Tirha Hi Moya-xiviri Hinkwawo!

¹ Hi ni swivangelo swo tala swo tlangela Yehovha. Leswi swi katsa swilo leswi a swi endleke enkarhini lowu nga hundza, leswi a swi endlaka enkarhini wa sweswi ni leswi a nga ta hi endlela swona enkarhini lowu taka. Xana ku tlangela ka hina ku fanele ku hi susumetela ku endla yini? Pisalema ya Davhida ya hlamula: “Nḍi ta twarisa Yehova hi masiku hikwawo; ku ḍunisa ka yena ku ta v̌a e noṅwini wa mina hi masiku.”—Ps. 34:1.

² Bibele yi swi kombisa kahle leswaku hi lerisiwe ku chumayela. Lowu i ntirho lowu hi wu endlaka “hi mbilu hinkwayo, onge hi loko [h]i tirhela Hosi.” (Kol. 3:23) Hi nga endla swo tanihi kwihi evutirhelini loko hakunene hi tirha hi moya-xiviri hinkwawo? Loko hi xiya rirhandzu ra Yehovha leri a hi rhandzaka ha rona, hakunene timbilu ta hina ti hi susumetela ku hlanganyela swinene eku byeleni van’wana hi yena ni swikongomelo swa yena swa risima! Hi susumeteleka ku endla leswi hi nga swi kotaka.

³ Swa twala ku langutela leswaku munhu loyi a tirhaka hi moya-xiviri hinkwawo u lava ku veka nyingiso wa yena eka ntirho lowo kwetsima nkarhi hinkwawo. Mupisalema, loyi swi nga erivaleni leswaku u titwe hi ndlela yoleyo, u vurile: “Nḍi ku ḍunisa e ka ntlhanu na kambiri hi siku.” (Ps. 119:164) Lava va nga ni mintlhaveko ya mupisalema va lava ku tirhisa minkarhi leyi va pfulekeleke va dzunisa Yehovha. Loko swiyimo swa vona swi pfumela, va tirha hi ku hiseka hilaha va nga kotaka hakona.

⁴ Hi Ni Minkarhi Yo Tala Yo Dzunisa Yehovha: A hi fanelanga hi rindzela nkarhi wo chumayela mahungu lamanene hi yindlu na yindlu ntsena. Vatirhi-kulorhi, vadyondzi-kulorhi, maxaka ni lava hi va toloveleke, hinkwavo va lava ku twa rungula ra Mfumo. Loko hi ri eku fambeni, hi nga sungula bulo leri nga endlaka leswaku hi vula vumbhoni eka mutirhi wa le hotela, eka vatirhi va le mavhengeleni, eka vatirhi va le tigaraji, kumbe eka vachayeri va mathekisi. Loko hi ri ekaya, hi nga ha vula vumbhoni eka vaakelani kumbe lava tisaka nhundzu. Loko hi etlerisiwile exibedlhele, ku ni vaongori, madokodela ni vavabyi van’wana lava hi nga va chumayelaka hi xitshuketa.

⁵ Ku Chumayela Hi Xitshuketa Swi Ni Vuyelo: Siku rin’wana Timbhoni timbirhi a ti ri eku fambeni ephakeni, kutani ti sungula bulo ni jaha leri a ri ri eku tifamba-fambeleni ni n’wana wa rona. Eku heteleleni, rona ni nsati wa rona va amukele ntiyiso. Jaha rolero endzhakunyana ri boxe leswaku loko ri nga si hlangana ni Timbhoni letimbirhi, a ra ha ku khongela Xikwembu ri kombela, ‘Loko u ri kona, ndzi kombela u ndzi endla ndzi ku tiva.’ U xiye ku hlangana loku ka le phakeni yi ri nhlamulo ya Yehovha ya xikhongelo xakwe.

⁶ Lava va tirhaka hi moya-xiviri hinkwawo hikwalaho ko navela ku pfuna van’wana hi tlhelo ra moya va kuma ntsako lowukulu. Va swi tiva leswaku ntirho wo tano, “hi mbilu le’yi tengeke,” wu tsakisa Yehovha.—1 Tikr. 28:9.