Yehovha Wa Wu Tlangela Ntirho Lowu U Wu Endlaka Hi Mbilu Hinkwayo
“Xin’wana ni xin’wana lexi mi xi endlaka, xi endleni hi mbilu hinkwayo, onge hi loko mi tirhela Hosi, ku nga ri vanhu.”—VAKOLOSA 3:23.
1, 2. (a) Hi rihi lunghelo lerikulu swinene leri hi nga vaka na rona? (b) Hikwalaho ka yini minkarhi yin’wana hi nga swi koti ku endla hinkwaswo leswi a hi ta rhandza ku swi endla entirhweni wa Xikwembu?
KU TIRHELA Yehovha i lunghelo lerikulu eka hinkwawo lawa hi nga vaka na wona. Hikwalaho ka xivangelo lexi, magazini lowu i khale wu ri karhi wu khutaza Vakreste leswaku va tikarhata evutirhelini, hambi ku ri ku tirha ‘swinene’ loko swi koteka. (1 Vatesalonika 4:1) Hambiswiritano, a hi nkarhi hinkwawo laha hi kotaka ku endla hinkwaswo leswi timbilu ta hina ti navelaka ku endla swona entirhweni wa Xikwembu. Makwerhu un’wana wa xisati la titshamelaka yexe loyi a khuvuriweke emalembeni ya kwalomu ka 40 lama hundzeke, u ri: “Swiyimo swa mina swi ndzi boha leswaku ndzi tirha nkarhi lowu taleke, lexi endlaka leswaku ndzi tirha a hi mhaka yo va ndzi lava ku kuma swiambalo swo durha kumbe ku teka maendzo ndzi famba ndzi tiphina, kambe ndzi lava ku fikelela swilaveko, swo tanihi vutshunguri swin’we ni ku hakelela vutshunguri bya meno. Ndzi twa onge ndzi nyika Yehovha manhlanhla.”
2 Ku rhandza Xikwembu swi hi susumetela ku lava ku endla swo tala hilaha hi nga kotaka hakona entirhweni wo chumayela. Kambe hakanyingi swiyimo swa hina evuton’wini swi endla leswaku hi nga swi koti ku endla leswi a hi ta kota ku swi endla. Ku khathalela vutihlamuleri byin’wana bya Matsalwa, byo tanihi vutihlamuleri bya ndyangu, swi nga hi dyela nkarhi wo tala ni ntamu. (1 Timotiya 5:4, 8) ‘Emasikwini lawa ya makumu yo nonon’hwa ku langutana na wona,’ vutomi byi ya byi va ntlhontlho lowukulu ku tlula rini na rini. (2 Timotiya 3:1) Loko hi nga swi koti ku endla hinkwaswo leswi a hi ta rhandza ku swi endla evutirhelini, hi nga ha tivona nandzu. Hi nga ha tivutisa loko Xikwembu xi tsakisiwa hi vugandzeri bya hina.
Vuxongi Bya Ntirho Wa Mbilu Hinkwayo
3. I yini leswi Yehovha a swi langutelaka eka hina hinkwerhu?
3 Eka Pisalema 103:14, Bibele yi hi tiyisekisa swinene leswaku Yehovha “wa tiv̌a leši hi endliweke ha šona, wa ṭunḍuka leŝaku hi nṭhuri ntsena.” U twisisa ku tsana ka hina ku tlula mani na mani. A nga langutelanga swo tala ku tlula leswi hi nga kotaka ku swi endla. I yini leswi a swi langutelaka? I nchumu lowu un’wana ni un’wana a nga kotaka ku wu nyikela, ku nga khathariseki xiyimo xa yena evuton’wini: “Xin’wana ni xin’wana lexi mi xi endlaka, xi endleni hi mbilu hinkwayo, onge hi loko mi tirhela Hosi, ku nga ri vanhu.” (Vakolosa 3:23) Ina, Yehovha u langutela leswaku—hinkwerhu ka hina—hi n’wi tirhela hi mbilu hinkwayo.
4. Xana ku tirhela Yehovha hi mbilu hinkwayo swi vula yini?
4 Xana swi vula yini ku tirhela Yehovha hi mbilu hinkwayo? Rito ra Xigriki leri hundzuluxeriweke ri va “mbilu hinkwayo” hi ku kongoma ri vula “lexi humaka eka moya-xiviri.” “Moya-xiviri” swi vula munhu a helerile, ni vuswikoti byakwe hinkwabyo bya miri ni bya mianakanyo. Xisweswo, ku tirha hi mbilu hinkwayo swi vula ku tinyiketa, hi tirhisa vuswikoti bya hina ni ku tirhisa matimba ya hina hi xitalo hilaha swi nga kotekaka hakona entirhweni wa Xikwembu. Kahle-kahle, swi vula ku endla hinkwaswo leswi moya-xiviri wa hina wu nga kotaka ku swi endla.—Marka 12:29, 30.
5. Xana xikombiso xa vaapostola xi swi kombisa njhani leswaku a hi nge swi koti ku endla ntirho lowu ringanaka evutirhelini?
