MAHUNGU LAMANENE HI KU YA HI MATEWU

1 Buku ya matimu* ya Yesu Kreste,* n’wana wa Davhida,+ n’wana wa Abrahama:+

17 Switukulwana hinkwaswo ku sukela eka Abrahama ku fikela eka Davhida a swi ri 14; ku sukela eka Davhida ku ya fika hi nkarhi lowu va yisiweke evuhlongeni eBabilona a ku ri switukulwana swa 14; ku sukela hi nkarhi wa ku yisiwa ka vona eBabilona ku fikela eka Kreste a ku ri switukulwana swa 14.

18 Kambe Yesu Kreste u velekiwe hi ndlela leyi. Hi nkarhi lowu mana wakwe Mariya a a tshembisane ku tekana na Yosefa, u kumeke a tikile hi moya lowo kwetsima*+ va nga si tekana. 19 Hambiswiritano, hikwalaho ka leswi Yosefa nuna wakwe a a lulamile naswona a a nga lavi ku n’wi endla xihlekiso evanhwini, u kunguhate ku n’wi tshika exihundleni.+ 20 Kambe endzhaku ka loko a ehleketisise hi mhaka leyi, hiloko ntsumi ya Yehovha* yi humelela eka yena enorhweni yi ku: “Yosefa, n’wana wa Davhida, u nga chavi ku teka Mariya nsati wa wena u famba na yena ekaya, hikuva ku tika kakwe ku vangiwe hi moya lowo kwetsima.+ 21 Mariya u ta veleka n’wana wa jaha, wena u ta n’wi thya vito ra Yesu,*+ hikuva u ta ponisa vanhu vakwe eswidyohweni swa vona.”+ 22 Hinkwaswo leswi swi humelerile leswaku ku endleka leswi vuriweke hi Yehovha* hi ku tirhisa muprofeta wakwe, a ku: 23 “Vonani! Nhwana u ta tika kutani a veleka n’wana wa jaha, u ta thyiwa vito ra Emanuwele,”+ leri loko ri hundzuluxeriwa ri vulaka, “Xikwembu Xi Na Hina.”+

24 Hiloko Yosefa a pfuka evurhongweni kutani a endla hilaha ntsumi ya Yehovha* yi n’wi leriseke hakona, a teka nsati wakwe a muka na yena. 25 Kambe a nga etlelanga na yena ku fikela loko a veleka n’wana wa jaha,+ kutani a n’wi thya vito ra Yesu.+

2 Endzhaku ka loko Yesu a velekiwile eBetlehema+ wa Yudiya hi nkarhi wa ku fuma ka hosi Heroda,*+ ku te vangoma va tinyeleti eYerusalema lava humaka etikweni ra le Vuxeni, 2 va fika va ku: “U kwihi loyi a nga velekeriwa ku va hosi ya Vayuda?+ Hi vone nyeleti ya yena loko hi ri eVuxeni, kutani hi tele ku ta n’wi khinsamela.” 3 Loko Hosi Heroda a twa mhaka leyi, a sungula ku karhateka ni muti hinkwawo wa Yerusalema wu sungula ku karhateka. 4 A hlengeleta vaprista lavakulu hinkwavo ni vatsari etikweni, kutani a va vutisa laha Kreste* a a ta velekeriwa kona. 5 Va n’wi hlamula va ku: “EBetlehema+ wa Yudiya, hikuva muprofeta u tsale a ku: 6 ‘Wena Betlehema wa tiko ra Yuda, a wu ximutana exikarhi ka vafumi va Yuda, hikuva eka wena ku ta huma hosi, leyi nga ta risa vanhu va mina, ku nga vanhu va Israyele.’”+

7 Kutani Heroda a vulavula ni vangoma va tinyeleti exihundleni leswaku a ta kumisisa nkarhi wa ku humelela ka nyeleti. 8 A va rhuma eBetlehema kutani a ku: “Fambani mi ya lava n’wana hi vukheta, loko mi n’wi kumile mi vuya mi ta ndzi byela, leswaku na mina ndzi ta ya n’wi khinsamela.” 9 Loko va twa leswi hosi yi swi vuleke, va khoma ndlela va rhangeriwe hi nyeleti leyi va yi voneke loko va ha ri eVuxeni,+ yi fika yi yima laha n’wana a a ri kona. 10 Kuteloko va vona nyeleti yi yima, va tsaka swinene. 11 Loko va nghena endlwini, va vona n’wana a ri na Mariya mana wakwe, kutani va wela ehansi, va n’wi khinsamela. Va pfula mindzhwalo ya vona va n’wi nyika tinyiko, ku nga nsuku, murhi wa risuna ni mira. 12 Hambiswiritano, leswi Xikwembu a xi va lemukisile enorhweni+ leswaku va nga tlheleli eka Heroda, va muke hi ndlela yin’wana.

13 Loko va fambile, ntsumi ya Yehovha* yi humelela eka Yosefa enorhweni+ yi ku: “Pfuka, u teka n’wana ni mana wakwe u balekela eEgipta, u tshama kona kukondza ndzi ku rhumela rito, hikuva Heroda u ta hlota n’wana leswaku a n’wi dlaya.” 14 Kutani Yosefa a pfuka nivusiku a teka n’wana ni mana wakwe, va balekela eEgipta. 15 U tshame kwalaho kukondza Heroda a fa. Ku endleke leswi vuriweke hi Yehovha* hi ku tirhisa muprofeta wakwe, a ku: “Ndzi vitane n’wananga a huma eEgipta.”+

16 Loko Heroda a vona leswaku vangoma va tinyeleti va n’wi tlhariherile, a hlundzuka ngopfu. Kutani a lerisa leswaku ku dlayiwa vana hinkwavo va vafana eBetlehema ni le migangeni ya wona hinkwayo, lava nga ni malembe mambirhi ku ya ehansi, hi ku landza nkarhi lowu a nga wu kumisisa eka vangoma va tinyeleti.+ 17 Kutani ku endleka leswi nga vuriwa hi muprofeta Yeremiya, loyi a nga te: 18 “Ku twakale rito eRhama, ra ku kalakala ni mukhosi lowukulu. A ku ri Rahele+ a rilela vana vakwe naswona a a nga pfumeli ku chaveleriwa, hikuva a va ha ri kona.”+

19 Loko Heroda a file, ntsumi ya Yehovha* yi humelela eka Yosefa enorhweni+ le Egipta 20 yi ku: “Pfuka u teka n’wana ni mana wakwe, u khoma ndlela u ya etikweni ra Israyele, hikuva lava a va lava ku dlaya n’wana va file.” 21 Hiloko a pfuka, a teka n’wana ni mana wakwe, a tlhelela etikweni ra Israyele. 22 Kambe loko a twa leswaku eYudiya a ku fuma Arkelawusi loyi a siveke tata wakwe Heroda, a chava ku ya kona. Ku engetela kwalaho, Xikwembu xi n’wi lemukisile enorhweni+ leswaku a ya eGaleliya.+ 23 A fika a tshama emutini lowu vuriwaka Nazareta,+ leswaku ku endleka leswi vuriweke hi ku tirhisa vaprofeta, va ku: “U ta vuriwa Munazareta.”*+

3 Emasikwini wolawo Yohane+ Mukhuvuri a a chumayela+ emananga ya le Yudiya, 2 a ku: “Hundzukani, hikuva Mfumo wa matilo wu tshinele.”+ 3 Kahlekahle, leswi hi swona leswi vuriweke hi muprofeta Esaya+ loko a ku: “Rito ra loyi a huwelelaka emananga ri ri: ‘Lunghisani ndlela ya Yehovha!* Basisani tindlela takwe.’”+ 4 Yohane a a ambala swiambalo leswi endliweke hi voya bya kamela a tlhela a boha bandhi leri endliweke hi dzovo.+ A a dya tinjiya ni vulombe bya le nhoveni.+ 5 Kutani vanhu va le Yerusalema ni le tikweni hinkwaro ra Yudiya ni tiko hinkwaro leri nga ekusuhi na Yordani a va huma va ya eka yena,+ 6 a a va khuvula eNambyeni wa Yordani,+ va vula swidyoho swa vona va nga fihli nchumu.

7 Loko a vona vo tala va Vafarisi ni Vasaduki+ va ta eku khuvuriweni, a ku eka vona: “N’wina vana va timhiri,*+ i mani loyi a nga mi lemukisa leswaku mi balekela vukarhi bya siku ra Xikwembu?+ 8 Hikwalaho, mitirho ya n’wina a yi kombise leswaku mi hundzukile. 9 Mi nga tibyeli mi ku, ‘Tata wa hina i Abrahama.’+ Ndzi mi byela ntiyiso leswaku Xikwembu xi nga vumbela Abrahama vana hi maribye lawa. 10 Xihloka se xi lunghekele ku tsema timitsu ta mirhi. Murhi wun’wana ni wun’wana lowu nga humesiki mihandzu leyinene wu ta tsemiwa wu hoxiwa endzilweni.+ 11 Mina ndzi mi khuvula hi mati hileswi mi hundzukeke,+ kambe loyi a taka endzhaku ka mina wa ndzi tlula hi matimba, naswona a swi ndzi faneli ni ku n’wi hluvula maphaxani.+ Yoloye u ta mi khuvula hi moya lowo kwetsima+ ni hi ndzilo.+ 12 U khome rihlelo rakwe ro peperha, naswona u ta basisa xivuya* xakwe, a hlengeleta koroni yakwe exitlatini, kambe muhungu* u ta wu hisa hi ndzilo+ lowu nga timekiki.”

13 Yesu a suka eGaleliya a ya eka Yohane eYordani, leswaku a ta khuvuriwa hi Yohane.+ 14 Kambe Yohane a ringeta ku n’wi sivela, a ku: “Hi wena loyi u faneleke u khuvula mina, hikwalaho ka yini wena u ta eka mina?” 15 Yesu a n’wi hlamula a ku: “U nga ndzi siveli, leswaku hi ta kota ku endla hinkwaswo leswi Xikwembu xi swi lavaka.” Hiloko Yohane a tshika ku n’wi sivela. 16 Loko Yesu a khuvuriwile, u hatle a huma ematini; hiloko matilo ma pfuleka,+ a vona moya wa Xikwembu wu xika ku fana ni tuva wu ta ehenhla ka yena.+ 17 Ku tlhela ku twala rito leri humaka ematilweni,+ ri ku: “Loyi i N’wananga,+ la rhandzekaka, loyi ndzi n’wi amukeleke.”+

4 Kutani moya wa Xikwembu wu yisa Yesu emananga leswaku a ya ringiwa+ hi Diyavulosi.+ 2 Endzhaku ka loko a titsone swakudya masiku ya 40 ni vusiku bya 40, a khomiwa hi ndlala. 3 Hiloko ku ta Muringi+ a ku eka yena: “Loko u ri n’wana wa Xikwembu, byela maribye lawa ma hundzuka swinkwa.” 4 Kambe a hlamula a ku: “Ku tsariwile: ‘Munhu a nga fanelanga a hanya hi xinkwa ntsena, kambe u ta hanya ni hi rito rin’wana ni rin’wana leri humaka enon’wini wa Yehovha.’”*+

5 Hiloko Diyavulosi a famba na yena emutini wo kwetsima,+ a n’wi yimisa ehenhla* ka tempele+ 6 kutani a ku eka yena: “Loko u ri n’wana wa Xikwembu, tilahlele ehansi, hikuva ku tsariwile: ‘Xi ta lerisa tintsumi ta xona mayelana na wena,’ kutani ‘Ti ta ku khawulela hi mavoko ya tona leswaku nenge wa wena wu nga bi ribye.’”+ 7 Yesu a ku eka yena: “Nakambe ku tsariwile: ‘U nga tshuki u ringa Yehovha* Xikwembu xa wena.’”+

8 Diyavulosi a tlhela a famba na yena entshaveni leyi tlakukeke ngopfu, a n’wi komba mifumo hinkwayo ya misava ni ku vangama ka yona.+ 9 Kutani a ku eka yena: “Ndzi ta ku nyika swilo leswi hinkwaswo loko wo khinsama u ndzi gandzela.” 10 Yesu a ku eka yena: “Suka, Sathana! Hikuva ku tsariwile: ‘U fanele u gandzela Yehovha* Xikwembu xa wena+ u tirhela yena ntsena.’”+ 11 Kutani Diyavulosi a n’wi siya,+ hiloko ku fika tintsumi ti n’wi pfuna.+

12 Loko a twa leswaku Yohane u khomiwile,+ a suka a ya eGaleliya.+ 13 Nakambe, loko a suka eNazareta, u fike a tshama eKapernawume+ etlhelo ka lwandle, emigangeni ya Zebuloni na Neftali, 14 leswaku ku ta endleka leswi nga vuriwa hi muprofeta Esaya loyi a nga te: 15 “Wena tiko ra Zebuloni ni tiko ra Neftali, endleleni leyi yaka elwandle, entsungeni wa Yordani, Galeliya wa matiko! 16 Vanhu lava tshamaka emunyameni va vone ku vonakala lokukulu, ni lava tshamaka etikweni leri nga ni ndzhuti wa rifu, ku vonakala+ ku va voningerile.”+ 17 Ku sukela enkarhini wolowo Yesu a sungula ku chumayela a ku: “Hundzukani, hikuva Mfumo wa matilo wu tshinele.”+

18 Loko a famba etlhelo ka Lwandle ra Galeliya, a vona vamakwavo vambirhi, Simoni loyi a vuriwaka Petro+ na Andriya makwavo, va ri karhi va hoxa nete elwandle, hikuva a va ri vaphasi va tihlampfi.+ 19 A ku eka vona: “Ndzi landzeleni, ndzi ta mi endla vaphasi va vanhu.”+ 20 Hiloko va hatla va siya tinete ta vona va n’wi landzela.+ 21 Loko a suka kwalaho, a vona van’wana vambirhi lava a va ri vamakwavo, Yakobo n’wana wa Zebediya na Yohane makwavo.+ A va ri exikepeni na Zebediya tata wa vona, va ri karhi va lunghisa tinete ta vona, hiloko a va vitana.+ 22 Hi ku hatlisa va siya xikepe ni tata wa vona, va n’wi landzela.

23 Kutani a famba etikweni hinkwaro ra Galeliya,+ a dyondzisa emasinagogeni* ya vona+ ni ku chumayela mahungu lamanene ya Mfumo. A horisa mavabyi yo hambanahambana ni vulema bya mixaka hinkwayo.+ 24 Ndhuma yakwe yi hangalaka etikweni hinkwaro ra Siriya, kutani va n’wi tisela hinkwavo lava karhatiwaka hi mavabyi yo hambanahambana ni switlhavi,+ lava nga ni madimona,+ switshetshela+ ni lava omeke swirho, kutani a va hanyisa. 25 Hikwalaho ka sweswo, a landzeriwa hi mintshungu ku suka eGaleliya, eDekapolisi,* eYerusalema, eYudiya ni le ntsungeni wa Yordani.

5 Loko a vona mintshungu, a tlhandlukela entshaveni; loko a tshame ehansi, vadyondzisiwa vakwe va ya eka yena. 2 Hiloko a sungula ku va dyondzisa, a ku:

3 “Va tsaka lava tikarhatelaka ku va ni vuxaka ni Xikwembu,+ hikuva Mfumo wa matilo i wa vona.

4 “Va tsaka lava rilaka, hikuva va ta chaveleriwa.+

5 “Va tsaka lavo rhula,+ hikuva va ta dya ndzhaka ya misava.+

6 “Va tsaka lava nga ni ndlala ni torha+ ra leswo lulama, hikuva va ta eneriseka.+

7 “Va tsaka lava nga ni tintswalo,+ hikuva va ta kombiwa tintswalo.

8 “Va tsaka lava nga ni timbilu leti tengeke,+ hikuva va ta vona Xikwembu.

9 “Va tsaka lava kondletelaka ku rhula,+ hikuva va ta vuriwa vana va Xikwembu.

10 “Va tsaka lava xanisiweke hikwalaho ka leswo lulama,+ hikuva Mfumo wa matilo i wa vona.

11 “Tsakani loko vanhu va mi rhuketela+ ni ku mi xanisa,+ va mi hembela hi swilo swo tala swo homboloka hikwalaho ka mina.+ 12 Tsakani swinene,+ hikuva hakelo ya n’wina+ i yikulu ematilweni naswona vaprofeta lava veke kona mi nga si va kona va xanisiwe tano.+

13 “Mi munyu+ wa misava, kambe loko munyu wu heleriwa hi matimba, xana ku dzunga ka wona ku nga pfuxetiwa njhani? A wa ha pfuni nchumu, wu ta cukumetiwa ehandle+ wu kandziyeriwa hi vanhu.

14 “Mi ku vonakala ka misava.+ Muti a wu nge tumbeli loko wu akiwe ehenhla ka ntshava. 15 Loko vanhu va lumeka rivoni a va ri veki ehansi ka basikiti,* kambe va ri veka ehenhla ka xo tlhandleka rivoni, kutani ri voningela hinkwavo lava nga endlwini.+ 16 Hi ndlela yoleyo, ku vonakala ka n’wina a ku voninge emahlweni ka vanhu,+ leswaku va ta vona mitirho ya n’wina leyinene+ kutani va vangamisa Tata wa n’wina loyi a nga ematilweni.+

17 “Mi nga ehleketi leswaku ndzi tele ku ta herisa Nawu kumbe Vaprofeta. Ndzi tele ku ta hetisisa, ku nga ri ku ta herisa.+ 18 Ndzi tiyisile ndzi ri eka n’wina, matilo ni misava swi nga hatla swi nyamalala ku ri ni ku va nhlanga yin’we leyitsongo eka hinkwato kumbe xiphemu xa yona xi nyamalala eNawini, ku nga si endleka swilo hinkwaswo leswi wu swi vuleke.+ 19 Hikokwalaho, loyi a tlulaka wun’wana wa milawu leyi vanhu va ehleketaka leswaku a hi wa nkoka, a tlhela a dyondzisa van’wana ku yi tlula, a nge faneleki ku nghena eMfun’weni wa matilo. Kambe loyi a yingisaka a tlhela a dyondzisa van’wana, u ta faneleka ku nghena eMfun’weni wa matilo. 20 Ndza mi byela, loko swiendlo swa n’wina swo lulama swi nga tluli swa vatsari ni Vafarisi,+ mi nga ka mi nga ngheni eMfun’weni wa matilo.+

21 “Mi swi twile leswaku lava khale va byeriwe leswi: ‘U nga tshuki u dlaya,+ kambe loyi a dlayaka u ta tihlamulela ehubyeni ya vuavanyisi.’+ 22 Kambe, ndza mi byela leswaku loyi a tshamelaka ku karihela+ makwavo u ta tihlamulela ehubyeni ya vuavanyisi; loyi a rhuketelaka makwavo a n’wi hlekula u ta tihlamulela eHubyeni Leyikulu; kasi loyi a nge, ‘Xiphukuphuku ndziwena,’ u faneriwa hi Gehena* laha ku nga ni ndzilo.+

23 “Hikwalaho, loko u tisa nyiko ealtarini+ kutani u tsundzuka u ri kwalaho leswaku ku ni mhaka leyi makwenu a ku hehlaka ha yona, 24 siya nyiko ya wena emahlweni ka altari u famba. U rhanga u ya lunghisa mhaka ya kona ni makwenu, kutani u vuya u ta nyikela nyiko ya wena.+

25 “Lulamisa timhaka hi ku hatlisa ni loyi a ku mangalelaka loko mi ri karhi mi ya ehubyeni, leswaku hi ndlela yo karhi loyi a ku mangalelaka a nga ku yisi eka muavanyisi, ni leswaku muavanyisi a nga ku yisi eka mutirhi wa le hubyeni, kutani u hoxiwa ekhotsweni.+ 26 Hakunene a wu nge humi kwalaho u nga si humesa sente* ya wena yo hetelela.

27 “Mi swi twile leswaku ku vuriwe leswi: ‘U nga tshuki u oswa.’+ 28 Kambe ndzi ri eka n’wina, un’wana ni un’wana loyi a tshamelaka ku languta wansati+ lerova a n’wi navela, ana se u endle vuoswi na yena embilwini yakwe.+ 29 Loko tihlo ra wena ra xinene ri ku dyohisa,* ri xokole u ri cukumeta ekule na wena.+ Hikuva swa antswa ku va u lahlekeriwa hi xirho xin’we ku ri ni ku va miri wa wena hinkwawo wu hoxiwa eGehena.*+ 30 Nakambe, loko voko ra wena ra xinene ri ku dyohisa,* ri tseme u ri cukumeta ekule na wena.+ Hikuva swa antswa ku va u lahlekeriwa hi xirho xin’we ku ri ni ku va miri wa wena hinkwawo wu hoxiwa eGehena.*+

31 “Ku tlula kwalaho, ku vuriwe leswi: ‘Loyi a tshikaka nsati wakwe, a a n’wi nyike papila ra ku dlaya vukati.’+ 32 Hambiswiritano, mina ndzi ri eka n’wina, loyi a tshikaka nsati wakwe, handle ka loko a tikhome ku biha hi swa masangu,* u n’wi hoxa endzingweni wo endla vuoswi, naswona loyi a tekaka wansati loyi a tshikiweke hi nuna wakwe u endla vuoswi.+

33 “Nakambe mi swi twile leswaku lava khale va byeriwe leswi: ‘U nga tshuki u hlambanya kutani u nga endli+ kambe u fanele u endla leswi u tiboheke swona emahlweni ka Yehovha.’*+ 34 Kambe, ndzi ri eka n’wina: Mi nga tshuki mi hlambanya,+ hambi ku ri hi tilo, hikuva i xiluvelo xa Xikwembu; 35 hambi ku ri hi misava, hikuva i vunavelo bya milenge ya xona;+ hambi ku ri hi Yerusalema, hikuva i muti wa Hosi leyikulu.+ 36 U nga hlambanyi hi nhloko ya wena hikuva a wu nge swi koti ku hundzula nsisi hambi wu ri wun’we wu va wo basa kumbe wa ntima. 37 ‘Ina’ wa n’wina a a ve ina, ‘E-e’ wa n’wina a va e-e,+ hikuva leswi tlulaka leswi swi huma eka lowo homboloka.+

38 “Mi swi twile leswaku ku vuriwe leswi: ‘Tihlo hi tihlo ni tino hi tino.’+ 39 Hambiswiritano, ndzi ri eka n’wina: Mi nga lwi ni munhu wo homboloka, kambe loko munhu a mi makala erhameni ra xinene, hundzuluxelani ni lerin’wana eka yena.+ 40 Loko munhu a lava ku ku yisa ehubyeni leswaku a ta kuma xiambalo xa wena xa le ndzeni, n’wi nyike ni xiambalo xa wena xa le handle;+ 41 naswona loko munhu loyi a nga ni xikhundlha xo karhi a ku sindzisa ku famba khilomitara,* famba na yena tikhilomitara timbirhi. 42 Nyika loyi a kombelaka, naswona u nga ali loko munhu a lava ku lomba* eka wena.+

43 “Mi swi twile leswaku ku vuriwe leswi: ‘U fanele u rhandza warikwenu+ u venga nala wa wena.’ 44 Kambe ndzi ri eka n’wina: Yanani emahlweni mi rhandza valala va n’wina+ ni ku khongelela lava mi xanisaka,+ 45 swi ta tikomba leswaku mi vana va Tata wa n’wina loyi a nge matilweni,+ hikuva u endla dyambu ra yena ri voningela lavo homboloka ni lavanene, naswona u nisa mpfula eka lava lulameke ni lava nga lulamangiki.+ 46 Hikuva loko mi rhandza lava mi rhandzaka, mi vuyeriwa hi yini?+ Xana valuvisi* na vona a va endli leswi fanaka? 47 Loko mi xeweta vamakwenu ntsena, xana mi tivona mi tlula van’wana hi yini? Xana vanhu va matiko na vona a va endli leswi fanaka? 48 Hikwalaho mi fanele mi va lava hetisekeke, tanihi leswi Tata wa n’wina wa le tilweni a hetisekeke.+

6 “Tivoneleni leswaku mi nga endli swilo leswi lulameke hi xikongomelo xo voniwa hi vanhu;+ hikuva Tata wa n’wina loyi a nga matilweni a nge mi katekisi. 2 Hikwalaho loko u nyika swisiwana tinyiko, u nga rhangi u chaya mhalamhala, hilaha vakanganyisi va endlaka hakona emasinagogeni ni le tindleleni, leswaku va ta dzunisiwa hi vanhu. Ndzi tiyisile ndzi ri eka n’wina, Xikwembu a xi nge va katekisi. 3 Kambe wena, loko u nyika swisiwana tinyiko, u nga tivisi voko ra wena ra ximatsi leswi endliwaka hi lera xinene, 4 leswaku tinyiko ta wena ti va exihundleni. Kutani Tata wa wena la vonaka hinkwaswo u ta ku katekisa.+

5 “Nakambe loko mi khongela, mi nga fani ni vakanganyisi,+ hikuva va rhandza ku khongela va yime emasinagogeni ni le mahlanganeni ya tindlela leswaku va voniwa hi vanhu.+ Ndzi tiyisile ndzi ri eka n’wina, Xikwembu a xi nge va katekisi. 6 Kambe loko u khongela, nghena ekamareni u pfala nyangwa, u khongela eka Tata wa wena la nga voniwiki.+ Kutani Tata wa wena loyi a vonaka hinkwaswo u ta ku katekisa. 7 Loko u khongela, u nga vuli marito lama fanaka hi ku phindhaphindha hilaha vanhu va matiko va endlaka hakona, hikuva va anakanya leswaku va ta twiwa loko va tirhisa marito yo tala. 8 Hikwalaho mi nga fani na vona, hikuva Tata wa n’wina wa swi tiva leswi mi swi pfumalaka+ mi nga si swi kombela.

