Ndzi Hlawule Ntirho Lowunene

Hi ku vula Plamen Kostadinov

A KU ri ninhlikanhi loko ndzi pfuka. Ehansi a ku lo n’walala hi mabodlhela lama nga riki na nchumu naswona xilo xo chela switompi swa fole a xi nun’hwa hileswi a xi tele. Ntsako lowu a ndzi ri na wona eka xinkhubyana lexi hi veke na xona hi xa tolo wa kona nivusiku wu helele emoyeni. A ndzi pfilunganyekile naswona ndzi ri ni xivundza lexi a ndzi nga si tshama ndzi va na xona evuton’wini. Swilo hinkwaswo a swi tikomba swi nga pfuni nchumu! Mi nge ndzi mi chumbutela leswaku swi te njhani leswaku ndzi va exiyin’weni xexo lexi nga tsakisiki.

Loko ndzi ri ni malembe ya 14, a ndzi lava ku dyondzela ku mpfampfarhuta. Hi ximumu xa 1980, tatana u ndzi byele leswaku ndzi amukeriwile ekholichi yo mpfampfarhuta ya le dorobeni ra Troyan, eBulgaria. A ndzi tsake ngopfu. Hi xixikana xa lembe rero, ndzi suke edorobeni ra Lovech leri a ndzi tshama eka rona, ndzi ya tshama eTroyan.

A ndzi rhandza ku tshama ekule ni vatswari va mina leswaku ndzi ta tiendlela ku rhandza. Ndzi sungule ku dzaha, naswona minkarhi yin’wana a ndzi nwa byala ni vanghana va mina va le xikolweni hi dakwa. Ku dzaha ni ku nwa byala a swi nga pfumeleriwi exikolweni. A swi ndzi tsakisa ngopfu ku tlula milawu.

Ku rhandza ku mpfampfarhuta swi ye swi dzima timitsu embilwini ya mina. A ndzi famba emahlweni eka vutshila bya mina byo mpfampfarhuta naswona ndzi sungule ku navela ku va ni ndhuma. Endzhaku ko heta malembe ya ntlhanu ndzi ri exikolweni eTroyan, ndzi lave ku ya emahlweni ni dyondzo ya mina eYunivhesiti ya Vumpfampfarhuti edorobeni ra Sofia, leri nga ntsindza wa Bulgaria. Leyi a ku ri yunivhesiti leyi xiximekaka swinene etikweni hinkwaro ra Bulgaria. Hi 1988, ndzi amukeriwile eka yona tanihi un’wana wa swichudeni swa nhungu ntsena leswi tlhariheke swinene leswi hlawuriweke etikweni hinkwaro. Ndzi tinyungubyise ngopfu hikwalaho ka vuswikoti bya mina! Siku rin’wana ndzi tilangute exivonini kutani ndzi tibyela ndzi ku, ‘Wena Plamen, a swi kanakanisi leswaku sweswi u ta va mumpfampfarhuti la dumeke!’

Ndzi Va Ni Vumunhu Byin’wana

Hi ku hatlisa ndzi sungule ku ambala swiambalo swa ntima, ndzi tshika misisi ni malepfu swi kula swinene. Vanhu vo tala a va ehleketa leswaku mumpfampfarhuti a a fanele a languteka tano. Ndzi sungule ku hanya hi ndlela ya xintu leyi a ndzi ehleketa leswaku vampfampfarhuti va fanele va hanya ha yona, leyi a yi nga fani ni ya vanhu van’wana. Leswi a swi katsa ku hirha kamara endhawini leyi ku tshamaka vampfampfarhuti ni ku tshika swilo swi tshama swi nga hlelekanga eka yona. Kutani ndzi fuwe ximanga ni vana va xona vanharhu ni ximbyanyana. Nakambe a ndzi rhandza ku tlanga hi mali.

