Xana Ku Va Ni “Vukhongeri Bya Munhu Hi Yexe” Hi Wona Ntlhantlho?

TANIHI LESWI VANHU vo tala va fularhelaka vukhongeri lebyi tolovelekeke, a swi hlamarisi leswi vunyingi bya vanhu va tisungulelaka vukhongeri bya vona vini. Kambe ku ni swivutiso leswi tlakukaka, Xana ku endla tano hakunene swi ta enerisa swilaveko swa vanhu swa moya? Xana ku va ni “vukhongeri bya munhu hi yexe” hi wona ntlhantlho?

Leswaku hi kota ku hlamula swivutiso leswi, kumbexana hi nga rhanga hi kambisisa loko vukhongeri bya munhu hi yexe byi hi enerisa loko hi byi kambela hi ku tirhisa “matimba [ya hina] ya ku anakanya,” ku nga yin’wana ya tinyiko letikulu leti munhu a nga na tona.—Varhoma 12:1.

Munhu loyi a ehleketaka kahle, a nga pfumelelani ni mhaka leyi tikanetaka. Kambe, eka nkambisiso lowu endliweke eka vukhongeri bya munhu hi yexe le Sweden, ku kumeke leswaku hakanyingi vanhu “va hlanganisa timhaka leti nga twananiki (leti nga riki na nhloko ni ncila) kutani va vumba mavonelo ya vona vini.”

Hi xikombiso, ko va ni tiphesente timbirhi ntsena ta vanhu lava tivitanaka “Vakreste hi ndlela ya vona vini,” lava vulavuleke hi Yesu tanihi munhu la tshameke a va kona. Kambe, va bule ngopfu hi dyondzo ya ntswariwo-nyingi. Xana sweswo a swi kanetani loko munhu a tivitana mulandzeri wa Yesu Kreste kasi hi hala tlhelo u honisa vutomi ni tidyondzo takwe—hambi ku ri ku namarhela tidyondzo leti kanetanaka ni letiya ta Kreste hi ku helela?a

Nakambe matimba ya hina ya ku anakanya a ma ti amukeli tidyondzo leti nga twisisekiki. Hambiswiritano, loko vanhu vo tala lava vutisiweke leswaku va pfumela eka “Xikwembu kumbe eka matimba ya le henhla,” va angule hi ku vula leswaku “Nchumunyana” wo tano wu nga ha va wu ri kona. Un’wana u te: “Ndzi pfumela eka nchumu wun’wana wa moya kambe lowu nga riki na xivumbeko xa Xikwembu.” Hinkwavo lava pfumelaka eka Xikwembu, va titwe “xi nga va pfunanga ngopfu evuton’wini bya vona.” Xisweswo, xiviko xexo xi hlamusele vukhongeri bya munhu hi yexe tanihi “mianakanyo leyi nga hlelekangiki,” naswona xi gimete hi ku tshaha tinhlamulo leti tolovelekeke: “Ndzi pfumela eka nchumu wo karhi, kambe a ndzi swi tivi leswaku i yini.”

Nkambisiso lowu endliweke eCanada mayelana ni vukhongeri bya munhu hi yexe, wu kombise vuyelo lebyi fanaka. Magazini lowu vitaniwaka Alberta Report wu ri: “Sweswi hi vona nhlayo leyi engetelekaka ya vanhu lava pfumelaka eka nchumu wun’wana ni wun’wana lowu va wu anakanyaka, kambe ku pfumela loku, a ku na nhloko na ncila. Naswona loko hi ringeta ku kambisisa ndlela leyi tidyondzo leti ti va kongomisaka ha yona vanhu, hi kuma leswaku a ti va pfuni ha nchumu. A ti va kombi ndlela leyi va faneleke va hanya ha yona. Kahle-kahle a ti pfuni nchumu.” Magazini wu vulavule hi “xikwembu lexi pandziweke xi va swipetlu-petlu” hikwalaho ka leswi vanhu lava pfumelaka eka tidyondzo teto “va hlawulaka swiphemu swo karhi eka tidyondzo ta vukhongeri.” Xana wena u vona swi twala ku sekela tidyondzo ta vukhongeri—hambi ku ri ntshembo hi vumundzuku—eka tidyondzo to tano leti nga twisisekiki, leti nga riki na nhloko ni ncila?