9 “Kutani mi fanele mi khongela hi ndlela leyi:+

“‘Tata wa hina la nga matilweni, vito+ ra wena a ri kwetsimisiwe.+ 10 Mfumo+ wa wena a wu te. Ku rhandza+ ka wena a ku endleke emisaveni, hilaha ku endlekaka hakona ematilweni.+ 11 Hi nyike xinkwa xa hina xa namuntlha;+ 12 naswona hi rivalele swidyoho swa hina, tanihi leswi na hina hi rivalelaka lava hi dyohelaka.+ 13 U nga hi tshiki hi nghena endzingweni,+ u hi sirhelela* eka lowo homboloka.’+

14 “Hikuva loko mi rivalela vanhu swidyoho swa vona, Tata wa n’wina wa le tilweni na yena u ta mi rivalela;+ 15 kambe loko mi nga va rivaleli vanhu swidyoho swa vona, Tata wa n’wina na yena a nge mi rivaleli.+

16 “Loko mi titsona swakudya,+ tshikani ku khwanyanisa swikandza ku fana ni vakanganyisi, hikuva a va hlambi swikandza hi xikongomelo xo voniwa hi vanhu leswaku va titsona swakudya.+ Ndzi tiyisile ndzi ri eka n’wina, Xikwembu a xi nge va katekisi. 17 Kambe loko mi titsona swakudya, tolani mafurha etinhlokweni ta n’wina, mi hlamba ni swikandza, 18 leswaku vanhu va nga swi voni leswaku mi titsona swakudya, kambe swi ta voniwa ntsena hi Tata wa n’wina loyi a vonaka swilo hinkwaswo. Kutani Tata wa n’wina la mi vonaka hambiloko a nga voniwi u ta mi katekisa.

19 “Tshikani ku tihlayisela xuma emisaveni,+ laha nsumba* ni nkurhe swi dyaka kona ni laha makhamba ma tshovaka kona ma yiva. 20 Ku ri na sweswo, tihlayiseleni xuma etilweni,+ laha nsumba ni nkurhe swi nga dyiki+ kona ni laha makhamba ma nga tshoviki ma yiva. 21 Hikuva laha xuma xa wena xi nga kona ni mbilu ya wena yi ta va kona.

22 “Rivoni ra miri i tihlo.+ Kutani, loko tihlo ra wena ri basile, miri wa wena hinkwawo wu ta vangama. 23 Kambe loko tihlo ra wena ri hombolokile,+ miri wa wena hinkwawo wu ta va munyama. Loko ku vonakala loku nga eka wena ku ri munyama, munyama wa kona wu ta va wukulu ngopfu!

24 “A ku na munhu loyi a nga tirhelaka tihosi timbirhi, hikuva u ta venga yin’wana a rhandza leyin’wana,+ kumbe u ta namarhela yin’wana kutani a yi langutela ehansi leyin’wana. A mi nge vi mahlonga ya Xikwembu ni ya Rifuwo.+

25 “Hikwalaho ndzi ri eka n’wina: Tshikani ku vilela+ hi vutomi bya n’wina ni hi leswi mi nga ta swi dya kumbe leswi mi nga ta swi nwa, kumbe ku vilela hi mimiri ya n’wina leswaku mi ta ambala yini.+ Xana vutomi a hi bya nkoka ku tlula swakudya ni miri a hi wa nkoka ku tlula swiambalo ke?+ 26 Xiyisisani swinyenyana;+ a swi byali mbewu, a swi tshoveli, a swi hlengeleti eswitlatini kambe Tata wa n’wina wa le tilweni wa swi wundla. Xana a mi va nkoka ku swi tlula? 27 I mani eka n’wina loyi a nga engetelaka nkarhinyana eka vutomi byakwe hikwalaho ko vilela?+ 28 Nakambe hikwalaho ka yini mi vilela hi swiambalo? Dyondzani eka makhon’wa* leswi ma kurisaka xiswona; a ma tirhi naswona a ma rhungi swiambalo; 29 kambe ndza mi byela leswaku hambi ku ri Solomoni+ eku vangameni kakwe hinkwako, a nga ambalanga ku fana na wona. 30 Kutani loko Xikwembu xi swi ambexa hi ndlela leyi swimilana swa nhova, leswi nga kona namuntlha kasi mundzuku swi ta hoxiwa exitikweni, xana xi nga tsandza hi yini ku mi ambexa n’wina lava nga ni ripfumelo leritsongo? 31 Hikwalaho mi nga tshuki mi vilela+ mi ku, ‘Xana hi ta dya yini?’ kumbe, ‘Xana hi ta nwa yini?’ kumbe, ‘Xana hi ta ambala yini?’+ 32 Hikuva leswi hinkwaswo i swilo leswi vanhu va matiko va swi lavaka ngopfu. Tata wa n’wina wa le tilweni wa swi tiva leswaku ma swi lava swilo leswi hinkwaswo.

33 “Hikokwalaho, yanani emahlweni mi lava Mfumo ni ku lulama ka yena ku sungula, kutani swilo leswin’wana hinkwaswo mi ta nyikiwa swona.+ 34 Mi nga tshuki mi vilela hi siku leri landzelaka+ hikuva siku leri landzelaka ri ta va ni mivilelo ya rona. Siku rin’wana ni rin’wana ri ni swiphiqo swa rona leswi swi ri ringaneke.

7 “Tshikani ku avanyisa van’wana+ leswaku mi nga avanyisiwi; 2 hikuva ndlela leyi mi avanyisaka van’wana ha yona mi ta avanyisiwa ha yona+ naswona xipimo lexi mi pimaka ha xona, va ta mi pimela ha xona.+ 3 Kutani hikwalaho ka yini u languta xilavi lexi nga etihlweni ra makwenu, kambe u nga yi voni mhandzi leyi nga etihlweni ra wena?+ 4 Kumbe, u nga vurisa ku yini eka makwenu u ku, ‘Ndzi pfumelele ndzi susa xilavi etihlweni ra wena,’ kasi ku ni mhandzi etihlweni ra wena. 5 Mukanganyisi! Rhanga u susa mhandzi leyi nga etihlweni ra wena, kutani u ta swi kota kahle ku susa xilavi lexi nga etihlweni ra makwenu.

6 “Mi nga nyiki timbyana swilo leswi kwetsimaka kumbe ku hoxa tiperela emahlweni ka tinguluve,+ hikuva ti ta ti kandziyela ti tlhela ti mi hlasela ti mi vavisa.

7 “Yanani emahlweni mi kombela, mi ta nyikiwa;+ yanani emahlweni mi lava, mi ta swi kuma; yanani emahlweni mi gongondza, mi ta pfuleriwa;+ 8 hikuva loyi a kombelaka u ta nyikiwa,+ loyi a lavaka u ta swi kuma naswona loyi a gongondzaka u ta pfuleriwa. 9 Kahlekahle, xana u kona eka n’wina loyi loko n’wana wakwe a kombela xinkwa, a nga ta n’wi nyika ribye? 10 Kumbe, loko a kombela nhlampfi, a nga ta n’wi nyika nyoka? 11 Hikwalaho, loko n’wina hambileswi mi nga vadyohi, mi kota ku nyika vana va n’wina tinyiko letinene, xana Tata wa n’wina la nge matilweni a nge va nyiki tinyiko letinene+ hilaha ku tlurisa lava n’wi kombelaka?+

12 “Hikwalaho, swilo hinkwaswo leswi mi lavaka van’wana va mi endlela swona na n’wina mi fanele mi va endlela swona.+ Kahlekahle, leswi hi leswi Nawu ni Vaprofeta va vulaka swona.+

13 “Nghenani hi nyangwa wo lala,+ hikuva nyangwa lowu yisaka eku lovisiweni wu anamile naswona ndlela ya kona yi pfulekile, kutani va tele lava nghenaka ha yona; 14 kambe nyangwa lowu yisaka evuton’wini wu larile, ni ndlela ya kona yi larile naswona a hi vangani lava yi kumaka.+

15 “Tivoneleni eka vaprofeta va mavunwa+ lava taka eka n’wina va ambale voya bya nyimpfu,+ kambe endzeni va ri timhisi leti phatlulelaka.+ 16 Mi ta va vona hi mitirho* ya vona. A swi si tshama swi endleka leswaku vanhu va kha madiriva kumbe makuwa emitweni, xana a swi tano?+ 17 Hilaha ku fanaka, murhi wun’wana ni wun’wana lowunene wu humesa mihandzu leyinene, kambe murhi wun’wana ni wun’wana lowu nga riki wunene wu humesa mihandzu leyi boleke.+ 18 Murhi lowunene a wu nge tswali mihandzu leyi boleke, ni murhi lowu nga riki wunene a wu nge tswali mihandzu leyinene.+ 19 Murhi wun’wana ni wun’wana lowu nga tswaliki mihandzu leyinene wa tsemiwa wu hoxiwa endzilweni.+ 20 Kutani ke, vanhu volavo mi ta va vona hi mitirho* ya vona.+

21 “A hi vanhu hinkwavo lava nge eka mina, ‘Hosi, Hosi,’ lava nga ta nghena eMfun’weni wa matilo, kambe ku ta nghena ntsena lava endlaka ku rhandza ka Tata wa mina la nge matilweni.+ 22 Hi siku rero vo tala va ta ku eka mina: ‘Hosi, Hosi,+ xana a hi profetanga hi vito ra wena, hi hlongola madimona hi vito ra wena ni ku endla mitirho yo tala leyi hlamarisaka hi vito ra wena?’+ 23 Hi nkarhi wolowo ndzi ta va hlamula ndzi ku: ‘A ndzi mi tivi! Sukani eka mina, n’wina vaendli va leswi nga lulamangiki!’+

24 “Hikwalaho, un’wana ni un’wana loyi a twaka leswi ndzi swi vulaka kutani a swi endla u ta fana ni wanuna wo tlhariha, loyi a akeke yindlu ya yena ehenhla ka ribye.+ 25 Loko mpfula yi na, ku va ni tindhambi ni moya wu hunga wu ba yindlu yoleyo, a yi nge wi hikuva yi akiwe ehenhla ka ribye. 26 Kambe, loyi a twaka leswi ndzi swi vulaka kambe a nga swi endli u ta fana ni wanuna wa xiphukuphuku, loyi a akeke yindlu yakwe esaveni.+ 27 Loko mpfula yi na, ku va ni tindhambi ni moya wu ba yindlu yoleyo+ yi wa naswona ku wa ka yona ku va kukulu.”

28 Loko Yesu a heta ku vula marito lawa, mitshungu yi hlamala ngopfu hikwalaho ka vuswikoti bya yena byo dyondzisa,+ 29 hikuva leswi a a swi dyondzisa a swi huma eka Xikwembu,+ a a nga dyondzisi ku fana ni vatsari.

8 Loko a sukile entshaveni, u landzeriwe hi mintshungu. 2 Hiloko ku fika munhu loyi a nga ni nhlokonho a n’wi khinsamela a ku: “Hosi loko u swi lava, u nga ndzi basisa.”*+ 3 Kutani a tshambuluta voko rakwe a n’wi khumba a ku: “Ndza swi lava! Basisiwa.”+ Hiloko nhlokonho yakwe yi hola hi nkarhi wolowo.+ 4 Yesu a ku eka yena: “U nga byeli munhu+ mhaka leyi, kambe famba u ya tikombisa eka muprista+ kutani u humesa nyiko leyi Muxe a yi leriseke,+ leswaku byi va vumbhoni eka vaprista.”

5 Loko a nghena eKapernawume, ndhuna ya masocha yi ta eka yena, yi n’wi kombela+ 6 yi ku: “Nkulukumba, nandza wa mina u latiwile endlwini hikwalaho ko oma swirho, wa vabya swinene.” 7 A yi hlamula a ku: “Ndzi ta n’wi hanyisa loko ndzi fika.” 8 Ndhuna ya masocha yi ku: “Nkulukumba, a swi ndzi faneli ku va u nghena endlwini ya mina kambe vula rito ntsena, kutani nandza wa mina u ta hola. 9 Hikuva na mina ndzi wanuna loyi a nga ni vulawuri, ndzi ni masocha lama nga ehansi ka mina, naswona loko ndzi byela socha ndzi ku, ‘Famba,’ ra famba, kasi loko ndzi byela rin’wana ndzi ku, ‘Tana,’ ra ta, niloko ndzi byela nandza wa mina ndzi ku, ‘Endla leswi,’ wa swi endla.” 10 Loko Yesu a twa sweswo, a hlamala kutani a byela vanhu lava a va n’wi landzela a ku: “Ndzi mi byela ntiyiso, ku hava munhu eIsrayele loyi ndzi n’wi kumeke a ri ni ripfumelo ro fana ni leri.+ 11 Kambe ndza mi byela leswaku vo tala lava humaka evuxeni ni le vupeladyambu va ta ta va fika va tshama etafuleni na Abrahama na Isaka na Yakobo eMfun’weni wa matilo;+ 12 loko ku ri vana va Mfumo va ta cukumeteriwa ehandle emunyameni. Kwalaho hi laha va nga ta rila va tlhela va getsela ni meno.”+ 13 Kutani Yesu a ku eka ndhuna ya masocha: “Famba. A swi endleke hi ku landza ripfumelo ra wena.”+ Hiloko nandza wakwe a hola hi nkarhi wolowo.+

14 Loko Yesu a fika endlwini ya Petro, a vona mana wa nsati wa Petro+ a etlele, a karhatiwa hi ku hisa ka miri.+ 15 Hiloko a khumba voko rakwe,+ kutani a hola, a pfuka a sungula ku va lunghisela swakudya. 16 Nimadyambu, vanhu va n’wi tisela vanhu vo tala lava nga ni madimona; a ma hlongola hi rito, a tlhela a hanyisa ni hinkwavo lava a va xaniseka, 17 leswaku ku hetiseka leswi vuriweke hi muprofeta Esaya, loyi a nga te: “Yena u rhwale mavabyi ni switlhavi swa hina.”+

18 Loko Yesu a vona ntshungu lowu a wu n’wi rhendzerile, a byela vadyondzisiwa vakwe leswaku va tlulela eka tlhelo lerin’wana.+ 19 Hiloko ku ta mutsari un’wana a fika a ku eka yena: “Mudyondzisi, ndzi ta ku landzela hinkwako laha u yaka kona.”+ 20 Kambe Yesu a ku eka yena: “Timhungubye ti ni micele ni swinyenyana swi ni swisaka, kambe N’wana wa munhu a nga na ndhawu yo veka nhloko yakwe.”+ 21 Un’wana wa vadyondzisiwa a ku eka yena: “Hosi, ndzi pfumelele ndzi rhanga hi ku ya lahla tatana.”+ 22 Yesu a ku eka yena: “Yana emahlweni u ndzi landzela, tshika vafi va lahla vafi va vona.”+

23 Kuteloko a khandziya xikepe, vadyondzisiwa vakwe va khandziya na yena.+ 24 Hiloko ku va ni xidzedze elwandle, lerova xikepe a xi biwa hi magandlati; kambe Yesu a a etlele.+ 25 Hiloko va ta va fika va n’wi pfuxa, va ku: “Hosi, hi ponise, ha lova!” 26 Kambe a ku eka vona: “Hikwalaho ka yini mi chava, n’wina va ripfumelo leritsongo?”+ Kutani a yima a tshinya moya ni lwandle, ku va ni ku rhula lokukulu.+ 27 Hiloko vadyondzisiwa vakwe va hlamala, va ku: “I munhu wa muxaka muni loyi? Hambi ku ri moya ni lwandle swa n’wi yingisa.”

28 Loko a fika eka tlhelo lerin’wana etikweni ra Vagadara, a hlangana ni vavanuna vambirhi lava nga ni madimona lava a va huma exikarhi ka masirha.+ A va ri ni tihanyi swinene lerova a ku nga ri na munhu loyi a a ri ni xivindzi xo hundza hi ndlela yoleyo. 29 Hiloko va huwelela, va ku: “Xana hi ku dyohele yini, wena N’wana wa Xikwembu?+ Xana u tele ku ta hi xanisa+ ku nga si fika nkarhi lowu vekiweke?”+ 30 A ku ri ni ntlhambi wa tinguluve ekulenyana na vona ti ri eku dyeni.+ 31 Kutani madimona ma sungula ku n’wi kombela ma ku: “Loko u hi hlongola, hi rhumele entlhambini wa tinguluve.”+ 32 A ku eka wona: “Fambani!” Hiloko ma huma ma ya etingulubyeni, kutani ntlhambi hinkwawo wu tsutsuma wu ya wela elwandle, wu fela ematini. 33 Kambe varisi va tsutsuma va ya emutini, va fika va vika hinkwaswo leswi endlekeke, ku katsa ni mhaka ya vavanuna lava a va ri ni madimona. 34 Kutani vanhu hinkwavo va muti va huma va ya hlangana na Yesu, loko va n’wi vona, va n’wi kombela leswaku a suka emugangeni wa vona.+

9 Hiloko a khandziya xikepe, a tluta a ya fika emutini wa ka vona.+ 2 Kutani va n’wi tisela munhu loyi a omeke swirho a etlele esangwini. Loko Yesu a vona ripfumelo ra vona, a byela munhu loyi a omeke swirho a ku: “Tiya mbilu, n’wananga! Swidyoho swa wena swi rivaleriwile.”+ 3 Van’wana va vatsari va tibyela va ku: “Munhu loyi u sandza Xikwembu.” 4 Hi ku tiva miehleketo ya vona, Yesu a ku: “Hikwalaho ka yini mi ehleketa swilo swo homboloka etimbilwini ta n’wina?+ 5 Hi xikombiso, i yini lexi olovaka, xana i ku vula u ku, ‘Swidyoho swa wena swi rivaleriwile,’ kumbe i ku vula u ku, ‘Pfuka u famba’?+ 6 Kambe, ku endlela leswaku mi swi tiva leswaku N’wana wa munhu u ni matimba yo rivalela swidyoho emisaveni,” hiloko a byela munhu loyi a omeke swirho a ku: “Pfuka, teka sangu ra wena u muka.”+ 7 Hiloko a pfuka a khoma ndlela a muka. 8 Kuteloko mintshungu yi vona leswi, yi sungula ku chava, yi dzunisa Xikwembu, lexi nyikeke vanhu matimba yo tano.

9 Endzhaku ka sweswo, loko Yesu a ri karhi a hundza, a vona wanuna loyi a vuriwaka Matewu a tshame ehofisini ya xibalo, hiloko a ku eka yena: “Vana mulandzeri wa mina.” Hiloko a suka a yima a n’wi landzela.+ 10 Endzhakunyana, loko Yesu a ha ri eku dyeni endlwini, ku te valuvisi* vo tala ni vadyohi va sungula ku dya na yena ni vadyondzisiwa vakwe.+ 11 Kambe loko Vafarisi va vona sweswo, va vutisa vadyondzisiwa vakwe va ku: “Hikwalaho ka yini mudyondzisi wa n’wina a dya ni valuvisi* ni vadyohi?”+ 12 Loko a twa leswi a va swi vula, a ku: “Vanhu lava hanyeke kahle a va lavi dokodela,* kambe u laviwa hi lava vabyaka.+ 13 Kutani, fambani mi ya dyondza nhlamuselo ya marito lawa: ‘Ndzi lava tintswalo, ku nga ri gandzelo.’+ Hikuva ndzi tele ku ta vitana vadyohi, ku nga ri vanhu lava lulameke.”

14 Vadyondzisiwa va Yohane va ta eka yena va n’wi vutisa, va ku: “Hikwalaho ka yini hina ni Vafarisi hi titsona swakudya kambe vadyondzisiwa va wena va nga titsoni swakudya?”+ 15 Yesu a va hlamula a ku: “Xana vanghana va muteki va na xivangelo xa ku rila loko muteki+ a ha ri na vona? Kambe nkarhi wa ta lowu muteki a nga ta va a nga ha ri kona,*+ kutani hi kona va nga ta titsona swakudya. 16 A nga kona munhu loyi a rhungelelaka xilapana lexintshwa eka xiambalo xa khale, hikuva xilapana lexintshwa xi ta endla leswaku xiambalo xi nyanya ku handzuka.+ 17 Vanhu a va cheli vhinyo leyintshwa emaguleni ya khale. Loko vo yi chela, magula wolawo ma ta buluka kutani vhinyo yi halaka na wona ma onhaka. Kambe vanhu va chela vhinyo leyintshwa emaguleni lamantshwa, kutani vhinyo ni magula swi hlayiseka.”

18 Loko a ha vulavula na vona, hiloko ku ta ndhuna yin’wana yi fika yi khinsama emahlweni ka yena, yi ku: “Sweswi n’wana wa mina wa nhwanyana u fanele a file, kambe tana u ta n’wi tlhandleka mavoko leswaku a ta hanya.”+

19 Kutani Yesu ni vadyondzisiwa vakwe va suka va yi landzela. 20 Hiloko wansati loyi a a ri ni malembe ya 12 a ri karhi a karhatiwa hi vuvabyi byo khuluka ngati,+ a ta hi le ndzhaku a fika a khumba makumu ya xiambalo xakwe xa le handle,+ 21 hikuva a a hamba a tibyela a ku: “Loko ntsena ndzo khumba xiambalo xakwe xa le handle, ndzi ta hola.” 22 Yesu a hundzuluka, loko a n’wi vona, a ku: “Tiya mbilu, n’wananga! Ripfumelo ra wena ri ku hanyisile.”+ Ku sukela nkarhi wolowo kavaloko wansati a va a hanyile.+

23 Loko a fika endlwini ya ndhuna, a vona vachayi va switiringo ni ntshungu lowu a wu ya ehenhla ni le hansi,+ 24 Yesu a ku: “Humani la, hikuva xinhwanyatana a xi fanga kambe xi lo etlela.”+ Hiloko va sungula ku n’wi hleka. 25 Loko ntshungu wu humeseriwe ehandle, Yesu a nghena a khoma voko ra xinhwanyatana,+ kutani xi pfuka.+ 26 Mhaka leyi yi hangalaka emugangeni wolowo hinkwawo.

27 Loko Yesu a ri karhi a hundza hi ndlela, vavanuna vambirhi lava feke matihlo+ va n’wi landzela, va ri karhi va huwelela va ku: “Hi twele vusiwana, N’wana wa Davhida.” 28 Loko Yesu a nghena endlwini, vavanuna lava feke matihlo va ta eka yena, kutani a va vutisa a ku: “Xana ma pfumela leswaku ndzi nga swi kota ku mi hanyisa?”+ Va n’wi hlamula va ku: “Ina, Hosi.” 29 Hiloko a khumba matihlo ya vona,+ a ku: “A swi endleke hi ku landza ripfumelo ra n’wina.” 30 Kutani va sungula ku vona. Yesu a va tshinya, a ku: “Mi nga byeli munhu mhaka leyi.”+ 31 Kambe, loko va humela ehandle, va sungula ku byela vanhu hinkwaswo leswi a va endleleke swona emugangeni wolowo hinkwawo.

