Ndzi Tiyisiwe Hi Ripfumelo Rakwe

NHWANYANA wa malembe ya 17 hi vukhale u tsalele hofisi ya Sosayiti ya Watch Tower eMoldova, ku nga khale ka Soviet Union, a nkhensa xihloko lexi nga eka Xalamuka! ya June 8, 1998. Xihloko lexi a xi ri ni nhloko-mhaka leyi nge “Ku Hlawula Ka Mina Exikarhi Ka Vatatana Vambirhi,” naswona xi hlamusele mintokoto ya muntshwa wa le Armenia.

Nhwanyana loyi u te: “Loko ndzi ri karhi ndzi hlaya xihloko lexi, mahlo ya mina ma tenga-tenge mihloti hikuva mhaka yakwe ya fana ni ya mina.” U ye emahlweni a ku: “Loko ndzi ri ni malembe ya 15, ndzi sungule ku dyondza Bibele, naswona eku sunguleni vatswari va mina a va nga ri na mhaka. Kambe loko ndzi sungula ku ya eminhlanganweni ya Timbhoni ta Yehovha, a va swi amukelanga nikatsongo. Kutani, hi 1997, loko ndzi sungula ku byela van’wana hi leswi a ndzi swi dyondza, va ndzi byele va ku: ‘Yana eka vanghana va wena lava nga Timbhoni va ku nyika swakudya, va ku ambexa ni ku ku nyika ntirho. U hungukile!’ Vatswari va mina va tlhele va ndzi ba, va hima nhloko ya mina ni khumbi.

“Ndzingo wolowo a wu ndzi tikela. Minkarhi yo tala a ndzi titwa hi ndlela leyi muntshwa wa le Armenia a a titwa ha yona, loyi a vuleke leswaku minkarhi yin’wana a a nga tshembi leswaku Yehovha wa n’wi tsakela. A ndzi tivutisa, ‘Xana ndzo va xikangalafula? Xana Yehovha u ta ndzi rivalela swidyoho swa mina swa khale? Xana Yehovha wa ha ndzi rhandza?’

“A swi tika swinene, ngopfu-ngopfu loko ndzi ehleketa leswaku Yehovha a nga ha ndzi rhandzi. A ndzi tala ku kombela Yehovha eswikhongelweni swa mina, ndzi khavaxela mihloti, leswaku a ndzi pfuna, a ndzi tiyisa leswaku ndzi nga n’wi tshiki. Kunene, ndzi swi vonile leswaku Yehovha u swi twile swikhongelo swa mina naswona u swi hlamurile swikombelo swa mina. U endle leswaku ndzi tserhama, ndzi tshembeka ni ku va ni xivindzi. Ngopfu-ngopfu leswi u swi endle hi ku tirhisa Rito rakwe, laha mupisalema a vuleke hi xivindzi a ku: ‘Loko tatana na manana vo ndzi tshika, Yehovha u ta ndzi teka.’—Pisalema 27:10.

“Hi September 27, 1997, ndzi kombise ku tinyiketela ka mina eka Yehovha hi ku khuvuriwa enhlengeletanweni ya xifundzha ya Timbhoni ta Yehovha le Kagul. Ndzi swi vona kahle leswaku Yehovha, Tata wa hina la nga le matilweni wa rirhandzu, u hetisisa xitshembiso xakwe lexi tsariweke eka Pisalema 84:11: ‘Hikuva Yehovha Xikwembu i dyambu ni xitlhangu; u nyika tintswalo ni ku vangama. Yehovha a nge va tsoni nchumu wihi ni wihi lowunene lava fambaka hi ndlela leyi pfumalaka xihoxo.’

“Ndza n’wi nkhensa swinene muntshwa loyi wa le Armenia hi ku hlamusela ntokoto wakwe lowu tiyisaka ripfumelo eka magazini wa Xalamuka! Ndza tshemba leswaku eku heteleleni, vatswari va mina ni va yena va ta ti tsakela tidyondzo ta Bibele.”