Xana U Khomeke Ngopfu?
1 Pawulo u khutaze leswaku hi “tirhela Hosi masiku hinkwawo.” (1 Kor. 15:58) Hi khutaziwa ku va ni dyondzo ya munhu hi xiyexe siku na siku, hi hlanganyela minhlangano hi ku tshembeka, naswona hi endla swiavelo swa hina evandlheni hi ku hiseka. Ku engetela ka sweswo, hi fanele hi pfuna van’wana lava lavaka mpfuno wa hina. Leswi hi nga ni swo tala swo swi endla, minkarhi yin’wana hi nga ha titwa hi tikeriwa hi anakanya leswaku hi fanele ku lava tindlela to hunguta ntirho wa hina.
2 Ku ni swiyimo leswi nga endlaka swi vonaka ku ri vutlhari ni ku va swi fanerile ku hunguta mintirho yo karhi kumbe ku hunguta nkarhi lowu hi wu endlaka ha wona. Vanhu van’wana va vona onge va languteriwe ku endla hinkwaswo leswi va komberiwaka ku endla swona hi van’wana. Ku ka u nga ringaniseli emhakeni leyi swi nga vanga ntshikilelo lowu eku heteleleni wu nga onhaka.
3 Ringanisela: Xilotlelo xo ringanisela xi kumeka loko u tirhisa ndzayo ya Pawulo yo “kota ku hlawula leswi nga swinene ku tlula swin’wana.” (Flp. 1:10) Hi ku olova, sweswo swi vula leswaku hi languta ntsena eka swilo leswi swi nga ni mhaka hakunene, naswona loko nkarhi ni swiyimo swi pfumela, hi nga endla eka swilo leswi nga riki swa nkoka. Mindzhwalo ya ndyangu entiyisweni i yo rhanga eka swilo sweswo leswi nga swa nkoka. Vutihlamuleri byo karhi bya ntirho wo tihanyisa byi fanele byi endliwa. Hambiswiritano, Yesu u dyondzise leswaku leswi hi swi rhangisaka swi fanele swi sekeriwa eka nsinya wa nawu wa leswaku hi rhanga hi tilavela Mfumo ku sungula. Hi fanele hi rhanga hi endla swilo leswi nga ta hi pfumelela ku hetisisa ku tinyiketela ka hina eka Yehovha.—Mt. 5:3; 6:33.
4 Loko hi ri na leswi emianakanyweni, hi ta tiyiseka leswaku eka xiyimiso xa hina lexi nga ni ntirho wo tala, hi hunguta nchumu wihi na wihi lowu nga bohiki lowu nga wa munhu hi xiyexe. Vuhungasi byo tlula mpimo, ni ku tirhela van’wana ku tlula mpimo. Loko hi kunguhata ntirho wa hina wa vhiki na vhiki, hi ta vekela nkarhi wa dyondzo ya munhu hi xiyexe etlhelo, hi hlanganyela kahle ensin’wini, hi va kona eminhlanganweni, ni swilo swihi na swihi swin’wana leswi fambisanaka ni ku gandzela ka hina. Nkarhi lowu salaka wu nga vekeriwa swilaveko leswin’wana, swi ta ya hi ndlela leyi swi tirhaka ha yona eka ku fikelela pakani ya hina leyikulu ya ku va Vakreste lava rhangisaka Mfumo ku sungula.
5 Hambi loko hi tamela mintirho ya hina ya swa moya, hi nga ha tama hi vona onge ndzhwalo wa hina wa ha tika. Loko swi ri tano, hi fanele hi angula eka xirhambo xa Yesu: “Tanani ka mina, n’wina hinkwenu lava karheleke, ni lava tikeriwaka, ndzi ta mi wisisa.” (Mt. 11:28) Nakambe languta eka Yehovha, loyi a “rwalaka mirwalo ya hina hi masiku” ni ku nyika la karhaleke matimba. U tshembisa leswaku a nga ka a nga tshiki la lulameke a xaniseka. (Ps. 55:22; 68:19; Esa. 40:29) Hi nga tiyiseka leswaku swikhongelo swa hina swi ta hlamuriwa, swi endla leswaku hi kota ku tiyisela evuton’wini lebyi bya migingiriko hi endla ntirho wa swa le tilweni.
6 Loko hi ri karhi hi tiyiseka leswaku hi tshama hi khomekile hi ku rhangisa timhaka ta nkoka ta Mfumo, hi nga tsaka hi ku tiva leswaku ntirho wa hina a hi wa hava eka Hosi.—1 Kor. 15:58.