Ndlela Yo Antswa Ya Ku Enerisa Swilaveko Swa Wena Swa Moya

HIKWALAHO KA YINI VANHU va lava vukhongeri? Van’wana va nga vula leswaku vanhu va rhandza swilo swa moya leswaku va ta kuma nsirhelelo eka misava leyi nga sirhelelekangiki. Kambe ku katseka swo tala. Xihloko xa magazini wa American Sociological Review xi te: “Ku lava nsirhelelo a hi swona ntsena swi kokelaka vanhu eka vukhongeri. Nkarhi ni nkarhi vanhu a va lava tinhlamulo ta swivutiso swo fana ni leswi: Xana vutomi byi sungule njhani? Xana vumundzuku bya hina hi byihi? Hikwalaho ka yini hi ri laha?”

A swi kanakanisi leswaku wa pfumela leswaku leswi i swivutiso swa nkoka swinene. Leswi swi nga swa nkoka, swi fanele swi hlamuriwa hi ndlela leyi enerisaka! Swivutiso swo tano i swa nkoka swinene, swi ni ntikelo naswona a swi nge hlamuriwi ntsena hi ku hlawula dyondzo leyi hi vonaka yi hi tsakisa eka tidyondzo to hambana-hambana ta vukhongeri. Loko hi ta kuma tinhlamulo leti khorwisaka, leti tshembekaka evuton’wini ta swivutiso swa ntshima, hakunene hi lava ndlela yo antswa.

Xana ku na nchumu wo antswa? Ferrar Fenton, muhundzuluxeri wa Bibele, u vule nchumu lowu xiyekaka mayelana ni buku yoleyo. U yi vitane “xilotlelo lexi nga pfulaka Xihundla xa Vuako Hinkwabyo eka Munhu, ni Xihundla xa Munhu hi Yexe.” Ina, Bibele yi hlamula swivutiso swa nkarhi lowu hundzeke, swa nkarhi wa sweswi ni swa nkarhi lowu taka. Yi hi byela leswaku vutomi byi sungurise ku yini, leswaku vutomi byi vula yini, ndlela leyi hi nga kumaka ntsako ha yona, ni leswi vumundzuku byi hi khomeleke swona. Ku hava buku yin’wana ematin’wini leyi veke ni nkucetelo ku fana ni Bibele; naswona a yi kona buku yin’wana leyi poneke ku hlaseriwa lokukulu swonghasi ka rivengo. Hikwalaho ka yini, vo tala va nga yi kambisisi buku leyi yo hlawuleka leswaku va kuma tinhlamulo ta swivutiso leswi vutisiwaka evuton’wini?

Vanhu vo tala a va tinyiki nkarhi wo anakanyisisa hi ku hambana lokukulu loku nga kona exikarhi ka Bibele ni tikereke leti va ti tivaka. Va yi vonile ndlela leyi lava vuriwaka Vakreste va dlayaneke hi vito ra Xikwembu ha yona. Vo tala va gungurile, tanihi leswi The Guardian yi vuleke leswaku “vaprista masiku lawa va tsakela ngopfu ku hlengeleta mali ku tlula ku endzela vanhu va endla ntirho wa vona wa moya.” Va anakanya leswaku Bibele yi amukela mahanyelo yo tano. Ntiyiso hileswaku, Bibele yi lerisa Vakreste ku “rhandzana,” naswona yi byela lava dyondzisaka rito yi ku, “Mi amukele mahala, nyikani mahala.” (Yohane 13:34; Matewu 10:8) Xana swi lulamile ku avanyisa Bibele hi swiendlo swa vanhu lava vulaka leswaku va yi xixima kambe va nga landzeli leswi yi swi vulaka?

