Tinyiketele Evutirhelini Bya Nsimu Xiyenge 1: Ntikelo Wa Ku Tlangela Yehova

1 Ku tinyiketela evutirhelini swi titshege hi ku tlangela loku enteke eka Yehova ni hinkwaswo leswi a hi endleleke swona. (2 Sam. 22:2, 3) Langutelo ra ntwelo-vusiwana hi khombo leri vanhu hinkwavo lava hambanisiweke ni Xikwembu va nga eka rona ri fanele ri hi susumetela ku tinyiketela entirhweni. (Mat. 9:36; 2 Vakor. 5:14, 15) Loko hi tinyiketela eka Yehova ni loko hi khathala hi vanhu, hi ta susumeteleka ku hlanganyela hi ku hiseka entirhweni wa nsimu. (Mat. 22:37-39) Kutani vutirheli bya hina byi va rifuwo ra nkoka lowukulu. (2 Vakor. 4:7) Kambe xana ku tlangela vutirheli hi ndlela yo tano ku nga hlakuleriwa njhani?

TINDLELA TO AKA KU TLANGELA

2 Dyondzo ya Bibele ya munhu hi xiyexe ni ya bandlha kun’we ni ku anakanyisisa loku fambisanaka ni xikhongelo swi hi pfuna ku aka vunghana bya munhu hi xiyexe na Yehova. Hi twisisa ku saseka ka timfanelo ni vumunhu bya yena. Xana wa xi landzelela xiyimiso xa ku hlaya ka Bibele ka vhiki na vhiki? Xana u vekela nkarhi etlhelo wa ku dyondza tibuku ta Sosayiti nkarhi na nkarhi? Xana wa lunghiselela, u va kona ni ku hlanganyela eka minhlangano hinkwayo ya bandlha? (Vahev. 10:24, 25) Hi nkarhi wa dyondzo yin’wana ni yin’wana ya munhu hi xiyexe ni le ndzhaku ka yona, ku anakanyisisa lokunene ku ta aka ku tlangela swinene Xikwembu xa hina xa ntwela-vusiwana ni malunghiselelo ya xona ya vugandzeri bya ntiyiso.—Ps. 27:4.

3 Ndlela yin’wana leyi hi nga engetelaka mpimo wa hina wa ku tlangela i ku xiya swinene xikombiso xa vatirheli van’wana va Xikwembu lava tinyiketeleke. Muprofeta Yeremiya a a chivirikela swinene ntirho lowu a nyikiweke wona. (Yer. 20:9) Yesu u siye ntila, a kombisa moya wa ku tlangela ni ku chivirika. (Yoh. 4:34) Hi mintirho ya yena evutirhelini, muapostola Pawulo u kombise ku tlangela ka yena tintswalo ta Xikwembu leti a kombisiweke tona. (1 Tim. 1:12, 13, 17) Loko hi languta eka swikombiso swo tano, kun’we ni swikombiso swa minkarhi ya manguva lawa, hi nga aka ku tlangela loku nga ta hi endla hi tinyiketela evutirhelini.

4 Loko hi dyondza hi ku vangama lokukulu ka vukulukumba bya Yehova naswona hi tikarhata hi mintirho ya yena leyi hlamarisaka, hi susumeteleka ku twarisa vukulukumba bya yena ni ku huwelela hi ku tsaka hi n’wi dzunisa. (Ps. 145:5-7) Hi kombisa leswaku hi tlangela minkarhi ya hina yo nyikela vumbhoni eka vito ra Xikwembu hi ku lava tindlela to hangalasa rungula ra Mfumo hi ku hiseka.—Luka 6:45.

5 Kambe xana ku na swilo swin’wana leswi nga hi endlaka hi tinyiketela swinene evutirhelini? Loko swi ri tano, hi swihi? Xana vakulu, malandza ya vutirheli, maphayona ni vahuweleri van’wana va Mfumo lava nga ni ntokoto va nga pfuna hi ndlela yihi? Xana tipakani ti endla xiphemu xihi eku hlakuleleni ka ku hiseka? I mimbuyelo yihi leyi yi nga languteriwaka? Swivutiso leswi ni swin’wana swi ta hlamuriwa eka nongonoko lowu wa ntlhanu wa swiphemu, lowu wu nga ta yisiwa emahlweni eka minkandziyiso leyi landzelaka ya Vutirheli Bya Hina Bya Mfumo.