Xiviko Xa Vahuweleri Va Mfumo

Ku Amukela Mahungu Lamanene eBelgium

“I MANI loyi a voneke swilo swo fana ni leswi?” ku vula hofisi ya rhavi ya Timbhoni ta Yehova eBelgium. (Ringanisa Esaya 66:8.) Tiko leri ro saseka ri vika nhlohlorhi ya vahuweleri va 24 464 ya lembe ra ntirho ra 1989. Nakambe a ku ri na ku engeteleka ka tiphesente ta 4 eka avhareji ya nhlayo ya lava hlanganyelaka entirhweni wo chumayela n’hweti na n’hweti.

◻ Mahungu lamanene lama twarisiweke hi Timbhoni ta Yehova ma amukeriwe hi muprista wa Khatoliki loyi a byeleke swirho swa yena swa kereke hi Xilalelo xa Rhoma Khatoliki xa Sonto a ku: “Loko Timbhoni ta Yehova ti mi endzela, ti amukeleni hi mandla mambirhi. Va ni ntiyiso!” Leswi hi leswi wansati un’wana a swi endleke. Loko Timbhoni ti ta, u ti amukele hi mandla mambirhi ivi a amukela buku leyi nge Life—How Did It Get Here? By Evolution or by Creation? Endzhakunyana u kombele buku leyi nge U Nga Hanya Hi Masiku aParadeyisini eMisaveni. Dyondzo ya Bibele yi sunguriwile na yena, kambe nuna wa yena a nga hlanganyelanga. Kutani makwerhu u n’wi bele riqingho ivi a n’wi vutisa loko a ta swi lava ku tshama ni nsati wa yena emisaveni yo antswa. Hikwalaho, u hlanganyerile edyondzweni. Mpatswa lowu a wu tshama swin’we wu nga tekananga hi ndlela ya le nawini, kambe wu nghenise vukati bya wona enawini ivi hi ku hatlisa wu khuvuriwa.

◻ Ntiyiso wu hundzule vutomi bya nhwanyana lontsongo. Loko a nga si fika eka malembe ya 14 hi vukhale, u siyiwe a ri yexe. U hlangane ni mufana lontsongo ivi a tshama na yena va hanya hi vunghwavava, va tirhisa swidzidzirisi ni ku kombisa moya wa vukari. Kutani mufana u lahlekeriwe hi vutomi bya yena emhangwini ya movha. Leswi swi siye nhwanyana a tsemeke nhlana swinene, naswona u anakanye ku tisunga. ‘Xana ndzi nga wu kuma kwihi ntlhantlho wa swiphiqo swa mina?’ u tivutisile. U hlangane ni munhu loyi a tirhisanaka ni mimoya loyi a n’wi khorwiseke leswaku a nga swi kota ku hlangana ni munghana wa yena loyi a feke. Va ringete hi ku dlaya mano ni ku femba. Loko a nga kumanga nchavelelo lowu a wu languteleke eka leswi, nakambe u khomiwe hi gome lerikulu. Hi tin’hweti ti nga ri tingani, u tihambanisile ni van’wana hi laha ku heleleke. Kutani un’wana wa Timbhoni ta Yehova u hlangane na yena ivi a ringeta ku n’wi pfuna hi tlhelo ra moya. Leswi swi endliwe hi papila nkarhinyana, naswona hi ku famba ka nkarhi swilo swi lulamile endzhaku ka matshalatshala ni xivindzi lexikulu eka yena. Sweswi a a ntshunxiwile eka nhlonhlotelo wa mademona, eka mukhuva wa ku dzaha, ni le ka mintlhaveko leyikulu yo tivona nandzu. Loko nkarhi wu ya emahlweni, vutivi lebyi engetelekeke bya Bibele ni moya wa Yehova swi n’wi pfunile swinene. Nakambe, minhlangano yi n’wi tiyisile, tanihi leswi a a yi lunghiselela swinene. Sweswi u khuvuriwile naswona u na moya wa vuphayona. Ana se u fambisa tidyondzo ti nga ri tingani ta Bibele, yin’wana ya tona ni mana wa yena, loyi sweswi a vaka kona eka minhlangano yin’wana. Entiyisweni, Yehova u n’wi pfunile!

◻ Lava va tirhisaka minkarhi leyi va pfulekeleke exikolweni va tsakela ku humelela lokunene eku hangalaseni ka mahungu lamanene. Makwerhu un’wana wa xisati lontsongo exikolweni eBelgium u averiwe ku nyikela mbulavulo ehenhleni ka nhloko-mhaka leyi a yi lavaka. U endle xiboho xo vulavula ehenhleni ka Timbhoni ta Yehova ni tidyondzo ta tona, a seketele mhaka ya yena eka broxara leyi nge Timbhoni Ta Yehova Eka Dzana Ra Vumakumembirhi. Profesa wa yena a a khumbekile. Endzhaku ka loko a nyikele nkulumo ya yena etlilasini, swichudeni swi pfumeleriwe ku vutisa swivutiso. Vadyondzi-kulobye etlilasini va nga ri vangani endzhaku va vutise leswi a va fanele ku swi endla leswaku va hanya eParadeyisini ya Xikwembu leyi boxiweke enkulumeni ya yena. Vo tala, ku katsa na profesa, va kombele tikopi ta tibroxara to hambana-hambana leti makwerhu wa xisati a a ri na tona. Titlilasi letin’wana ti kombele tibroxara ni rungula leri engetelekeke, naswona profesa wa vukhongeri u kambisise tibroxara ivi a ti bumabumela etlilasini yakwe.

Goza ra xivindzi ra makwerhu wa hina lontsongo wa xisati ri katekisiwile. Tibroxara ta makume-mbirhi-nharhu ti hangalasiwile eka vaprofesa vambirhi ni swichudeni swo tala; xichudeni xin’wana, loko xi twe ehenhleni ka nkulumo leyi, xi kombele rungula ro hlamusela ntirho wa Timbhoni ta Yehova etlilasini ya xona.

Vo tala va karhi va amukela mahungu lamanene eBelgium. Va amukela Rito ra Xikwembu, “ku nga ri kukota mahungu yo huma eka vanhu, kambe tanihi mahungu yo huma eka Xikwembu . . . [lexi] tirhaka hi matimba exikarhi ka n’wina lava pfumeleke.”—1 Vatesalonika 2:13.