32 Loko va suka, hiloko vanhu va n’wi tisela mbheveve leyi nga ni dimona;+ 33 loko dimona ri hlongoriwile munhu loyi wa mbheveve a sungula ku vulavula.+ Mintshungu yi hlamala, yi ku: “A ku si tshama ku voniwa nchumu wo fana ni lowu eIsrayele.”+ 34 Kambe Vafarisi va ku: “U hlongola madimona hi hosi ya madimona.”+

35 Kutani Yesu a teka riendzo a ya emitini ni le swimitanini hinkwaswo, a ya dyondzisa emasinagogeni, a chumayela mahungu lamanene ya Mfumo ni ku hanyisa vanhu lava nga ni mavabyi ni vulema bya mixaka hinkwayo.+ 36 Loko a vona mintshungu a yi twela vusiwana,+ hikuva a yi tshikileriwa yi nga khathaleriwi ku fana ni tinyimpfu leti nga riki na murisi.+ 37 Hiloko a byela vadyondzisiwa vakwe a ku: “Ntshovelo i wukulu kambe vatirhi a va talanga.+ 38 Hikwalaho, kombelani N’wini wa ntshovelo a rhumela vatirhi entshovelweni wakwe.”+

10 Yesu a vitana vadyondzisiwa vakwe va 12 kutani a va nyika matimba yo hlongola mimoya leyi nga basangiki,+ ni ku hanyisa lava nga ni mavabyi ni vulema bya mixaka hinkwayo.

2 Mavito ya vaapostola va 12 hi lawa:+ Wo sungula i Simoni, loyi a vuriwaka Petro+ na Andriya+ makwavo; Yakobo n’wana wa Zebediya na Yohane+ makwavo; 3 Filipi na Bartolomi;+ Tomasi+ na Matewu+ wa muluvisi;* Yakobo n’wana wa Alfiya; na Tadiya; 4 Simoni loyi a a tiviwa hi ku gingiriteka; na Yudasi Iskariyota, loyi hi ku famba ka nkarhi a nga n’wi xavisa.+

5 Yesu a rhuma lava 12, kutani a va lerisa a ku:+ “Mi nga yi eka vamatiko naswona mi nga ngheni emitini ya Vasamariya;+ 6 kambe yanani eka tinyimpfu ta yindlu ya Israyele leti lahlekeke.+ 7 Loko mi ri karhi mi famba, chumayelani, mi ku: ‘Mfumo wa matilo wu tshinele.’+ 8 Hanyisani lava vabyaka,+ pfuxani lava feke, horisani lava nga ni nhlokonho, hlongolani madimona. Mi nyikiwe mahala, nyikani mahala. 9 Mi nga fambi ni nsuku, silivhere kumbe koporo emikwameni ya n’wina ya mali,+ 10 kumbe nkwama wa timbuva ta ndlela, swiambalo swo cinca, maphaxani man’wana hambi ku ri nhonga,+ hikuva mutirhi u fanele a kuma swakudya swakwe.+

11 “Emutini kumbe eximutanini xin’wana ni xin’wana lexi mi nga ta nghena eka xona, lavisisani loyi a faneriwaka hi rungula ra n’wina, kutani mi tshama kona kukondza mi suka.+ 12 Loko mi nghena endlwini, xewetani vandyangu. 13 Loko yindlu ya kona swi yi fanela, a yi ve ni ku rhula;+ kambe loko swi nga yi faneli, ku rhula ka n’wina a ku tlhelele eka n’wina. 14 Laha va nga mi amukeliki kumbe va nga mi yingisiki, loko mi huma endlwini yoleyo kumbe emutini wolowo, phumunhani ritshuri emilengeni ya n’wina.+ 15 Ndzi tiyisile ndzi ri eka n’wina, muti wolowo wu ta xupuriwa swinene ku tlula tiko ra Sodoma na Gomora+ hi Siku ra Vuavanyisi.

16 “Vonani! Ndzi mi rhuma ku fana ni tinyimpfu exikarhi ka timhisi; hikokwalaho vanani ni vuxiyaxiya ku fana ni tinyoka kambe mi va lavo rhula ku fana ni matuva.+ 17 Tivoneleni eka vanhu, hikuva va ta mi yisa etihubyeni+ naswona va ta mi ba+ emasinagogeni ya vona.+ 18 Mi ta yisiwa emahlweni ka tindhuna ni tihosi+ hikwalaho ka mina leswaku byi va vumbhoni eka vona ni le ka vanhu va matiko.+ 19 Hambiswiritano, loko va mi khoma, mi nga vileli hi leswi mi nga ta swi vula kumbe ndlela leyi mi nga ta swi vula ha yona, hikuva leswi mi nga ta swi vula, mi ta nyikiwa swona hi nkarhi wolowo;+ 20 hikuva a hi n’wina mi nga ta vulavula, kambe i moya wa Tata wa n’wina lowu nga ta vulavula ha n’wina.+ 21 Ku tlula kwalaho, makwavo u ta nyiketa makwavo leswaku a dlayiwa, tatana a nyiketa n’wana wakwe, kasi vana va ta pfukela vatswari va endla leswaku va dlayiwa.+ 22 Mi ta vengiwa hi vanhu hinkwavo hikwalaho ka vito ra mina,+ kambe loyi a tiyiseleke* ku ya fika emakumu u ta ponisiwa.+ 23 Loko va mi xanisa emutini wun’wana, balekelani eka wun’wanyana;+ hikuva ndzi tiyisile ndzi ri eka n’wina, N’wana wa munhu u ta fika mi nga si heta ntirho wa n’wina emitini ya Israyele.

24 “Xichudeni a xi n’wi tluli mudyondzisi wa xona, ni hlonga a ri n’wi tluli n’wini wa rona.+ 25 Xichudeni xi fanele xi eneriseka loko xi fana ni mudyondzisi wa xona, ni hlonga ri fanele ri eneriseka loko ri fana ni n’wini wa rona.+ Loko vanhu va ri ni xivindzi xo vitana n’wini wa yindlu va ku i Belzebule,*+ va ta endla tano ni le ka vandyangu wakwe! 26 Hikwalaho mi nga va chavi, hikuva a ku na nchumu lowu funengetiweke lowu nga ta ka wu nga fununguriwi naswona a ku na xihundla lexi nga ta ka xi nga tiviwi.+ 27 Leswi ndzi mi byelaka swona emunyameni, swi vuleni eku vonakaleni naswona leswi mi swi twaka swi hleveteriwa, swi chumayeleni mi ri ehenhla ka tiyindlu.+ 28 Mi nga va chavi lava dlayaka miri kambe va nga swi kotiki ku herisa vutomi;*+ kambe chavani loyi a nga lovisaka vutomi ni miri eGehena.*+ 29 Xana swindzingiri swimbirhi a swi xavisiwi hi sente* yin’we? Kambe ku hava ni xin’we xa swona lexi nga welaka ehansi Tata wa n’wina a nga swi tivi.+ 30 Kambe hambi ku ri misisi ya tinhloko ta n’wina yi hlayiwile hinkwayo. 31 Hikwalaho mi nga chavi; mi va nkoka ku tlula swindzingiri swo tala.+

32 “Kutani loyi a vulaka leswaku wa ndzi tiva emahlweni ka vanhu,+ na mina ndzi ta vula leswaku ndza n’wi tiva emahlweni ka Tata wa mina loyi a nga ematilweni.+ 33 Kambe loyi a ndzi landzulaka emahlweni ka vanhu, na mina ndzi ta n’wi landzula emahlweni ka Tata wa mina loyi a nga ematilweni.+ 34 Mi nga ehleketi leswaku ndzi tise ku rhula emisaveni; a ndzi tisanga ku rhula, kambe ndzi tise banga.+ 35 Hikuva ndzi tele ku ta vanga ku avana exikarhi ka jaha ni tata wa rona, nhwanyana ni mana wakwe ni nhlomi ni n’wingi wa yona.+ 36 Hakunene, valala va munhu ku ta va vandyangu wa ka vona. 37 Loyi a rhandzaka tata wakwe kumbe mana wakwe ku tlula mina a nga ndzi faneli; naswona loyi a rhandzaka n’wana wakwe wa jaha kumbe wa nhwanyana ku tlula mina a nga ndzi faneli.+ 38 Ni loyi a nga rhwaliki mhandzi yakwe ya nxaniso* kutani a ndzi landzela a nga ndzi faneli.+ 39 Loyi a ringetaka ku ponisa vutomi byakwe byi ta n’wi lahlekela, ni loyi a lahlekeriwaka hi vutomi byakwe hikwalaho ka mina u ta tlhela a byi kuma.+

40 “Loyi a mi amukelaka wa ndzi amukela na mina nakambe loyi a ndzi amukelaka u amukela ni Loyi a ndzi rhumeke.+ 41 Loyi a amukelaka muprofeta hileswi a nga muprofeta u ta kuma hakelo ya muprofeta,+ naswona loyi a amukelaka munhu loyi a lulameke hileswi a nga munhu loyi a lulameke u ta kuma hakelo ya munhu loyi a lulameke. 42 Loyi a nyikaka un’wana wa lava lavatsongo mati yo titimela, leswaku a nwa hileswi a nga mudyondzisiwa, ndza mi byela, a nge lahlekeriwi hi hakelo yakwe.”+

11 Loko Yesu a heta ku byela vadyondzisiwa vakwe va 12 leswi a va fanele va swi endla, a suka kwalaho a ya dyondzisa ni ku chumayela emitini ya vona.+

2 Loko Yohane, loyi a ri ekhotsweni+ a twa hi ta mitirho ya Kreste, a rhuma vadyondzisiwa vakwe+ 3 va ya n’wi vutisa va ku: “Xana hi wena Loyi a Taka kumbe hi fanele ku langutela un’wana?”+ 4 Yesu a va hlamula a ku: “Fambani mi ya vikela Yohane leswi mi swi twaka ni ku swi vona:+ 5 Lava a va fe mahlo se va vona,+ lava a va nga koti ku famba se va famba, lava a va ri ni nhlokonho+ va horile, lava a va fe tindleve se va twa, kasi vafi va pfuxiwa ni swisiwana swi byeriwa mahungu lamanene.+ 6 Wa tsaka loyi a nga kumiki nchumu lexi n’wi khunguvanyisaka eka mina.”+

7 Loko va ri endleleni, Yesu a sungula ku vulavula ni mintshungu mayelana na Yohane a ku: “Xana a mi yele ku ya vona yini emananga?+ Ku ya vona rihlanga leri biwaka hi moya?+ 8 Xana a mi ya vona yini? Wanuna loyi a ambaleke swiambalo swo durha? Phela lava ambalaka swiambalo swo durha va le tindlwini ta tihosi. 9 Kahlekahle a mi ya vona yini? Ku ya vona muprofeta? Hakunene ndza mi byela, i wa nkoka swinene ku tlula ni muprofeta.+ 10 Loyi hi yena loyi ku tsariweke mayelana na yena va ku: ‘Waswivo! Ndzi rhuma nandza wa mina emahlweni ka wena, loyi a nga ta ku lunghisela ndlela u nga si fika!’+ 11 Ndzi tiyisile ndzi ri eka n’wina, eka vanhu hinkwavo lava tshameke va hanya a nga kona lonkulu eka Yohane Mukhuvuri, kambe lontsongo eMfun’weni wa matilo i nkulu eka yena.+ 12 Ku sukela emasikwini ya Yohane Mukhuvuri ku ta fikela sweswi, vanhu va lwela ku nghena eMfun’weni wa matilo, naswona lava tiyimiseleke va ta nghena.+ 13 Hikuva Vaprofeta hinkwavo ni Nawu va profete kukondza ku ta Yohane;+ 14 naswona loko mi tiyimiserile ku swi amukela, hi yena ‘Eliya loyi vaprofeta va vuleke leswaku u ta ta.’+ 15 Loyi a nga ni tindleve a a yingise.

16 “Xana xitukulwana lexi ndzi nga xi fanisa na yini?+ Xi fana ni vana lava tshameke etimakete kutani va huwelela vanghana va vona, 17 va ku: ‘Hi mi chayele xitiringo, kambe a mi cinanga; hi yimbelele risimu ra xirilo kambe a mi rilanga na hina.’ 18 Hilaha ku fanaka, Yohane u tile a nga dyi hambi ku ri ku nwa kambe vanhu va ku, ‘U ni dimona.’ 19 N’wana wa munhu u tile a dya ni ku nwa,+ kambe vanhu va ku, ‘Maswivo! I munhu wa makolo naswona u rhandza vhinyo, i munghana wa valuvisi* ni vadyohi.’+ Hambiswiritano, vutlhari byi tikomba byi lulamile hi mitirho ya byona.”+

20 Kutani a sungula ku sola miti leyi a endleke masingita* yo tala eka yona, hikuva a yi hundzukanga: 21 “Khombo eka wena Korazini! Khombo eka wena Betsayida, hikuva loko masingita lama endliweke eka n’wina a ma endliwe eTiri ni le Sidoni, vanhu va kona a va ta va va hundzuke khale swinene va ambale swiambalo swo khwaxa va tshame enkumeni.+ 22 Kambe ndzi ri eka n’wina, mi ta xupuriwa swinene hi Siku ra Vuavanyisi ku tlula miti ya Tiri na Sidoni.+ 23 Na wena Kapernawume,+ xana u ta tlakuseriwa etilweni? U ta ya eSirheni;*+ hikuva loko masingita lama endlekeke eka wena a ma endleke etikweni ra Sodoma, a ri ta va ra ha ri kona ninamuntlha. 24 Kambe ndzi ri eka wena, u ta xupuriwa swinene hi Siku ra Vuavanyisi ku tlula tiko ra Sodoma.”+

25 Hi nkarhi wolowo Yesu a ku: “Tatana, Hosi ya tilo ni misava, ndza ku dzunisa emahlweni ka vanhu lava, hikuva swilo leswi u swi fihlele lavo tlhariha ni lavo dyondzeka, u swi paluxela swihlangi.+ 26 Tatana, u endle tano hikuva i ku rhandza ka wena. 27 Tatana+ u ndzi nyike swilo hinkwaswo naswona a nga kona loyi a tivaka N’wana hi ku helela handle ka Tatana;+ hambi ku ri loyi a tivaka Tatana hi ku helela handle ka N’wana, ni loyi N’wana a rhandzaka ku n’wi paluxa eka yena.+ 28 Tanani eka mina, n’wina hinkwenu lava karhaleke ni lava tikeriwaka, ndzi ta mi phyuphyisa. 29 Rhwalani joko ra mina mi tlhela mi dyondza eka mina, hikuva ndzi ni musa naswona ndza titsongahata,+ kutani mi ta phyuphyisiwa. 30 Hikuva joko ra mina ra olova ni ndzhwalo wa mina wa vevuka.”

12 Hi nkarhi wolowo Yesu a tsemakanya masimu ya koroni hi Savata. Vadyondzisiwa vakwe va khomiwa hi ndlala kutani va sungula ku tshova koroni va dya.+ 2 Loko va vona leswi, Vafarisi va ku eka yena: “Languta! Vadyondzisiwa va wena va endla swilo leswi nawu wu nga pfumeliki leswaku swi endliwa hi Savata.”+ 3 Hiloko a ku eka vona: “Xana a mi hlayanga leswi Davhida a swi endleke loko a khomiwe hi ndlala ni vavanuna lava a a ri na vona?+ 4 Ndlela leyi a ngheneke ha yona endlwini ya Xikwembu kutani a dya swinkwa swa magandzelo,*+ hambileswi yena kumbe vanhu lava a a ri na vona a va nga pfumeleriwanga ku swi dya hikuva a swi fanele swi dyiwa hi vaprista ntsena.+ 5 Kumbe, xana a mi hlayanga eNawini leswaku hi Tisavata vaprista va tirha etempeleni hi Savata kambe va nga vi na nandzu?+ 6 Kambe ndza mi byela leswaku laha mi nga kona ku ni munhu wa nkoka swinene ku tlula tempele.+ 7 Hambiswiritano, loko a mi yi twisise kahle nhlamuselo ya tsalwa leri nge, ‘Ndzi lava tintswalo,+ ku nga ri gandzelo,’+ a mi ta va mi nga va gwevanga lava nga riki na nandzu. 8 Hikuva N’wana wa munhu i Hosi ya Savata.”+

9 Loko a suka endhawini yoleyo u ye esinagogeni* ya vona, 10 naswona kwalaho a ku ri ni wanuna loyi a a lamale voko!+ Leswi a va lava xo n’wi hehla ha xona, va vutisa Yesu va ku: “Xana swa pfumeleriwa ku hanyisa munhu hi Savata?”+ 11 A va hlamula a ku: “I mani eka n’wina loyi loko nyimpfu yakwe leyi nga yoxe yo wela emugodini hi Savata, a nga ta ka a nga yi humesi?+ 12 Xana munhu a hi wa nkoka swinene ku tlula nyimpfu? Kutani swa pfumeleriwa ku endla nchumu lowunene hi Savata.” 13 Yesu a byela wanuna yoloye a ku: “Ololoxa* voko ra wena.” Hiloko a ri ololoxa, kutani ri hola ri fana ni lerin’wana. 14 Kambe Vafarisi va huma kutani va boha kungu ro n’wi dlaya. 15 Loko Yesu a swi xiyile leswaku va lava ku n’wi dlaya, a suka kwalaho. Vo tala va n’wi landzela,+ kutani a va hanyisa hinkwavo, 16 kambe a va lerisa leswaku va nga byeli vanhu leswaku hi yena mani,+ 17 leswaku ku ta endleka leswi vuriweke hi muprofeta Esaya, loyi a nga te:

18 “Vonani! Nandza+ wa mina loyi ndzi n’wi hlawuleke, loyi ndzi n’wi rhandzaka, loyi ndzi n’wi amukeleke!+ Ndzi ta veka moya wa mina ehenhla ka yena+ naswona u ta endla leswaku matiko ma byi tiva kahle vululami. 19 A nge holovi+ na munhu hambi ku ri ku huwelela naswona ku hava loyi a nga ta twa rito ra yena etindleleni. 20 A nge ri tshovi rihlanga leri govekeke naswona a nge ri timi rivoni leri ketimelaka,+ ku fikela loko a endla leswaku ku va ni vululami. 21 Matiko ma ta tshemba vito rakwe.”+

22 Hiloko va n’wi tisela wanuna loyi a nga ni dimona naswona a nga bofu tlhelo mbheveve, kutani a n’wi hanyisa, wanuna loyi a sungula ku vulavula a tlhela a vona. 23 Mintshungu hinkwayo yi hlamala kutani yi sungula ku vutisana yi ku: “Xana loyi a hi N’wana wa Davhida?” 24 Loko Vafarisi va twa sweswo, va ku: “Muyisa loyi u hlongola madimona hi Belzebule,* hosi ya madimona.”+ 25 Leswi a a tiva leswi a va swi anakanya, a ku eka vona: “Mfumo wun’wana ni wun’wana lowu avaneke wu ta wa naswona muti wunʼwana ni wunʼwana kumbe ndyangu lowu avaneke a wu nge tiyi. 26 Hilaha ku fanaka, loko Sathana a hlongola Sathana, swi vula leswaku u avanile; xana mfumo wa yena wu nga tiya ke? 27 Ku tlula kwalaho, loko ndzi hlongola madimona hi Belzebule, xana vana va n’wina va ma hlongola hi mani? Hi yona mhaka leyi va nga ta mi avanyisa. 28 Kambe loko ku ri leswaku ndzi hlongola madimona hi moya wa Xikwembu, Mfumo wa Xikwembu se wu mi hundzile.+ 29 Kumbe, xana munhu a nga yi hlaserisa ku yini yindlu ya wanuna wa matimba kutani a teka nhundzu yakwe, loko a nga rhanganga hi ku n’wi boha? Endzhaku ka sweswo hi kona a nga tekaka leswi nga endlwini yakwe. 30 Loyi a nga yimiki na mina u lwa na mina naswona loyi a nga hlengeletiki na mina wa hangalasa.+

31 “Hikwalaho ka sweswo, ndzi ri eka n’wina, vanhu va ta rivaleriwa swidyoho ni swisandzu swa vona, kambe loyi a sandzaka moya wa Xikwembu a nge rivaleriwi.+ 32 Hi xikombiso, loyi a solaka N’wana wa munhu, u ta rivaleriwa;+ kambe loyi a solaka moya lowo kwetsima, a nge rivaleriwi, hambi sweswi kumbe enkarhini lowu taka.+

33 “Endlani murhi wu va lowunene ni mihandzu ya wona yi va leyinene kumbe mi endla murhi wu va lowu boleke ni mihandzu ya wona yi va leyi boleke, hikuva murhi wu tiviwa hi mihandzu ya wona.+ 34 Vana va timhiri,*+ xana mi ta vulavurisa ku yini swilo leswinene mi ri vaendli va leswo biha? Hikuva nomu wu vulavula leswi mbilu yi taleke swona.+ 35 Munhu lonene u humesa tinyiko letinene exumeni xakwe lexinene, kasi munhu loyi a endlaka leswo biha u humesa swilo swo biha exumeni xakwe lexi nga riki xinene.+ 36 Ndzi mi byela ntiyiso, swilo hinkwaswo leswi nga pfuniki nchumu leswi vanhu va swi vulaka va ta tihlamulela+ mayelana na swona hi Siku ra Vuavanyisi; 37 hikuva mi ta vuriwa lava lulameke hikwalaho ka marito ya n’wina naswona marito ya n’wina hi wona ma nga ta endla leswaku mi va ni nandzu.”

38 Hiloko vatsari ni Vafarisi van’wana va n’wi hlamula va ku: “Mudyondzisi, hi lava ku ku vona u endla singita.”+ 39 A va hlamula a ku: “N’wina xitukulwana xo homboloka ni lexi nga tshembekiki eka Xikwembu mi tshamela ku lava singita, kambe a ku na singita leri mi nga ta ri vona handle ka singita ra muprofeta Yonasi.+ 40 Tanihi leswi Yonasi a a ri ekhwirini ra nhlampfi leyikulu masiku manharhu ni vusiku bya kona,+ ni N’wana wa munhu u ta va ehansi ka misava masiku manharhu ni vusiku bya kona.+ 41 Vavanuna va le Ninivha va ta pfuxiwa swin’we ni xitukulwana lexi hi nkarhi wa ku avanyisiwa naswona va ta xi gweva, hikuva va hundzukile eka leswi Yonasi a swi chumayeleke.+ Kambe vonani, laha ku ni munhu wa nkoka ku tlula Yonasi.+ 42 Hosi ya xisati ya le dzongeni yi ta pfuxiwa swin’we ni xitukulwana lexi loko ku avanyisiwa naswona yi ta xi gweva, hikuva yi tile yi huma hi le kule swinene ku ta twa vutlhari bya Solomoni.+ Kambe vonani, laha ku ni munhu wa nkoka ku tlula Solomoni.+

43 “Loko moya lowu nga basangiki wu huma eka munhu, wu ya emananga wu famba wu lava ndhawu yo wisela eka yona, kambe wu nga yi kumi.+ 44 Kutani wu ku, ‘Ndzi ta tlhelela endlwini ya mina leyi ndzi humeke eka yona,’ naswona loko wu fika wu kuma yi nga ri na nchumu kambe yi kukuriwile yi basa yi tlhela yi sasekisiwa. 45 Hiloko wu famba wu ya landza mimoya yin’wana ya nkombo leyi hombolokeke ngopfu ku tlula wona, loko yi nghenile endzeni, yi namba yi tshama kona; kutani xiyimo xa munhu yoloye xi nyanya ku biha ku tlula eku sunguleni.+ Swi ta va tano hi xitukulwana lexi xo homboloka.”

