Ku Sungula Tidyondzo Hi Ku Tirhisa Ku Lavisisa Ka Vanhu Xikwembu
1 Yesu u te, “Mahungu lamanene ma fanele ku rhanga ma twarisiwa ematikweni hinkwawo.” (Marka 13:10, NW) Leswi a a swi vula leswaku vadyondzisiwa va yena a a va ta vulavurisana ni vanhu va tindzimi, mindhavuko ni swisekelo swa vukhongeri swo tala swo hambana-hambana. Nakambe swi vule leswaku vadyondzisiwa va yena va sweswi, Timbhoni ta Yehova, ti ta va ni xiavelo xo dyondzisa vanhu va tinxaka hinkwato.
2 Buku ya hina leyintshwa leyi nge Ku Lavisisa Ka Vanhu Xikwembu handle ko kanakana yi ta pfuna vanhu vo tala swinene va timbilu letinene ku kuma Xikwembu xa ntiyiso, Yehova, ni ku kuma ndlela ya yena ya ntiyiso. (Yoh. 4:21-24) Xana hi nga ti sungula njhani tidyondzo ta Bibele hi ku tirhisa buku leyi?
NDLELA YO SUNGULA DYONDZO
3 Masungulo ya dyondzo ya Bibele ma nga ha va ma vekiwe hi nkarhi wa riendzo ro sungula loko u tive nkarhi lowu munhu loyi a hlanganeke ni vukhongeri ha wona. Eka riendzo rero ro sungula, entiyisweni u yise nyingiso wa n’wini wa muti eka ndzima kumbe ndzimana yo karhi. Kwalaho, kumbe eka riendzo leri landzelaka, yinhla yoleyo leyi pfunaka yi nga tirhisiwa tanihi ndlela ya bulo leri yisaka edyondzweni. Hi ku tirhisa swivutiso leswi nga emakumu ka tluka, u na xisekelo xo pfuxa mianakanyo ni bulo. Kavula, a hi tsakeli ku pfuxa ku kanetana, kambe ematshan’wini ya sweswo, ku xiya mhaka hi ndlela leyi twisisekaka. Hambi loko hi sungula eku sunguleni ka buku kumbe eka ndzima yihi na yihi yin’wana, xikongomelo xa hina xi fanele eku heteleleni xi va xa ku yisa munhu eka tindzima 10, 15 na 16. Ha yini swi ri tano?
4 Ku lavisisa Xikwembu xa ntiyiso handle ko kanakana ku fanele ku va ha Kriste. Yesu u te, “Hi mina ndlela, ni ntiyiso, ni vutomi; a ku na munhu loyi a taka eka Tatana, loko ku nga ri ha mina.” (Yoh. 14:6) Ndzima 10 yi xi hlamula kahle xivutiso lexi nge, “Xana Yesu A A Ri Ndlela Yo Ya Eka Xikwembu?” Yi hlamusela timfanelo ta Yesu, ndlela leyi hi swi tivaka ha yona leswaku a a nga ri munhu wa ntsheketo, ndlela leyi a vhumbiweke ha yona hi vuprofeta, mhaka leyi ha yona vadyondzisiwa va yena vo sungula va pfumeleke eka yena tanihi ndlela yo ya eka Xikwembu ni leswaku hi swi tivisa ku yini leswaku a amukeleka eka Xikwembu. (Yoh. 6:44, 65) Tindzima 15 na 16 ti vulavula hi “Ku Tlhelela Eka Xikwembu Xa Ntiyiso” na “Xikwembu Xa Ntiyiso Ni Vumundzuku Bya Wena.”
