi swiendlo+ swa yena. 14 Kutani rifu+ ni Hayidesi swi lahleriwa etiveni ra ndzilo. Tiva leri ra ndzilo+ ri vula rifu+ ra vumbirhi. 15 Ku tlula kwalaho, mani na mani la kumekaka a nga tsariwanga ebukwini ya vutomi+ a a lahleriwa etiveni ra ndzilo.+

21 Kavaloko ndzi vona tilo+ lerintshwa ni misava+ leyintshwa; hikuva tilo+ ro sungula ni misava+ yo sungula a swi hundzile, ni lwandle+ ri nga ha ri kona. 2 Ndzi vona ni muti+ wo kwetsima, Yerusalema Lowuntshwa, wu xika hi le tilweni+ wu huma eka Xikwembu, wu lunghisiwe wonge i mutekiwa+ a tisasekisele nuna+ wa yena. 3 Kutani ndzi twa rito lerikulu ri huma exiluvelweni ri ku: “Waswivo! Ntsonga+ wa Xikwembu wu le vanhwini, xi ta tshama+ na vona, naswona vona va ta va vanhu+ va xona. Xikwembu hi xiviri xi ta va na vona.+ 4 Kutani xi ta sula mihloti+ hinkwayo ematihlweni ya vona, rifu a ri nge he vi kona,+ hambi ku ri ku kolola, ni xirilo ni xitlhavi a swi nge he vi kona.+ Swilo swo sungula swi hundzile.”+

5 Kutani Loyi a tshameke exiluvelweni+ a ku: “Waswivo, ndzi endla swilo hinkwaswo swi va leswintshwa.”+ A tlhela a ku: “Tsala, hikuva marito lawa ma tshembekile, i ya ntiyiso.” 6 Kutani a ku eka mina: “Se swi endlekile! Hi mina Alfa na Omega, masungulo ni makumu.+ Mani na mani la khomiweke hi torha ndzi ta n’wi nwisa mahala eka nseledyana wa mati ya vutomi.+ 7 Mani na mani la hlulaka u ta dya ndzhaka ya swilo leswi, kutani ndzi ta va Xikwembu+ xa yena, yena a va n’wana+ wa mina. 8 Kambe loko ku ri matoya ni lava nga riki na ripfumelo+ ni lava nyenyetsaka hikwalaho ka thyaka+ ra vona ni lava dlayaka+ hi vomu ni timbhisa+ ni lava tirhisaka vungoma ni vagandzeri va swifaniso+ swa hava ni vahembi+ hinkwavo, xiavelo xa vona xi ta va etiveni leri pfurhaka ndzilo+ ni xivavula.+ Rona ri vula rifu+ ra vumbirhi.”

9 Kavaloko ku ta yin’wana ya tintsumi ta nkombo leti a ti tamele minkambana ya nkombo leyi a yi tele makhombo+ yo hetelela ya nkombo, kutani yi vulavula na mina yi ku: “Tana haleno, ndzi ta ku komba mutekiwa, nsati+ wa Xinyimpfana.” 10 Kutani yi ndzi teka hi matimba ya moya yi ndzi yisa entshaveni+ leyikulu, leyi tlakukeke, yi ndzi komba Yerusalema muti+ wo kwetsima wu xika hi le tilweni eka Xikwembu+ 11 wu ri ni ku vangama ka Xikwembu.+ Ku vangama ka wona a ku fana ni ribye ra risima ngopfu, kukotisa ribye ra yaspere leri hatimaka ku fana ni kristala yo tenga.+ 12 A wu ri ni rirhangu+ lerikulu ro tlakuka naswona a wu ri ni tinyangwa ta 12, kutani etinyangweni a ku ri ni tintsumi ta 12, a ku tsariwe mavito ya tinyimba leta 12 ta vana va Israyele.+ 13 Evuxeni a ku ri ni tinyangwa tinharhu, en’walungwini ku ri ni tinyangwa tinharhu, edzongeni ku ri ni tinyangwa tinharhu, evupela-dyambu ku ri ni tinyangwa+ tinharhu. 14 Rirhangu ra muti na rona a ri ri ni maribye ya masungulo+ ya 12, eka wona a ku ri ni mavito ya 12 ya vaapostola+ va 12 va Xinyimpfana.