Xilaveko Xa Hina Xa Ku Va Ni Vunghana

I khale vapfumeri va bumabumela vunghana, ku twanana swin’we ni vun’we. (Mintirho 2:42, 46) Kambe tanihi leswi vukhongeri bya munhu hi yexe byi ngo va—bya munhu un’we—xana byi ta swi kota njhani ku fikelela swilaveko leswi?

Xana vukhongeri bya munhu hi yexe, laha “munhu un’wana ni un’wana a nga ni kereke yakwe,” a byo ya byi nyanyisa ku avana exikarhi ka vanhu va vukhongeri? Magazini wa Alberta Report wu te: “Mhaka ya vukhongeri ko va ku tihlawulela ka munhu ka le xihundleni . . . , kutani hi hundzuke tiko leri ri nga pfanganisiwiki hi tidyondzo ta madzana ta vukhongeri kambe hi tidyondzo ta timiliyoni.” Kutani, a swi hlamarisi leswi vukhongeri bya munhu hi yexe byi tlheleke byi hlamuseriwa tanihi vukhongeri lebyi nga ni hasahasa.

Ku Vuriwa Yini Hi Misinya Ya Milawu Ya Byona?

Mufundhisi wa le Sweden, Martin Lönnebo, eka mbulavurisano lowu a veke na wona ni phepha-hungu ra Svenska Dagbladet u boxe leswaku “vukhongeri bya munhu hi yexe a byi nge byi antswisi vutomi bya hina, naswona bya tikeriwa hi ku hundzisela milawu ya byona eka vanhu va manguva lawa.” Vonelo leri ri pfumelelana ni langutelo leri tolovelekeke ra vatswari va le Sweden loko va kurisa vana. Phepha-hungu ra Svenska Dagbladet ri katsakanya langutelo leri hi ndlela leyi: “Pfumela leswi u swi lavaka! Naswona u nga sindzisi vana va wena leswaku va endla xiboho. Kambe va pfumelele va hlawula loko se va kurile.”

Phepha-hungu leri ri pfumela leswaku ku dyondzisa vana misinya ya milawu ya vukhongeri swi nga fana ni ku va dlaya dzano. Kambe, phepha-hungu leri ri gimetise xileswi: “Ku dyondzisa vana swi nga va leswinene naswona swi nga ha endleka ku ri yona ndlela ntsena leyi va nga va pfunaka ha yona . . . ku tiendlela swiboho.” Ina, xirilo ya sweswinyana xa vantshwa, xi kombisa leswaku vukhongeri bya munhu hi yexe a byi endlanga nchumu leswaku byi hlanganisa mindyangu hi ku tirhisa milawu leyi tiyeke leyi nga ha hundzisiwaka yi ya eka rixaka lera ha taka.

Kutani, swi vonaka onge vukhongeri bya munhu hi yexe a byi tshembiwi, a byi nge kongomisi munhu evuton’wini, naswona a byi nge swi koti ku hlanganisa vanhu kumbe ku kongomisa vanhu emhakeni ya mahanyelo. Phepha-hungu leri nge Svenska Dagbladet, leri boxiweke eku sunguleni ri tshahe xihloko lexi hlamuselaka vukhongeri bya munhu hi yexe hi ndlela leyi: “Loko ‘ripfumelo’ ri katsa swilo hinkwaswo, a ri pfuni nchumu. Naswona loko ntshunxeko wu nga ringaniseriwi, a wu pfuni.”

Swi le rivaleni leswaku vukhongeri bya munhu hi yexe bya hluleka hi tindlela to tala ku enerisa swilaveko swa vanhu swa moya. I ntiyiso, xana munhu la ehleketaka kahle a nga langutela leswaku a enerisa swilaveko swa vanhu hi ku hlawula ntsena tidyondzo to karhi eka mindhavuko yo hambana-hambana, onge hiloko munhu a hlawulela swakudya leswi a swi lavaka etafuleni leri nga ni swakudya swa mixaka-xaka? Nakambe swi le rivaleni leswaku vukhongeri lebyi tolovelekeke byi hlulekile ku fikelela swilaveko swa vanhu. Kutani, xana hi nga wu kuma kwihi mpfuno?

[Nhlamuselo ya le hansi]

[Xifaniso lexi nga eka tluka 24, 25]

Xana hi fanele ku languta vukhongeri tanihi swakudya, laha hi hlawulaka tidyondzo leti tsakisaka hina?