TWISISA SWILAVEKO SWA MUNHU YOLOYE
5 Endzhaku ka tidyondzo to talanyana hi nga ha swi vona swi ri vutlhari ku hundzela eka buku leyi sekeriweke ngopfu eBibeleni, tanihi buku leyi nge U Nga Hanya Hi Masiku aParadeyisini eMisaveni. Tanihi leswi buku leyi nge Ku Lavisisa Ka Vanhu Xikwembu yi lunghiseleriweke ngopfu ku kokela vanhu va swisekelo swo tala leswi hoxeke eka Xikwembu xa ntiyiso, a hi ndzima yin’wana ni yin’wana leyi nga ta tsakisa munhu un’wana ni un’wana. Hi fanele ku tiva ndlela yo endla mhaka ni lunghiselelo ra hina ra dyondzo swi fanelana ni swilaveko swa munhu un’wana ni un’wana.—1 Vakor. 9:19-22.
6 Hi xikombiso, hi nga ha va hi fambise buku eka munhu loyi a tivulaka Mukriste. Kutani xivutiso xa riendzo ro vuyela xi nga ha va lexi, “Ha yini ku ri na vukhongeri byo tala swinene lebyi tivulaka bya Vukriste?” Xisweswo, ndzima 11 leyi vulavulaka hi vugwinehi na ndzima 13 leyi vulavulaka hi Ndzhundzunuko ti nga va swisekelo swo sungula dyondzo. Loko munhu a tiva ndlela leyi Vujagana byi sunguleke ha yona, hi ta n’wi pfuna leswaku a anakanyisisa hi tidyondzo ta Bibele tanihi leti kanetanaka ni tidyondzo ta vugwinehi ta Vujagana. Hi tshemba leswaku ntiyiso wu ta ntshunxa mianakanyo ya munhu yoloye leswaku a kurisa vunghana na Yehova Xikwembu. (Yoh. 8:31, 32) Kutani dyondzo yi nga ha yisiwa emahlweni eka tindzima 15 na 16 kumbe eka buku leyi nge Hanya Hi Masiku.
KU FIKELELA VANHU LA VA NGA RIKI VA VUKHONGERI BYA VUKRISTE
7 Loko hi dyondza ni vanhu va ripfumelo rin’wana, rirhandzu ni vutlhari bya Vukriste swi fanele ku kombisiwa nkarhi hinkwawo. Pawulo u kandziyise sweswo loko a tsarile a ku: “Ku vulavula ka n’wina a ku ve lokunene, loku nandzihaka masiku hinkwawo, mi ta tiva hi laha mi fanelaka ku hlamula un’wana ni un’wana ha kona.” (Vakol. 4:6) Eka Mahindu hi nga ha ringeta ku sungula dyondzo eka tluka 372 ehansi ka xihlokwana lexi nge “Misava Leyintshwa Leyi Tshembisiweke.” Kutani yana emahlweni eka ndzima 5 leyi vulavulaka hi Vuhindu. Xilotlelo xo humelela i ku tiva swilaveko swa munhu yoloye.—Ringanisa Mintirho 17:22, 23.
8 Ngopfu-ngopfu vutlhari bya laveka loko hi vulavula ni Mamoslem. Handle ko kanakana va ta kokiwa hi ndzima 12 leyi vulavula hi Vuislem. Loko mhaka yoleyo yi ya emahlweni, tindzima ta Bibele to ringanisa ni to hambana ta nghenisiwa eswivutisweni, ngopfu-ngopfu ku sukela eka ndzimana 23 ku ya emahlweni. Hi tsakela ku anakanyisisa hi laha Bibele yi rhambaka ha kona: “Tanani, hi tenga timhaka! ku vula Yehova.”—Esa. 1:18; 1 Pet. 3:15.
9 Ringeta ku pfuna vanhu va vukhongeri byo hambana-hambana leswaku va lavisisa Xikwembu xa ntiyiso. Tsundzuka leswaku loko hi byala ni ku cheleta, eku heteleleni, i Xikwembu ‘lexi xi nga ta hambeta xi kurisa mbewu ya ntiyiso’ loko misava yi ri leyinene.—1 Vakor. 3:6, 7; Mat. 13:18-23.