Vantshwa Lava ‘Tshembaka Yehovha’

VUMBHURHI a hi bya lavantshwa ntsena, na byona vutlharhi a hi bya lavakulu ntsena. (Ringanisa Swivuriso 11:22; Eklesiasta 10:1.) Kambe, lava nga ni vumbhurhi lebyi nga heriki ni vutlharhi bya ntiyiso hi lava va tshembaka Yehovha hi mbilu hinkwayo naswona va ku eka yena: “U Šikwembu ša nga!”—Pisalema 31:14; Swivuriso 9:10; 16:31.

Emisaveni hinkwayo ku ni vunyingi lebyi andzaka bya vanhu vo xonga, lavantshwa ni lavakulu hi ku fanana, lava kombisaka vutlharhi bya vona hi ku tirhela Xikwembu ni ku chumayela mahungu lamanene ya Mfumo wa Xikwembu. Hi xikombiso, xiya Sabrina wa malembe ya nhungu hi vukhale.

Sabrina u tshama le Jarimani naswona u le ka ntlawa wa vumbirhi exikolweni. I wo sungula eka Timbhoni ta Yehovha ku nghena xikolo lexi a nga eka xona. Lexi khomisaka gome, a a tshamela ku rhuketeriwa hi vadyondzi-kulobye ku kondza ku fika siku leri mudyondzisi a nga kombela swichudeni leswaku swi ta ni tibuku leti swi ti tsakelaka etlilasini. Sabrina u kunguhate ku ta ni buku leyi nge Buku Yanga Ya Timhaka Ta Bibele. Hi tolo xa kona, hambi leswi a chuhile, u lunghiselele kahle leswi a nga ta swi vula etlilasini. Tanihi leswi a ku ri ni swichudeni swa 26 etlilasini yakwe, u swi tivile leswaku swi nga ha endleka a nga vi na nkarhi lowu eneleke. Kambe a a tiyimisele leswaku ku nga vi na munhu loyi a kavanyetaka dyondzo yakwe naswona a tiyiseka leswaku Yehovha u ta n’wi pfuna. Hi siku ra kona, mudyondzisi u vutise leswaku i mani la teke na buku, la navelaka ku va wo sungula ku yi kombisa. Leswi hlamarisaka i Sabrina ntsena loyi a a te na yona. U yime emahlweni ka tlilasi a sungula ku vulavula, a hlaya ni ku kombisa swifaniso leswi nga ebukwini naswona a hlamusela leswaku hinkwaswo swi sekeriwe eBibeleni. Loko a heta u vutise a ku: “I mani la tsakelaka ku va ni buku leyi?” U nyike mudyondzisi kopi yin’we, naswona masiku ma nga ri mangani lama tlhandlameke, u nyike vadyondzi-kulobye van’wana tibuku ta khume leti engetelekeke. Nhlamuselo yin’we ya mudyondzisi malunghana ni dyondzo yakwe yi te: “A ndzi si tshama ndzi vona nchumu wo fana ni lowu.” U nyike Sabrina timaraka ta le henhla hikwalaho ka ntirho wakwe.

Entiyisweni, vunyingi bya Timbhoni letintshwa i vahuweleri lava tsakeke va mahungu lamanene exikolweni. Xikombiso xin’wana i xa Erika, muhuweleri wa malembe ya 11 hi vukhale le Mexico. U dyondzisiwe ku rhandza Yehovha ku sukela evuhlangini. Ntirho wakwe wa xikolo wa tsakisa. Xiavelo xin’wana xa yena a ku ri ku lunghiselela marungula lama khumbaka AIDS ni ku godzomberiwa hi fole ni xihoko. U lunghiselele kahle, a tirhisa magazini wa Xalamuka!, naswona u kume timaraka ta le henhla. Mudyondzisi wakwe u vutise lomu a a kuma rungula leri kona, naswona u nyikiwe timagazini leti nga ni swihloko leswi vulavulaka hi timhaka teto. Eku heteleleni, mudyondzisi u tirhisise timagazini teto ku burisana hi timhaka leti ni tlilasi hinkwayo. Hikwalaho ka ku tikhoma ka Erika, ku xixima ka yena vadyondzisi ni timaraka takwe ta le henhla, u lulameriwe hi ku kuma tinyiko, tidiploma, ni mpfunonyana wa mali yo n’wi nghenisa xikolo. Hambi swi ri tano, wa swi vona leswaku nchumu lowu wu nga n’wi pfuna swinene hi leswi a titiviseke tanihi un’wana wa Timbhoni ta Yehovha, a kota ku fambisa tibuku ta Bibele, naswona u tlakuse vito ra Xikwembu.

Kutani ku na Shannon, mufana wa malembe ya khume hi vukhale la tshamaka le New Zealand. U vona hi tihlo rin’we ntsena; lerin’wana ri dlaye hi khensa loko a ha ri ricece. Loko Shannon a ri na malembe ya nkombo, mana wakwe u sungule ku dyondza Bibele ni Timbhoni ta Yehovha. Hambi swi ri tano, endzhaku ka ku sungula dyondzo ya yena ya Bibele, u sungule ku tshama ni wanuna va nga tekananga naswona u kunguhate ku tshika ku dyondza kakwe. Shannon u kombele leswaku dyondzo ya yena ya Bibele yi ya emahlweni. Sweswo swi ve tano. Timbhoni ti ye emahlweni ti n’wi endzela, naswona eku heteleleni swirho hinkwaswo leswinharhu swa muti swi dyondze Bibele naswona swi endle nhluvuko emoyeni. Endzhaku ka ku tekana hi nawu, mana wa Shannon ni tata wakwe wa vumbirhi va khuvuriwile.

Siku rin’wana Shannon ni nsati wa mulanguteri wa xifundzha a va ri swin’we entirhweni wa nsimu. N’wini wa muti u vutise Shannon a ku: “Ri lo yini tihlo ra wena?” U hlamule a ku: “A ri khome hi khensa, kutani a ri fanele ku susiwa. Ku nga ri khale Yehovha u ta ndzi nyika lerintshwa eParadeyisini, hi tele ku ta ku byela sweswo.”