Ku Khongotela Vanhu Lavakulu Lava Xanisiweke Va Ha Ri Vatsongo

A KU ri mpatswa lowu ntshunxekeke, lowu a wu xiximiwa ngopfu evandlheni. Kambe rito rakwe ri kombise leswaku u karhatekile swinene loko a kombela leswaku va ta va ta va endzela, loko ku ri nsati yena, a huma ni mihloti. A karhatiwa hi ntshikilelo lowukulu ni ku tivenga, hambi ku ri ku ehleketa hi ku tisunga. U khomiwe hi ndlela yo biha hi tlhelo ra rimbewu loko a ha ri ntsongo. Leswi nhlengeletano ya Yehovha yi nyikeleke nkongomiso wa ndlela yo pfuna lava va xanisiweke hi ndlela yoleyo, nkulu u kambisise mapapila ya Sosayiti lama yaka eka vakulu kun’we ni swihloko swa Awake! ya October 8, 1991, ni xihloko xa Xihondzo xo Rindza xa October 1, 1983, lexi a xi hlamusela mhaka leyi. Hi leti tinhla ti nga ri tingani leti pfunaka, leti tekiweke eka minkandziyiso leyi.

1. Yingisela, yingisela, yingisela. Loko n’wana a pyemuka tsolo, xilo xo sungula i ku tsutsumela eka Manana kumbe Tatana leswaku a chaveleriwa. Kambe n’wana loyi a a khomiwa hi ndlela yo biha, swi nga ha endleka a nga wu kumanga nkarhi wo ehleketa sweswo. Kutani hambi se a kurile, wa ha ri na xona xilaveko xexo—xo byela, xo tiphofula, ni ku kuma nchavelelo wa muyingiseri la nga ni ntwela-vusiwana. (Ringanisa Yobo 10:1; 32:20.) Loko nkulu a endzele mpatswa lowu boxiweke laha henhla, nuna a a hlamele hi ndlela leyi nkulu a nga vulavula hi ku komisa ha yona ni ndlela leyi a a yingisela ha yona. Wanuna loyi, i munhu loyi a twisisaka, la pfunaka swinene, kambe u kume leswaku a a ringeta ku lulamisa xiphiqo hi ndlela yakwe, a a ringeta ku lulamisa mintlhaveko leyi yena a yi vonaka yi ri ya vuhunguki. U dyondze leswaku nsati wakwe a a lava ku kombisiwa ntwela-vusiwana ku ri na ku nyikiwa tinhlamulo. (Ringanisa Varhoma 12:15.) A lava ku byeriwa leswaku u ni swivangelo leswi twalaka swa ku titwa hi ndlela leyi a a titwa ha yona.

2. Paluxa mavunwa. Ku khomiwa hi ndlela yo biha ku dyondzisa vana leswaku va thyakile, a va rhandziwi, na swona a va vuli nchumu. Ku fana ni tidyondzo ta vukhongeri bya mavunwa, mianakanyo leyi yi nga endla leswaku swi nonon’hwa ku va ni vuxaka lebyinene na Yehovha. Kutani paluxa mavunwa lawa, kutani u ma pfala hi ntiyiso—khwatsi, nkarhi na nkarhi, na hi ku lehisa mbilu. Kombisana na yena hi Matsalwa. (2 Vakorinto 10:4, 5) Hi xikombiso: “Ndza swi twisisa leswaku u tivona u thyakile. Kambe Yehovha yena u titwisa ku yini ha wena? Loko a pfumelele N’wana wakwe leswaku a fa kutani a ku endlela nkutsulo, xana sweswo a swi vuli swona leswaku wa ku rhandza? [Yohane 3:16] Emahlweni ya Yena, xana ku khomiwa hi ndlela yo biha ku thyakise wena, kumbe ku thyakise loyi a nga ku khoma hi ndlela yo biha? Tsundzuka, Yesu u te: ‘A ku na nchumu lexi nga ehandle ka munhu, lexi kotaka ku n’wi nyamisa loko xi nghena eka yena, kambe leswi humaka ka munhu, hi swona leswi swi n’wi nyamisaka.’ [Marka 7:15] Xana hi wena u pfinyeke, n’wana lontsongo swonghasi? Kumbe xana loyi a nga ku onha hi yena a nga swi kunguhata emianakanyweni yakwe?”

3. Ku khongotela. Vanhu a va fani, kutani ndzayo ya Pawulo ya ku “tiyisa lava helaka ntamu” yi tirha hi ku hambana-hambana. (1 Tes. 5:14) Hambi swi ri tano, ku vulavula hi ndlela yo vevukisa swilo, a swi khongoteli. Hi xikombiso, ku byela loyi a tshameke a khomiwa hi ndlela yo biha leswaku a hlaya Bibele swinene, a chumayela kumbe leswaku a ‘hoxa ndzhwalo wakwe eka Yehovha’—hambi leswi swiringanyeto leswi swi pfunaka nkarhi wun’wana—a swi nge byi humesi vuyelo lebyi lavekaka. (Pisalema 55:22; ringanisa Vagalatiya 6:2.) Vo tala ana va swi endla swilo leswi hi laha va kotaka ha kona, naswona va tisola ngopfu loko va nga antswisi.—Ringanisa 1 Yohane 3:19, 20.

Hi laha ku fanaka, ku byela lava tshameke va khomiwa hi ndlela yo biha leswaku va rivala swilo leswi hundzeke swi nga ha va vavisa ngopfu, ematshan’weni ya leswaku va pfuneka. Loko a va swi kota, a va ta swi endla—naswona a va nga ta lava ku pfuniwa leswaku va fikelela xiboho xexo xo olova.a Tsundzuka, xiphiqo xa vona i xa mintlhaveko. Hi xikombiso, ehleketa u kuma munhu a katseke enghozini ya movha a manyekile, a rila. Xana u nga n’wi byela leswaku a rivala hi ku vava loku a ku twaka? Doo, ku laveka swo tlula sweswo.

Loko u nga tiyiseki leswaku leswi u swi vulaka swa khongotela ni ku pfuna, ha yini u nga vutisi loyi a nga ni ntshikilelo? Naswona, hambi ku ri ndzayo leyi nga ya ntiyiso naswona yi ri ya Matsalwa yi fanele ku fika hi nkarhi naswona yi faneleka.—Ringanisa Swivuriso 25:11.

Endzhaku ka maendzo ma nga ri mangani, makwerhu loyi wa xisati u sungule ku vona langutelo rakwe ri antswa, naswona nuna wakwe se a swi kota ku n’wi pfuna eminkarhini yo nonon’hwa. Havambirhi va kote ku khongotela van’wana lava va weriweke hi maxangu lama fanaka. Swi tiyisa ripfumelo hakunene ku vona Yehovha, “Xikwembu lexi ku chavelela hinkwako ku humaka eka xona,” a tirha hi Rito ra yena ni vanhu va yena ku “horisa la’v̌a nga ni timbilu le’ti v̌av̌isekaka” eminkarhini leyi yo nonon’hwa.—2 Vakorinto 1:3; Esaya 61:1.

[Nhlamuselo ya le hansi]