Ti N’wi Nyika Rungula Leri Lavekaka

Muhlayi wa le Ohio, le U.S.A., u tsarile a ku: “Ndzi lava ku mi tivisa ntsena ndlela leyi ndzi tlangelaka ha yona timagazini ta Xihondzo xo Rindza na Xalamuka! Hakunene i tindzalama.” U hlamusele ndlela leyi ku ti hlaya ka yena ku n’wi nyikaka rungula leri lavekaka ha yona.

U tsarile a ku: “Ndzi tshike xikolo xa le henhla malembe ya 13 lama hundzeke. Sweswinyana, xiyimo xi ndzi bohe ku tsala xikambelo lexi fanaka ni xa xikolo xa le henhla, lexi tiviwaka ku antswa tanihi xikambelo xa GED (General Educational Development). Leswaku ndzi lunghekela xikambelo lexi, a ndzi boheka ku nghena xikolo. Hi ntolovelo, loko munhu a endla kahle etitlilasini leti hi tin’hwetinyana ta tsevu, a nga xi tsala xikambelo xa GED. Hambi swi ri tano, mina a ndzi tiyimisele ku xi tsala ku nga si hela mavhiki ya mune, kutani ndzi xi pasele ehenhla swinene.

“Xivangelo a xi ri xihi ke? Kwalomu ka hinkwaswo leswi a swi ri exikambelweni—sayense, ntivo-ntshamisano, ni swin’wana ni swin’wana—a ku vulavuriwe ha swona hi ndlela yo karhi eminkandziyisweni leyi hundzeke ya Xihondzo xo Rindza na Xalamuka! Hikwalaho ko hlaya timagazini leti ntsena, vuswikoti bya mina byo hlaya, byo tsala ni byo hikahata a byi ri byinene. Kahle-kahle, a ndzi dyondzanga ni yin’we ya tidyondzo leti. Titlilasi leti ndzi ngheneke eka tona ti lo ndzi pfuna ntsena ku pfuxeta vuswikoti bya mina bya tinhlayo.”

Loko u lava rungula leswaku u nga yi kuma njhani kopi ya Xihondzo xo Rindza na Xalamuka! kumbe u tsakela ku va ni dyondzo ya le kaya ya Bibele ya mahala, hi kombela u tsalela eka Watch Tower, Private Bag X2067, Krugersdorp, 1740, kumbe eka adirese leyi faneleke eka leti xaxametiweke eka tluka 5.