Lehisa Mbilu Ni Ku Va Ni Vukheta Evutirhelini
1 Muapostola Pawulo u hlayise langutelo lerinene ra vutihlamuleri emahlweni ka Yehova ro lehisa mbilu ni ku va ni vukheta loko a chumayela mahungu lamanene eka hinkwavo lava a va yingisela. Hi xivindzi u byele valanguteri lava a va hlengeletanile va huma aEfesa a ku: “Ndzi vona leswaku ku lahlekeriwa hi vutomi, a swi na mhaka nikutsongo eka mina, loko ndzi nga kota ntsena ku heta leswi ndzi nga rhumiwa ku endla swona, ni ntirho lowu ndzi wu amukeleke eka Hosi Yesu, wa ku vula Mahungu Lamanene ya tintswalo ta Xikwembu.” (Mintirho 20:24) Xana ha xi vona xilaveko lexi vekiweke eka hina xo endla hi laha ku fanaka?—1 Vakor. 9:16.
ENSIN’WINI LEYI TIRHIWAKA NKARHI NA NKARHI
2 Ku lehisa mbilu i swa nkoka loko nsimu ya hina yi tirhiwa nkarhi na nkarhi. Ku nga khathariseki leswaku nsimu i yintsongo, hi fanele hi susumeteleka ku tlhelela nkarhi na nkarhi. Endla matshalatshala yo vulavurisana na hinkwavo lava tshamaka eka kaya rin’wana ni rin’wana naswona hambeta u pfuna vanhu lavanene ku twisisa ntshembo lowu sekeriweke eBibeleni wa Mfumo wa Xikwembu.
3 Loko nsimu ya hina yi tirhiwa nkarhi na nkarhi, mpfuno wun’wana wa ku lehisa mbilu hi leswaku hi nga kota ku tolovelana swinene ni vini va miti. Leswi swi nga ha va endla vatitwa va ntshunxekile swinene ku hi amukela. Ku na swiringanyeto leswinene ebukwini leyi nge Reasoning leswi hi nga swi tirhisaka ku cinca-cinca swingheniso swa hina eka nsimu leyi tirhiwaka nkarhi na nkarhi.—Vona Reasoning, matluka 9-15.
4 Ku nga ha va ni minkarhi leyi loko hi endzela vanhu lava, hambi loko va kombisa ku tsakela ko karhi, va nga taka va nga amukeli tibuku ta hina. Hi fanele hi endlisa ku yini? Matshalatshala ya hina yo va ni vukheta ma ta hi susumetela ku phikelela ku aka ku tsakela koloko. Ku hlakulela leswi byariweke etimbilwini ta vona swi nga ha va susumetela ku amukela dyondzo ya Bibele eku heteleleni. Makwerhu un’wana u endzele n’wini wa muti la tsakelaka mavhiki ya ntlhanu lama landzelanaka handle ko n’wi fambisela buku. Eka riendzo ra vutsevu, n’wini wa muti u amukele buku, naswona eku heteleleni dyondzo ya Bibele yi sunguriwile.
KU NYIKELA TIBROXARA
5 Hi July na August Mhaka ya hina yo Vulavurisana, yi ta ku “Misava Leyintshwa—Hi Mani?” Nhloko-mhaka leyi yi faneleka kahle ku yi tirhisa loko hi nyikela yihi na yihi ya tibroxara leti landzelaka: Tsakela Vutomi eMisaveni Hi Masiku!, “Vonani, Ndzi Endla Swilo Hinkwaswo Swi Va Leswintshwa”!, Xana U Fanele Ku Pfumela Eka Vunharhu-un’we?, Vito Ra Xikwembu Leri Nga Ta Tshama Hi Masiku na Hulumendhe Leyi Nga Tisa Paradeyisi. Loko hi tinyika nkarhi wo tolovelana ni tibroxara leti, hi ta kuma nhlayo ya tinhla to vulavurisana to ti tirhisa ni Mhaka yo Vulavurisana.
6 Hi xikombiso, hi nga titivisa kutani hi ku: “U ehleketa yini hi xitshembiso xa munhu xo tisa misava yo rhula? [Yimela nhlamulo.] Xiya ndlela leyi Bibele yi hlamuselaka vuswikoti bya munhu ha yona emhakeni leyi. [Hlaya Yeremia 10:23.] Eka malembe xidzana hinkwawo, munhu u kombise leswaku hakunene a nga swi koti ku tifuma. Hambi swi ri tano, xiya xitshembiso xa Xikwembu lexi tshembekaka. [Hlaya 2 Petro 3:13.] Kutani xitshembiso xa Xikwembu lexi tiyeke xa misava leyintshwa xi ta humelela.” Loko hi tirhisa broxara leyi nge “Vonani,” hi nga yisa nyingiso wa n’wini wa muti eka leswi hlamuseriweke eka tluka 30, ndzima 58. Loko hi nyikela broxara leyi nge Hulumendhe, hi nga kandziyisa leswi hlamuseriweke eka ndzimana yo sungula eka tluka 3. Xifaniso emahlweni ka broxara leyi nge Vutomi eMisaveni xa tsakisa hakunene naswona xi fambisana ni Mhaka yo Vulavurisana. Nakambe, ndzimana ya vunharhu eka tluka 31 ya broxara leyi nge Vito Ra Xikwembu yi nga tirhisiwa.
7 Ku hlanganisa nsimu ya hina hi ku lehisa mbilu na hi vukheta hi mahungu lamanene swi ta tisa ku ponisiwa eka lava va hi yingiselaka. (1 Tim. 4:16) Nkarhi wa famba! Hikwalaho, onge hi nga lehisa mbilu ni ku nyikela vumbhoni lebyi heleleke loko hi hlanganyela hi xitalo eku chumayeleni ka rungula leri ra ku ponisiwa.