15 Kutani loyi a a vulavula na mina a a khome rihlanga+ ra nsuku leri nga xipimo, leswaku a pima muti ni tinyangwa ta wona ni rirhangu+ ra wona. 16 Muti wu ni matlhelo ya mune yo ringana, naswona ku leha ka wona i kukulu ku ringana ni ku anama ka wona. Kavaloko yi pima muti+ hi rihlanga, wu va tistadiya ta 12 000; ku leha ni ku anama ni ku tlakuka ka wona swa ringana. 17 Hiloko yi pima ni rirhangu ra wona, ri va swisungunu swa 144, hi ku ya hi xipimo xa munhu, ni xipimo xa ntsumi hilaha ku fanaka. 18 Kutani rirhangu ra wona ri akiwe hi yaspere,+ naswona muti wu akiwe hi nsuku wo tenga ku fana ni nghilazi yo tenga. 19 Masungulo+ ya rirhangu ra muti ma sasekisiwe hi mixaka hinkwayo ya maribye+ ya risima: masungulo yo rhanga a ma ri yaspere,+ ya vumbirhi ma ri safiri,+ ya vunharhu ma ri kalkedoni, ya vumune ma ri emeralda,+ 20 ya vuntlhanu ma ri sardonikisi, ya vutsevu ma ri sardiyo, ya vunkombo ma ri krisolita,+ ya vunhungu ma ri berila, ya vukaye ma ri topazi,+ ya vukhume ma ri krisopurasi, ya vu-11 ma ri yakinta, ya vu-12 ma ri ametisita.+ 21 Nakambe, tinyangwa leta 12 a ti ri tiperela ta 12; nyangwa yin’wana ni yin’wana a yi endliwe hi perela+ yin’we. Kutani ndlela yo anama ya muti a yi ri nsuku wo tenga, wonge i nghilazi yo vonikela.

22 Kutani a ndzi vonanga tempele eka wona,+ hikuva Yehovha+ Xikwembu xa Matimba Hinkwawo+ i tempele+ ya wona, na xona Xinyimpfana i tempele ya wona.+ 23 Naswona muti a wu lavi dyambu kumbe n’weti leswaku wu voninga ehenhla ka wona, hikuva ku vangama ka Xikwembu ka wu voninga,+ naswona rivoni ra wona i Xinyimpfana.+ 24 Kutani matiko ma ta famba hi ku vonakala ka wona,+ tihosi ta misava ti ta tisa ku vangama ka tona eka wona.+ 25 Kutani tinyangwa ta wona a ti nge pfariwi nikatsongo ninhlikanhi,+ hikuva vusiku a byi nge vi kona kwalaho.+ 26 Kutani ti ta tisa ku vangama ni ku xiximeka ka matiko eka wona.+ 27 Kambe xin’wana ni xin’wana lexi nga kwetsimiki ni munhu un’wana ni un’wana loyi a tamaka a endla xilo lexi nyenyetsaka+ ni ku hemba mavunwa+ a nge ngheni eka wona nikatsongo;+ ku ta nghena ntsena lava tsariweke eka buku-nsongwa ya vutomi ya Xinyimpfana.+

22 Kutani yi ndzi komba nambu wa mati ya vutomi,+ lowu tengeke ku fana ni kristala, wu khuluka wu huma exiluvelweni xa Xikwembu ni xa Xinyimpfana+ 2 wu ya ehansi exikarhi ka ndlela ya wona yo anama. Haleno ka nambu ni hala ntsungeni ka wona a ku ri ni mirhi+ ya vutomi leyi humesaka mixaka ya mihandzu ya 12, leyi vekaka mihandzu ya yona n’hweti+ yin’wana ni yin’wana. Naswona matluka ya mirhi a ma ri ya ku hanyisa matiko.+

3 Kutani kwalaho a ku nge he vi na ndzhukano+ ni wun’we. Kambe xiluvelo xa Xikwembu+ ni xa Xinyimpfana+ swi ta va emutini wolowo, naswona mahlonga ya xona ma ta xi endlela ntirho wo kwetsima;+ 4 ma ta vona xikandza+ xa xona, kutani vito ra xona ri ta va emimombyeni+ ya wona. 5 Nakambe, vusiku a byi nge he vi kona,+ a ma lavi ku voninga ka rivoni naswona a ma na ku voninga ka dyambu hikuva Yehovha Xikwembu u ta ma voningela,+ kutani ma ta va tihosi hi masiku ni masiku.+

6 Hiloko a ku eka mina: “Marito lawa ma tshembekile i ya ntiyiso;+ ina, Yehovha Xikwembu xa marito lama huhuteriweke+ ya vaprofeta+ u rhume ntsumi ya yena ku komba mahlonga ya yena swilo leswi faneleke ku endleka hi ku hatlisa.+ 7 Kutani waswivo, ndza ta hi ku hatlisa.+ Wa tsaka munhu un’wana ni un’wana la hlayisaka marito ya vuprofeta bya buku-nsongwa+ leyi.”

