Swikhongelo Swo Kombela Ku Rhula Loko Minkumbuko Ya Nyimpi Yi Tama Ya Ha Ri Kona

HI November 1994, Mupapa John Paul II u khome nhlengeletano ya vukhongeri byo hambana-hambana le Vatican. Swikhongelo swo khongelela ku rhula ka misava a swi ri swakudya swa siku. Eka marito yakwe yo pfula mupapa u te: “Ku nga khathariseki madzolonga ya nkarhi lowu hundzeke ni ya sweswi, i xiavelo ni ntirho wa hina hinkwerhu ku endla leswaku vuxaka bya vukhongeri ni ku rhula swi tiviwa ku antswa.”

Lexi hlamarisaka, hi leswaku vukhongeri bya misava leyi bya tsandzeka emhakeni leyi. William Vendley, matsalana-jenerala wa nhlengeletano, u pfumerile leswaku “vukhongeri byi nghena ngopfu enkitsinkitsini eswiphen’wini swo hambana-hambana swa misava.” Anakanya hi ku dlayana le Rwanda, tiko leri lawuriwaka ngopfu hi Rhoma Khatoliki.

Hi May 1994, Mupapa, John Paul II u pfumerile leswaku mhangu ya le Rwanda “a ku ri ku herisiwa ka rixaka ka xiviri ni loku nge rivaleni loku khombo ra kona, hambi ku ri Makhatoliki ya nga ni nandzu wa kona.” Xana ku hoxa xandla ka Khatoliki ku khumbe ripfumelo ra vanhu ehenhleni ka kereke? André Bouillot, Mujesuit wa le Belgium u te: “Ku dlayana loku ku hungute ripfumelo ra vanhu vo tala.” Naswona hikwalaho ka xivangelo lexi twalaka.

Hi ku ya hi xiviko xa Reuters lexi kandziyisiweke eka Herald ya le Miami, “vaprista, vafundhisi ni tinani va kona exikarhi ka 40 000 wa vabohiwa va Mahutu lava yimeleke ku tengiseriwa swiendlo swa ku herisa rixaka.” The New York Times yi vikile: “Vanhu vo tala va le Rwanda va vula leswaku vabixopo ni vabixopo-nkulu va vona a va ku solanga hi xihatla ku dlayana loku kumbe a va ku solanga hi matimba hi laha ku ringaneleke ni leswaku a va ri vanghana lavakulu va Hulumendhe ya Habyarimana, leyi yi pfuneke ku letela mintlawa ya vadlayi. Ku na muprista un’we la khotsiweke hi Hulumendhe leyintshwa leyi lawuriwaka hi Matutsi hikwalaho ka swihehlo swo pfuneta eku dlayaneni loku.” Kutani a swi hlamarisi leswaku “Hulumendhe leyintshwa,” ku engetela Times, “yi vulaka leswaku a ya ha lavi Kereke ya Khatholiki yi va ni vulawuri hi laha a yi ri ha kona eku sunguleni, naswona vaprista lava vulavulaka ni lava lawulaka ngopfu, masocha ya va cinise xinchachacha ni ku va xungeta ku va pfalela ekhotsweni.”

Xana Yehovha Xikwembu u swi languta njhani swikhongelo swo kombela ku rhula leswi endliwaka hi vanhu va vukhongeri lava nga ni nandzu wa ngati? Esaya 1:15 ya hlamula: “Loko mi ṭhambuluta mav̌oko ya ṅwina, nḍi mi sirelela mahlo ya mina; loko mi anḍisa mikhongelo ya ṅwina, a nḍi yingisi; mav̌oko ya ṅwina ma tele ngati.”

Hi nkarhi lowu fanaka, malandza ya Yehovha ya ntiyiso ma tshama ma ‘nga ri ya misava’ ni minkitsinkitsi ya yona. Hi nkarhi wa ku dlayana le Rwanda, Timbhoni ta Yehovha ta rixaka lerin’wana a ti tirhisa makaya ya tona tanihi vuchavelo bya Timbhoni leti xungetiwaka ta rixaka lerin’wana, xisweswo ti va sirhelela hi ku veka vutomi bya tona vini ekhombyeni. “Ntshungu lowukulu” wa Timbhoni, leti humaka emisaveni hinkwayo ta mindhavuko hinkwayo, ti khongelela ni ku yimelela Mfumo wa Xikwembu tanihi ntshembo wu ri woxe wa ku rhula ni nsirhelelo wa ntiyiso.—Yohane 17:14; Nhlavutelo 7:9; Matewu 6:9, 10; 24:14.

[Xifaniso lexi nga eka tluka 1]

Luc Delahaye/Sipa Press