“Ku Lavisisa Ka Vanhu Xikwembu”

Phepha-hungu ra September 25, 2002 ra le Mexico leri vuriwaka Mexico City’s Excelsior a ri ri ni nhloko-mhaka leyi nga laha henhla. Ri tsariwe hi Carlo Coccioli, xidyondzi lexi dumeke tlhelo mutsari wa le Mexico. Xihloko xakwe xi pfule hi marito lama landzelaka.

“Ndza ha ku heta ku hlaya—kumbexana ndzi nga ha ku, ndza ha ku heta ku tlhela ndzi hlaya, kumbe ku hlaya buku yin’we ka nharhu—xibukwana xo hlamarisa swinene xo tshwuka—kambe ku nga ri xona lexi a xi dumile emasikwini ya Mao Tse-tung. Leyi [Ku Lavisisa Ka Vanhu Xikwembua] a ko va buku yo hlamarisa ntsena, kambe ku hambana ni buku ya Mao Tse-tung leyi nge ‘Xibukwana Xo Tshwuka’ leyi nga phupha hi ku famba ka nkarhi, leyi swi nga ha endlekaka yi nga hundzeriwi hi nkarhi. Ku vula ntiyiso, buku leyi i nyiko leyi Timbhoni ta Yehovha ti yi nyikeke misava. Loko yi pimanisiwa ni tibuku tin’wana, i yitsongo, kambe yi tamele rungula ra ntshima swinene. I yitsongo, kambe loko a wo yi kuma elayiburari leyi nga ni tibuku ta 90 000, swi nga ha endleka a wu ta kuma leswaku hi yona ya nkoka ku ti tlula hinkwato.”

Nkul. Coccioli u ye emahlweni a landza ta le vutsongwanini byakwe, loko a ta endla xiboho xa ntirho-vutomi lowu a nga ta tihlawulela wona. U hlamusele a ku: “Dyondzo leyi ndzi tihlawuleleke yona eyunivhesiti, hi leyi a yi ta ndzi nyika vutivi naswona a yi tsakisa moya-xiviri wa mina: vukhongeri, ngopfu-ngopfu bya vanhu va le Vuxeni.” U vule leswaku dyondzo ya vukhongeri yi n’wi tsakisile swinene nileswaku hi nkarhi wa Nyimpi ya Vumbirhi ya Misava, u kume digri eka tidyondzo to tano.

Wa hlamusela: “Xisweswo, ndzi vona ndzi faneleka kahle ku vula leswaku ku endliwe vulavisisi lebyikulu swinene ni bya nkoka emhakeni ya vukhongeri eka xibukwana lexo tshwuka lexi ndzi xi kumeke. . . . Ndyangu wun’wana ni wun’wana wu fanele wu va na yona [buku leyi], wu yi pfalula, wu yi hlaya naswona wu hambeta wu yi hlaya ko tala. A yi navetisi vukhongeri byo karhi, kambe i ntirho wa ntshima lowu tsariweke hi vanhu, lava a va hisekela ku kambisisa xihundla lexi rharhanganeke xa Xikwembu.”

Loko a gimeta xihloko xakwe, Nkul. Coccioli u tsale nomboro ya riqingho ra Mbhoni leyi yi n’wi nyikeke buku leyi. Mbhoni yoleyo se yi kume tinqingho to tala ta vanhu lava kombelaka buku leyi, xisweswo rhavi ra Timbhoni ta Yehovha ra le Mexico ri endle leswaku hinkwavo lava va lavaka ku kuma buku leyi yi nge Ku Lavisisa Ka Vanhu Xikwembu va yi kuma. Munhu un’wana la kombeleke 20 wa tibuku leti leswaku a nyika va ka vona ni vanghana vakwe, sweswi u endla nhluvuko lowunene edyondzweni yakwe ya Bibele.

[Nhlamuselo ya le hansi]