Vanhu vo tala va kholwa leswaku Bibele a yi fambisani ni sayense, ya tikaneta, naswona yi hundzeriwe hi nkarhi. Kambe nkambisiso lowukulu wu kombisa leswi hambaneke. I ntiyiso leswaku Bibele a hi buku ya sayense. Kambe, loko yi vulavula hi timhaka leti fambelanaka ni sayense—to fana ni ku landzelelana ka minkarhi leyi swilo leswi hanyaka swi humeleleke ha yona emisaveni, xivumbeko xa misava kumbe matshungulelo lama faneleke ya vuvabyi lebyi tlulelaka—Bibele a yi vuli nchumu lexi hoxeke. Ku hambana ni sweswo, yi tamele timhaka leti vativi va sayense va tikumeke endzhaku ka malembe yo tala. Hambileswi Bibele yi endliweke hi 66 wa tibuku leti tsariweke emalembeni lama tlulaka 1 600, hinkwato ka tona ta pfumelelana. Ku tlula kwalaho, Bibele yi tiva swo tala hi ndlela leyi munhu a vumbekisiweke xiswona, leswi endlaka leswaku yi tshama yi ri enkarhini nkarhi hinkwawo.

Buku leyi xiyekaka yi vula swilo swa nkoka mayelana ni vugandzeri bya Xikwembu. Yi vula leswaku xi fanele xi gandzeriwa, ku nga ri hi ndlela leyi vanhu va swi lavisaka xiswona, kambe hi ndlela leyi Xikwembu xi swi lavisaka xiswona. (Yohane 5:30; Yakobo 4:13-15; 2 Petro 1:21) Kambe a va talanga vanhu lava landzeleke nkongomiso wolowo. Ku sukela eminkarhini ya khale, vanhu va vumbe vukhongeri lebyi fambelanaka ni swikongomelo swa vona. Leswi swi vonake hiloko vanhu va vatla swikwembu hi mirhi kutani va swi gandzela. Swi tano niloko minhlangano ya vukhongeri yi dyondzisa tidyondzo leti yi nga lo tisungulela tona. Xana a swi tano ni hi vanhu lava vumbaka vukhongeri bya le xihundleni leswaku byi fambisana ni leswi va swi rhandzaka?

Ehleketa hi leswi. Hikwalaho ka yini u nga endli hilaha muavanyisi lonkulu wa Huvo-nkulu ya le United States a endleke hakona? Hi ndlela leyi fanaka ni leyi a tengaka milandzu ha yona, u kambisise vumbhoni hinkwabyo lebyi hehlaka Bibele. Xana ku ve ni vuyelo byihi? U te: “Ndzi fikelele xiboho xa leswaku Bibele i buku leyi humaka eka xivumbiwa xa moya, yi huma eka Xikwembu.”

Xana wena u nga wu endlisa ku yini ndzavisiso lowu fanaka? Hi ringanyeta leswi, u nga ringeta fambiselo ro dyondza Bibele, kutani u lavisisa tinhlamulo ta swivutiso leswi vutisiweke eku sunguleni ka xihloko lexi. Ku ni Timbhoni ta Yehovha ta kwalomu ka tsevu wa timiliyoni, ematikweni ya 235, leti ngheneleke dyondzo yo tano. Ti nyikele hi nkarhi wa tona leswaku ti avelana ni van’wana leswi ti swi dyondzeke. Dyondzo ya le kaya ya Bibele leyi ti yi dyondzisaka mahala yi pfune vanhu va timiliyoni leswaku va va ni ripfumelo leri sekeriweke edyondzweni leyi twalaka ku nga ri ntsena eka nchumu lowu vanhu va wu tsakelaka. Vukreste bya ntiyiso, lebyi tengeke lebyi kumekaka eBibeleni a hi vukhongeri ntsena lebyi fanaka ni lebyin’wana. Byi seketela ntiyiso malunghana ni Xikwembu ni swikongomelo swa xona. Hikwalaho, a hi fanelanga hi enerisiwa hi dyondzo leyi nga riki ntiyiso!—Yohane 17:17.

[Swifaniso leswi nga eka tluka 26]

Ndlela yo antswa ya ku enerisa swilaveko swa wena swa moya i ku dyondza eBibeleni hi Xikwembu kutani u tihlanganisa ni vagandzeri va ntiyiso