Kambe, ndzi hambete ndzi hisekela ku mpfampfarhuta. A ndzi tshamela ku mpfampfarhuta swifaniso swa misava yo saseka leyi a ndzi anakanya ha yona. Ndzi kale ndzi mpfampfarhuta swilo eka makhumbi ya kamara ra mina. A ndzi ehleketa leswaku sweswo a ku ri masungulo ya vutshila lebyi xiximekaka.

Nchumu lowu a wu ri wa nkoka evuton’wini bya mina a ku ri ku tshamela ku tihungasa ni swichudeni-kulorhi. A hi tolovele ku hlangana ekamareni ra mina, hi yingisela vuyimbeleri ni ku kukutlela byala, hambiloko hi lunghiselela ku tsala xikambelo. Mabulo ya hina a ma dzike eka vuyimbeleri, ku mpfampfarhuta ni xikongomelo xa vutomi. Hakanyingi a hi vulavula hi matimba lamakulu lama tlulaka ya vanhu ni swivumbiwa leswi hanyaka eka tipulanete tin’wana. Mabulo lawa ma ndzi susumetele leswaku ndzi ehleketisisa hi swilo leswintshwa leswi a ndzi ta swi mpfampfarhuta enkarhini lowu taka. A ndzi lava ku tshama nkarhi wo leha ndzi tsakile, kambe ntsako wolowo a ndzi va na wona ntsena loko ndzi dakwile. Hakanyingi, hi siku leri landzelaka a ndzi nga swi tivi nileswaku ntsako wolowo wu helele kwihi.

A ndzi nga enerisekanga hambileswi ndzi hanyeke vutomi byebyo ku ringana malembe ya khume. Ku hambana ni mivala yo vangama leyi a ndzi yi tirhisa eka swifaniso leswi a ndzi swi mpfampfarhuta, vutomi bya mina a byi tele gome naswona a ndzi ri ni xivundza lexikulu. Ku navela ka mina ko va mumpfampfarhuti la dumeke ku sungule ku tsana. A ndzi tshikilelekile naswona a ndzi nga swi tivi leswaku ndzi ta endla yini hi vutomi bya mina. Wolowo a ku ri nkarhi lowu ndzi wu hlamuseleke eku sunguleni ka xihloko lexi.

Ku Tiva Ntiyiso Swi Ndzi Pfunile

Hi 1990, ndzi teke xiboho xo kombisa vanhu swifaniso leswi ndzi swi mpfampfarhuteke eLovech. Ndzi rhambe Yanita, munghana wa mina wa le yunivhesiti eSofia, leswaku a va kona tanihi leswi na yena a a huma eLovech. Loko ndzi heta ku kombisa vanhu swifaniso sweswo, mina na Yanita hi ye ekhefini leyi nga ekusuhi ni kwalaho leswaku hi ya tlangela ntirho wa mina. Loko hi ri karhi hi bula, u sungule ku vulavula hi swilo leswi a a swi dyondza eka dyondzo yakwe ya Bibele ni Timbhoni ta Yehovha. U ndzi byele hi ta misava leyintshwa leyi ku profetiweke ha yona eBibeleni. Sweswo swi ndzi koke rinoko.

Yanita u ye emahlweni a dyondza Bibele eSofia, naswona minkarhi yin’wana a a ndzi tisela minkandziyiso ya Bibele. A ndzi nge pfuki ndzi rivale ndlela leyi ndzi yi hlayeke ndzi yi heta hi ku tiyimisela ha yona broxara leyi nge “Vonani, Ndzi Endla Swilo Hinkwaswo Swi Va Leswintshwa”! ni ndlela leyi ndzi yi hlayeke hi ku hiseka buku leyi nge U Nga Hanya Hi Masiku aParadeyisini eMisaveni.a A swi ndzi tikelanga ku pfumela leswaku Xikwembu xi kona, naswona hi ku hatlisa ndzi lave ku dyondza ndlela yo khongela. Ndzi tsundzuka xikhongelo xa mina xo sungula. Ndzi nkhinsamile kutani ndzi phofulela Yehovha leswi ndzi karhataka. A ndzi tiyiseka hi ku helela leswaku a a ri eku ndzi yingiseleni. Xivundza lexi a ndzi ra na xona xi sungule ku siviwa hi ntsako ni ku rhula.

