‘Xana Ntirho Wa N’wina Wu Va Pfuna Njhani Vanhu?’

LEXI i xivutiso lexi Chandrakant Patel, mutsari wa phepha-hungu wa Muindiya a xi vutiseke vatirhi va le yindlu-nkulu ya misava hinkwayo ya Timbhoni ta Yehovha, eBrooklyn, le New York. Nkul. Patel a a tele ku ta valanga miako naswona u tsakisiwe ngopfu hi leswi a swi voneke ni ku swi twa lerova loko a fika eIndiya, u tsale xihloko eka phepha-hungu ra Xigujarati.

Loko a hambanisa tidyondzo ta Timbhoni ta Yehovha ni ta tinhlengeletano ta tikereke ta le Indiya, Nkul. Patel u tsale leswaku Timbhoni ta Yehovha ti pfumela eka Xikwembu xa matimba hinkwawo, Yehovha, lexi nga faniki ni dyondzo ya Vunharhu-un’we leyi hi ntolovelo yi dyondzisiwaka etikerekeni nileswaku a ti tirhisi swifaniso evugandzerini bya tona. U xiye leswaku Timbhoni ta Yehovha ti ni misinya ya milawu leyi tlakukeke hikuva ti yi namarhela swinene mimpimanyeto ya Vukreste leyi tsariweke eBibeleni malunghana ni vuoswi, ku humesa khwiri ni ku vengana kumbe ku dlayana ka vanhu. U hlamusele Timbhoni ti ri vanhu lava rhuleke, lava nga ni rirhandzu, lava lehisaka mbilu ni lava hoxaka xandla eku pfuneni van’wana naswona a va chavi nchumu, va hiseka eku hangalaseni ka rungula ra Bibele eka van’wana.

Xana mutsari wa phepha-hungu wa le Indiya u kume nhlamulo yihi eka xivutiso xa yena lexi nge, ‘Xana ntirho wa n’wina wu va pfuna njhani vanhu?’ U tsarile: ‘Nhlamulo ya kona a ku ri leswaku dyondzo ya Bibele yi pfuna vanhu eka swiyenge hinkwaswo swa vutomi.’ Nkul. Patel ngopfu-ngopfu a a lava ku tiva hi ku khathalela rihanyo ni mintirho. Loko a tshaha tinhlamuselo tin’wana leti a nyikiweke tona, u te: ‘Loko munhu a landzela xitsundzuxo xa Matsalwa xa ku hambana ni swilo leswi nga ni khombo swo fana ni fole ni swidzidzirisi kutani a hanya vutomi lebyi baseke, a nga papalata mavabyi yo hambana-hambana. Naswona vanhu lava tirhaka hi matimba, lava rhandzaka ku basa, lava tshembekaka va tala ku kuma mintirho. Ku tlula kwalaho, ku tlhantlha swiphiqo hi ndlela ya tintswalo ni ya rirhandzu swi endla leswaku u va ni vuxaka bya ku rhula ni vanhu van’wana. Kutani ku dyondzisa vanhu leswi Bibele yi swi vulaka swa va pfuna.’

Mutsari loyi wa phepha-hungu u vone tidyondzo ta Bibele ti tirha eyindlu-nkulu ya misava hinkwayo ya Timbhoni ta Yehovha. Xihloko xa yena xi bumabumele ku basa ni ku tsaka ka vatirhi va ku tirhandzela lava tinyiketeleke entsindza wolowo wa mintirho ya swa moya. Na wena u nga vuyeriwa eka tidyondzo ta Bibele. Timbhoni ta Yehovha ti nga tsakela ku ku kombisa leswaku u nga vuyeriwa hi ndlela yihi.

Loko u swi tsakela ku kuma rungula leri engetelekeke kumbe u tsakela leswaku un’wana a ku endzela leswaku a ta dyondza Bibele na wena mahala, hi kombela u tsalela eka Watch Tower, Private Bag X2067, Krugersdorp, 1740, South Africa, kumbe eka adirese leyi faneleke eka leti xaxametiweke eka tluka 5.

[Laha Xifaniso Xi Humaka Kona eka tluka 32]

Newspaper background: Courtesy Naya Padkar, Gujarati Daily published from Anand, India