Ku Tixavela Nkarhi Wo Endla Swilo Swa Nkoka

“Nkarhi lowu seleke wu komile.”—1 Vakorinto 7:29.

EBUKWINI yakwe leyi nge Working Smart, Michael LeBoeuf u tsale a ku: “Ku tlula-tlula ematini ni ku ma pfindlusa a swi vuli swona leswaku u le ku hlambeleni.”

Hi marito man’wana, ku ni ku hambana exikarhi ka ku gingiriteka ntsena ni ku endla nchumu lowu nga wa nkoka hakunene. Ehleketa hi swilo leswi endlekeke evhikini leri nga hundza. Hi swihi swilo leswi u tixaveleke nkarhi wo swi endla? Hi swihi swilo leswi a wu khomeke ha swona? Xana wa swi xiya leswaku u lava nkarhi lowu engetelekeke wo endla swilo swa nkoka swinene?

Kambisisa leswi Yesu a swi profeteke malunghana ni minkarhi ya hina leyi vanhu va kona va tshamaka va khomekile. U vule leswaku loko makumu ya misava leyi ma ri kusuhi ni ku fika naswona misava leyintshwa ya Xikwembu yo lulama yi ri kusuhi ni ku simekiwa, vadyondzisiwa vakwe a va ta khomeka. A va ta khomeka hi yini? Hi ku chumayela ‘mahungu lamanene ya Mfumo wa Xikwembu.’ Yesu u tlhele a vula leswaku vanhu vo tala a va ta va va khomeke ngopfu lerova va nga swi koti ku yingisa. A va ta khomeka hi timhaka leti tolovelekeke ta vutomi. Nakambe u vule leswaku lava va khomekeke ngopfu lerova va nga yingisi rungula ra Mfumo va ta lovisiwa.—Matewu 24:14, 37-39; Luka 17:28-30.

Namuntlha Timbhoni ta Yehovha ti chumayela mahungu lamanene ya Mfumo wa Xikwembu ematikweni lama tlulaka 230. Hilaha Yesu a a profete hakona, vanhu vo tala a va lavi no twa, va vula leswaku va “khomeke ngopfu.” Hambileswi u tshamaka u khomekile, kambe ha ku kombela leswaku u tinyika nkarhi wo kambisisa leswi Bibele yi swi dyondzisaka malunghana ni Mfumo wa Xikwembu. Ha tshemba leswaku loko wo dyondza hi ta mikateko leyi Xikwembu xi yi tshembiseke vanhu, u ta pfumela leswaku ku twa ni ku yingisa rungula ra Bibele i nchumu wa nkoka hakunene naswona ku tivekela nkarhi wa swona a hi ku tirhela mbhongolo leyi feke.a

[Nhlamuselo ya le hansi]