Loko hi ri eSofia, Yanita u ndzi tivise eka mpatswa lowu a wu ri Timbhoni ta Yehovha. Va ndzi kombele leswaku ndzi dyondza Bibele na vona naswona va ndzi rhambe ku ya eminhlanganweni ya vona. Ndzi tsundzuka minhlangano yo sungula leyi ndzi yeke eka yona hi June 1991. Ndzi fike ka ha sele tiawara timbirhi leswaku yi sungula kutani ndzi rindze ephakini leyitsongo. Leswi a ndzi chuhile ni ku karhateka, ndzi tivutisile loko va ta ndzi amukela kahle. Lexi ndzi hlamariseke, hinkwavo va ndzi amukele hi mandla mambirhi hambileswi a ndzi nga languteki ku fana na vona. Ku sukela hi nkarhi wolowo, ndzi sungule ku ya eminhlanganweni nkarhi na nkarhi naswona a ndzi fambiseriwa dyondzo ya Bibele kambirhi hi vhiki.

A ndzi tsake ngopfu loko ndzi nyikiwa Bibele. Evuton’wini bya mina a ndzi nga si tshama ndzi hlaya nchumu wo tsakisa ni lowu hlamarisaka ku fana ni marito ya vutlhari lama kumekaka eka Dyondzo ya le Ntshaveni! Loko ndzi ya emahlweni ndzi dyondza, ndzi sungule ku xiya ndlela leyi Rito ra Xikwembu ri nga ni matimba yo hundzula munhu ha yona hilaha swi tsariweke hakona eka Vaefesa 4:23 leyi nge: “[Mi fanele] mi endliwa mi va lavantshwa ematimbeni lama susumetaka mianakanyo ya n’wina.” Ndzi tshike ku dzaha naswona ndzi cince ndlela leyi a ndzi languteka ha yona leyi a yi nga hlelekanga. A ndzi cince ngopfu lerova siku rin’wana loko Tatana a te ku ta hlangana na mina exitichini xa xitimela eLovech, u ndzi hundzile hileswi a a nga ha ndzi tivi.

Ndzi sungule ku khathala hi ndhawu leyi a ndzi tshama eka yona. Futa ra le kamareni ra mina, makhumbi lama nga ni swifaniso ni ku nun’hwa ka musi wa fole a swi nga ha ndzi susumeteli ku mpfampfarhuta swifaniso. Ndzi sungule ku lava ku basisa swilo hinkwaswo. Ndzi pende makhumbi hi pende yo basa, xisweswo ndzi sula xifaniso xo chavisa lexi nga ni mahlo manharhu lexi a ndzi xi mpfampfarhute ekhumbini.

Hi ku hatlisa vanghana va mina va ndzi fularherile, kambe va hatle va siviwa hi vanhu vo tala lava ndzi hlanganeke na vona eminhlanganweni ya Vukreste, lava ni sweswi va ha riki vanghana va mina lava rhandzekaka. Ndzi hatle ndzi endla nhluvuko hileswi a ndzi ri ni vanghana volavo lava ndzi akaka. Hi March 22, 1992, ndzi khuvuriwile eka nhlengeletano yo sungula ya Timbhoni ta Yehovha eBulgaria, leyi a yi khomeriwe edorobeni ra Plovdiv.

Ndzi Tlhelela eLovech

Hambileswi a ndzi swi tiva leswaku a swi ta tika ku va mumpfampfarhuti a kota ku tihanyisa exidorobanini, ndzi tibyele leswaku endzhaku ko thwasa eyunivhesiti ndzi ta tlhelela eLovech. Ndzi xiye leswaku a swi ta ndzi tikela ku va mumpfampfarhuti la humelelaka, hi hala tlhelo ndzi rhangisa timhaka ta Mfumo wa Xikwembu evuton’wini bya mina. Kutani ndzi endle xiboho xo cinca makungu lawa a ndzi tivekele wona malunghana ni ntirho wa mina wa ku va mumpfampfarhuti kutani ndzi va mudyondzisi wa Bibele wa ku tirhandzela. Loko ndza ha ri eYunivhesiti ya Vumpfampfarhuti, Yanita loyi a a ri ni malembe manharhu a thwasile mina ndzi nga si thwasa, se a a ri mudyondzisi la hisekaka wa ntiyiso lowu nga eBibeleni eLovech. A ku ri yena ntsena Mbhoni kwalaho.

