Ntirho Wu Tshama Wu Tele
1 Vanhu va Yehovha i vanhu lava tshamaka va khomekile. Hi ni vutihlamuleri lebyo tala malunghana ni ndyangu wa hina, ntirho ni xikolo. Naswona ku tlula kwalaho, nkarhi hinkwawo ku ni ‘swo tala swo swi endla entirhweni wa Hosi.’ (1 Kor. 15:58) Hi fanele ku lunghiselela ni ku va kona eminhlanganweni ya vhiki na vhiki ya vandlha. Hi khutaziwa leswaku ku nga heli vhiki hi nga hlanganyelanga evutirhelini bya le nsin’wini. Nkarhi na nkarhi ku fanele ku vekiwa karhi etlhelo wa dyondzo ya Bibele ya munhu hi xiyexe ni ya ndyangu. Vakulu ni malandza ya vutirheli va ni swiavelo swo tala swa vandlha. Minkarhi yin’wana hi komberiwa ku pfuna lava lavaka mpfuno.
2 Hakanyingi, van’wana va hina hi nga ha titwa hi tikeriwa hi swilo hinkwaswo leswi hi faneleke ku swi endla. Kambe, vanhu lava tshamaka va khomekile va nga va lava tsakeke swinene loko va hlayisa ku ringanisela ni langutelo lerinene.—Ekl. 3:12, 13.
3 Muapostola Pawulo a a ri un’wana loyi a ri ni ntirho wo tala. Hambi loko a ri karhi a khathalela swilaveko swakwe hi ku tirha ntirho wo tihanyisa tanihi muendli wa matende, u tirhe hi matimba ku tlula vaapostola van’wana. U tirhe handle ko karhala tanihi muevhangeli, a chumayela erivaleni ni hi yindlu na yindlu, kambe a nga byi honisi vutihlamuleri byakwe tanihi murisi wa ntlhambi. (Mint. 20:20, 21, 31, 34, 35) Hambi leswi a a tshama a khomekile, nkarhi hinkwawo Pawulo a a tiyimisele ku endla swo tala entirhweni wa Yehovha.—Ringanisa Varhoma 1:13-15.
4 Pawulo u hlayise ku ringanisela kakwe ni ku va ni mbilu leyi tsakeke hi ku titshega hi Yehovha leswaku a kuma matimba. U kume vutirheli byakwe byi ri lebyi vuyerisaka ni lebyi enerisaka. (Flp. 4:13) A a swi tiva leswaku Xikwembu a xi nge rivali ntirho wa yena. (Hev. 6:10) Ntsako wa ku pfuna van’wana leswaku va tiva Yehovha wu n’wi nyike matimba. (1 Tes. 2:19, 20) Xitiyisekiso xo vona ntshembo wakwe lowu sekeriweke eBibeleni xi n’wi susumetele ku tshama a ri karhi a gingiriteka.—Hev. 6:11.
5 Na hina hi fanele ku languta swilo leswinene leswi tisiwaka hi ntirho wa hina. Vukona bya hina ni ku hlanganyela eminhlanganweni ya vhiki na vhiki swi aka van’wana ni ku va khutaza. (Hev. 10:24, 25) Matshalatshala ya hina yo fikelela hinkwavo hi mahungu lamanene ma endla leswaku vandlha ri kula loko hi ri karhi hi hlakulela ku tsakela lavantshwa na vona va ri karhi va hlanganyela na hina. (Yoh. 15:8) Ku pfuna vapfumari swi kondletela vun’we, ni moya lowu fanaka ni wa ndyangu evandlheni. (Yak. 1:27) Ku tlula kwalaho, ku fana na Pawulo, a hi fanelanga hi rivala leswaku ku tshama hi khomekile emintirhweni leyi vuyerisaka swi tsakisa Yehovha Xikwembu. Hi swi vona ku ri lunghelo lerikulu ku n’wi tirhela. Eka hina ku hava ndlela yo antswa ya vutomi yo tlula leyi!
6 Ku ni vuyelo byin’wana hi ku va ni swo tala swo swi endla. Loko hi ya emahlweni hi hanya hi ndlela leyinene ya moya, nkarhi wu vonaka wu famba hi ku hatlisa. Hi ku xiya leswaku siku rin’wana ni rin’wana leri hundzaka ri hi tshineta ekusuhi swinene ni misava leyintshwa, ha byi tsakela vutomi lebyi hi nga na byona sweswi. Naswona hi swi vona ku ri vutlharhi ku tshama hi khomekile, tanihi leswi hi nga riki na nkarhi wo hlongorisa swilo swa hava swa misava.—Ef. 5:15, 16.
7 Hakunene, ku ni swo tala swo swi endla entirhweni wa Hosi. Kambe hi nga tshama hi tsakile loko hi hambeta hi titshega ha Yehovha Xikwembu na Yesu Kreste, lava endlaka ntirho wa hina wu phyuphyisa ni ku vuyerisa.—Mt. 11:28-30; 1 Yoh. 5:3.