Ku Gandzela Xikwembu Hi Ntiyiso
Leswaku vugandzeri byi amukeleka eka Xikwembu, byi fanele byi sekeriwa entiyisweni. (Yohane 4:23) Bibele yi hlamusela vagandzeri va ntiyiso va ri lava nga swirho swa “vandlha ra Xikwembu lexi hanyaka, phuphu tlhelo xiseketelo xa ntiyiso.” (1 Timotiya 3:15) Lava va vumbaka vandlha ra Xikwembu a va pfumeli ntiyiso wa Rito ra Xikwembu ntsena kambe va tlhela va hanya hi ku pfumelelana na rona ni ku ri lwela, va ri twarisa emisaveni hinkwayo. —Matewu 24:14; Varhoma 10:9-15.
TIMBHONI TA YEHOVHA ti tiviwa swinene hi ntirho wa tona wo dyondzisa Bibele, lowu sweswi wu endliwaka ematikweni lama tlulaka 200. Ti dyondza Bibele ni ku yi dyondzisa tanihi ntiyiso, handle ko yi hlanganisa ni tifilosofi ta vanhu. Xana u ti toloverile tidyondzo ta tona leti sekeriweke eBibeleni? Vo tala va kanakana ku yingisela Timbhoni ta Yehovha hikwalaho ka vunwa lebyi hangalasiwaka malunghana na tona. Kambe vanhu va timbilu letinene va rhambiwa ku tiendlela xiboho leswaku leswi Timbhoni ti swi chumayelaka i ntiyiso kumbe e-e. Xiboho xolexo xa nkoka a xi fanelanga xi sekeriwa eka mavarivari. Vo tala lava kambisiseke tidyondzo ta Timbhoni ta Yehovha hi voxe va vuyeriwile swinene.
Ku Tiva Ntiyiso Swi Herisa Ku Chava
Hi xikombiso, anakanya hi mhaka ya Eugenia. U kurisiwe endyangwini lowu a wu namarhele Vukhatoliki swinene. Tata wa yena a a ri un’wana wa vahleri va riendzo ra mupapa eMexico hi 1979. Loko a endzele vanghana, Eugenia u hlangane ni Timbhoni ta Yehovha. U sungule ku kambisisa swinene leswi Bibele yi swi vulaka hi ku pfuniwa hi vona. Wa tsundzuka: “Eku sunguleni, ku chava ku sungule ku kula. A ndzi kume ntiyiso! Kambe leswi a swi vula leswaku to tala ta tidyondzo ta mina ta khale a ti hoxile. Tidyondzo ta ndyangu wa ka hina, vanghana va mina, vanhu lava a ndzi va rhandza—hinkwato a ti hoxile. A ndzi ri ni rhumbu. A ndzi tshama ndzi ri karhi ndzi tivutisa leswaku ndyangu wa ka hina wu ta angurisa ku yini eka leswi ndza ha ku swi tshubulaka. Loko nkarhi wu ri karhi wu famba naswona hi mpfuno wa Yehovha, ndzi sungule ku pfumelelana ni ntokoto lowu lowu hlamarisaka. Siku rin’wana ndzi tiphofule eka munghana wa ndyangu wa ka hina, profesa wa ntivo-vukwembu. Ndzi n’wi byele hinkwaswo malunghana ni ku navela ka mina ku kuma ntiyiso. Kutani u te, ‘Loko u lava ku tiva ntiyiso, lava Timbhoni ta Yehovha.’”
Hilaha Eugenia a a anakanya hakona, ndyangu wa ka vona wu n’wi hlongorile ekaya. Hambiswiritano, Timbhoni ti ye emahlweni ti n’wi nyika mpfuno wa moya. U ri: “Ndzi kume matimba yo yimela ntiyiso. Ndzi swi xiyile leswaku a ku ri nchumu lowu a wu faneriwa hi ku lweriwa. Ndlela leyi ndzi amukeriweke ha yona hi Timbhoni ta Yehovha yi ndzi pfunile swinene. A ndzi titwa ndzi rhandziwa evandlheni ra Vukreste. Ku va ekusuhi ni nhlengeletano ya Xikwembu swi ndzi pfune leswaku ndzi nga chavi ku yimela ntiyiso hambi ndzi ri ndzexe.”
Xiya xikombiso xin’wana. Sabrina u kule a tolovele ku burisana ni ndyangu wa ka vona hi Bibele. Kahle-kahle, va sungule ‘vukhongeri bya ndyangu.’ U swi endle mukhuva ku tihlanganisa ni swirho swa vukhongeri byo hambana-hambana leswaku a ta paluxa swihoxo swa byona. Loko un’wana wa Timbhoni ta Yehovha a lave ku dyondza na yena Bibele, u pfumele hi ku hatlisa hi xikongomelo xo kaneta tidyondzo ta tona. Wa tsundzuka: “Endzhaku ko dyondza nkarhi lowu tlulaka lembe, ndzi sungule ku chava ku lahlekeriwa hi ‘ntiyiso wa mina.’ Swi ndzi oloverile ku paluxa vuxisi bya vukhongeri byo tala lebyi ndzi hlanganyeleke na byona, kambe sweswi a swi nga olovi.”
