Ku Tirhela Mutshila Lonkulu Eka Hinkwavo

TANIHI nhwanyana lontsongo wa malembe ya nkombo hi vukhale, ndzi sungule ku tivutisa: ‘Ha yini ndzi ta fanela ku fa? Xana swa koteka ku papalata rifu?’ Ndzi byeriwe leswaku Xikwembu xi teka vanhu lavanene hikwalaho ka leswi xi va lavaka ku va na xona etilweni. Ndza ha tsundzuka un’wana wa vadyondzi-kulorhi etlilasini a phofula marito yo hlamala a ku: “Swa antswa ku va munhu lowo biha hikuva lonene u fa ku sungula!”

A ndzi rhandza ku dirowa, kutani ndzi sungule ku dyondzela ntivo-vuxongi. Exikolweni, a ndzi nga ri na nkarhi wo xiya timhaka ta vukhongeri, hambi wu ri nkarhi wo tikarhatela tona. Entiyisweni, a ndzi tolovele ku byela vanghana va mina leswaku loko a lava ku va wa vukhongeri, munhu u lava mpimo wa le hansi wa vutlhari. Loko ndzi hete tidyondzo ta mina ta ntivo-vuxongi, ndzi nyikiwe ntirho wa ku va mudyondzisi wa ntivo-vuxongi exikolweni xa le henhla.

A ndzi rhandza ntirho wa mina naswona a ndzi tlhela ndzi tsakisiwa hi tibuku ta Xintariyana ni ta tindzimi timbe, vuyimbeleri bya xichayana xin’we ni bya swichayachayana swo tala na opera. Nchumu wun’we ntsena wa vukhongeri lowu ndzi wu dyondzeke enkarhini wolowo a ku ri tinhloko-mhaka leti vulavulaka hi swifaniso ta vaendli va swifaniso swa swiendlakalo swo hambana-hambana leswi nga rivalekiki. Kutani ndzi sungule ku tiva leswi ku nyikiwa nyingiso lowukulu ku nga swona, leswi ku kombisa mintirho ya wena swi nga swona, leswi a swi vula swona ku xiximiwa swinene, ku dzunisiwa ni ku tsakeriwa tanihi mutivi wa vuxongi.

Hi nkarhi wolowo, xivandla xa ntivo-vuxongi a xi vula swo tala eka mina, tanihi leswi ku nga eka xona laha ndzi voneke xivangelo xa xiphemu lexikulu xa vukona bya mina. Kambe swivutiso leswi ndzi swi vutiseke loko ndza ha ri ni malembe ya nkombo hi vukhale a swa ha ri kona emianakanyweni ya mina. Nkarhi na nkarhi ndzi lavisise nchumu wun’wana lowu enteke, nchumu lowu a ndzi nga ta wu fikelela tanihi leswi a wu nga si hlamuseriwa. A ndzi ri muhlayi la gingiritekaka naswona ndzi kombele vativi va filosofi leswaku va ndzi hlamusela. Hi tindlela hinkwato, ndzi lave nhlamulo leyi kongomeke eka ku kanakana ka mina.

