Xilaveko Xa Vanhu Xo Lavisisa Xikwembu

¹ Eka lembe xidzana leri ra vu-20, ku ve ni ku rhurha lokukulu ka vanhu hikwalaho ka tinyimpi, ntshikilelo ni swiyimo swo nonon’hwa swa ikhonomi. Naswona leswi swo famba ni mbulavurisano swi hatlisaka, misava yi vonaka yi ya yi va yitsongo. Leswi swi endle vukhongeri byo hambana-hambana byi tshinelelana swinene. Xisweswo, vukhongeri hakanyingi ku vulavuriwa hi byona tanihi lebyi khumbaka vutomi bya vanhu kun’wana ni kun’wana.

² Ntirho wa hina wo chumayela na wona wu khumbekile. A swa ha hlamarisi ku hlangana ni vanhu lava nga ni xisekelo xa vukhongeri lebyi hi nga byi tolovelangiki.

³ Ku hi pfuna leswaku hi byi twisisa kahle vukhongeri byin’wana ni xisekelo xa byona xa matimu, hi lunghiseleriwe buku leyi nge Ku Lavisisa Ka Vanhu Xikwembu. Yi hlamula swivutiso swa madzana-dzana mayelana ni tidyondzo ta xisekelo ta vukhongeri lebyikulu bya misava. Hi ta va hi tirhisa buku leyi evutirhelini bya hina eka n’hweti ya June. I tinhloko-mhaka tihi leti humaka eka xipfuno lexi xa nkoka leti hi nga ti kandziyisaka leswaku hi khutaza vanhu va timbilu letinene va dyondza leswi engetelekeke hi Xikwembu?

⁴ Xivutiso xin’wana xa nkoka lexi hlamuseriwaka ebukwini leyi hi lexi nge: Xana munhu u ni moya lowu nga fiki lowu ponaka rifu ivi wu ya emahlweni wu hanya endzhaku ka rifu? Hi ndlela yo karhi, vukhongeri byo tala byi dyondzisa mianakanyo yoleyo. Swivutiso swin’wana leswi nga kona ebukwini hi leswi nge: Xana yi kona ndhawu yo tanihi tihele laha mimoya-xiviri yi xanisiwaka kona? Hi wihi ntshembo wa ntiyiso wa lava feke? Xana ku ni Xikwembu xin’we, kumbe ku ni swikwembu swo tala? Nyingiso wu nga yisiwa eka swivutiso leswi nga eka matluka 17-18 ya buku leyi. Hambi loko u vulavula ni loyi a nga pfumeliki eka vukona bya Xikwembu kumbe loyi a nge Xikwembu a xi tiviwi, swivutiso 4 na 5 swi nga koka nyingiso wakwe naswona kumbexana swi pfuxa bulo lerinene.

⁵ Vanhu hinkwavo va fanele ku lavisisa Xikwembu ni ku lava ku amukeriwa hi xona sweswi. Swiendlakalo swa misava swi komba leswaku Armagedoni yi ta hi ku hatlisa. I nkarhi wa ku gingiriteka. Mawaku lunghelo ronghasi leri hi nga na rona ra ku khutaza van’wana leswaku va lava Yehova sweswi, loko a ha kumeka! (Esa. 55:6, 7) Buku leyi nge Ku Lavisisa Ka Vanhu Xikwembu yi va pfunisa ku yini vanhu eku lavisiseni ka vona Xikwembu? Yi nyikela rungula leri pfuxaka mianakanyo ra vanhu va swisekelo swo hambana. Hi xikombiso, ndzimana 26 eka tluka 297 yi kombisa Mamoslem leswaku Vukriste bya ntiyiso a byi yi dyondzisi dyondzo ya Vunharhu-un’we. Xiya ndlela leyi ndzimana 43 eka tluka 229 yi nga ha pfuxaka ku tsakela eka Vayuda malunghana ni ku tirhisiwa ka vito ra Xikwembu.

⁶ Hi ni xivangelo lexinene xo hiseka loko hi fambisa buku leyi. Loko hi tolovelane kahle ni leswi nga endzeni ka yona, hi ta kuma tindlela to pfuxa ku tsakela ka vanhu va timbilu letinene va swisekelo swo tala swa vukhongeri. Onge hi nga hisekela ntirho lowu.

⁷ Yehova i Xikwembu lexi hananaka, xa tintswalo. Mawaku ku saseka konghasi ka xirhambo xa yena xa ku dyondza ha yena! Ku nga va ni vo tala swinene lava nga ta va vadzunisi va Yehova. Hi June, hi ku pfuniwa hi buku leyi nge Ku Lavisisa Ka Vanhu Xikwembu, hi ta swi kota ku pfuna vo tala eVujaganini kun’we ni lava nga riki va Vukriste kumbe lava nga tiviki Xikwembu, leswaku va sungula ku gandzela Yehova “hi moya ni ntiyiso.” (Yoh. 4:23, 24) Onge hi nga phikelela eku kumeni ka valavi va ntiyiso naswona hi tiyisa vuxaka bya vona ni Xikwembu xa ntiyiso. Xi nga kumiwa!