Ku Kombisa Nkhathalelo Wa Munhu Hi Xiyexe Eka Van’wana
1 Nkhathalelo wa Yehova eka van’wana wu le rivaleni swinene. Xana a nga nyikelanga swilaveko swa nyama eka swivumbiwa swa yena hi xitalo? (Gen. 1:29, 30; 2:16, 17; Mat. 5:45; ringanisa Luka 6:35.) Xa nkoka ngopfu, xana a nga kombisanga nkhathalelo wa munhu hi xiyexe eka hina hi ku lunghiselela leswaku hi kutsuriwa eka xidyoho ni rifu?—Yoh. 3:16.
2 Loko Yesu a ha ri emisaveni, u tekelele xikombiso lexi hetisekeke xa Tata wa yena xa ku kombisa nkhathalelo wa munhu hi xiyexe eka van’wana. (Mat. 11:28-30; 1 Pet. 2:21) Loko munhu la nga ni nhlokonho a byele Yesu a ku, “Hosi, loko u swi rhandza, u nga ndzi basisa,” Yesu u hlamurile a ku, “Ndza swi rhandza,” ivi a tshungula munhu yoloye. (Mat. 8:2, 3) Loko a tshinela emutini wa Nayini, Yesu u hlangane ni ntshungu lowu rhwaleke jaha, n’wana la nga yexe eka manana la nga noni, naswona hi ku susumetiwa hi ntwela-vusiwana, Yesu u n’wi tlherisele evuton’wini. (Luka 7:11-15) Handle ko komberiwa, Yesu u kombise nkhathalelo wa munhu hi xiyexe eka van’wana. Hambi ku ri vana lavantsongo a va langutiwa tanihi lava faneriwaka hi nkarhi ni nyingiso wa yena, naswona a nga khomekanga ngopfu leswaku a chavelela ni ku khutaza van’wana.—Mat. 20:31-34; Marka 10:13-16.
NDYANGU NI VANGHANA
3 Hi fanele ku lwela ku fana na Yehova na Yesu Kriste eku laveni ka tindlela to kombisa nkhathalelo wa munhu hi xiyexe eka van’wana. Hikwalaho, a hi xiyeni minkarhi yin’wana yo endla sweswo.
4 Xin’wana xa swilaveko leswikulu hi leswaku vamakwerhu va va ni nkhathalelo wa xiviri wa munhu hi xiyexe eka swirho swa mindyangu ya vona ni ku nga byi honisi vumoya bya ndyangu. Leswi swi katsa ku dyondza ni ndyangu nkarhi na nkarhi. Eka dyondzo ya n’wina ya ndyangu, xana mi kambisisa mhaka hi ndlela leyi yi tsakisaka ni leyi pfunaka? Nakambe xana ma landzelerisisa hi ku tshama mi ri karhi mi endla ntirho wa nsimu ni xirho xin’wana ni xin’wana xa ndyangu wa n’wina? Loko mi endla tano, xana i nkarhi lowu tsakisaka? Xana mi aka ku navela ku pfuna vanhu van’wana eka vana va n’wina, xisweswo mi kombisa rirhandzu ra Vukriste ni ra vuakelani? Loko u tekile naswona u nga ri na vana ekaya, ematshan’wini ya sweswo xana u va na yona dyondzo ya ndyangu?
5 Hi lava ku nyikela mpfuno wa moya eka un’wana ni un’wana loyi hi nga swi kotaka ku n’wi pfuna. Kambe evuton’wini bya hina bya bizi, xana ha rivala ku kombisa nkhathalelo wa munhu hi xiyexe eka swirho swa bandlha leswi nga ni swilaveko leswi hlawulekeke? (Swiv. 3:27; Vagal. 6:10) Ebandlheni ra Vukriste, ku na swisiwana, lava dyuhaleke, tinoni, swilema, lava nga ni gome, lava lamaleke ni van’wana lava nga ni swilaveko swo hlawuleka. Loko hi ta tekelela Yehova ni N’wana wa yena, Yesu Kriste, a hi fanelanga hi honisa ku kombisa nkhathalelo wa munhu hi xiyexe eka vamakwerhu hinkwavo.—1 Vakor. 10:24; Vafil. 2:4; Vahev. 13:16.
LAVA FANAKA NI TINYIMPFU ENSIN’WINI
6 Xana hi nga wu kombisa njhani nkhathalelo wa munhu hi xiyexe eka vanhu lava nga ni tidyondzo ta le kaya ta Bibele? Vo tala va lava va vone xilaveko xa ku tsema vunghana ni vanhu va misava. Hambi loko hi khomekile, xana ha wu kombisa nkhathalelo wa munhu hi xiyexe eka swichudeni swo tano ni ku endla lava va endleke ku hundzuka va titwa va amukelekile tanihi vanghana va hina lavantshwa? Xana hi xihlovo xa xikhutazo eka vona hambi loko ku nga ri hina lava hi dyondzaka na vona?—Ringanisa Marka 10:28-30.
7 Xana u nga va ni xiphemu lexikulu eku kombiseni ka nkhathalelo wa munhu hi xiyexe wa xiviri eka vanhu lava rhandzaka ku yingisela mahungu lamanene? Xana u ta ringeta ku va pfuna leswaku va fikelela swilaveko swa vona swa moya? Wena n’wini, u nga endla yini leswaku u va ni xiphemu lexikulu evutirhelini bya nsimu? U nga kokeli endzhaku loko u ri eka xiyimo xo hlanganyela hi xitalo sweswi.—Luka 9:60-62.
8 Hi fanele ku tekelela Yehova na Yesu eku kombiseni ka nkhathalelo wa munhu hi xiyexe eka van’wana. Hi fanele ku va ni ntwela-vusiwana ni ku fanelekela ku pfuna, hi laha Yesu a endleke ha kona emhakeni ya wanuna luya a a ri ni nhlokonho. Ina, nkarhi hinkwawo hi fanele hi xiya tindlela leti ha tona hi nga kombisaka nkhathalelo wa munhu hi xiyexe eka van’wana.