8 Ina, hi mina Yohane la tweke ni ku vona swilo leswi. Kuteloko ndzi swi twile ni ku swi vona, ndzi wa ehansi leswaku ndzi gandzela+ emahlweni ka milenge ya ntsumi leyi a yi ndzi komba swilo leswi. 9 Kambe yi ndzi byela yi ku: “Tivonele! U nga endli sweswo! Mina ndzo va hlonga-kuloni swin’we ni vamakwenu lava nga vaprofeta+ ni lava hlayisaka marito ya buku-nsongwa leyi. Gandzela Xikwembu.”+

10 Yi engeta yi ndzi byela yi ku: “U nga lemeli marito ya vuprofeta bya buku-nsongwa leyi, hikuva nkarhi lowu vekiweke wu kusuhi.+ 11 Loyi a endlaka leswi nga lulamangiki, a a ye emahlweni a endla leswi nga lulamangiki;+ kutani loyi a thyakeke a a ye emahlweni a thyakisiwa;+ kambe loyi a lulameke+ a a ye emahlweni a endla leswi lulameke, naswona mukwetsimi a a ye emahlweni a kwetsimisiwa.+

12 “ ‘Waswivo, ndza ta hi ku hatlisa,+ ndzi ni hakelo+ leyi ndzi yi humesaka, leswaku ndzi nyika un’wana ni un’wana hi ku ya hi ntirho wa yena.+ 13 Hi mina Alfa na Omega,+ wo sungula ni wo hetelela,+ masungulo ni makumu. 14 Va tsaka lava hlantswaka tinguvu+ ta vona to leha, leswaku va kuma mfanelo ya ku ya emirhini ya vutomi+ ni leswaku va kota ku nghena emutini hi tinyangwa+ ta wona. 15 Ehandle ku ni timbyana+ ni lava tirhisaka vungoma+ ni timbhisa+ ni lava dlayaka hi vomu ni vagandzeri va swifaniso swa hava ni hinkwavo lava rhandzaka mavunwa ni lava tamaka va hemba.’+

16 “ ‘Mina, Yesu, ndzi rhume ntsumi ya mina leswaku yi nyikela vumbhoni eka n’wina hi swilo leswi swa mavandlha. Ndzi rimitsu+ ni ntukulu+ wa Davhida, naswona ndzi nyeleti+ ya mixo leyi vangamaka.’ ”

17 Kutani moya+ ni mutekiwa+ va hambeta va ku: “Tana!” Naswona mani na mani la swi twaka a a vule a ku: “Tana!”+ Mani na mani la khomiweke hi torha a a te;+ mani na mani la swi navelaka a a nwe mati ya vutomi mahala.+

18 “Ndzi nyikela vumbhoni eka munhu un’wana ni un’wana la twaka marito ya vuprofeta bya buku-nsongwa leyi: Loko munhu hambi a ri wihi a engetela+ eka swilo leswi, Xikwembu xi ta n’wi engetelela makhombo+ lama tsariweke eka buku-nsongwa leyi; 19 naswona loko munhu hambi a ri wihi a susa xo karhi emaritweni ya buku-nsongwa ya vuprofeta lebyi, Xikwembu xi ta susa xiavelo xa yena emirhini ya vutomi+ ni le mutini wo kwetsima,+ ku nga swilo leswi ku tsariweke ha swona eka buku-nsongwa leyi.

20 “Loyi a nyikelaka vumbhoni bya swilo leswi u ri, ‘Ina; Ndza ta hi ku hatlisa.’ ”+

“Amen! Tana, Hosi Yesu.”

21 Onge musa lowu nga faneriwiki wa Hosi Yesu Kreste wu nga va ni vakwetsimi.+