46 Loko a ha vulavula ni mintshungu, mana wakwe ni vamakwavo+ a va yime ehandle va lava ku vulavula na yena.+ 47 Hiloko un’wana a ku eka yena: “Mana wa wena ni vamakwenu va yime hala handle, va lava ku vulavula na wena.” 48 A n’wi hlamula a ku: “I mani mana wa mina, naswona i vamani vamakwerhu?” 49 Hiloko a tlakusa voko a kombetela vadyondzisiwa vakwe, a ku: “Vonani! Mana wa mina ni vamakwerhu hi lava!+ 50 Hikuva loyi a endlaka ku rhandza ka Tata wa mina la nge tilweni, hi yena a nga makwerhu wa xinuna ni wa xisati ni manana eka mina.”+

13 Hi siku rero, Yesu a huma endlwini a ya tshama ekusuhi ni lwandle. 2 Kutani mintshungu yi hlengeletana yi ya eka yena, hiloko a khandziya xikepe a tshama eka xona, ntshungu hinkwawo wu yime eribuweni.+ 3 Kutani a wu dyondzisa swilo swo tala hi ku tirhisa swifaniso,+ a ku: “Muhaxi u humile a ya haxa mbewu.+ 4 Loko a ri karhi a haxa, mbewu yin’wana yi wela etlhelo ka ndlela, kutani yi dyiwa hi swinyenyana.+ 5 Yin’wana yi wela emaribyeni laha a ku nga ri na misava yo tala, kutani yi hatla yi mila hikuva misava ya kona a yi nga entanga.+ 6 Kambe loko dyambu ri tlhava, swimilana swi tshwa swi tlhela swi vuna hikwalaho ka ku pfumala timitsu. 7 Yin’wana yi wela exikarhi ka mitwa, kutani mitwa yi yi phasaphasa.+ 8 Hambiswiritano yin’wana yi wela emisaveni leyinene kutani yi sungula ku tswala mihandzu, yin’wana yi tswala 100 ku tlula leswi a swi byariwile, yin’wana 60, yin’wanyana 30.+ 9 Loyi a nga ni tindleve a a yingise.”+

10 Hiloko vadyondzisiwa va ta eka yena kutani va ku: “Hikwalaho ka yini u tirhisa swifaniso loko u va dyondzisa?”+ 11 A va hlamula a ku: “N’wina mi nyikiwe ku twisisa swihundla swo kwetsima+ swa Mfumo wa matilo kambe vona a va nyikiwanga. 12 Hikuva loyi a nga ni xo karhi, u ta nyikiwa swo tala; kambe loyi a nga riki na nchumu, u ta tekeriwa ni leswi a nga na swona.+ 13 Hi yona mhaka leyi ndzi tirhisaka swifaniso loko ndzi va dyondzisa; hikuva va languta kambe a va voni nchumu, naswona va yingisela kambe a va twi nchumu, a va wu kumi mongo wa mhaka.+ 14 Vuprofeta bya Esaya byi hetiseka eka vona, lebyi nge: ‘Mi ta twa kambe a mi nge wu kumi mongo wa mhaka naswona mi ta languta kambe a mi nge voni nchumu.+ 15 Hikuva timbilu ta vanhu lava ti sihalarile naswona va swi twile hi tindleve ta vona kambe va nga vuli nchumu, va tipfale matihlo leswaku va nga tshuki va vona ni ku twa hi tindleve ta vona, leswaku va kuma mongo wa mhaka etimbilwini ta vona kutani va hundzuka leswaku ndzi va horisa.’+

16 “Kambe, tsakani hikuva matihlo ya n’wina ma vona naswona tindleve ta n’wina ta twa.+ 17 Hikuva ndzi tiyisile ndzi ri eka n’wina, vaprofeta vo tala ni vanhu lava lulameke a va swi navela ku vona swilo leswi mi swi vonaka kambe a va swi vonanga,+ hambi ku ri ku twa swilo leswi mi swi twaka kambe a va swi twanga.

18 “Yingisani nhlamuselo ya xifaniso xa muhaxi wa mbewu.+ 19 Loyi a twaka rito mayelana ni Mfumo kambe a nga kumi mongo wa rona, i mbewu leyi haxiweke etlhelo ka ndlela,+ lowo homboloka+ a ta, a fika a teka leswi byariweke embilwini yakwe. 20 Loko ku ri leyi haxiweke emaribyeni, hi loyi a twaka rito kutani a hatla a ri amukela hi ntsako.+ 21 Kambe a nga na timitsu naswona u ya emahlweni swa nkarhinyana, loko a xanisiwa hikwalaho ka rito wa tshika. 22 Loko ku ri leyi haxiweke exikarhi ka mitwa, hi loyi a twaka rito kambe ku vilela hi swilo swa misava leyi+ ni rifuwo leri kanganyisaka vo tala swi endla leswaku rito ri kavanyeteka kutani ri nga tswali mihandzu.+ 23 Loko ku ri leyi haxiweke emisaveni leyinene, hi loyi a twaka rito a tlhela a kuma mongo wa rona, kutani a humesa mihandzu yo tala, yin’wana ka 100, yin’wana ka 60, kasi leyin’wanyana ka 30.”+

24 A va byela xifaniso xin’wana, a ku: “Mfumo wa matilo wu nga fanisiwa ni munhu loyi a haxeke mbewu leyinene ensin’wini yakwe. 25 Loko vanhu va ha etlele, nala wakwe a ta kutani a fika a haxa mfava exikarhi ka koroni, ivi a famba. 26 Loko koroni yi rhumbuka yi sungula ku tswala, ku humelele ni mfava. 27 Hiloko malandza ya n’wini wa yindlu ma ta, ma ku eka yena, ‘Hosi, xana a wu haxanga mbewu leyinene ensin’wini ya wena? Kutani, swi tise ku yini leswaku ku va ni mfava?’ 28 A ma hlamula a ku, ‘Leswi swi endliwe hi munhu, loyi a nga nala.’+ Malandza ma ku, ‘Xana u lava leswaku hi ya wu tsuvula?’ 29 A ma hlamula a ku, ‘Wu tshikeni, hikuva mi nga tshuka mi tsuvula ni koroni loko mi ri karhi mi tsuvula mfava. 30 Swi tshikeni swi kula swin’we kukondza ku fika ntshovelo, kutani hi nguva ya ntshovelo ndzi ta byela vatshoveri ndzi ku: Rhangani hi ku hlengeleta mfava mi wu boha wu va tinyandza leswaku mi wu hisa; endzhaku ka sweswo mi hlengeleta koroni mi yi veka exitlatini xa mina.’”+

31 A va byela xifaniso xin’wana a ku: “Mfumo wa matilo wu fana ni ndzoho ya sinapi leyi munhu a yi tekeke a ya yi byala ensin’wini yakwe.+ 32 Kahlekahle i yitsongo swinene ku tlula timbewu hinkwato, kambe loko yi mirile yi kula yi tlula swimilana hinkwaswo, yi va murhi lerova swinyenyana swi kuma ndhawu yo tshama emarhavini ya wona.”

33 A tlhela a va byela xifaniso xin’wana a ku: “Mfumo wa matilo wu fana ni comela, lexi wansati a xi pfuvaka ni mimpimo yinharhu leyikulu ya mapa, ku fikela loko mbila hinkwayo yi kukumuka.”+

34 Yesu a a dyondzisa mintshungu swilo leswi hinkwaswo hi ku tirhisa swifaniso. Kahlekahle, a a nga vulavuli na yona handle ko tirhisa swifaniso,+ 35 leswaku ku ta endleka leswi vuriweke hi muprofeta loyi a nga te: “Ndzi ta vulavula hi swifaniso; ndzi ta mi byela swilo leswi a swi ri xihundla ku sukela eku sunguleni.”*+

36 Endzhaku ka loko a byele mintshungu leswaku yi famba, a ya nghena endlwini. Hiloko vadyondzisiwa va ta eka yena va ku: “Hi hlamusele xifaniso xa mfava lowu nga ensin’wini.” 37 A va hlamula a ku: “Muhaxi wa mbewu leyinene i N’wana wa munhu; 38 nsimu i misava.+ Mbewu leyinene i vana va Mfumo, kasi mfava i vana va lowo homboloka,+ 39 nala loyi a wu haxeke i Diyavulosi. Ntshovelo i nkarhi wa makumu, naswona vatshoveri i tintsumi. 40 Hikwalaho, hilaha mfava wu nga ta hlengeletiwa hakona wu hisiwa hi ndzilo, swi ta va tano hi nkarhi wa makumu.+ 41 N’wana wa munhu u ta rhuma tintsumi takwe, kutani ti ta humesa hinkwavo lava dyohisaka van’wana eMfun’weni wakwe ni hinkwavo lava tlulaka nawu, 42 kutani ti ta va hoxa ekheleni ra ndzilo lowu vavulaka.+ Kwalaho hi laha va nga ta rila va tlhela va getsela ni meno. 43 Hi nkarhi wolowo lava lulameke va ta vangama swinene kukota dyambu+ eMfun’weni wa Tata wa vona. Loyi a nga ni tindleve a a yingise.

44 “Mfumo wa matilo wu fana ni xuma lexi fihliweke ensin’wini, lexi munhu a xi kumeke kutani a xi fihla; naswona hikwalaho ka ntsako lowu a nga na wona, a famba a ya xavisa swilo hinkwaswo leswi a nga na swona kutani a xava nsimu yoleyo.+

45 “Nakambe Mfumo wa matilo wu fana ni muxavisi loyi a fambaka a lava tiperela letinene. 46 Loko a kuma perela yin’we ya nkoka, xikan’wekan’we a famba a ya xavisa swilo hinkwaswo leswi a a ri na swona kutani a yi xava.+

47 “Nakambe Mfumo wa matilo wu fana ni nete leyi hoxiweke elwandle kutani yi kukuta tihlampfi ta mixaka hinkwayo. 48 Loko yi tele va yi kokela eribuweni, kutani va tshama ehansi, va hoxa tihlampfi letinene+ exibyeni, kambe leti nga riki tinene+ va ti cukumeta. 49 Swi ta va tano hi nkarhi wa makumu. Tintsumi ti ta huma ti hambanisa lavo homboloka eka lavo lulama, 50 kutani ti ta va hoxa ekheleni ra ndzilo lowu vavulaka. Kwalaho hi laha va nga ta rila va tlhela va getsela ni meno.

51 “Xana mi wu kumile mongo wa swilo leswi hinkwaswo?” Va ku eka yena: “Ina.” 52 Kutani a ku eka vona: “Loko swi ri tano, mudyondzisi un’wana ni un’wana loyi a dyondzisiwaka hi ta Mfumo wa matilo, u fana ni n’wini wa yindlu loyi a humesaka swilo leswintshwa ni swa khale laha a swi hlayise kona.”

53 Loko Yesu a heta ku va byela swifaniso leswi, a suka laha a a ri kona. 54 Kuteloko a fika etikweni ra rikwavo,+ a sungula ku va dyondzisa esinagogeni, kutani va hlamala va ku: “Xana munhu loyi u byi kuma kwihi vutlhari ni matimba yo endla masingita lawa?+ 55 Xana loyi a hi n’wana wa muvatli?+ Xana a hi n’wana wa Mariya naswona vamakwavo wa yena a hi Yakobo, Yosefa, Simoni na Yudasi ke?+ 56 Vamakwavo vakwe va xisati xana a hi vona lava hi nga na vona? Kutani, xana munhu loyi u swi kuma kwihi swilo leswi hinkwaswo?”+ 57 Hiloko va sungula ku khunguvanyeka hikwalaho ka leswi Yesu a a swi vula ni ku swi endla.+ Kambe Yesu a ku eka vona: “Muprofeta wa xiximiwa, handle ka le tikweni ra rikwavo ni le ndyangwini wa ka vona.”+ 58 Kutani a nga endlanga masingita yo tala kwalaho, hi leswi a va nga ri na ripfumelo.

14 Hi nkarhi wolowo Heroda ndhuna ya muganga, a twa hi ndhuma ya Yesu,+ 2 hiloko a ku eka malandza yakwe: “Loyi i Yohane Mukhuvuri. U pfuxiwile eku feni, hi yona mhaka leyi a endlaka masingita lawa.”+ 3 Heroda* a a khome Yohane a n’wi boha kutani a n’wi pfalela ekhotsweni hikwalaho ka Herodiya nsati wa Filipi makwavo.+ 4 Hikuva Yohane a a tshamela ku n’wi byela a ku: “A swi pfumeleriwi leswaku u n’wi teka.”+ 5 Hambileswi a a lava ku n’wi dlaya, a a chava ntshungu hikuva a wu n’wi teka a ri muprofeta.+ 6 Kambe loko ku tlangeriwa siku ra ku velekiwa ka Heroda,+ hi siku rero n’wana wa Herodiya wa nhwanyana a cina kutani Heroda a tsaka swinene+ 7 lerova a hlambanya leswaku u ta n’wi nyika xin’wana ni xin’wana lexi a nga ta xi kombela. 8 Kutani hi ku kuceteriwa hi mana wakwe, a ku: “Ndzi nyike nhloko ya Yohane Mukhuvuri yi ri enkambaneni.”+ 9 Hambileswi hosi a yi ri ni gome, kambe hi ku xixima xihlambanyo xa yona ni hikwalaho ka vanhu lava a yi ri eku dyeni na vona, yi lerisa leswaku va n’wi nyika yona. 10 Hiloko yi rhuma vanhu leswaku va ya tsema nhloko ya Yohane ekhotsweni. 11 Kutani nhloko ya Yohane yi tisiwa eka lowa nhwana yi ri enkambaneni, ivi yena a yi yisa eka mana wakwe. 12 Endzhaku ka sweswo, vadyondzisiwa vakwe va ta va ta teka ntsumbu wakwe va ya wu lahla; kutani va ya vikela Yesu. 13 Loko a twa sweswo, Yesu a suka kwalaho a famba hi xikepe a ya endhawini leyi nga riki na vanhu. Kambe loko mintshungu yi twa sweswo, yi huma emitini yi famba hi milenge yi n’wi landzela.+

14 Loko a fika eribuweni, a vona ntshungu lowukulu, kutani a wu twela vusiwana,+ hiloko a hanyisa vavabyi lava a va ri exikarhi ka wona.+ 15 Kambe loko ri phumela vadyondzisiwa vakwe va ya eka yena va ku: “Hi le kule ni miti naswona se ri perile; byela mintshungu leyi leswaku yi ya eswimitanini yi ya tixavela swakudya.”+ 16 Hambiswiritano, Yesu a ku: “Va nga fambi; n’wina va nyikeni swakudya.” 17 Va n’wi hlamula va ku: “Ho va ni swinkwa swa ntlhanu ni tihlampfi timbirhi ntsena.” 18 A ku: “Swi tiseni haleno.” 19 Hiloko a byela mintshungu leswaku yi tshama ebyanyini. A teka swinkwa swa ntlhanu ni tihlampfi timbirhi, a languta etilweni kutani a khongela,+ endzhaku ko phema swinkwa, a swi nyika vadyondzisiwa vakwe, kutani vadyondzisiwa va swi avela mintshungu. 20 Ntshungu hinkwawo wu dya wu xurha wu tlhela wu hlengeleta leswi nga sala, swi tata tibasikiti ta 12.+ 21 Lava dyeke a ku ri vavanuna va kwalomu ka 5 000, ku nga hlayiwi vavasati ni vana.+ 22 Kutani a byela vadyondzisiwa vakwe leswaku va hatla va khandziya xikepe va pfa va ya eribuweni lerin’wana ra lwandle, loko yena a ri karhi a byela mintshungu leswaku yi tlhela.+

23 Endzhaku ka loko a tlherise mintshungu, a tlhandluka a ri yexe a ya entshaveni a ya khongela.+ Dyambu ri n’wi pelele a ri kwalaho. 24 Hi nkarhi wolowo, xikepe a xi ri ekule swinene ni ribuwa,* xi ri karhi xi biwa hi magandlati hikuva a ku ba moya lowukulu. 25 Kambe hi matakuxa* a ta eka vona a ri karhi a famba ehenhla ka lwandle. 26 Loko vadyondzisiwa va n’wi vona a ri karhi a famba ehenhla ka lwandle, va chuha va ku: “I yini lexi taka!” Kutani va huwelela hi ku chava. 27 Kambe Yesu a ku eka vona: “Mi nga chavi; hi mina.”+ 28 Petro a hlamula a ku: “Hosi, loko ku ri wena, ndzi pfumelele ndzi famba ehenhla ka mati ndzi ta eka wena.” 29 A n’wi hlamula a ku: “Tana!” Hiloko Petro a xika exikepeni, a famba ehenhla ka mati a ya eka Yesu. 30 Kambe loko a languta xidzedze, a sungula ku chava. Kutani loko a sungula ku mbombomela, a huwelela a ku: “Hosi, ndzi ponise!” 31 Yesu a n’wi khoma hi voko kutani a ku: “Wena wa ripfumelo leritsongo, hikwalaho ka yini u kanakana?”+ 32 Xidzedze xi miyela endzhaku ka loko va khandziye xikepe. 33 Lava nga exikepeni va n’wi khinsamela, va ku: “Hakunene u N’wana wa Xikwembu.” 34 Kutani va tluta va fika eribuweni eGenesareta.+

35 Loko vavanuna va ndhawu yoleyo va n’wi vona, va tivisa van’wana emugangeni hinkwawo, hiloko vanhu va n’wi tisela hinkwavo lava vabyaka. 36 Kutani va kombela ku khumba ntsena makumu ya xiambalo xakwe xa le handle,+ hinkwavo lava xi khumbeke va horile.

15 Kutani Vafarisi ni vatsari+ lava humaka eYerusalema va ta eka Yesu, va fika va ku: 2 “Hikwalaho ka yini vadyondzisiwa va wena va tlula ndhavuko wa vakokwana? Hi xikombiso, va dya swakudya va nga hlambanga mavoko.”*+

3 A va hlamula a ku: “Hikwalaho ka yini mi tlula nawu wa Xikwembu hikwalaho ka ndhavuko wa n’wina?+ 4 Hi xikombiso, Xikwembu xi te, ‘Xixima tata wa wena ni mana wa wena,’+ naswona, ‘Loyi a rhukanaka tata wakwe kumbe mana wakwe a dlayiwe.’+ 5 Kambe n’wina mi ri, ‘Loyi a byelaka tata wakwe kumbe mana wakwe a ku: “Leswi ndzi nga na swona leswi a ndzi fanele ndzi ku pfuna hi swona, se ndzi swi nyikele eka Xikwembu,”+ 6 a nga fanelanga a xixima tata wakwe nikatsongo.’ Kutani mi endle rito ra Xikwembu ri nga pfuni nchumu hikwalaho ka ndhavuko wa n’wina.+ 7 Vakanganyisi ndzin’wina, Esaya a a profeta hi n’wina loko a ku:+ 8 ‘Vanhu lava va ndzi xixima hi nomu ntsena, kambe a swi humi embilwini. 9 A swi pfuni nchumu ku va va ndzi gandzela, hikuva leswi va swi dyondzisaka i milawu ya vanhu.’”+ 10 Hiloko a vitana ntshungu wu tshinela ekusuhi kutani a ku: “Yingisani mi tlhela mi twisisa leswi ndzi swi vulaka:+ 11 Munhu a nga thyakisiwi hi leswi nghenaka enon’wini wakwe, kambe u thyakisiwa hi leswi humaka enon’wini wakwe.”+

12 Kutani vadyondzisiwa va ta, va fika va ku: “Xana wa swi tiva leswaku Vafarisi va khunguvanyekile hikwalaho ka leswi u nga swi vula?”+ 13 A va hlamula a ku: “Ximilana lexi nga byariwangiki hi Tata wa mina wa le matilweni xi ta simuriwa. 14 Va tshikeni. I vakongomisi lava feke matihlo. Kutani, loko munhu loyi a feke matihlo a kongomisa un’wana loyi a feke matihlo, havambirhi va ta wela emugodini.”+ 15 Petro a ku: “Hi hlamusele xifaniso lexi.” 16 Hiloko a ku: “Xana na n’wina a mi si swi twisisa?+ 17 Xana a mi swi tivi leswaku lexi nghenaka enon’wini xi hundza hi le marhumbyini kutani xi humela ehandle? 18 Hambiswiritano, leswi humaka enon’wini swi huma embilwini, sweswo hi swona leswi thyakisaka munhu.+ 19 Hi xikombiso, embilwini ku huma ku anakanya ko homboloka:+ ku dlaya, vuoswi, ku tikhoma ko biha hi swa masangu,* vukhamba, vumbhoni bya mavunwa ni swisandzu. 20 Leswi hi swona swilo leswi thyakisaka munhu; kambe loko munhu a dya a nga hlambanga mavoko* a swi n’wi thyakisi.”

21 Loko a suka kwalaho, Yesu a ya etindhawini leti nga ekusuhi na Tiri na Sidoni.+ 22 Hiloko ku ta wansati wa Mufenikiya loyi a humaka endhawini yoleyo a n’wi kombela, a ku: “Ndzi twele vusiwana Hosi yanga, N’wana wa Davhida. N’wana wa mina wa nhwanyana wa xaniseka swinene hileswi a nga ni dimona.”+ 23 Kambe Yesu a nga n’wi hlamulanga. Kutani vadyondzisiwa vakwe va ku: “N’wi tlherise, hikuva wa hi tinga.” 24 A hlamula a ku: “A ndzi rhumiwanga eka un’wana ni un’wana kambe ndzi rhumiwe eka tinyimpfu leti lahlekeke ta yindlu ya Israyele.”+ 25 Kambe wansati a fika a khinsama a ku: “Ndzi pfune Hosi yanga!” 26 Yesu a n’wi hlamula a ku: “A hi swinene ku teka xinkwa xa vana u xi hoxela swimbyanyana.” 27 Wansati a ku: “U tiyisile Hosi yanga, kambe ntiyiso hi leswaku swimbyanyana swi dya mahlanhla lawa ma waka etafuleni ra vini va swona.”+ 28 Yesu a n’wi hlamula a ku: “Wansati, ripfumelo ra wena i rikulu; a swi endleke hilaha u kombelaka hakona.” Kutani n’wana wakwe wa nhwanyana a hola hi nkarhi wolowo.

29 Loko Yesu a suka kwalaho, a ya ekusuhi ni Lwandle ra Galeliya,+ a fika a khandziya ntshava a tshama kona. 30 Hiloko ku ta mintshungu yi ri ni vanhu lava khwitaka, lava lamaleke, lava feke matihlo, timbheveve ni van’wana vo tala va va veka emilengeni ya yena, kutani a va hanyisa.+ 31 Ntshungu wu hlamala loko wu vona timbheveve ti vulavula, lava lamaleke va horisiwa, lava khwitaka va famba kahle ni lava feke matihlo va vona, kutani ntshungu wu dzunisa Xikwembu xa Israyele.+

32 Kambe Yesu a vitana vadyondzisiwa vakwe kutani a ku: “Ntshungu lowu ndzi wu twela vusiwana,+ hikuva wu ni masiku manharhu wu tshame na mina naswona a wu na swakudya. A ndzi lavi ku wu tlherisa wu ri ni ndlala, hikuva wu nga wa endleleni.”+ 33 Hiloko vadyondzisiwa va ku: “Xana hi ta swi kuma kwihi swinkwa leswi nga ta xurhisa ntshungu wo tarisa xileswi, kwala nhoveni?”+ 34 Yesu a ku eka vona: “Mi ni swinkwa swingani?” Va ku: “Swa nkombo ni tihlampfinyana ti nga ri tingani.” 35 Endzhaku ko lerisa ntshungu leswaku wu tshama ehansi, 36 a teka swinkwa swa nkombo ni tihlampfi, loko a khongerile, a swi phemelela a sungula ku nyika vadyondzisiwa, vadyondzisiwa na vona va nyika mintshungu.+ 37 Hinkwavo va dya va xurha kutani va hlengeleta leswi saleke, ku tala tibasikiti letikulu ta nkombo.+ 38 Ku dye vavanuna va 4 000 ku nga hlayiwi vavasati ni vana. 39 Endzhaku ka loko a tlherise mintshungu, a khandziya xikepe a ya emugangeni wa Magadani.+

16 Hiloko Vafarisi ni Vasaduki va ta eka yena va ta n’wi ringa, va kombela leswaku a va endlela singita leri humaka etilweni.+ 2 A va hlamula a ku: “Loko ri pela mi tolovele ku vula mi ku, ‘Ku ta va ni maxelo lamanene, hikuva xibakabaka xi tshwukile,’ 3 naswona nimixo mi ri, ‘Namuntlha ku ta titimela ku tlhela ku na mpfula, hikuva xibakabaka xi tshwukile, xi tlhela xi va ni mapapa.’ Ma swi tiva ku hlamusela ndlela leyi xibakabaka xi langutekaka ha yona, kambe mi tsandzeka ku hlamusela swikombiso swa mikarhi. 4 N’wina xitukulwana xo homboloka ni lexi nga tshembekiki eka Xikwembu mi tshamela ku lava singita, kambe a ku na singita leri mi nga ta ri vona+ handle ka singita ra Yonasi.”+ Hiloko a famba, a va siya.

5 Kutani vadyondzisiwa va famba va ya eka tlhelo lerin’wana kambe va rivala ku teka swinkwa.+ 6 Yesu a ku eka vona: “Tshamani mi pfule mahlo naswona tivoneleni eka comela xa Vafarisi ni Vasaduki.”+ 7 Hiloko va sungula ku vulavula va ri voxe, va ku: “A hi tanga na swinkwa.” 8 Hi ku tiva leswi a va swi vula, Yesu a ku: “Hikwalaho ka yini mi hlevetela hi leswi mi nga riki na swinkwa, n’wina va ripfumelo leritsongo? 9 Xana a mi si swi twisisa leswi ndzi ringetaka ku mi byela swona, kumbe, xana a mi tsundzuki leswaku ndzi phamele vanhu va 5 000 hi swinkwa swa ntlhanu ni leswaku i tingani tibasikiti leti mi nga ti tata hi leswi nga sala?+ 10 Kumbe xana a mi tsundzuki leswaku hi swinkwa swa nkombo ndzi phamele vanhu va 4 000 ni leswaku i tibasikiti tingani letikulu leti mi nga ti tata hi leswi nga sala?+ 11 Hikwalaho ka yini mi nga swi xiyi leswaku a ndzi nga vulavuli hi xinkwa ke? Kambe tivoneleni eka comela xa Vafarisi ni Vasaduki.”+ 12 Kutani va swi twisisa leswaku u ri va tivonela eka dyondzo ya Vafarisi ni ya Vasaduki, hayi eka comela xo endla xinkwa.

