Xiviko Xa Vahuweleri Va Mfumo

Mi Nga Tshiki Ku Twarisa Mahungu Lamanene

LOKO vavalangi va le Yuropa va endzele Nsonga-nkulu wa Venezuela na Tiva ra Maracaibo ro sungula, ribuwa a ri tele hi swiyindlwana swa byanyi leswi akiweke ehenhla ka timhandzi leti dzimiweke ematini lama nga entangiki. Ndhawu leyi a yi fana na Venice, le Italy, laha vanhu a va aka makaya ya vona ematlhelo ka mati. Xisweswo, vavalangi lava vulavulaka Xipaniya va thye ndhawu leyi Venezuela, leswi vulaka “Venice Leyitsongo.”

Namuntlha, etikweni leri ro saseka ku ni nongonoko wun’wana wo aka lowu endlekaka, ku aka hi tlhelo ra moya. Timbhoni ta Yehovha ti khomekile swinene hi ku byala mbewu ya Mfumo hi nkarhi wun’wana ni wun’wana lowu faneleke. Ntshovelo wa moya lowu vaka kona wu tisa ku dzuneka lokukulu eka “N’wini wa ntshovelo,” Yehovha Xikwembu.—Matewu 9:37, 38.

Loko mulanguteri la famba-fambaka a endzele vandlha ra le xifundzheni xa Zulia, en’walungu-vupela-dyambu bya Venezuela, Timbhoni ta kwalaho ti hlele leswaku yena ni nsati wa yena va endzela xihlala lexitsongo xa le kusuhi lexi vuriwaka Toas. Loko va ha ri enxaxamelweni wa lava nga ta khandziya byatso nimixo swinene va ya exihlaleni, nsati wa mulanguteri la famba-fambaka, Mery, u ringanyete eka loyi a a famba na yena ensin’wini, makwerhu wa xisati la nga phayona ra nkarhi hinkwawo, leswaku va vulavula ni van’wana lava tirhaka ebyatsweni. Makwerhu loyi la nga phayona u pfumerile.

Mery u ye eka mulunghisi wa mabyatso ivi a humesa buku leyi nge Vutivi Lebyi Yisaka eVuton’wini Lebyi Nga Heriki. U n’wi kombe ndzima leyi nge “Ku Aka Ndyangu Lowu Xiximaka Xikwembu,” ku nga ndzima leyi a vonakeke a yi tlangela. Kutani Mery u hlamusele leswaku hi ku tirhisa buku leyi, a nga va ni dyondzo ya Bibele ekaya ra yena. U amukele buku, ivi ku endliwa malunghiselelo ya leswaku un’wana a n’wi endzela ekaya ra yena.

Endzhaku ka nkarhinyana, ku ve ni nhlengeletano yo hlawuleka ya siku rin’we endhawini yoleyo. Mery u hlamale swinene ku vona mulunghisi wa mabyatso, Senor Nava a ri kona ni nsati wa yena ni vana vambirhi va vanhwanyana! Mery u vutise nsati wa yena leswaku u titwisa ku yini hi dyondzo ya vona ya ndyangu ya Bibele. Nhlamulo ya yena a yi hlamarisa swinene.

U te: “Ndzi nkhensa Yehovha leswi hi dyondzeke ntiyiso.” Kutani u hlamuserile. “Loko mi vulavula ni nuna wa mina, a ha ku ndzi siya a ya tshama ni wansati un’wana. Nakambe a a ri xindzendzele. Minkarhi yin’wana loko a pyopyiwile, a kariha swinene, ku nga nchumu lowu vaaki lava nga talangiki va xihlala lexi a va nga swi tsakeli. Nakambe a a ri mungoma. Hambiswiritano, vutivi bya Bibele lebyi a byi kumeke eka dyondzo leyi byi n’wi pfune ku hundzuka hi ndlela leyikulu evuton’wini bya yena. U yi tshike hinkwayo mikhuva ya yena leyi nga basangiki. Vatswari va yena lava nga Makhatoliki, va khumbiwe swinene hi ku hundzuka loku. Va tsakile leswi sweswi a nga wanuna tlhelo tatana la tshembekaka.”

Senor Nava u khuvuriwe hi 1996 naswona sweswi i mutirheli wa nkarhi hinkwawo. Nsati wa yena, Jenny, u khuvuriwe hi 1997. Meyara wa doroba u khumbiwe swinene hi ku hundzuka ka mulunghisi loyi wa mabyatso lerova na yena u kombele dyondzo ya Bibele. Mawaku ndlela leyi vamakwerhu lava va xisati va tsakeke ha yona leswi va nga tshikangiki ku twarisa mahungu lamanene loko va ri enxaxamelweni wa vakhandziyi va byatso mixo wolowo!

[Xifaniso lexi nga eka tluka 7]

Ku avela mulunghisi wa mabyatso mahungu lamanene swi tise vuyelo lebyi tsakisaka