Xiviko Xa Yena Xi Ve Ni Nkucetelo Lowunene

Ginny un’wana wa Timbhoni ta Yehovha le United States, elembeni ra yena ro hetelela exikolweni u ve ni lunghelo lerinene ro vulavula hi vukhongeri bya yena. U ri: “Mudyondzisi wa mina u byele swichudeni leswaku hi fanele hi tsala rungula leri nga ta tirhiseriwa ku pasa ka hina. Ndzi n’wi byele leswaku ndzi lava ku tsala hi Timbhoni ta Yehovha ekampeni ya Manazi ya nxaniso.”

Mudyondzisi u nyike Ginny mpfumelelo wo tsala hi nhloko-mhaka ya yena. Ginny u ri: “A ndzi khome hi rhumbu loko ku fika nkarhi wa leswaku ndzi yisa ntirho wa mina ni ku ya rungulela ntlawa wa swichudeni. A ndzi nga swi tivi leswaku vadyondzi-kulorhi a va ta ku yini kumbe va ta ndzi hleka.”

Ginny u sungule rungula ra yena hi ku vutisa: “Xana u kona loyi a tivaka leswaku i mani loyi a a ambale Nyeleti ya Davhida etikampeni ta nxaniso ta Manazi?” Hinkwavo ka vona va te, “I va Yuda.” Hiloko a vutisa leswaku u kona loyi a tivaka leswaku i vamani lava a va ambale xilapana xa tinhla-tinharhu. A ku hlamulanga munhu. Ginny u ri: “Ndzi va byele leswaku a ku ri Timbhoni ta Yehovha.”

Mudyondzisi ni ntlawa a va tsakele rungula ra Ginny. Ginny u ri: “A swi va hlamarisile leswaku Timbhoni ta Yehovha a ti ta va ti kume ntshunxeko hi ku sayina phepha ntsena ti landzula ripfumelo ra tona. Van’wana va swichudeni-kulorhi hi ku famba ka nkarhi va ndzi byele leswaku enkarhini lowu hundzeke a va hleka Timbhoni ta Yehovha kambe sweswi loko ku tshuka ku fika un’wana wa tona va ta n’wi yingisa.”

Ginny u kume tinyeleti ta mune hi xirungulwana xa yena ni ku rungulela ka yena ntlawa. U ri: “A ndzi kumanga timaraka letinene ntsena kambe ndzi ve ni nkarhi lowunene wo vulavula hi ripfumelo ra mina!”

[Xifaniso lexi nga eka tluka 22]

Timbhoni ta Yehovha to tala a ti tshembisiwe ntshunxeko loko ntsena to sayina phepha leri leswaku ti landzula ripfumelo ra tona

[Xihlovo Xa Kona]

Courtesy of United States Holocaust Memorial Museum