13 Loko Yesu a fika emugangeni lowu vuriwaka Khezariya wa Filipi, a vutisa vadyondzisiwa vakwe a ku: “Xana vanhu va ri N’wana wa munhu i mani?”+ 14 Va n’wi hlamula va ku: “Van’wana va ri i Yohane Mukhuvuri,+ van’wana va ri i Eliya,+ kasi van’wanyana va ri i Yeremiya kumbe un’wana wa vaprofeta.” 15 A va vutisa a ku: “Kambe n’wina mi ri hi mina mani?” 16 Simoni Petro a hlamula a ku: “Hi wena Kreste,+ N’wana wa Xikwembu lexi hanyaka.”+ 17 Yesu a n’wi hlamula a ku: “Wa tsaka Simoni n’wana wa Yonasi, hikuva a ku na munhu loyi a ku hlamuseleke swona, kambe u hlavuteriwe hi Tata wa mina la nge matilweni.+ 18 Nakambe ndzi ri eka wena: Hi wena Petro+ naswona eka ribye+ leri ndzi ta aka vandlha ra mina, tinyangwa ta Sirha* a ti nge ri hluli. 19 Ndzi ta ku nyika swikhiya swa Mfumo wa matilo, lexi u nga ta xi boha laha misaveni xi ta va lexi bohiweke ni le matilweni, naswona lexi u nga ta xi tshunxa laha misaveni xi ta va lexi tshunxiweke ni le matilweni.” 20 Hiloko a tshinya vadyondzisiwa vakwe a tlhela a va lerisa leswaku va nga byeli munhu leswaku hi yena Kreste.+

21 Ku sukela nkarhi wolowo, Yesu a sungula ku hlamusela vadyondzisiwa vakwe leswaku u fanele a ya eYerusalema a ya xanisiwa swinene hi vakulukumba, vaprista lavakulu ni vatsari, a dlayiwa kutani a pfuxiwa hi siku ra vunharhu.+ 22 Hiloko Petro a ya na yena etlhelo kutani a sungula ku n’wi tshinya, a ku: “Titsetselele, Hosi; khombo leri ri nga ka ri nga ku weli nikatsongo.”+ 23 Kambe Yesu a fularhela Petro, kutani a ku: “Yana endzhaku ka mina Sathana! U xikhunguvanyiso eka mina, hikuva u ehleketa ku fana ni vanhu ku nga ri Xikwembu.”+

24 Yesu a ku eka vadyondzisiwa vakwe: “Loyi a lavaka ku ndzi landzela, a a titshike kutani a rhwala mhandzi yakwe ya nxaniso* a ndzi landzela nkarhi hinkwawo.+ 25 Hikuva loyi a lavaka ku ponisa vutomi byakwe u ta lahlekeriwa hi byona, kambe loyi a lahlekeriwaka hi vutomi byakwe hikwalaho ka mina u ta tlhela a byi kuma.+ 26 Xana swi pfuna yini ku va munhu a kuma swilo swa misava leyi hinkwaswo kambe a lahlekeriwa hi vutomi byakwe?+ Kumbe xana munhu a nga byi xava hi yini vutomi byakwe?+ 27 Hikuva N’wana wa munhu u ta ta hi ku vangama ka Tata wakwe a ri ni tintsumi takwe, kutani u ta hakela un’wana ni un’wana hi ku ya hi mitirho yakwe.+ 28 Ndzi tiyisile ndzi ri eka n’wina, ku ni van’wana lava yimeke laha, lava nga ta ka va nga fi va nga si vona N’wana wa munhu a ri eMfun’weni wakwe.”+

17 Endzhaku ka masiku ya tsevu, Yesu a teka Petro, Yakobo ni makwavo wa yena Yohane va khandziya ntshava leyi tlakukeke.+ 2 Hiloko a hundzuriwa emahlweni ka vona; xikandza xakwe xi vangama kukota dyambu, swiambalo swakwe swa le handle swi basa swi ku paa!+ 3 Kutani ku humelela Muxe na Eliya va vulavula na yena. 4 Hiloko Petro a byela Yesu a ku: “Hosi, swa tsakisa ku va laha. Loko u swi rhandza, ndzi ta dzima mitsonga* yinharhu laha, wun’we wu va wa wena, wun’wana wu va wa Muxe, wun’wanyana wu va wa Eliya.” 5 Loko a ha vulavula, ku humelela papa leri vangamaka ri va funengeta, kutani ku twala rito ri huma epapeni ri ku: “Loyi i N’wananga, loyi ndzi n’wi rhandzaka, loyi ndzi n’wi amukeleke.+ N’wi yingiseni.”+ 6 Loko vadyondzisiwa va twa sweswo va chava swinene kutani va khinsama, swikandza swa vona swi languta ehansi. 7 Kutani Yesu a tshinela, a va khumba, a ku: “Pfukani. Mi nga chavi.” 8 Loko va languta, va vona Yesu ntsena. 9 Loko va ri karhi va rhelela entshaveni, Yesu a va lerisa, a ku: “Mi nga byeli munhu xivono lexi ku fikela loko N’wana wa munhu a pfuxiwile eku feni.”+

10 Hambiswiritano, vadyondzisiwa vakwe va n’wi vutisa va ku: “Hikwalaho ka yini vatsari va vula leswaku ku fanele ku rhanga ku ta Eliya?”+ 11 A va hlamula a ku: “Eliya u ta ta naswona u ta lunghisa swilo hinkwaswo.+ 12 Hambiswiritano, ndzi ri eka n’wina Eliya se u tile naswona a va n’wi lemukanga, kambe va n’wi xanisile.+ Ni N’wana wa munhu va ta n’wi xanisa hi ndlela leyi fanaka.”+ 13 Hiloko vadyondzisiwa va swi xiya leswaku a a va byela hi Yohane Mukhuvuri.

14 Loko va fika ekusuhi ni ntshungu,+ wanuna un’wana a n’wi tshinelela, a fika a khinsama emahlweni ka yena a ku: 15 “Hosi, twela n’wana wa mina vusiwana hikuva u ni switshetshela naswona wa vabya swinene. U tala ku wela endzilweni ni le matini.+ 16 Ndzi n’wi yise eka vadyondzisiwa va wena kambe va tsandzekile ku n’wi hanyisa.” 17 Yesu a n’wi hlamula a ku: “N’wina xitukulwana lexi nga riki na ripfumelo xi tlhela xi homboloka,+ xana ndzi fanele ndzi mi tiyiselela ku fikela rini? Ndzi ta mi lehisela mbilu ku fikela rini? N’wi tiseni haleni.” 18 Kutani Yesu a tshinya dimona, hiloko ri huma eka yena, mufana a hola hi wona nkarhi wolowo.+ 19 Endzhaku ka sweswo vadyondzisiwa va ya eka Yesu exihundleni va ku: “Hikwalaho ka yini hi tsandzekile ku ri hlongola?” 20 A ku eka vona: “Hikwalaho ka ripfumelo ra n’wina leritsongo. Hikuva ndzi tiyisile ndzi ri eka n’wina, loko mo va ni ripfumelo leri ringanaka ni ndzoho ya sinapi, mi ta swi kota ku byela ntshava leyi mi ku, ‘Suka laha u ya lahaya,’ kutani yi ta suka, naswona ku hava lexi nga ta mi tsandza.”+ 21* ——

22 Loko va ha hlengeletane eGaleliya, Yesu a ku eka vona: “N’wana wa munhu u ta xavisiwa+ 23 a tlhela a dlayiwa, kutani u ta pfuxiwa hi siku ra vunharhu.”+ Hiloko vadyondzisiwa va va ni gome lerikulu.

24 Loko va fika eKapernawume, vavanuna lava hlengeletaka xibalo xa tempele* va ya eka Petro va ku: “Xana mudyondzisi wa n’wina a nga hakeli xibalo xa tempele?”+ 25 A va hlamula a ku: “Wa hakela.” Kambe, loko Yesu a nghena endlwini a n’wi vutisa a ku: “U swi vonisa ku yini, Simoni? Xana tihosi ta misava ti yi kuma eka vamani mali ya xibalo? Xana ti yi kuma eka vana va tona kumbe eka vafambi?” 26 A hlamula a ku: “Eka vafambi,” Yesu a ku: “Kutani, vana va tona a va hakeli xibalo. 27 Kambe leswaku hi nga va khunguvanyisi,+ yana elwandle, u ya petela kutani u teka nhlampfi yo sungula leyi u nga ta yi phasa, loko u pfula nomu wa yona, u ta kuma mali ya silivhere.* Yi teke u ya hakelela mina na wena.”

18 Hi nkarhi wolowo vadyondzisiwa va ta eka Yesu va ku: “Kahlekahle i mani lonkulu eMfun’weni wa matilo?”+ 2 Kutani a vitana n’wana, a n’wi yimisa exikarhi ka vona 3 kutani a ku: “Ndzi tiyisile ndzi ri eka n’wina, loko mi nga hundzuki mi fana ni vana,+ a mi nge ngheni eMfun’weni wa matilo.+ 4 Hikwalaho, loyi a nga ta titsongahata ku fana ni n’wana loyi hi yena lonkulu eMfun’weni wa matilo;+ 5 naswona loyi a amukelaka un’wana wa vana lava hikwalaho ka vito ra mina wa ndzi amukela na mina. 6 Kambe loyi a khunguvanyisaka un’wana wa lava lavatsongo, lava nga ni ripfumelo eka mina, nxupulo wakwe wu ta va wukulu lerova swi nga antswa loko o boheleriwa ribye lerikulu ro sila* enhan’wini kutani a hoxiwa elwandle.+

7 “Khombo eka misava, hikuva yi fanele yi avanyisiwa hi ndlela yo vava hikwalaho ko veka swikhunguvanyiso swa ripfumelo! Swikhunguvanyiso swi fanele swi va kona kambe u ni khombo munhu loyi a khunguvanyisaka van’wana! 8 Loko voko ra wena kumbe nenge wa wena wu ku dyohisa,* wu tseme u wu cukumeta ekule na wena.+ Swa antswa leswaku u kuma vutomi u lamarile kumbe u khwita, ku ri ni ku hoxiwa endzilweni lowu nga heriki u ri ni mavoko mambirhi kumbe milenge yimbirhi.+ 9 Nakambe, loko tihlo ra wena ri ku dyohisa,* ri xokole u ri cukumeta ekule na wena. Swa antswa leswaku u kuma vutomi u ri ni tihlo rin’we ku ri ni ku hoxiwa endzilweni wa Gehena*+ u ri ni matihlo mambirhi. 10 Mi nga n’wi languteli ehansi un’wana wa lava lavatsongo, hikuva ndza mi byela leswaku tintsumi leti va khathalelaka etilweni mikarhi hinkwayo ti vona xikandza xa Tatana loyi a nga ematilweni.+ 11* ——

12 “Mi swi vonisa ku yini? Loko munhu a ri ni tinyimpfu ta 100 kutani ku lahleka yin’we,+ xana a nge ti siyi leta 99 etintshaveni kutani a ya lava leyi lahlekeke?+ 13 Ndzi tiyisile ndzi ri eka n’wina loko a yi kuma, u ta tsaka ngopfu leswi a nga yi kuma ku tlula leta 99 leti nga lahlekangiki. 14 Hilaha ku fanaka, Tata wa mina* la nga ematilweni a nga naveli leswaku un’wana wa lava lavatsongo a lova.+

15 “Ku tlula kwalaho, loko makwenu a ku dyohela, famba u ya n’wi komba xihoxo xakwe* mi ri vambirhi.+ Loko a ku yingisa, u ta va u pfune makwenu ku endla leswinene.+ 16 Kambe loko a nga ku yingisi, famba ni munhu un’we kumbe vambirhi, leswaku mhaka yin’wana ni yin’wana yi ta tiya loko ku ri ni vumbhoni bya timbhoni timbirhi kumbe tinharhu.+ 17 Loko a nga va yingisi, tivisa vandlha. Loko a nga ri yingisi hambi vandlha, a a fane ni munhu wa matiko+ ni muluvisi* eka wena.+

18 “Ndzi tiyisile ndzi ri eka n’wina, swilo leswi mi nga ta swi boha laha misaveni swi ta va leswi bohiweke ni le tilweni, naswona swilo leswi mi nga ta swi tshunxa laha misaveni swi ta va leswi tshunxiweke ni le tilweni. 19 Nakambe ndzi mi byela ntiyiso ndzi ri, loko vambirhi va n’wina laha misaveni va twanana ku khongela hi nchumu wa nkoka, va ta endleriwa wona hi Tata wa mina wa le tilweni.+ 20 Hikuva laha vambirhi kumbe vanharhu va hlengeletaneke hi vito ra mina,+ ndzi kona exikarhi ka vona.”

21 Hiloko Petro a ta eka yena, a ku: “Hosi, loko makwerhu a ndzi dyohela, xana ndzi fanele ndzi n’wi rivalela kangani? Ka nkombo ke?” 22 Yesu a n’wi hlamula a ku: “Mina ndzi ri, hayi ka nkombo, kambe ka 77.+

23 “Hi yona mhaka leyi Mfumo wa matilo wu nga ha fanisiwaka ni hosi leyi byeleke malandza ya yona leswaku ma yi hakela leswi ma yi kolotaka swona. 24 Loko ma sungula ku hakela, ku tisiwe munhu loyi a a yi kolota titalenta ta 10 000.* 25 Kambe leswi a a nga ri na mali yo hakela ha yona, n’wini wakwe u lerise leswaku yena ni nsati wakwe ni vana vakwe ni swilo hinkwaswo leswi a a ri na swona swi xavisiwa leswaku ku ta kumiwa mali yo hakela ha yona.+ 26 Kutani nandza a khinsama a yi kombela hi mbilu hinkwayo, a ku, ‘Ndzi lehisele mbilu ndzi ta ku hakela hinkwaswo leswi ndzi ku kolotaka swona.’ 27 N’wini wa nandza yoloye a n’wi twela vusiwana, a n’wi tshika kutani a sula xikweleti xakwe.+ 28 Kambe nandza yoloye a huma kutani a kuma nandza un’wana loyi a a n’wi kolota tidenari* ta 100, hiloko a n’wi khoma, a n’wi tlimba nkolo, a ku, ‘Hakela mali ya mina.’ 29 Kutani nandza yoloye a khinsama, a n’wi xavelela a ku, ‘Ndzi lehisele mbilu ndzi ta ku hakela.’ 30 Hambiswiritano, a a nga lavi no twa, kambe a lerisa leswaku a hoxiwa ekhotsweni a kala a hakela mali leyi a a n’wi kolota yona. 31 Loko malandza laman’wana ma vona leswi endlekeke, ma karhateka swinene, hiloko ma famba ma ya hlamusela n’wini wa wona swilo hinkwaswo leswi endlekeke. 32 Kutani n’wini wa nandza yoloye a n’wi vitana a ku eka yena: ‘Wena nandza wo homboloka, ndzi sule xikweleti xa wena loko u ndzi kombela. 33 Xana na wena a wu nga fanelanga u ve ni tintswalo eka nandzakuloni, hilaha na mina ndzi veke ni tintswalo eka wena?’+ 34 Hiloko n’wini wa yena a hlundzuka, a n’wi nyiketa eka valanguteri va khotso kukondza a hakela hinkwaswo leswi a a swi kolota. 35 Ni Tata wa mina la nge matilweni u ta endla hilaha ku fanaka eka n’wina+ loko un’wana wa n’wina a nga rivaleli makwavo hi mbilu hinkwayo.”+

19 Loko Yesu a heta ku vulavula marito lawa, a suka eGaleliya a ya endzilakaneni wa Yudiya entsungeni wa Yordani.+ 2 A a landzeriwa hi mintshungu, kutani a yi hanyisa kwalaho.

3 Hiloko Vafarisi va ta eka yena hi xikongomelo xo n’wi ringa, va n’wi vutisa va ku: “Xana swa pfumeleriwa leswaku wanuna a tshika nsati wakwe hi xivangelo xin’wana ni xin’wana?”+ 4 A va hlamula a ku: “Xana a mi hlayanga leswaku loyi a va vumbeke eku sunguleni u endle wanuna ni wansati+ 5 kutani a ku: ‘Hikwalaho ka sweswo, wanuna u ta siya tata wakwe ni mana wakwe kutani a namarhela* nsati wakwe naswona lavambirhi va ta va nyama yin’we?’+ 6 A va ha ri vambirhi, kambe i nyama yin’we. Hikwalaho, leswi Xikwembu xi swi paneke swin’we, ku nga tshuki ku va ni munhu la swi hambanisaka.”+ 7 Va ku eka yena: “Hikwalaho ka yini Muxe a lerise leswaku wansati a nyikiwa papila ra ku n’wi hlongola ni ku n’wi tshika?”+ 8 A ku eka vona: “Muxe u mi pfumelele ku tshika vasati va n’wina hikwalaho ka ku nonon’hwa ka timbilu ta n’wina,+ kambe a swi nga ri tano ku sukela eku sunguleni.+ 9 Ndza mi byela leswaku loyi a tshikaka nsati wakwe a teka un’wana, handle ka loko a tikhome ku biha hi swa masangu* u endla vuoswi.”+

10 Vadyondzisiwa va ku eka yena: “Loko vukati byi ri tano, a hi vutlhari ku teka.” 11 A ku eka vona: “A hi vanhu hinkwavo lava nga kotaka ku endla tano, kambe swi kotiwa ntsena hi lava nga ni nyiko yo tano.+ 12 Hikuva ku ni vatsheniwa lava nga velekiwa va ri tano, nakambe ku ni vatsheniwa* lava nga endliwa vatsheniwa hi vanhu, naswona ku ni vatsheniwa lava tiendlaka vatsheniwa hikwalaho ka Mfumo wa matilo. Loyi a nga swi kotaka a endle tano.”+

13 Hiloko vana va yisiwa eka Yesu leswaku a va tlhandleka mavoko,* a va khongelela, kambe vadyondzisiwa va holovela vanhu volavo.+ 14 Kambe Yesu a ku: “Tshikani vana, mi nga va siveli ku ta eka mina, hikuva Mfumo wa matilo i wa lava fanaka na vona.”+ 15 Kutani a va tlhandleka mavoko, a suka kwalaho.

16 Hiloko munhu un’wana a ya eka yena, a ku: “Mudyondzisi, ndzi fanele ndzi endla yini leswinene leswaku ndzi kuma vutomi lebyi nga heriki?”+ 17 A ku: “Hikwalaho ka yini u ndzi vutisa hi leswinene? I Xikwembu ntsena xi nga xinene.+ Kambe, loko u lava ku kuma vutomi, yana emahlweni u yingisa milawu.”+ 18 Munhu yoloye a ku: “Milawu yihi?” Yesu a ku: “U nga tshuki u dlaya,+ u nga tshuki u oswa,+ u nga tshuki u yiva,+ u nga tshuki u nyikela vumbhoni bya mavunwa,+ 19 xixima tata wa wena ni mana wa wena,+ naswona u fanele u rhandza warikwenu hi ndlela leyi u tirhandzaka ha yona.”+ 20 Jaha leri ri ku: “Milawu leyi hinkwayo ndza yi yingisa; xana ku laveka yini swin’wana?” 21 Yesu a ku eka yena: “Loko u lava ku va la hetisekeke, famba u ya xavisa leswi u nga na swona, u nyika swisiwana mali ya kona, kutani u ta va ni xuma etilweni;+ ivi u ta u va mulandzeri wa mina.”+ 22 Loko jaha leri ri twa sweswo, ri famba ri ri ni gome, hikuva a ri ri ni swilo swo tala.+ 23 Hiloko Yesu a byela vadyondzisiwa vakwe a ku: “Ndzi tiyisile ndzi ri eka n’wina, swi ta tika ku va munhu loyi a fuweke a nghena eMfun’weni wa matilo.+ 24 Nakambe ndzi ri eka n’wina, swi olova ngopfu ku va kamela yi hundza embhoveni wa neleta ku ri ni ku va munhu la fuweke a nghena eMfun’weni wa Xikwembu.”+

25 Loko vadyondzisiwa va twa sweswo, va hlamala ngopfu, va ku: “Kahlekahle i mani loyi a nga ta pona?”+ 26 Yesu a va langutisisa kutani a ku eka vona: “Eka vanhu a swi koteki, kambe eka Xikwembu swilo hinkwaswo swa koteka.”+

27 Petro a n’wi hlamula a ku: “Waswivo! Hi siye swilo hinkwaswo hi ku landzela; kahlekahle hi ta vuyeriwa hi yini?”+ 28 Yesu a ku eka vona: “Ndzi tiyisile ndzi ri eka n’wina, hi nkarhi lowu swilo hinkwaswo swi nga ta endliwa leswintshwa, loko N’wana wa munhu a tshama ehansi exiluvelweni xakwe lexi vangamaka, n’wina lava mi ndzi landzeleke mi ta tshama eswiluvelweni swa 12, mi avanyisa tinyimba ta 12 ta Israyele.+ 29 Loyi a siyeke tiyindlu kumbe vamakwavo va xinuna kumbe vamakwavo va xisati kumbe tatana kumbe manana kumbe vana kumbe masimu hikwalaho ka vito ra mina u ta nyikiwa swona ka dzana, naswona u ta kuma ndzhaka ya vutomi lebyi nga heriki.+

30 “Kambe vo tala lava nga vo sungula va ta va vo hetelela, kasi lavo hetelela va ta va vo sungula.+

20 “Hikuva Mfumo wa matilo wu fana ni n’wini wa muti, loyi a humeke nimixo ku ya thola vatirhi lava nga ta tirha ensin’wini yakwe ya madiriva.+ 2 Endzhaku ka loko a pfumelelane ni vatirhi leswaku u ta va hakela denari* hi siku, a va byela leswaku va ya tirha ensin’wini yakwe ya madiriva. 3 A tlhela a huma kwalomu ka awara ya vunharhu,* a vona van’wana va yime emakete va nga ri na ntirho; 4 hiloko a ku, ‘Na n’wina yanani ensin’wini ya madiriva, ndzi ta mi hakela leswi faneleke.’ 5 Kutani va famba. A tlhela a huma kwalomu ka awara ya vutsevu* ni ya vukaye* a endla hilaha ku fanaka. 6 Kwalomu ka awara ya vu-11* a tlhela a huma kutani a kuma van’wana va yimile, a ku, ‘Hikwalaho ka yini mi yime laha siku hinkwaro mi nga tirhi?’ 7 Va n’wi hlamula va ku, ‘Hikuva a hi thoriwanga.’ A ku, ‘Na n’wina yanani ensin’wini ya madiriva.’