Ku chava ka Sabrina ku endle leswaku a tshika ku dyondza Bibele ni Timbhoni ta Yehovha. Kambe u titwe a pfumala hi tlhelo ra moya. U tlhele a sungula ku dyondza naswona eku heteleleni u wu amukerile ntiyiso lowu a ha ku wu kumaka. Sabrina u endle nhluvuko ku fikela laha a laveke ku avela van’wana leswi a a swi dyondza. U kombele ni ku famba ni Timbhoni evutirhelini bya tona bya yindlu na yindlu. Sabrina wa hlamusela: “Ndzi nga si pfumeleriwa leswaku ndzi ya chumayela ni Timbhoni ta Yehovha, ndzi vutisiwile: ‘Xana wa swi lava hakunene ku va un’wana wa Timbhoni ta Yehovha?’ Ndzi te, ‘E-e!’ Se a ndzi sungule ku chava nakambe.” Eku heteleleni, endzhaku ko ya emahlweni a va kona eminhlanganweni hinkwayo ni ku xiya vanhu va Xikwembu ni ndlela leyi va tirhisaka misinya ya milawu ya Bibele ha yona, Sabrina u gimete hi leswaku a wu ri ntiyiso hakunene. U khuvuriwile naswona sweswi i muvuri wa evhangeli wa nkarhi hinkwawo.
Ha Yini Ti Hambanile Swinene?
Un’wana a nga ha vutisa, ‘Ha yini tidyondzo ta Timbhoni ta Yehovha ti hambanile swinene ni ta vukhongeri byin’wana?’ Ku languta katsongo leswi Timbhoni ti pfumelaka swona swi ta ku pfuna ku vona leswaku i Vakreste vo tshembeka, swichudeni swa Bibele leswi kongomisiwaka hi ripfalo. Hi ku khutaza leswaku u pfula Bibele ya wena u languta tindzimana leti nga eka nkatsakanyo wa tidyondzo ta tona ta xisekelo leti kombisiweke laha henhla.
Hi ku kambisisa swinene leswi Timbhoni ta Yehovha ti swi pfumelaka ni ndlela leyi ti namarhelaka leswi Bibele yi swi dyondzisaka, u nga katekisiwa hi ntshunxeko lowu nyikeriwaka hi ntiyiso. (Yohane 17:17) Ku hava xivangelo xo chava ntiyiso. Tsundzuka xitshembiso xa Yesu: “Mi ta tiva ntiyiso, kutani ntiyiso wu ta mi ntshunxa.”—Yohane 8:32.
[Bokisi leri nga eka tluka 6]
TIDYONDZO TIN’WANA TA XISEKELO TA TIMBHONI TA YEHOVHA
◯ Yehovha i Xikwembu xa matimba hinkwawo. Vito ra yena ri humelela minkarhi leyi tlulaka 7000 eka matsalwa yo sungula ya Bibele.—Pisalema 83:18.
◯ Yesu Kreste i N’wana wa Xikwembu, loyi a teke emisaveni leswaku a ta nyikela vutomi bya yena hikwalaho ka vanhu. (Yohane 3:16, 17) Timbhoni ta Yehovha ti landzelela tidyondzo ta Yesu Kreste leti kumekaka eka Tievhangeli.
◯ Vito ra Timbhoni ta Yehovha ri sekeriwe eka Esaya 43:10, leyi nge: “Mi timboni ta mina, ku v̌ula Yehova.”
◯ Mfumo lowu vanhu va wu khongelelaka eka xikhongelo xa “Tata Wa Hina” i hulumendhe ya le tilweni leyi ku nga ri khale yi nga ta susa ku xaniseka hinkwako ni ku vaviseka emisaveni kutani ku nghena Paradeyisi leyi Bibele yi yi tshembisaka.—Esaya 9:6, 7; Daniyele 2:44; Matewu 6:9, 10; Nhlavutelo 21:3, 4.
◯ Un’wana ni un’wana la endlaka ku rhandza ka Xikwembu u ni lunghelo ro kuma mikateko ya Mfumo hilaha ku nga heriki.—Yohane 17:3; 1 Yohane 2:17.
◯ Vakreste va fanele va lulamisa mahanyelo ya vona hi ku ya hi leswi Bibele yi swi vulaka. Va fanele va lwela ku tshembeka, va hanya vutomi lebyi baseke, lebyi tengeke, naswona va kombisa rirhandzu eka vaakelani va vona.—Matewu 22:39; Yohane 13:35; 1 Vakorinto 6:9, 10.
[Xifaniso lexi nga eka tluka 5]
Timbhoni ta Yehovha ti twarisa ntiyiso wa Bibele eka vanhu va le matikweni lama tlulaka 200