A ndza ha ri ni mpfilungano lowu loko ndzi tekiwa. Endzhaku ka ku velekiwa ka n’wana wa mina wa nhwanyana, vulavisisi bya mina bya ntiyiso byi tinyike matimba swinene. Ndzi ringete ku wu kuma hi ntivo-vuxongi, ku tsala switlhokovetselo, ku yingisela vuyimbeleri ni ku hlaya tibuku. Loko ndzi tshuka ndzi ya ekhonsatini ivi ndzi yingisela tilayeni to sungula ta vuyimbeleri, miehleketo ya mina hi xitshuketa a yi ya eka Xikwembu, eka Munhu la Tlakukeke loyi a ndzi nga n’wi tivi, naswona ndzi n’wi khensile. Hi nkarhi wolowo, hakanyingi a ndzi dzunisa Xikwembu hikwalaho ka swilo leswo saseka leswi a ndzi swi hlamala—n’wana wa mina la etlelaka, mihlovo ya swivumbeko swa rivala. Hakanyingi a ndzi hlamala ndzi ku: “Vona tingana tonghasi leswaku ntivo-vuxongi, lowu wu nga vaka ni swilo swo tala leswo saseka wu fanele wu tirhisiwa ngopfu swinene ku hlamusela rifu ematshan’wini ya vutomi!” Swin’wana swa swiphemu swo tala leswo xonga swa vutlhokovetseri ni mintirho ya le ndlwini ya mintlangu i tinsimu leti hetelelaka hi leswo biha kumbe mahlomulo; swiphemu swin’wana leswikulu leswinene swa ntivo-vuxongi swi tlakusa rifu ematshan’wini ya vutomi ni vuxongi bya byona. Ha yini?

Mianakanyo leyi yi kanetanaka yi ndzi karhatile swinene, naswona hakantsongo-ntsongo ndzi sungule ku phirhweka. A ku ri enkarhini wolowo loko Timbhoni ta Yehova ti ndzi endzela. Loko ndzi va yingisa, swi tikombe onge a va vulavula na mina hi ririmi lerintshwa. Xitshembiso xa Xikwembu xo endla leswaku misava yi va paradeyisi xi twale ku fana ni vuyimbeleri byo nandziha etindleveni ta mina. Ndzi sungule ku hlaya Bibele. Kwalaho eku heteleleni ndzi kume tinhlamulo ta swivutiso swa mina leswi a ndzi tshama ndzi ri karhi ndzi swi vutisa ku sukela loko ndzi ri ni malembe ya nkombo hi vukhale. Xikwembu a xi swi lavi leswaku munhu a fa, kambe xi tiyimisele ku katekisa malandza ya xona layo tshembeka hi ku ma nyika vutomi lebyi nga heriki emisaveni!

Kwalaho a ku ri hi 1973. Lembe leri landzeleke ndzi tinyiketerile eka Yehova naswona ndzi khuvuriwile. A swi nga olovi ku siva xiyimo xa mina xa ximbilwa-mbilwana hi ku lawuriwa hi ntlhaveko ni moya wa rirhandzu ra ntiyiso ra vumakwerhu, ku tidya ka mina hi ku pfumala vutianakanyi ni moya wa ku tinyikela ematshan’wni ya ku tianerisa hi ndzexe! A ndzi fanele ku titshika. Timbhoni ta Yehova ti pfunile swinene, tanihi leswi ti khomeke minhlangano eHolweni ya Mfumo.

Mutshila Lonkulu u suse ku kanakana ni ku pfilunganyeka ka mina. Ndza n’wi nkhensa swinene! Hi yo mhaka leyi, ku sukela hi September 1984, ndzi tekeke ntirho wa vuphayona bya nkarhi hinkwawo, ndzi heta tiawara ta 90 n’hweti yin’wana ni yin’wana eku chumayeleni ka mahungu lamanene ya Mfumo wa Xikwembu.

Ku tirhela Mutshila ni Muvumbi Lonkulu, Yehova, ni ndyangu wa mina swa phyuphyisa hakunene. Hi rindzele hi mahlo-ngati nkarhi lowu a nga ta endla xifaniso lexikulu ku tlula hinkwaswo ha wona; loko eku heteleleni a susa mafambiselo ya khale, yo homboloka lama thyakisaka ni ku onha misava leyi. Rifu a ri nga ha vi kona, naswona hi nkarhi wolowo ntivo-vuxongi wu ta nyikeriwa evuton’wini ntsena. Kutani i vuxongi ntsena lebyi nga ta kombisiwa, hikuva hikwalaho ka fambiselo lerintshwa ro lulama ra Xikwembu, nhlomulo ni gome swi ta va swi heriseriwe makumu.—Yi nyikeriwile.