8 “Loko ri pela, n’wini wa nsimu ya madiriva a byela ndhuna a ku, ‘Vitana vatirhi u va holela,+ u rhanga hi lavo hetelela kutani u hetelela hi lavo sungula.’ 9 Loko ku fika lavo hetelela lava nga sungula ku tirha hi awara ya vu-11, un’wana ni un’wana wa vona u holeriwe denari.* 10 Loko ku fika lavo sungula, a va ehleketa leswaku va ta holeriwa ngopfu, kambe na vona va holeriwe denari.* 11 Loko va holeriwile, va sungule ku gungula va sola n’wini wa muti 12 va ku, ‘Lavo hetelela va tirhe awara yin’we; kambe na vona u va ringanisa na hina lava hi tirheke siku hinkwaro hi hisiwa hi mumu!’ 13 Kambe a hlamula un’wana wa vona a ku, ‘Nandzuwe, a ndzi ku dyohelanga nchumu. Xana a hi pfumelelananga hi denari?*+ 14 Teka leswi nga swa wena u famba. Ndzi lava ku holela lavo hetelela ku fana na wena. 15 Xana a ndzi na mfanelo yo endla leswi ndzi swi lavaka hi swilo swa mina? Kumbe, xana tihlo ra wena ri ni mavondzo hileswi ndzi endlaka leswinene?’*+ 16 Hi ndlela leyi, lavo hetelela va ta va vo sungula, kutani lavo sungula va ta va vo hetelela.”+

17 Loko va ri endleleni yo ya eYerusalema, Yesu a ya endhawini leyi nga riki na vanhu swin’we ni vadyondzisiwa va 12 a ku eka vona:+ 18 “Maswivo! Hi ya eYerusalema naswona N’wana wa munhu u ta nyiketiwa eka vaprista lavakulu ni vatsari. Va ta n’wi gweva rifu,+ 19 va n’wi nyiketa eka vamatiko leswaku va tlanga hi yena ni ku n’wi ba va tlhela va n’wi dlaya hi ku n’wi belela emhandzini;+ naswona u ta pfuxiwa hi siku ra vunharhu.”+

20 Endzhaku ka sweswo mana wa vana va Zebediya+ a ya eka yena ni vana vakwe, a fika a khinsama, a kombela swo karhi.+ 21 Yesu a vutisa wansati yoloye a ku: “U lava yini?” Wansati a ku eka yena: “Ndzi kombela leswaku eMfun’weni wa wena vana lava vambirhi va mina, un’we a tshama evokweni ra wena ra xinene kasi lowun’wana eka lera ximatsi.”+ 22 Yesu a hlamula a ku: “A mi swi tivi leswi mi swi kombelaka. Xana mi nga swi kota ku nwa eka xinwelo lexi ndzi nga ta nwa eka xona ku nga ri khale?”+ Va ku eka yena: “Hi nga swi kota.” 23 Yesu a ku eka vona: “Kunene mi ta swi kota ku nwa xinwelo xa mina,+ kambe loko ku ri mhaka ya ku tshama evokweni ra mina ra xinene ni ra ximatsi a hi mina ndzi nga mi nyikaka swona, kambe i swa lava lunghiseriweke swona hi Tata wa mina.”+

24 Loko lavan’wana va khume va twa mhaka leyi, va hlundzukela vamakwavo lava vambirhi.+ 25 Kambe Yesu a va vitana, a ku: “Ma swi tiva leswaku tihosi ta matiko ti tikisela vanhu va tona naswona vafumi lava nga ni matimba va fuma hi voko ra nsimbhi.+ 26 A swi fanelanga swi va tano exikarhi ka n’wina;+ kambe loyi a lavaka ku va lonkulu eka n’wina u fanele a mi tirhela+ 27 naswona loyi a lavaka ku va wo sungula exikarhi ka n’wina u fanele a va nandza wa n’wina.+ 28 Ku fana ni N’wana wa munhu loyi a nga telangiki ku tirheriwa, kambe a teleke ku tirhela van’wana+ ni ku nyikela vutomi byakwe leswaku byi va nkutsulo wa lavo tala.”+

29 Loko va ri karhi va huma eYeriko ntshungu lowukulu a wu n’wi landzelela. 30 Vanhu vambirhi lava feke matihlo lava a va tshame etlhelo ka ndlela, loko va twa leswaku Yesu wa hundza, va huwelela va ku: “Hosi, hi twele vusiwana, N’wana wa Davhida!”+ 31 Kambe ntshungu wu va holovela wu va byela leswaku va miyela; kambe va ya va huwelela swinene, va ku: “Hosi, hi twele vusiwana, N’wana wa Davhida!” 32 Kutani Yesu a yima, a va vitana a ku: “Mi lava ndzi mi endlela yini?” 33 Va n’wi hlamula va ku: “Hosi, pfula matihlo ya hina.” 34 Yesu a va twela vusiwana, kutani a khumba matihlo ya vona,+ hiloko va sungula ku vona hi nkarhi wolowo, va n’wi landzela.

21 Loko va ri ekusuhi ni le Yerusalema, va fike eBetefage eNtshaveni ya Mitlhwari, kutani Yesu a rhuma vadyondzisiwa vambirhi,+ 2 a ku eka vona: “Yanani eximutanini lexi mi langutaneke na xona, mi ta kuma mbhongolo yi tsimbiwile yi ri ni ximbhongolwana. Ti tshunxeni mi vuya na tona. 3 Loko un’wana a mi vutisa, mi fanele mi ku, ‘Hosi ya ti lava.’ Kutani u ta mi tshika mi famba na tona.”

4 Kahlekahle leswi swi endlekile leswaku ku hetiseka leswi nga vuriwa hi muprofeta, loyi a nga te: 5 “Byelani nhwanyana wa Siyoni mi ku: ‘Waswivo! Hosi ya wena yi ta eka wena+ hi moya wo rhula,+ yi gade mbhongolo, yi gade ximbhongolwana, n’wana wa mbhongolo.’”+

6 Hiloko vadyondzisiwa va famba, va ya endla hilaha Yesu a va leriseke hakona.+ 7 Va vuya ni mbhongolo ni ximbhongolwana xa yona, va ti kapeka swiambalo swa vona, hiloko Yesu a gada ximbhongolwana.+ 8 Vo tala lava a va ri entshungwini va andlala swiambalo swa vona endleleni,+ van’wana va tsema marhavi emirhini va ma andlala endleleni. 9 Loko ku ri mintshungu leyi a yi n’wi rhangerile ni lava a va n’wi landzela, a va ya emahlweni va huwelela va ku: “Ha khongela, a ku ponisiwe N’wana wa Davhida!+ U katekile loyi a taka hi vito ra Yehovha!*+ Ha khongela, n’wi ponise, wena la nga le matilweni!”+

10 Kutani loko a nghena eYerusalema, muti hinkwawo wu yimayimeka, wu ku: “I mani loyi?” 11 Mitshungu a yi tshamela ku vula yi ku: “Loyi i muprofeta Yesu,+ la humaka eNazareta wa Galeliya!”

12 Yesu a nghena etempeleni a hlongola hinkwavo lava xavisaka ni lava xavaka etempeleni, a wisetela matafula ya vacinci va mali ni switulu swa lava xavisaka matuva.+ 13 A ku eka vona: “Ku tsariwile, ‘Yindlu ya mina yi ta vuriwa yindlu ya xikhongelo,’+ kambe n’wina mi yi endla bako ra swigevenga.”+ 14 Nakambe vanhu lava feke mahlo ni lava khwitaka va ta eka yena etempeleni kutani a va hanyisa.

15 Vaprista lavakulu ni vatsari va hlundzuka+ loko va vona swilo swo hlamarisa leswi Yesu a nga swi endla kasi vafana vona a va huwelela etempeleni va ku, “Ha khongela, a ku ponisiwe N’wana wa Davhida,”+ 16 kutani va ku eka yena: “Xana wa swi twa leswi vuriwaka hi vafana lava?” Yesu a va hlamula a ku: “Ina. Xana a mi si tshama mi hlaya leswi, ‘U humese swidzuniso hi milomu ya vana ni tincece’?”+ 17 Hiloko a huma emutini a va siya kwalaho a ya eBetaniya kutani a etlela kona vusiku byebyo.+

18 Loko a tlhelela emutini nimixo, a khomiwa hi ndlala.+ 19 Hiloko a vona nkuwa ekusuhi ni ndlela kutani a ya eka wona kambe a kuma matluka ntsena,+ hiloko a ku eka wona: “Ku nga ha tshuki ku huma mihandzu eka wena.”+ Nkuwa wu vuna hi nkarhi wolowo. 20 Loko vadyondzisiwa va vona leswi, va hlamala kutani va ku: “Swi tisa ku yini leswaku nkuwa wu vuna hi ku hatlisa?”+ 21 Yesu a va hlamula a ku: “Ndzi tiyisile ndzi ri eka n’wina, loko mi ri ni ripfumelo naswona mi nga kanakani, a mi nge endli leswi ndzi swi endleke eka nkuwa lowu ntsena, kambe mi nga byela ni ntshava leyi mi ku, ‘Suka u ya tihoxa elwandle,’ kutani swi ta endleka.+ 22 Naswona swilo hinkwaswo leswi mi swi kombelaka hi xikhongelo mi ri ni ripfumelo, mi ta swi kuma.”+

23 Endzhaku ka loko a nghene etempeleni, vaprista lavakulu ni vakulukumba va tiko va ta eka yena loko a ri karhi a dyondzisa va ku: “U swi endla hi matimba ya mani swilo leswi? I mani loyi a ku nyikeke matimba lawa?”+ 24 Yesu a va hlamula a ku: “Na mina ndzi ta mi vutisa xilo xin’we. Loko mo ndzi hlamula, ndzi ta mi byela leswaku ndzi endla swilo leswi hi matimba ya mani: 25 Xana nkhuvulo wa Yohane, a wu huma kwihi? A wu huma etilweni kumbe eka vanhu?” Hiloko va sungula ku vulavula va ri voxe, va ku: “Loko hi ku, ‘A wu huma etilweni,’ u ta ku, ‘Kutani, hikwalaho ka yini mi nga n’wi tshembanga?’+ 26 Kambe loko hi ku, ‘A wu huma eka vanhu,’ hi chava ntshungu hikuva hinkwawo wu tshemba leswaku Yohane i muprofeta.” 27 Kutani va hlamula Yesu va ku: “A hi swi tivi.” Na yena a ku eka vona: “Na mina a ndzi nge mi byeli leswaku ndzi endla swilo leswi hi matimba ya mani.

28 “Xana mi ri yini hi mhaka leyi? Wanuna un’wana a a ri ni vana vambirhi. A ya eka lowo sungula, a ku, ‘N’wananga, famba u ya tirha ensin’wini ya madiriva namuntlha.’ 29 A n’wi hlamula a ku, ‘A ndzi nge yi,’ kambe endzhaku ka nkarhi a tisola a ya. 30 A ya eka lowa vumbirhi, a vula leswi fanaka. Yena a ku, ‘Ndzi ta ya, Nkulukumba,’ kambe a nga yanga. 31 Hi wihi eka lava vambirhi la endleke ku rhandza ka tata wakwe?” Va ku: “Hi lowo sungula.” Yesu a ku eka vona: “Ndzi tiyisile ndzi ri eka n’wina, valuvisi* ni tinghwavava va mi rhangela ku nghena eMfun’weni wa Xikwembu. 32 Hikuva Yohane u tile eka n’wina a mi dyondzisa ndlela yo lulama, kambe a mi n’wi tshembanga. Hambiswiritano u tshembiwe hi valuvisi* ni tinghwavava+ kambe n’wina hambiloko mi swi vonile swilo leswi, a mi tisolanga mi n’wi tshemba.

33 “Hi lexi xifaniso xin’wana: A ku ri ni munhu loyi a a rime nsimu ya madiriva,+ kutani a yi biyela a endla ni ndhawu yo kamela madiriva, a aka ni xihondzo;+ kutani a endla ntwanano ni varimi van’wana leswaku va yi khathalela, yena a endzela etikweni ra le kule.+ 34 Loko nkarhi wo kha mihandzu wu fika, a rhuma malandza yakwe eka varimi leswaku ma landza mihandzu yakwe. 35 Kambe varimi va khoma malandza yakwe, un’wana va n’wi ba, un’wana va n’wi dlaya, un’wana va n’wi khandla hi maribye.+ 36 A tlhela a rhuma malandza man’wana, yo tala ku tlula yo sungula, kambe va ma endla leswi fanaka.+ 37 Eku heteleleni, a rhuma n’wana wakwe eka vona, a ku, ‘Va ta n’wi xixima n’wananga.’ 38 Loko varimi va vona n’wana wakwe, va byelana va ku, ‘Hi loyi mudyandzhaka.+ A hi n’wi dlayeni hi ta teka nsimu* yakwe!’ 39 Hiloko va n’wi khoma va n’wi cukumetela ehandle ka nsimu ya madiriva kutani va n’wi dlaya.+ 40 Hikwalaho, loko n’wini wa nsimu a vuya, u ta endla yini hi varimi volavo?” 41 Va ku eka yena: “Hikwalaho ka leswi va hombolokeke, u ta va dlaya hi ndlela yo vava, kutani a endla ntwanano ni varimi van’wana, lava nga ta n’wi nyika mihandzu loko nkarhi wa yona wu fika.”

42 Yesu a ku eka vona: “Xana a mi si tshama mi hlaya eMatsalweni mhaka leyi nge, ‘Ribye leri vaaki va nga ri nyenya, hi rona ri veke ribye ra nkoka swinene?*+ Ri huma eka Yehovha,* naswona ra hi hlamarisa.’+ 43 Hi yona mhaka leyi ndzi nge eka n’wina, mi ta tekeriwa Mfumo wa Xikwembu wu nyikiwa tiko leri tswalaka mihandzu. 44 Nakambe, munhu loyi a welaka eribyeni leri u ta phyandlaseka.+ Kasi loyi ri n’wi welaka, ri ta n’wi phyandlasa.”+

45 Loko vaprista lavakulu ni Vafarisi va twa swifaniso swa Yesu, a va swi tiva leswaku a a vula vona.+ 46 Hambileswi a va lava ku n’wi khoma, a va chava mintshungu hikuva a yi tshemba leswaku i muprofeta.+

22 Yesu a tlhela a va dyondzisa hi ku tirhisa swifaniso, a ku: 2 “Mfumo wa matilo wu nga fanisiwa ni hosi leyi endleleke n’wana wa yona mucato.+ 3 Kutani yi rhuma malandza ya yona ku ya vitana lava rhambiweke emucatweni, kambe va ala ku ta.+ 4 Yi tlhela yi rhuma malandza man’wana yi ku, ‘Byelani lava rhambiweke mi ku: “Ndzi sweke swakudya, ndzi tlhave tinkuzi ni swifuwo swo nona, swilo hinkwaswo swi lunghekile. Tanani emucatweni.”’ 5 Kambe a va vanga na mhaka na swona, un’wana u tiyele ensin’wini yakwe, un’wanyana ebindzwini rakwe;+ 6 kambe lavan’wana va khoma malandza ya yona, va ma xanisa va tlhela va ma dlaya.

7 “Hiloko hosi yi kariha, yi rhuma masocha ya yona ma ya dlaya vadlayi volavo ma tlhela ma hisa muti wa vona.+ 8 Kutani hosi yi byela malandza ya yona yi ku, ‘Mucato wu lunghekile, kambe lava a va rhambiwile a va nga faneleki.+ 9 Hikwalaho, yanani etindleleni leti yaka ehandle ka muti, mi ya rhamba un’wana ni un’wana loyi mi nga ta n’wi kuma leswaku a ta emucatweni.’+ 10 Hiloko malandza wolawo ma huma ma ya etindleleni ma ya rhamba vanhu vo lulama ni lava nga lulamangiki; kutani holo leyi mucato a wu endleriwe eka yona yi tala hi lava teke emucatweni.

11 “Loko hosi yi nghena ku ta vona vaendzi, yi vona munhu un’wana loyi a a nga ambalanga swiambalo swa mucato. 12 Hosi yi ku, ‘Nandzuwe, u nghenise ku yini laha u nga ambalanga swiambalo swa mucato?’ Hiloko a miyela a nga vuli nchumu. 13 Kutani hosi yi byela malandza ya yona yi ku, ‘N’wi boheni mavoko ni milenge mi n’wi cukumetela ehandle emunyameni. Kwalaho hilaha a nga ta rila a tlhela a getsela ni meno.’

14 “Hikuva va tele lava rhambiweke, kambe a va talanga lava hlawuriweke.”

15 Kutani Vafarisi va famba va ya boha kungu, hi xikongomelo xo n’wi phasa hi leswi a a ta swi vula.+ 16 Hiloko va rhuma vadyondzisiwa va vona eka yena, va famba ni ntlawa lowu seketelaka Heroda,+ va fika va ku: “Mudyondzisi, ha swi tiva leswaku u ni ntiyiso naswona u dyondzisa ndlela ya Xikwembu hi ntiyiso, a wu xaveleli munhu hikuva a wu yi hi nghohe. 17 Kutani, hi byele, u ri yini hi mhaka leyi? Xana swa pfumeleriwa ku hakela xibalo eka Khezari kumbe a swi pfumeleriwi?” 18 Kambe, hi ku tiva makungu ya vona yo biha, Yesu a ku: “Vakanganyisi ndzin’wina, hikwalaho ka yini mi ndzi ringa? 19 Ndzi kombeni mali ya nsimbhi leyi ku hakeriwaka ha yona xibalo.” Hiloko va n’wi tisela denari.* 20 A ku eka vona: “Xana xifaniso ni marito lawa i swa mani?” 21 Va ku eka yena: “I swa Khezari.” A ku eka vona: “Hikwalaho, tlheriselani swilo swa Khezari eka Khezari, kambe swa Xikwembu eka Xikwembu.”+ 22 Kuteloko va twa sweswo, va hlamala hiloko va n’wi siya va famba.

23 Hi siku rero Vasaduki lava vulaka leswaku vafi a va nge pfuxiwi,+ va ta eka yena va fika va n’wi vutisa va ku:+ 24 “Mudyondzisi, Muxe u te: ‘Loko wanuna a fa a nga ri na vana, makwavo wakwe u fanele a teka nsati loyi, a velekela mufi vana.’+ 25 A ku ri ni vamakwavo va nkombo. Lowo sungula u tekile kutani a fa, leswi a a nga ri na vana, nsati wakwe u sale a tekiwa hi makwavo. 26 Ku endleke leswi fanaka eka lowa vumbirhi ni wa vunharhu, ku fikela eka lowa vunkombo. 27 Eku heteleleni wansati na yena a fa. 28 Hikwalaho, loko vafi va pfuxiwa, u ta va nsati wa mani eka lava nkombo? Hikuva hinkwavo va n’wi tekile a va nsati wa vona.”

29 Yesu a va hlamula a ku: “Ma hoxisa, hikuva a mi ma tivi Matsalwa hambi ku ri matimba ya Xikwembu;+ 30 hikuva loko vafi va pfuxiwa, vavanuna a va nge he teki ni vavasati a va nge he tekiwi, kambe va ta fana ni tintsumi ta le tilweni.+ 31 Mayelana ni ku pfuxiwa ka vafi, xana a mi hlayanga leswi Xikwembu xi nga mi byela swona, xi ku: 32 ‘Hi mina Xikwembu xa Abrahama, Xikwembu xa Isaka ni Xikwembu xa Yakobo’?+ A hi Xikwembu xa lava feke, kambe i xa lava hanyaka.”+ 33 Loko mintshungu yi twa sweswo, yi hlamala ngopfu hikwalaho ka madyondziselo yakwe.+

34 Loko Vafarisi va twa leswaku Yesu u pfale Vasaduki milomu, va hlengeletana va ya eka yena. 35 Kutani un’wana wa vona, loyi a a tiva Nawu, a n’wi ringa a ku: 36 “Mudyondzisi, xana hi wihi nawu lowukulu eka Nawu wa Muxe?”+ 37 A n’wi hlamula a ku: “‘U fanele u rhandza Yehovha* Xikwembu xa wena hi mbilu ya wena hinkwayo, hi vutomi bya wena hinkwabyo ni hi mianakanyo ya wena hinkwayo.’+ 38 Lowu hi wona nawu lowukulu ni wo sungula eka hinkwayo. 39 Wa vumbirhi, lowu fanaka na wona, hi lowu nge: ‘U fanele u rhandza warikwenu hi ndlela leyi u tirhandzaka ha yona.’+ 40 Nawu hinkwawo ku katsa ni marito ya Vaprofeta swi huma eka milawu leyimbirhi.”+

41 Loko Vafarisi va ha hlengeletanile Yesu a va vutisa a ku:+ 42 “Xana mi ri yini hi Kreste? Mi ehleketa leswaku i n’wana wa mani?” Va hlamula va ku: “I n’wana wa Davhida.”+ 43 A va vutisa a ku: “Kutani, swi tisa ku yini leswaku Davhida hi ku kongomisiwa hi moya lowo kwetsima+ a n’wi vitana Hosi, a ku, 44 ‘Yehovha* a ku eka Hosi ya mina: “Tshama evokweni ra mina ra xinene ku fikela loko ndzi veka valala va wena ehansi ka mikondzo ya wena”’?+ 45 Hikwalaho, loko Davhida a n’wi vitana Hosi, xana i n’wana wa yena hi ndlela yihi?”+ 46 A ku na munhu loyi a nga kota ku n’wi hlamula, naswona ku sukela siku rero a ku na munhu loyi a nga xinyata a n’wi vutisa swin’wana.

23 Kutani Yesu a vulavula ni mintshungu ni vadyondzisiwa vakwe, a ku: 2 “Vatsari ni Vafarisi va tinyike xitulu xa Muxe. 3 Hikwalaho, endlani hinkwaswo leswi va mi byelaka swona kambe mi nga swi endli leswi va swi endlaka, hikuva va vula hi nomu ntsena, kambe a va endli.+ 4 Va boha mindzhwalo yo tika va yi rhwexa vanhu,+ kambe vona a va tiyimiselanga ku yi susumeta hi ritiho ra vona.+ 5 Hinkwaswo leswi va swi endlaka, va swi endlela ku voniwa hi vanhu,+ hikuva va kurisa swibokisana* leswi nga ni matsalwa va swi endla swisirhelelo eka leswo biha,+ va tlhela va lehisa ni makhaxa ya swiambalo swa vona.+ 6 Va rhandza tindhawu leti hlawulekeke hi nkarhi wa swakudya swa nimadyambu ni switulu swa le mahlweni emasinagogeni,+ 7 va rhandza ni ku xewetiwa etimakete ni ku vuriwa Rabi* hi vanhu. 8 Kambe n’wina, mi nga tshuki mi vuriwa Rabi, hikuva mi ni Mudyondzisi un’we,+ kasi n’wina hinkwenu mi vamakwavo. 9 Ku tlula kwalaho, mi nga tshuki mi vitana hambi ku ri mani leswaku i tatana laha misaveni, hikuva Tata wa n’wina i un’we,+ hi Loyi a nga le matilweni. 10 Mi nga vuriwi varhangeri, hikuva mi ni Murhangeri un’we, ku nga Kreste. 11 Kambe lonkulu exikarhi ka n’wina u fanele ku va nandza wa n’wina.+ 12 Loyi a titlakusaka u ta tsongahatiwa,+ kasi loyi a titsongahataka u ta tlakusiwa.+

13 “Khombo eka n’wina vatsari ni Vafarisi, vakanganyisi ndzin’wina, hikuva mi sivela vanhu ku nghena eMfun’weni wa matilo; ku ve n’wina a mi ngheni, hambi ku ri lava lavaka ku nghena ma va sivela.+ 14* ——

15 “Khombo eka n’wina vatsari ni Vafarisi, vakanganyisi+ ndzin’wina, hikuva mi tsemakanya lwandle mi ya etindhawini ta le kule mi ya hundzula munhu un’we a va muproselita,* kutani loko a hundzukile mi n’wi endla munhu la faneriwaka hi Gehena* ku mi tlula.

16 “Khombo eka n’wina vakongomisi lava feke mahlo,+ lava nge, ‘Loko munhu o hlambanya hi tempele, a swi vuli nchumu; kambe loko o hlambanya hi nsuku wa tempele, u tibohile.’+ 17 N’wina swiphukuphuku ni mabofu! I yini xa nkoka, xana i nsuku kumbe i tempele leyi endlaka nsuku wu va wo hlawuleka entirhweni wa Xikwembu? 18 Mi tlhela mi ku, ‘Loko munhu o hlambanya hi altari, a swi vuli nchumu; kambe loko o hlambanya hi nyiko leyi nga eka yona, u tibohile.’ 19 N’wina mabofu! I yini lexi nga xa nkoka, xana i nyiko kumbe i altari leyi endlaka nyiko yi hlawuleka entirhweni wa Xikwembu? 20 Hikwalaho, loyi a hlambanyaka hi altari u hlambanya ni hi swilo hinkwaswo leswi nga eka yona; 21 naswona loyi a hlambanyaka hi tempele u hlambanya hi yona ni hi Loyi a tshamaka eka yona;+ 22 naswona loyi a hlambanyaka hi matilo u hlambanya hi xiluvelo xa Xikwembu ni hi Loyi a tshameke eka xona.

23 “Khombo eka n’wina vatsari ni Vafarisi, vakanganyisi ndzin’wina, hikuva mi nyikela vukhume bya musuzwana, bya aneta ni bya kumini,*+ kambe mi honisa timhaka ta nkoka ta Nawu, ku nga vululami,+ tintswalo+ ni ku tshembeka. A swi boha ku endla swilo leswi, kambe a mi nga fanelanga ku honisa leswin’wana.+ 24 N’wina vakongomisi lava feke matihlo,+ mi wungula* nsuna+ kambe mi mita kamela!+

25 “Khombo eka n’wina vatsari ni Vafarisi, vakanganyisi ndzin’wina, hikuva mi basisa xinwelo ni ndyelo ehandle,+ kambe endzeni swi tele makwanga+ ni manyala.+ 26 N’wina Vafarisi lava feke mahlo, rhangani hi ku basisa endzeni ka xinwelo ni ndyelo, leswaku swi ta basa ni le handle.