Hi nkarhi lowu ndzi tlheleleke ha wona eLovech, a ku ri ni ntlawa lowutsongo wa vanhu lava a va dyondza Bibele ni Timbhoni ta Yehovha. Ndzi swi tsakele ngopfu ku chumayela vanhu hi muti ni muti ni ku va byela hi ta ntshembo lowu a ndzi ri na wona hi vumundzuku. Ndzi endle xiboho xo endla ntirho lowu nkarhi hinkwawo.

Hambiswiritano, hi ku famba ka nkarhi ku fike minkarhi yo nonon’hwa. Hi 1994, ku tsarisiwa ka hina ka le nawini tanihi nhlangano wa vukhongeri ku suriwile kutani ku sunguriwe tsima lerikulu ra ku hi onha vito eka thelevhixini, xiya-ni-moya ni le ka maphepha-hungu.b Hakanyingi Timbhoni a ti yisiwa exitichini xa maphorisa naswona tibuku ta hina a ti tekiwa. Hi nkarhi wolowo wo tika, a hi nga pfumeleriwi ku hlangana etindhawini ta le rivaleni leswaku hi khoma minhlangano. Hambiswiritano, a hi khoma minhlangano nkarhi na nkarhi ekamareni leri leheke 12 wa swikwere-mitara, leri a ri khomane ni yindlu ya Yanita. Siku rin’wana vanhu va 42 va kote ku tshama ekamareni rero leritsongo. Leswaku hi nga kavanyeti vaakelani, hi pfale fasitere loko hi ri karhi hi yimbelela tinsimu ta Mfumo. Minkarhi yin’wana loko dyambu ri vavula ngopfu, a ku hisa swinene ekamareni kambe a hi tsaka hileswi hi hlanganeke.

Mikateko Leyi Humaka Eka Yehovha

Ndlela leyi Yanita a a byi hisekela ha yona vugandzeri bya ntiyiso yi ndzi tsakise ngopfu naswona loko nkarhi wu ri karhi wu famba hi sungule ku rhandzana. Hi tekanile hi May 11, 1996. Hambileswi hi nga ni vumunhu lebyi nga faniki, ha fanelana hi ndlela yo hlamarisa. I munghana ni mupfuni wa mina lonkulu. Ndzi nkhensa Yehovha hileswi a ndzi nyikeke wansati loyi ‘ntikelo wakwe wu wu tlulaka ekule wa tikorala.’—Swivuriso 31:10.

Van’wana va vanghana va mina va khale va ve vampfampfarhuti lavakulu, ku nga nchumu lowu ndzi tshameke ndzi wu lava swinene. Hambiswiritano, ndza tsaka hileswi ndzi hlawuleke ntirho lowu ndzi wu tekaka wu ri lowunene ngopfu. Ndzi pfune vanhu vo tala leswaku va va ni xikongomelo evuton’wini bya vona, naswona sweswi i vamakwerhu va moya. Ndhuma yihi na yihi leyi a ndzi ta va ndzi yi kumile tanihi mumpfampfarhuti, a yi pimanisiwi ni mikateko leyi ndzi tiphineke ha yona entirhweni wa Yehovha. Ndza tsaka leswi ndzi tiveke Mumpfampfarhuti lonkulu, ku nga Yehovha Xikwembu.

[Tinhlamuselo ta le hansi]

[Xifaniso lexi nga eka tluka 12]

Ndzi ri ni nsati wa mina Yanita