Tinyiketele Evutirhelini Bya Nsimu Xiyenge 5: Mimpfuno Leyi Fuweke Ya Ntirho Wa Ku Tinyiketela

1 Yehova u nyika malandza ya yena lama tinyiketeleke mphakelo wo tala wa mimpfuno leyi fuweke. (Ps. 116:12) Hi nga tiphina njhani hi mikateko leyikulu leyi humaka eka Yehova evutirhelini bya hina? I mimpfuno yihi leyi hi vekeriwaka yona? Hi fanele hi endla yini leswaku hi tiyisekisa ku amukeriwa hi yena?

2 Matshalatshala Ya Munhu Hi Xiyexe Ma Laveka: Mpimo lowu ha wona u tsakelaka mimpfuno leyi humaka eka Xikwembu wu titshege ngopfu hi matshalatshala ya wena hi wexe yo endla ku rhandza ka Xikwembu. Pawulo u tsarile malunghana ni vutirheli, a ku: “Un’wana ni un’wana [u] ta amukela hakelo ya yena hi mpimo wa ntirho wa yena.” (1 Vakor. 3:8) Hikwalaho a hi veni ni xiphemu lexikulu evutirhelini hi laha hi nga kotaka ha kona. Muapostola Pawulo u kume hakelo ya munhu hi xiyexe yo pfuna vanhu vo tala, hambi ku ri mabandlha hinkwawo, leswaku ma tiva Xikwembu. Mawaku ntsako lowu a veke na wona loko a vona ku tiya ka vona eripfumelweni! (1 Vates. 2:19, 20) Kumbexana swiyimo swa wena a swi nge ku pfumeleli leswaku u katseka hi xitalo evutirhelini hi laha Pawulo a a ri ha kona. Kambe, xana a swi nge vi nkateko lowukulu ku pfuna munhu kumbe hambi ku ri ndyangu wa lava fanaka ni tinyimpfu leswaku va yima va tiyile endleleni leyi yisaka evuton’wini? Mawaku nsusumeto wonghasi ku tirha hi matimba evutirhelini bya yindlu na yindlu ni ku landzelela hi maendzo yo vuyela ni tidyondzo ta Bibele!

3 Mimpfuno Leyi Engetelekeke: Mpfuno lowukulu swinene wa ntirho wa ku tinyiketela hi leswaku, tanihi mutirhi-kulobye, munhu u kokeriwa ekusuhi na Yehova na Yesu Kriste. (Mat. 11:29, 30; 1 Vakor. 3:9) Mawaku ntsako wonghasi wo vona moya wa Xikwembu wu ku pfuna evutirhelini! (Mat. 10:20; Yoh. 14:26) Ku tlula kwalaho, ku tirhisana hi vutlhari, hi ku gingiriteka ni van’wana ebandlheni swi tiyisa xiboho xa hina xa rirhandzu ni vun’we.

4 Handle ka loko hi seketela hi xitalo nhlengeletano leyi Yehova a yi tirhisaka ku hetisisa ku rhandza ka yena emasikwini lawa ya makumu, hi nga ka hi nga yi tsakeli mimpfuno leyi teleke leyi humaka eka yena. (Ringanisa 2 Tihosi 10:15.) Loko hi landzela nkongomiso lowu hi wu kumaka hi fambiselo ra Xikwembu swinene na hi ku tinyiketela, ni loko hi katseka hi ku hiseka emintirhweni ya bandlha, hi sirheletekile eka mintlhamu ya Sathana hi tlhelo ra moya. Hi endliwa hi swi kota ku va ni xiphemu lexi humelelaka swinene evutirheli.

5 Nongonoko lowu wa swiyenge swa ntlhanu wa swihloko swa ku tinyiketela evutirhelini bya nsimu wu kandziyise tinhla to tala leti katsekaka. Xana wa ha ti tsundzuka tinhla to aka ku tlangela Yehova, leti khutazaka munhu leswaku a tinyiketela? (July) Ha yini ku lunghiselela ku ri ka nkoka eku akeni ka ku chivirika evutirhelini bya nsimu? Hi nga lunghiselela hi ndlela yihi? (August) Vahuweleri lava nga ni ntokoto va nga va pfuna njhani van’wana leswaku va tinyiketela? (September) Ku hleleka lokunene ka munhu hi xiyexe ku nga hi pfuna njhani leswaku hi tinyiketela evutirhelini? (October) Xana wa swi tirhisa swiringanyeto leswi?

6 Yehova u lava leswaku hi pfuneka hi ku n’wi yingisa. (Esa. 48:17) Ku tlula kwalaho, mimpfuno ya ntirho wa ku tinyiketela yi ya ni le ka vanhu lava ku yingisaka. (1 Tim. 4:15, 16) U nga tiyiseka leswaku leswi u tirhaka hi ku gingiriteka entirhweni lowu endliwaka, Yehova u ta swi vona leswi naswona ‘u ta amukela hakelo leyi faneleke ya ndzhaka,’ vutomi lebyi nga heriki.—Vakol. 3:23, 24.