27 “Khombo eka n’wina vatsari ni Vafarisi, vakanganyisi ndzin’wina,+ hikuva mi fana ni masirha lama pendiweke,+ lama vonakaka ma sasekile ehandle kambe endzeni ma tele marhambu ya vanhu lava feke ni thyaka ra mixakaxaka. 28 Hi laha ku fanaka, ehandle mi vonaka mi lulamile emahlweni ka vanhu, kambe endzeni mi tele vukanganyisi ni ku tlula nawu.+

29 “Khombo eka n’wina vatsari ni Vafarisi, vakanganyisi ndzin’wina,+ hikuva mi aka masirha ya vaprofeta mi tlhela mi khavisa masirha ya lavo lulama,+ 30 kutani mi ku, ‘Loko a hi hanye emikarhini ya vakokwa wa hina, a hi ta va hi nga hoxanga xandla eku dlayiweni ka vaprofeta.’ 31 Hikwalaho, mi nyikela vumbhoni lebyi mi rhwexaka nandzu wa leswaku mi vana va lava dlayeke vaprofeta.+ 32 Kutani hetisani leswi sunguriweke hi vakokwa wa n’wina.

33 “N’wina tinyoka, vana va timhiri,*+ xana mi ta swi balekela njhani ku avanyiseriwa Gehena?*+ 34 Hikwalaho ka sweswo, ndzi mi rhumela vaprofeta,+ tintlhari ni vadyondzisi.+ Van’wana va vona mi ta va dlaya+ mi va belela etimhandzini, kasi van’wana mi ta va ba+ emasinagogeni ya n’wina mi va xanisa+ emitini yo hambanahambana, 35 leswaku mi ta va ni nandzu wo halata ngati ya vanhu hinkwavo vo lulama emisaveni, ku sukela eka ngati ya Avele+ wo lulama ku ya eka ngati ya Zakariya n’wana wa Barakiya, loyi mi n’wi dlayeke exikarhi ka tempele ni altari.+ 36 Ndzi tiyisile ndzi ri eka n’wina, xitukulwana lexi xi ta xupuriwa hikwalaho ka swilo leswi hinkwaswo.

37 “Yerusalema, Yerusalema, mudlayi wa vaprofeta loyi a va khandlaka hi maribye lava rhumiweke eka yena,+ i ko tala ndzi lava ku hlengeleta vana va wena, ku fana ni mbhaha loko wu hlengeleta swiciwana ehansi ka timpapa ta wona! Kambe a wu swi lavangi.+ 38 Maswivo! Yindlu* ya n’wina yi le kusuhi ni ku lovisiwa.+ 39 Hikuva ndzi ri eka n’wina, a mi nge he ndzi voni ku sukela sweswi ku fikela loko mi ku, ‘U katekile loyi a taka hi vito ra Yehovha!’”*+

24 Loko Yesu a huma etempeleni, vadyondzisiwa vakwe va n’wi tshinelela leswaku va ta n’wi komba miako ya tempele. 2 Yesu a ku eka vona: “Xana ma swi vona swilo leswi hinkwaswo? Ndzi tiyisile ndzi ri eka n’wina, a ku nge sali ribye ehenhla ka ribye rin’wana ma ta hirimuxiwa hinkwawo.”+

3 Loko a ha tshame eNtshaveni ya Mitlhwari, vadyondzisiwa va ya eka yena va ri voxe, va ku: “Hi byele, xana swilo leswi swi ta endleka rini naswona xi ta va xihi xikombiso xa ku vuya ka wena+ ni xa ku fika ka makumu?”+

4 Yesu a va hlamula a ku: “Tivoneleni leswaku ku nga vi ni loyi a mi hambukisaka,+ 5 hikuva vo tala va ta ta hi vito ra mina, va ku, ‘Hi mina Kreste’ naswona va ta hambukisa vo tala.+ 6 Mi ta twa hi ta tinyimpi ni swiviko swa tinyimpi. Tivoneleni leswaku mi nga chavi, hikuva swilo leswi swi fanele swi endleka, kambe makumu ma ta va ma nga si fika.+

7 “Hikuva matiko ma ta hlaselana ni mifumo yi ta hlaselana,+ ku ta va ni ku kayivela ka swakudya+ ni ku tsekatseka ka misava etindhawini to hambanahambana.+ 8 Swilo leswi hinkwaswo i ku sungula ka maxangu.*

9 “Kutani vanhu va ta mi xanisa+ ni ku mi dlaya+ naswona mi ta vengiwa hi matiko hinkwawo hikwalaho ka vito ra mina.+ 10 Vo tala va ta heleriwa hi ripfumelo naswona va ta xengana va tlhela va vengana. 11 Ku ta va ni vaprofeta vo tala va mavunwa naswona va ta hambukisa vo tala;+ 12 nakambe rirhandzu ra vo tala ri ta hola hikwalaho ka ku andza ka vubihi. 13 Kambe loyi a tiyiseleke* ku ya fika emakumu u ta ponisiwa.+ 14 Kutani mahungu lawa lamanene ya Mfumo ma ta chumayeriwa emisaveni hinkwayo leswaku byi va vumbhoni ematikweni hinkwawo,+ kutani hi kona makumu ma nga ta fika.

15 “Hikwalaho, loko mi vona nchumu lowu nyenyetsaka lowu onhetelaka, wu yime endhawini yo kwetsima,+ hilaha muprofeta Daniyele a vuleke hakona (muhlayi a a twisise), 16 lava nga eYudiya a va balekele etintshaveni.+ 17 Loyi a nga ehenhla ka yindlu a nga xiki a ta humesa nhundzu endlwini yakwe 18 naswona loyi a nga emasin’wini a nga tlheli a ya teka xiambalo xakwe. 19 Khombo eka vavasati lava tikeke ni lava nga ta va va mamisa hi nkarhi wolowo! 20 Tshamani mi ri karhi mi khongelela leswaku ku baleka ka n’wina ku nga vi hi xixika kumbe hi siku ra Savata; 21 hikuva ku ta va ni nhlomulo lowukulu+ lowu nga si tshamaka wu va kona hi mpfhuka misava yi va kona ku fikela sweswi, naswona a wu nge he tlheli wu va kona.+ 22 Kahlekahle, loko masiku wolawo a ma nga hungutiwanga, a ku nga ta pona munhu; kambe masiku wolawo ma ta hungutiwa hikwalaho ka vahlawuriwa.+

23 “Kutani loko un’wana a ku eka n’wina, ‘Vonani! Hi loyi Kreste,’+ kumbe, ‘Hi luya,’ mi nga n’wi tshembi.+ 24 Hikuva ku ta va ni lava nga ta hemba va tivula Kreste ni vaprofeta va mavunwa+ naswona va ta endla masingita lamakulu ni swihlamariso leswaku va hambukisa+ hambi ku ri vahlawuriwa loko swi koteka. 25 Vonani! Ndzi mi lemukisile swi nga si endleka. 26 Hikwalaho, loko vanhu va ku eka n’wina, ‘Vonani! U le mananga,’ mi nga yi; ‘Vonani! U le ndzeni ka yindlu,’ mi nga va tshembi.+ 27 Hikuva ku fana ni rihati leri hatimaka ku sukela evuxeni ku ya fika evupeladyambu, swi ta va tano ni hi nkarhi wa ku vuya ka N’wana wa munhu.+ 28 Laha ku nga ni ntsumbu, magama ma ta hlengeletana kona.+

29 “Loko masiku ya nhlomulo wolowo ma hela, dyambu ri ta hundzuka ntima+ ni n’weti a wu nge he voningi, tinyeleti ti ta wa hi le tilweni naswona swilo leswi nga ematilweni swi ta tsekatsekisiwa.+ 30 Endzhaku ka sweswo ku ta va ni xikombiso xa N’wana wa munhu ematilweni, kutani tinyimba hinkwato ta misava ti ta rila+ naswona ti ta vona N’wana wa munhu+ a ta a ri emapapeni hi matimba ni ku vangama lokukulu.+ 31 U ta rhumela tintsumi takwe hi mpfumawulo lowukulu wa mhalamhala naswona ti ta hlengeleta vahlawuriwa va yena va huma ematlhelweni ya mune ya misava, ku suka emakun’wini ya matilo ku ya emakun’wini man’wanyana.+

32 “Kutani dyondzani eka xifaniso lexi xa nkuwa: Loko marhavi ya wona ma sungula ku hluka, ma swi tiva leswaku ximumu xi le kusuhi.+ 33 Hilaha ku fanaka, na n’wina loko mi vona swilo leswi hinkwaswo, swi tiveni leswaku u le kusuhi, u le tinyangweni.+ 34 Ndzi tiyisile ndzi ri eka n’wina, xitukulwana* lexi a xi nge fi xi hela swilo leswi hinkwaswo swi nga si endleka. 35 Tilo ni misava swi ta hundza kambe marito ya mina ma nga ka ma nga hundzi.+

36 “Mayelana ni siku ra kona ni nkarhi a ku na munhu loyi a swi tivaka,+ hambi tintsumi ematilweni kumbe N’wana, kambe swi tiviwa hi Tatana ntsena.+ 37 Hilaha swi endlekeke hakona enkarhini wa Nowa,+ swi ta va tano ni hi nkarhi wa ku vuya ka N’wana wa munhu.+ 38 Hilaha a swi ri hakona emasikwini wolawo ku nga si fika Ndhambi, vanhu a va dya, va nwa, vavanuna va teka ni vavasati va tekiwa, ku fikela siku leri Nowa a ngheneke ha rona engalaveni,+ 39 a va nga ri na mhaka kukondza Ndhambi yi fika yi va kukula hinkwavo,+ kutani swi ta va tano ni hi nkarhi wa ku vuya ka N’wana wa munhu. 40 Vavanuna vambirhi va ta va va ri emasin’wini; un’wana u ta tekiwa kasi un’wanyana u ta siyiwa. 41 Vavasati vambirhi va ta va va ri eku sileni; un’wana u ta tekiwa kasi lowun’wana u ta siyiwa.+ 42 Hikwalaho tshamani mi rindzile, hikuva a mi ri tivi siku leri Hosi ya n’wina yi nga ta ta ha rona.+

43 “Kambe tivani leswi: Loko n’wini wa yindlu a a tiva nkarhi lowu khamba ri nga ta fika ha wona,+ a a nga ta etlela naswona a a nga ta pfumela leswaku ri nghena endlwini yakwe.+ 44 Hikwalaho na n’wina tshamani mi lunghekile,+ hikuva N’wana wa munhu u ta ta hi nkarhi lowu mi nga wu ehleketiki.

45 “Kahlekahle i mani nandza wo tshembeka ni wo tlhariha, loyi n’wini wakwe a n’wi vekeke leswaku a hlayisa malandza yakwe, a ma phamela swakudya hi nkarhi lowu faneleke?+ 46 Wa tsaka nandza yoloye, loyi loko n’wini wakwe a fika a nga ta n’wi kuma a endla tano!+ 47 Ndzi tiyisile ndzi ri eka n’wina, u ta n’wi hlawula leswaku a hlayisa swilo swa yena hinkwaswo.

48 “Kambe loko nandza yoloye o endla swo biha kutani a tibyela a ku, ‘N’wini wa mina wa hlwela,’+ 49 kutani a sungula ku ba malandza laman’wana a tlhela a dya ni ku nwa ni swidakwa, 50 n’wini wa nandza yoloye u ta ta hi siku leri a nga ri langutelangiki ni hi nkarhi lowu a nga wu tiviki,+ 51 u ta n’wi xupula hi ndlela ya tihanyi, a n’wi veka endhawini yin’we ni vakanganyisi. Kwalaho hi laha a nga ta rila a tlhela a getsela ni meno.+

25 “Mfumo wa matilo wu nga fanisiwa ni vanhwana va khume lava tekeke timboni ta vona+ va huma va ya hlanganisa muteki.+ 2 Ntlhanu wa vona a va ri swiphukuphuku, kasi lavan’wana va ntlhanu a va tlharihile.+ 3 Lava swiphukuphuku va teke timboni ta vona kambe va nga teki mafurha, 4 kasi lavo tlhariha va teke timboni ta vona ni mafurha va ma chela eka swo chela mafurha. 5 Loko muteki a hlwela, hiloko hinkwavo va khudzehela ivi va etlela. 6 Exikarhi ka vusiku ku twakale rito leri nge: ‘Muteki u fikile! Humani mi n’wi hlanganisa.’ 7 Kutani vanhwana volavo hinkwavo va pfuka va lulamisa timboni ta vona.+ 8 Lava swiphukuphuku va byela lavo tlhariha va ku, ‘Hi cheleleninyana mafurha ya n’wina, hikuva timboni ta hina ti lava ku timeka.’ 9 Lavo tlhariha va hlamula va ku: ‘Loko ho mi nyika a ma nge hi ringani hinkwerhu. Fambani mi ya tixavela ya n’wina eka lava xavisaka.’ 10 Loko va ha fambile va ya xava mafurha, muteki a fika. Kutani vanhwana lava a va lunghekile va nghena na yena emucatweni,+ hiloko nyangwa yi pfariwa. 11 Endzhakunyana vanhwana lavan’wana va vuya kutani va ku, ‘Nkulukumba, Nkulukumba, hi pfulele!’+ 12 A va hlamula a ku, ‘Ndzi mi byela ntiyiso, a ndzi mi tivi.’

13 “Hikwalaho, tshamani mi rindzile,+ hikuva a mi ri tivi siku hambi ku ri nkarhi wa kona.+

14 “Hikuva swi fana ni munhu loyi a lavaka ku endzela etikweni ra le kule, la vitanaka malandza yakwe a ma khomisa nhundzu ya yena.+ 15 A nyika un’wana titalenta* ta ntlhanu, un’wana timbirhi, kasi lon’wana a n’wi nyika yin’we, ha un’we hi ku ya hi vuswikoti bya yena, ivi a famba. 16 Loyi a kumeke titalenta ta ntlhanu a hatla a famba a ya bindzula ha tona kutani a vuyeriwa hi tin’wana ta ntlhanu. 17 Hi ndlela leyi fanaka loyi a kumeke timbirhi a vuyeriwa hi tin’wana timbirhi. 18 Kambe nandza loyi a kumeke yin’we a famba a ya yi celela, a fihla mali* ya n’wini wakwe.

19 “Endzhaku ka nkarhi wo leha n’wini wa malandza wolawo a vuya a ta vona leswi ma swi endleke hi mali yakwe.+ 20 Loyi a kumeke titalenta ta ntlhanu a ta a khome tin’wana ta ntlhanu, a ku, ‘Hosi yanga, u ndzi nyike titalenta ta ntlhanu; vona, ndzi bindzurile ndzi vuyeriwa hi tin’wana ta ntlhanu.’+ 21 N’wini wa yena a ku: ‘U endle kahle, wena nandza lonene ni wo tshembeka! U tshembekile eka swilo leswitsongo. Ndzi ta ku nyika swo tala leswaku u swi hlayisa.+ Tsaka ni n’wini wa wena.’+ 22 Ku landzela nandza loyi a kumeke titalenta timbirhi a fika a ku, ‘Hosi yanga, u ndzi nyike titalenta timbirhi; vona, ndzi bindzurile ndzi vuyeriwa hi tin’wana timbirhi.’+ 23 N’wini wa yena a ku: ‘U endle kahle, wena nandza lonene ni wo tshembeka! U tshembekile eka swilo leswitsongo. Ndzi ta ku nyika swo tala leswaku u swi hlayisa. Tsaka ni n’wini wa wena.’

24 “Eku heteleleni ku fika nandza loyi a kumeke talenta yin’we a fika a ku: ‘Hosi yanga, ndza swi tiva leswaku u munhu loyi a karhataka, loyi a tshovelaka laha a nga byalangiki kona ni ku hlengeleta mavele lawa a nga ma tirhelangiki.+ 25 Kutani ndzi chavile ivi ndzi famba ndzi ya celela talenta ya wena. Hi leyi, teka.’ 26 N’wini wa yena a n’wi hlamula a ku: ‘Wena, nandza wo homboloka loyi a lolohaka, leswi a wu swi tiva leswaku ndzi tshovela laha ndzi nga byalangiki kona naswona ndzi hlengeleta mavele lawa ndzi nga ma tirhelangiki, 27 a wu fanele u vekise mali* ya mina eka vabindzurisi, kutani loko ndzi fika a ndzi ta va ndzi yi kume yi ri ni ntswalo.

28 “‘Hikwalaho n’wi tekeleni talenta yoleyo mi yi nyika loyi a nga ni titalenta ta khume.+ 29 Hikuva loyi a nga ni swo karhi, u ta nyikiwa swo tala naswona u ta va ni swo tala. Kambe loyi a nga riki na nchumu, u ta tekeriwa ni leswi a nga na swona.+ 30 Kutani cukumetelani nandza loyi wo loloha ehandle emunyameni. Kwalaho hilaha a nga ta rila a tlhela a getsela ni meno.’

31 “Loko N’wana wa munhu+ a ta hi ku vangama kakwe a ri ni tintsumi hinkwato,+ u ta tshama exiluvelweni xakwe xo vangama. 32 Matiko hinkwawo ma ta hlengeletiwa emahlweni ka yena, kutani u ta hambanisa vanhu, ku fana ni loko murisi a hambanisa tinyimpfu eka timbuti. 33 U ta veka tinyimpfu+ evokweni rakwe ra xinene, kasi timbuti eka lera ximatsi.+

34 “Kutani Hosi yi ta byela lava nga exineneni yi ku: ‘Tanani n’wina lava katekisiweke hi Tatana, amukelani Mfumo lowu mi lunghiseriweke wona hi mpfhuka misava yi va kona. 35 Hikuva a ndzi khomiwe hi ndlala, mi ndzi nyika swakudya; a ndzi ri ni torha, mi ndzi nyika swakunwa. A ndzi ri mufambi kambe mi ndzi amukerile hi malwandla;+ 36 a ndzi nga ambalanga nchumu kambe mi ndzi ambexile.+ A ndzi vabya, mi ndzi ongorile. A ndzi ri ekhotsweni, mi tile mi ta ndzi vona.’+ 37 Kutani lavo lulama va ta yi hlamula va ku: ‘Hosi, hi ku vone rini u ri ni ndlala kutani hi ku phamela, kumbe u ri ni torha kutani hi ku nyika swakunwa?+ 38 Hi ku vone rini u ri mufambi, hi ku amukela hi malwandla, kumbe u nga ambalanga nchumu kutani hi ku ambexa? 39 Hi ku vone rini u vabya kumbe u ri ekhotsweni hi ku endzela?’ 40 Hosi yi ta va hlamula yi ku, ‘Ndzi tiyisile ndzi ri eka n’wina, leswi mi swi endleleke un’wana wa vamakwerhu lava lavatsongo, mi swi endle ni le ka mina.’+

41 “Kutani yi ta byela lava nga eximatsini xa yona yi ku: ‘Sukani eka mina,+ n’wina lava rhukaniweke, mi ya endzilweni lowu nga heriki+ lowu lunghiseleriweke Diyavulosi ni tintsumi takwe.+ 42 Hikuva a ndzi ri ni ndlala, kambe a mi ndzi nyikanga swakudya; a ndzi ri ni torha, kambe a mi ndzi nyikanga swakunwa. 43 A ndzi ri mufambi kambe a mi ndzi kombanga malwandla; a ndzi nga ambalanga nchumu, kambe a mi ndzi ambexanga; a ndzi vabya, ndzi ri ekhotsweni kambe a mi tanga mi ta ndzi pfuxela.’ 44 Kutani na vona va ta hlamula va ku: ‘Hosi, hi ku vone rini u ri ni ndlala kumbe u ri ni torha kumbe u ri mufambi kumbe u nga ambalanga nchumu kumbe u vabya kumbe u ri ekhotsweni hi nga ku pfuni?’ 45 Kutani yi ta va hlamula yi ku: ‘Ndzi tiyisile ndzi ri eka n’wina, leswi mi nga swi endlangiki eka lava lavatsongo, a mi swi endlanga ni le ka mina.’+ 46 Kutani lava va ta loviseriwa makumu,+ kambe lavo lulama va ta kuma vutomi lebyi nga heriki.”+

26 Loko Yesu a hetile ku vula timhaka toleto hinkwato, a byela vadyondzisiwa vakwe a ku: 2 “Ma swi tiva leswaku ku ta va ni nkhuvo wa Paseka endzhaku ka masiku mambirhi,+ naswona N’wana wa munhu u ta khomiwa a dlayiwa emhandzini.”+

3 Kutani vaprista lavakulu ni vakulukumba va tiko va hlengeletana exivaveni* xa muprista lonkulu loyi a a vuriwa Kayafasi,+ 4 va boha kungu+ ro khoma Yesu hi ndlela ya vuxisi leswaku va ta n’wi dlaya. 5 Hambiswiritano, a va ku: “Hi nga n’wi khomi enkhubyeni, hikuva vanhu va nga vanga hasahasa.”

6 Loko Yesu a ri eBetaniya endlwini ya Simoni loyi a nga tshama a va ni nhlokonho,+ 7 ku te wansati loyi a a ri ni xikutsu xa alabasta xa mafurha yo nun’hwela yo durha, kutani a chela mafurha enhlokweni ya Yesu hi nkarhi lowu a ri eku dyeni. 8 Loko vadyondzisiwa va vona sweswo, va hlundzuka va ku: “Hikwalaho ka yini mafurha lawa ma tlangisiwa? 9 Hikuva a ma ta xavisiwa hi mali yo tala kutani mali ya kona yi nyikiwa swisiwana.” 10 Loko Yesu a swi lemuka, a ku eka vona: “Hikwalaho ka yini mi ringeta ku karhata wansati loyi? U ndzi endlele leswinene. 11 Hikuva swisiwana mi ta tshama mi ri na swona+ kambe mina a mi nge tshami mi ri na mina.+ 12 Loko wansati loyi a ndzi chela mafurha lawa yo nun’hwela emirini wa mina, a a lulamisela miri wa mina ku lahliwa.+ 13 Ndzi tiyisile ndzi ri eka n’wina, laha mahungu lawa lamanene ma nga ta chumayeriwa kona emisaveni hinkwayo, leswi wansati loyi a swi endleke swi ta vuriwa, u ta tsundzukiwa ha swona.”+

14 Kutani un’wana wa lava 12, loyi a vuriwaka Yudasi Iskariyota,+ a ya eka vaprista lavakulu+ 15 a fika a ku: “Xana mi ta ndzi nyika yini loko ndzo mi pfuna leswaku mi n’wi khoma?”+ Hiloko va n’wi tshembisa swiphemu swa 30 swa mali ya silivhere.+ 16 Ku sukela siku rero, a a tshamela ku lava ndlela yo n’wi xavisa.

17 Hi siku ro sungula ra Nkhuvo Wa Swinkwa Leswi Nga Riki Na Comela,+ vadyondzisiwa va ta eka Yesu, va ku: “U lava hi ya ku lunghisela kwihi laha u nga ta dyela kona Paseka?”+ 18 A ku: “Yanani emutini eka Ximanimani mi ku eka yena, ‘Mudyondzisi u ri: “Nkarhi wa mina lowu vekiweke wu le kusuhi; ndzi ta tlangela Paseka ni vadyondzisiwa va mina laha kaya ra wena.”’” 19 Hiloko vadyondzisiwa va endla hilaha Yesu a va leriseke ha kona, va ya lulamisa Paseka.

20 Nimadyambu+ a a tshame etafuleni ni vadyondzisiwa vakwe va 12.+ 21 Loko va ha ri eku dyeni, a ku: “Ndzi tiyisile ndzi ri eka n’wina, un’wana wa n’wina u ta ndzi xavisa.”+ 22 Mhaka leyi yi endle leswaku va va ni gome lerikulu, lerova un’wana ni un’wana wa vona a sungula ku n’wi vutisa a ku: “Hosi, xana hi mina?” 23 A va hlamula a ku: “Un’wana wa n’wina loyi a nghenisaka voko na mina exibyeni hi yena a nga ta ndzi xavisa.+ 24 I ntiyiso, N’wana wa munhu u ta famba, hilaha swi tsariweke hakona mayelana na yena, kambe u ni khombo+ munhu loyi a xavisaka N’wana wa munhu!+ A swi ta antswa loko a nga velekiwanga.”+ 25 Yudasi loyi a a ri kusuhi ni ku n’wi xavisa a ku: “Rabi, xana hi mina?” Yesu a ku: “Wena u swi vurile.”

26 Loko va ri karhi va dya, Yesu a teka xinkwa, loko a khongerile a xi phema+ a xi nyika vadyondzisiwa, a ku: “Tekani mi dya. Xinkwa lexi xi fanekisela miri wa mina.”+ 27 A tlhela a teka xinwelo, a khongela kutani a va nyika xona, a ku: “Nwanani hi xona hinkwenu ka n’wina,+ 28 hikuva xi fanekisela ‘ngati+ ya mina ya ntwanano,’+ leyi nga ta halatiwa leswaku ku vuyeriwa vanhu vo tala+ leswaku va rivaleriwa swidyoho.+ 29 Kambe ndzi ri eka n’wina: A ndzi nge he nwi vhinyo ku fikela siku rero loko ndzi nwa vhinyo leyintshwa na n’wina eMfun’weni wa Tata wa mina.”+ 30 Endzhaku ko yimbelela tinsimu to dzunisa,* va suka va ya eNtshaveni ya Mitlhwari.+

31 Kutani Yesu a ku eka vona: “Hinkwenu ka n’wina mi ta khunguvanyeka hikwalaho ka mina vusiku bya namuntlha, hikuva ku tsariwile: ‘Ndzi ta ba murisi, kutani tinyimpfu ta ntlhambi wakwe ti ta hangalaka.’+ 32 Kambe loko ndzi pfuxiwile, ndzi ta ya eGaleliya mi ta ndzi kuma kona.”+ 33 Kambe Petro a n’wi hlamula a ku: “Hambiloko hinkwavo vo khunguvanyeka hikwalaho ka wena, mina a ndzi nge pfuki ndzi khunguvanyekile!”+ 34 Yesu a ku eka yena: “Ndzi tiyisile ndzi ri eka n’wina, vusiku bya namuntlha, loko nkuku wu nga si ringa u ta va u ndzi landzule kanharhu.”+ 35 Petro a ku eka yena: “Hambiloko ndzi fanele ndzi fa na wena, a ndzi nge pfuki ndzi ku landzurile.”+ Ni vadyondzisiwa lavan’wana hinkwavo va vula leswi fanaka.

36 Yesu a fika ni vadyondzisiwa vakwe endhawini leyi vuriwaka Getsemani,+ kutani a ku eka vona: “Tshamani laha, ndza ha ya lahaya ndzi ya khongela.”+ 37 A famba na Petro ni vana vambirhi va Zebediya, kutani a sungula ku khomiwa hi gome a karhateka swinene.+ 38 A ku eka vona: “Ndzi ni gome lerikulu, gome ra ku fa. Salani kwala, mi tshama mi rindzile na mina.”+ 39 A ya emahlweninyana a fika a khinsama, xikandza xakwe xi languta ehansi, a khongela+ a ku: “Tatana, loko swi koteka, xinwelo+ lexi a xi hundze eka mina. Kambe, ku nga endleki ku rhandza ka mina, a ku endleke ku rhandza ka wena.”+

40 A tlhelela eka vadyondzisiwa vakwe, a va kuma va etlele kutani a byela Petro a ku: “Xana mi tsandzeke ku tikhoma mi nga etleli ku ringana awara yin’we?+ 41 Tshamani mi rindzile+ mi ya emahlweni mi khongela+ leswaku mi nga weli endzingweni.+ Mbilu ya swi lava kambe nyama yi tsanile.”+ 42 A tlhela a ya khongela ra vumbirhi a ku: “Tatana, loko swi nga koteki leswaku xinwelo lexi xi hundza ndzi nga xi nwanga, a ku endleke ku rhandza ka wena.”+ 43 Loko a vuya a tlhela a va kuma va etlele, hikuva matihlo ya vona a ma tika. 44 A tlhela a va siya, a ya khongela ra vunharhu, a vula marito lama fanaka. 45 Kutani a tlhelela eka vadyondzisiwa a fika a ku eka vona: “Mi etlele, mi wisa hi nkarhi lowu wo tika swinene. Vonani! Nkarhi wu tshinele wa leswaku N’wana wa munhu a nyiketiwa eka vadyohi. 46 Pfukani, a hi fambeni. Vonani! Loyi a ndzi xavisaka se u le kusuhi.” 47 Loko a ha vulavula, Yudasi, un’wana wa lava 12, a humelela a ri ni ntshungu lowukulu wu khome mabanga ni tinhonga, wu rhumiwe hi vaprista lavakulu ni vakulukumba va tiko.+

48 Yudasi a a va byele ndlela leyi a nga ta va komba Yesu ha yona, a ku: “Loyi ndzi nga ta n’wi tswontswa, hi yena; n’wi khomeni.” 49 Hiloko a ya eka Yesu a fika a ku: “Xewani Rabi,” kutani a n’wi tswontswa. 50 Kambe Yesu a ku eka yena: “Nandzuwe, u te hi xikongomelo xihi?”+ Kutani va tshinela va khoma Yesu va ya n’wi pfalela. 51 Kambe, un’wana wa lava a va ri na Yesu a hlomula banga a tsema ndleve ya nandza wa muprista lonkulu.+ 52 Yesu a ku eka yena: “Tlherisela banga ra wena endhawini ya rona,+ hikuva hinkwavo lava khomaka banga va ta dlayiwa hi banga.+ 53 Kumbe, xana u ehleketa leswaku a ndzi nge kombeli eka Tatana sweswi leswaku a ndzi rhumela magidigidi* ya tintsumi?+ 54 Xana Matsalwa lama vulaka leswaku swi fanele swi endleka hi ndlela leyi ma ta hetiseka njhani?” 55 Hi nkarhi wolowo Yesu a byela mintshungu a ku: “Xana mi tele ku ta ndzi khoma mi ri ni mabanga ni tinhonga onge hi loko mi tela ku khoma xigevenga? Siku ni siku a ndzi tshama etempeleni ndzi dyondzisa,+ kambe a mi ndzi khomanga.+ 56 Kambe hinkwaswo leswi swi endleka leswaku ku hetiseka leswi tsariweke hi vaprofeta.”+ Kutani vadyondzisiwa hinkwavo va baleka va n’wi siya.+

57 Lava nga khoma Yesu va n’wi yise eka Kayafasi+ muprista lonkulu, laha vatsari ni vakulukumba a va hlengeletane kona.+ 58 Kambe Petro a n’wi landzela a ri ekulenyana, ku ya fika exivaveni xa muprista lonkulu, loko a nghena a fika a tshama ni malandza lama langutelaka yindlu, leswaku a ta vona leswi nga ta endleka.+

59 Vaprista lavakulu ni swirho hinkwaswo swa Sanedri* a va lava vumbhoni bya mavunwa byo hehla Yesu leswaku va ta n’wi dlaya.+ 60 Kambe a va byi kumanga, hambileswi ku humeleleke timbhoni to tala ta mavunwa.+ Endzhaku ku humelela timbhoni timbirhi 61 ti ku: “Munhu loyi u te, ‘Ndzi nga swi kota ku wisa tempele ya Xikwembu ndzi tlhela ndzi yi aka hi masiku manharhu.’”+ 62 Loko muprista lonkulu a twa sweswo, a suka a yima a ku eka yena: “U ri yini hi leswi va swi vulaka? Xana wa swi twa leswi va ku hehlaka ha swona?”+ 63 Kambe Yesu a nga n’wi hlamulanga.+ Kutani muprista lonkulu a ku eka yena: “Ndza ku lerisa leswaku u hlambanya emahlweni ka Xikwembu lexi hanyaka u hi byela loko u ri Kreste, N’wana wa Xikwembu!”+ 64 Yesu a ku eka yena: “Wena u swi vurile. Kambe ndzi ri eka n’wina: Ku sukela sweswi mi ta vona N’wana wa munhu+ a tshame evokweni ra xinene ra Loyi a nga ni matimba hinkwawo+ naswona a ta hi mapapa ya le tilweni.”+ 65 Kutani muprista lonkulu a handzula swiambalo swakwe a ku: “U rhukane Xikwembu! A ka ha laveki timbhoni. Mi n’wi twile loko a rhukana Xikwembu. 66 Xana mi ri yini?” Va hlamula va ku: “U fanele a fa.”+ 67 Hiloko va n’wi tshwutela xikandza+ va tlhela va n’wi ba hi swibakela.+ Van’wana va n’wi makala hi timpama,+ 68 va ri karhi va ku: “Profeta, wena Kreste. I mani loyi a nga ku ba?”

69 Petro a a tshame ehandle exivaveni, kutani nandza un’wana wa xisati a ta eka yena a ku: “Na wena a wu ri na Yesu wa le Galeliya!”+ 70 Kambe a kaneta emahlweni ka vona hinkwavo, a ku: “A ndzi swi tivi leswaku u vulavula hi yini.” 71 Kuteloko a huma a ya egedeni ya muti wolowo, nandza un’wanyana wa xisati a n’wi vona ivi a byela lava a va ri kwalaho a ku: “Wanuna loyi a a ri na Yesu wa le Nazareta.”+ 72 Petro a tlhela a landzula hi ku hlambanya a ku: “A ndzi n’wi tivi munhu loyi!” 73 Endzhaku ka nkarhinyana lava a va yime kwalaho va ta, va ku eka Petro: “Hakunene na wena u wun’wana wa vona, hikuva entiyisweni mavulavulelo ya wena ma ku paluxa.” 74 Kutani Petro a sungula ku hlambanya ni ku tiyisekisa a ku: “A ndzi n’wi tivi munhu loyi!” Hiloko nkuku wu ringa hi nkarhi wolowo. 75 Kutani Petro a tsundzuka marito lawa Yesu a ma vuleke, lama nge: “Nkuku wu nga si ringa, u ta ndzi landzula kanharhu.”+ Kutani a humela ehandle, a fika a rila hi xiviti.

27 Loko ri xile, vaprista hinkwavo lavakulu ni vakulukumba va tiko va kanerisana hi mhaka ya Yesu leswaku va ta n’wi dlaya.+ 2 Endzhaku ka loko va n’wi bohile, va famba na yena va n’wi yisa eka ndhunankulu Pilato.+

3 Loko Yudasi, loyi a nga n’wi xavisa a vona leswaku Yesu u gweviwe rifu, a tisola kutani a tlherisela swiphemu swa 30 swa silivhere eka vaprista lavakulu ni vakulukumba,+ 4 a ku: “Ndzi dyohile hi ku xenga ngati leyi nga riki na nandzu.” Va ku: “Sweswo swi lava wena ku nga ri hina!” 5 Hiloko a lahla swiphemu swoleswo swa silivhere etempeleni ivi a famba a ya tisunga.+ 6 Kambe vaprista lavakulu va teka swiphemu swoleswo swa silivhere, va ku: “A swi pfumeleriwi ku swi hoxa laha ku hlayisiwaka xuma xo kwetsima, hikuva i mali ya ngati.” 7 Endzhaku ka loko va kanerisanile, va teka mali yoleyo va xava ndhawu* leyi a va ta lahla vanhu lava humaka ematikweni man’wana kona. 8 Hikwalaho, ndhawu yoleyo ninamuntlha ya ha vuriwa Ndhawu Leyi Xaviweke Hi Ngati.+ 9 Kutani ku endleka leswi vuriweke hi muprofeta Yeremiya, loko a ku: “Va teke swiphemu swa 30 swa silivhere, ku nga mali leyi Vaisrayele van’wana a va n’wi xavisa ha yona munhu, 10 va xava ndhawu yoleyo, hi ku ya hi leswi Yehovha* a ndzi leriseke swona.”+

11 Kutani Yesu a yima emahlweni ka ndhunankulu, hiloko yi n’wi vutisa yi ku: “Xana u Hosi ya Vayuda?” Yesu a ku: “Wena u swi vurile.”+ 12 Kambe loko vaprista lavakulu ni vakulukumba va n’wi hehla, a nga va hlamulanga.+ 13 Kutani Pilato a ku eka yena: “Xana wa swi twa swilo leswi va ku hehlaka ha swona?” 14 Kambe Yesu a nga n’wi hlamulanga, lerova Pilato a hlamala ngopfu.

15 Enkhubyeni wun’wana ni wun’wana, ndhunankulu a yi tolovele ku tshunxela ntshungu mubohiwa, loyi wu n’wi lavaka.+ 16 Hi nkarhi wolowo a va khome xigevenga lexi a xi dumile lexi a va ku i Barabasi. 17 Kutani loko va hlengeletanile Pilato a vutisa ntshungu a ku: “Xana mi lava leswaku ndzi mi tshunxela mani, Barabasi kumbe Yesu loyi a vuriwaka Kreste?” 18 Hikuva Pilato a a swi xiya leswaku a va n’wi tise eka yena hikwalaho ka mona. 19 Ku tlula kwalaho, loko a ha tshame exitulwini xa vuavanyisi, nsati wakwe a n’wi rhumela rito, a ku: “U nga n’wi endli nchumu munhu yoloye wo lulama, hikuva namuntlha ndzi ve ni norho wo chavisa hikwalaho ka yena.” 20 Kambe vaprista lavakulu ni vakulukumba va kucetela mintshungu leswaku yi kombela ku tshunxeriwa Barabasi,+ kambe Yesu a dlayiwa.+ 21 Kutani ndhunankulu yi vutisa mintshungu yi ku: “Xana mi lava leswaku ndzi mi tshunxela mani eka lavambirhi?” Mintshungu yi ku: “Barabasi.” 22 Pilato a ku eka yona: “Ndzi endla yini hi Yesu loyi a vuriwaka Kreste?” Mintshungu hinkwayo yi ku: “A a beleriwe emhandzini!”+ 23 A ku: “Hikwalaho ka yini? U dyohe yini?” Kambe yi ya emahlweni yi huwelela swinene yi ku: “A a beleriwe emhandzini!”+

24 Loko Pilato a vona leswaku mintshungu a yi nga lavi ku twa nchumu, kambe a yo vanga hasahasa, a teka mati a hlamba mavoko emahlweni ka wona, a ku: “A ndzi na nandzu engatini ya munhu loyi. N’wina mi ta tihlamulela.” 25 Hiloko vanhu hinkwavo va ku: “Ngati yakwe a yi ve ehenhla ka hina ni le henhla ka vana va hina.”+ 26 Kutani a va tshunxela Barabasi, kambe a lerisa leswaku Yesu a biwa,+ a n’wi nyiketa vona leswaku a ya dlayiwa emhandzini.+

27 Hiloko masocha ya ndhunankulu ma teka Yesu ma n’wi yisa emutini wa yona, ma hlengeleta masocha hinkwawo ma n’wi rhendzela.+ 28 Kutani ma n’wi hluvula swiambalo swa yena, ma n’wi kapeka nguvu yo tshwuka,+ 29 ma luka harhi ya mitwa ma yi tlhandleka enhlokweni yakwe, ma n’wi khomisa rihlanga hi voko ra xinene. Kutani ma khinsama emahlweni ka yena, ma n’wi hlekula, ma ku: “Xewani, wena Hosi ya Vayuda!” 30 Hiloko ma n’wi tshwutela,+ ma teka rihlanga ma n’wi ba nhloko hi rona. 31 Loko ma hetile ku n’wi hlekula, ma n’wi hluvula nguvu yo tshwuka, ma n’wi ambexa swiambalo swakwe ma famba na yena leswaku a ya beleriwa emhandzini.+

32 Loko ma ri karhi ma huma, ma hlangana ni wanuna un’wana wa le Kirena loyi a vuriwaka Simoni. Ma n’wi sindzisa ku rhwala mhandzi yakwe ya nxaniso.*+ 33 Loko ma fika endhawini leyi vuriwaka Golgota, leswi vulaka, Ndhawu ya Xipalapala,+ 34 ma n’wi nyika vhinyo leyi pfanganisiweke ni nyongwa leswaku a nwa;+ kambe endzhaku ko yi nantswa, a ala ku yi nwa. 35 Loko ma n’wi belele emhandzini, ma avelana swiambalo swakwe swa le handle hi ku hoxa vuhlolotwana,*+ 36 ma tshama kwalaho ma n’wi rindza. 37 Ehenhlanyana ka nhloko yakwe ma tsala nandzu wakwe ma ku: “Loyi i Yesu Hosi ya Vayuda.”+

38 Swigevenga swimbirhi a swi beleriwe na yena, xin’wana exineneni xakwe lexin’wana eximatsini xakwe.+ 39 Kutani vahundzi va ndlela va n’wi tseketsela,+ va hlakahla ni tinhloko+ 40 va ku: “Wena loyi a nga ta hirimuxa tempele a tlhela a yi aka hi masiku manharhu,+ tiponise! Loko u ri n’wana wa Xikwembu, xika emhandzini ya nxaniso!”*+ 41 Vaprista lavakulu ni vatsari ni vakulukumba na vona va sungula ku n’wi hlekula va ku:+ 42 “U ponise van’wana; kambe yena wa tsandzeka ku tiponisa! I Hosi ya Israyele;+ a a xike sweswi emhandzini ya nxaniso* kutani hi ta n’wi kholwa. 43 U tshembe Xikwembu; a xi n’wi ponise loko xi n’wi rhandza,+ hikuva u te, ‘Ndzi N’wana wa Xikwembu.’”+ 44 Hambi ku ri swigevenga leswi beleriweke na yena a swi n’wi rhukana.+

45 Hiloko munyama wu funengeta tiko hinkwaro ku sukela hi awara ya vutsevu* ku fikela hi awara ya vukaye.*+ 46 Kwalomu ka awara ya vukaye, Yesu a huwelela hi rito lerikulu, a ku: “Eli, Eli, lama sabaktani?” leswi vulaka leswaku, “Xikwembu xanga, Xikwembu xanga, u ndzi tshikele yini?”+ 47 Loko van’wana va lava a va yime kwalaho va twa sweswo, va sungula ku vula va ku: “Wanuna loyi u vitana Eliya.”+ 48 Hi ku hatlisa un’wana wa vona a tsutsuma a teka xiponci a xi peta eka vhinyo yo dzunga kutani a xi tlhoma erihlangeni, a n’wi nyika leswaku a nwa.+ 49 Kambe lavan’wana hinkwavo va ku: “N’wi tshikeni! Hi ta vona loko Eliya a ta ta a ta n’wi ponisa.” 50 Yesu a tlhela a huwelela hi rito lerikulu, kutani a fa.+

51 Hiloko khetheni* leri nga etempeleni+ ri handzuka hi le xikarhi,+ ku suka ehenhla ku ya ehansi,+ misava yi tsekatseka ni maribye ma pandzeka. 52 Kutani masirha ma pfuleka, mitsumbu yo tala ya vanhu va Xikwembu yi humela ehandle 53 (endzhaku ka loko Yesu a pfuxiwile, vanhu lava a va huma emasirheni, va nghene emutini wo kwetsima), yi voniwa hi vanhu vo tala. 54 Loko ndhuna ya masocha ni lava a va rindze Yesu swin’we na yona, va vona ku tsekatseka ka misava ni swilo leswi endlekaka, va sungula ku chava ngopfu kutani va ku: “Hakunene loyi a a ri N’wana wa Xikwembu.”+

55 A ku ri ni vavasati vo tala lava a va ri kwalaho va langute va ri ekule, lava a va ri na Yesu ku suka eGaleliya leswaku va n’wi pfuna;+ 56 exikarhi ka vona a ku ri na Mariya Magadala, Mariya mana wa Yakobo na Yosi ni mana wa vana va Zebediya.+

57 Loko ri ya eku peleni, ku fike wanuna loyi a fuweke wa le Arimatiya, vito rakwe a ku ri Yosefa, loyi na yena a a ri mudyondzisiwa wa Yesu.+ 58 Wanuna loyi u ye eka Pilato a ya kombela ntsumbu wa Yesu.+ Kutani Pilato a lerisa leswaku a nyikiwa wona.+ 59 Yosefa a teka ntsumbu wolowo, a wu tsondzela hi lapi ra xiyimo xa le henhla leri a ri basile,+ 60 a wu veka esirheni rakwe lerintshwa,+ leri a a ri kovotle eribyeni. Hiloko a khunguluxa ribye lerikulu a pfala nyangwa ya sirha, ivi a famba. 61 Kambe Mariya Magadala na Mariya lowun’wana va ya emahlweni va tshama emahlweni ka sirha.+

62 Leswi swi humelele hi siku ro lulamisela Savata.+ Hi siku leri tlhandlamaka, vaprista lavakulu ni Vafarisi va hlengeletana emahlweni ka Pilato, 63 va ku: “Nkulukumba, hi tsundzuke leswaku muxisi loyi u tshame a vula marito lawa loko a ha hanya, ‘Endzhaku ka masiku manharhu ndzi ta pfuxiwa.’+ 64 Hikwalaho lerisa leswaku sirha ri rindziwa ku fikela siku ra vunharhu, leswaku vadyondzisiwa vakwe va nga ti va ta n’wi yiva+ kutani va byela vanhu va ku, ‘U pfuxiwile eku feni!’ Mavunwa yo tano ma ta va ma bihe ngopfu ku tlula layo sungula.” 65 Pilato a ku: “Fambani ni varindzi va ya rindza hilaha mi lavaka hakona.” 66 Kutani va suka va ya lema ribye leri pfaleke sirha va tlhela va veka varindzi.

28 Endzhaku ka Savata, loko ri ya eku xeni, hi siku ro sungula ra vhiki, Mariya Magadala na Mariya lowun’wana va ta ku ta vona sirha.+

2 Ku va ni ku tsekatseka lokukulu ka misava, hikuva ntsumi ya Yehovha* yi xike hi le tilweni yi fika yi khunguluxa ribye naswona a yi tshame ehenhla ka rona.+ 3 A yi vangama ku fana ni rihati, naswona swiambalo swa yona a swi ri swo basa paa!+ 4 Vavanuna lava a va ri varindzi va chava ngopfu lerova va ku whii, va fana ni vanhu lava feke.

5 Kambe ntsumi yi byela vavasati yi ku: “Mi nga chavi, hikuva ndza swi tiva leswaku mi lava Yesu loyi a dlayiweke emhandzini.+ 6 A nga kona laha, u pfuxiwile hilaha a vuleke hakona.+ Tanani mi ta vona laha a a vekiwe kona. 7 Hatlisani mi ya byela vadyondzisiwa vakwe leswaku u pfuxiwile eku feni, mi ta ya n’wi kuma eGaleliya.+ Mi ta n’wi vona kona. Mi tsundzuka leswi ndzi mi byeleke swona.”+

8 Va suka esirheni hi ku hatlisa, va chuhile hala tlhelo va tsake swinene, va tsutsuma va ya tivisa vadyondzisiwa vakwe.+ 9 Hiloko Yesu a hlangana na vona a ku: “Xewani!” Kutani va tshinela va khinsama emahlweni ka yena va n’wi khoma milenge. 10 Yesu a ku eka vona: “Mi nga chavi! Fambani mi ya tivisa vamakwerhu leswaku va ya eGaleliya, va ta ndzi vona kwale.”

11 Loko va ha ri endleleni, varindzi van’wana+ va ya emutini va ya vikela vaprista lavakulu swilo hinkwaswo leswi endlekeke. 12 Kuteloko va hlangane ni vakulukumba naswona va burile hi mhaka leyi, va nyika masocha mali yo tala ya silivhere 13 ivi va ku: “Mi fanele mi ku, ‘Vadyondzisiwa vakwe va te nivusiku va ta n’wi yiva loko ha ha etlele.’+ 14 Loko mhaka leyi yo fika etindleveni ta ndhunankulu, hi ta yi hlamusela, mi nga karhateki.” 15 Hiloko va teka mali ya silivhere va endla hilaha va lerisiweke hakona, mhaka leyi yi tiviwe hi Vayuda vo tala ku ta fikela namuntlha.

16 Hambiswiritano, vadyondzisiwa va 11 va ya entshaveni ya Galeliya+ laha Yesu a a ta hlangana na vona kona.+ 17 Loko va n’wi vona va khinsama, kambe van’wana a va kanakana. 18 Yesu a tshinela eka vona a ku: “Ndzi nyikiwe matimba yo lawula swilo hinkwaswo etilweni ni le misaveni.+ 19 Hikwalaho, fambani mi ya endla vanhu va matiko hinkwawo va va vadyondzisiwa.+ Mi va khuvula+ hi vito ra Tatana, ni ra N’wana, ni ra moya lowo kwetsima, 20 mi va dyondzisa ku yingisa hinkwaswo leswi ndzi mi leriseke swona.+ Vonani! Ndzi na n’wina mikarhi hinkwayo kukondza makumu ma fika.”+