5 Xana ku tirha hi mbilu hinkwayo swi vula leswaku hinkwerhu hi fanele hi endla ntirho lowu ringanaka evutirhelini? Sweswo a swi nge koteki nikatsongo, hikuva swiyimo ni vuswikoti bya vanhu swa hambana. Anakanya hi vaapostola va Yesu lavo tshembeka. A va swi kotanga ku endla ntirho lowu ringanaka hinkwavo ka vona. Hi xikombiso, a hi tivi swo tala hi vaapostola van’wana, vo tanihi Simoni wa Kanana kun’we na Yakobo n’wana Alfiya. Kumbexana mintirho ya vona tanihi vaapostola a yi nga nyawuri. (Matewu 10:2-4) Ku hambana ni sweswo, Petro u kote ku kuma malunghelo yo tala lama tikaka—phela, Yesu u n’wi nyike hambi ku ri “swilotlelo swa Mfumo”! (Matewu 16:19) Kambe, Petro a nga tlakusiwanga ehenhla ka lavan’wana. Loko Yohane a nyikiwa xivono xa Yerusalema Lontshwa hi Nhlavutelo (kwalomu ka 96 C.E.), u vone maribye ya 12 ya xisekelo, naswona ehenhla ka wona a ku tsariwe “mavito ya 12 ya vaapostola lava khume na vambirhi.”a (Nhlavutelo 21:14) Yehovha a a wu teka wu ri wa nkoka ntirho wa vaapostola lava hinkwavo, hambileswi swi nga erivaleni leswaku van’wana a va kota ku endla swo tala ku tlula van’wana.
6. Eka xifaniso xa Yesu xa muhaxi, xana ku humelele yini eka mbewu leyi byariweke “emisaveni leyinene,” naswona ku tlakuka swivutiso swihi?
6 Hilaha ku fanaka, Yehovha a nga koxi leswaku hinkwerhu hi endla ntirho wo chumayela hi ndlela leyi ringanaka. Yesu u kombise leswi eka xifaniso xa muhaxi, laha a faniseke ntirho wo chumayela ni ku haxa timbewu. Mbewu leyi yi wele emisaveni ya tinxaka to hambana-hambana, leswi kombisaka swiyimo swa timbilu ta vanhu vo hambana-hambana lava twaka rungula. Yesu u hlamuserile, “Kambe mbewu leyi haxiweke emisaveni leyinene, swi fana ni loko munhu a twa Rito a ri twisisa; hi yena loyi a vekaka mihandzu hakunene, yin’wana ka 100, yin’wana ka 60, yin’wana ka 30.” (Matewu 13:3-8, 18-23) Xana mihandzu leyi i yini, naswona hikwalaho ka yini yi humesiwa hi tinhlayo to hambana?
7. Xana mbewu ya mihandzu leyi byariweke i yini, naswona hikwalaho ka yini yi veka mihandzu hi tinhlayo to hambana-hambana?
7 Tanihi leswi mbewu leyi byariweke ku nga “Rito ra Mfumo,” ku tswala mihandzu swi vula ku hangalasa rito rero, ku ri byela van’wana. (Matewu 13:19) Nhlayo ya mihandzu leyi humesiweke ya hambana—ku sukela eka 30 ku ya eka 100—hikuva vuswikoti ni swiyimo evuton’wini swa hambana. Munhu loyi a nga ni rihanyo lerinene ni matimba a nga ha swi kota ku heta nkarhi wo tala entirhweni wo chumayela ku tlula hi laha loyi matimba yakwe ma tsanisiweke hi xiyimo xa rihanyo lexi hambetaka, kumbe hikwalaho ko dyuhala, a nga endlaka hakona. Muntshwa la titshameleke yexe loyi a nga riki na vutihlamuleri bya ndyangu a nga ha swi kota ku tirha ku tlula loyi a bohekaka ku tirha nkarhi lowu taleke leswaku a wundla ndyangu.—Ringanisa Swivuriso 20:29.
8. Xana Yehovha u va languta njhani lava nyikelaka hi hinkwaswo leswi va nga swi kotaka?
8 Hi ku ya hi langutelo ra Xikwembu, xana munhu la tirhaka hi mbilu hinkwayo kutani a humesa mihandzu ka 30 a nga tinyiketelanga swinene ku fana ni la humesaka mihandzu ka 100? Nikatsongo! Nhlayo ya mihandzu yi nga ha hambana, kambe Yehovha wa tsaka, ntsena loko ntirho lowu hi wu endlaka wu ri wona lowu hi nga kotaka ku wu endla. Tsundzuka, tinhlayo ta mihandzu leti hambaneke, hinkwato ti huma etimbilwini leti nga ‘misava leyinene.’ Rito ra Xigriki (ka·losʹ) leri hundzuluxeriweke ri va “leyinene” ri vula nchumu wo “saseka” ni lowu “tsakisaka mbilu, wu tlhela wu tsakisa mahlo.” Mayana ndlela leyi swi chavelelaka ha yona ku tiva leswaku loko hi tikarhata hilaha hi nga kotaka hakona, timbilu ta hina ti sasekile emahlweni ka Xikwembu!
U Nga Tiringanisi Ni Munhu Un’wana
9, 10. (a) Hi yihi mianakanyo leyi hoxeke leyi timbilu ta hina ti nga ha hi yisaka eka yona? (b) Xana xikombiso lexi nga eka 1 Vakorinto 12:14-26, xi swi kombisa njhani leswaku Yehovha a nga hi ringanisi ni van’wana eka leswi hi swi endlaka?
9 Hambiswiritano, timbilu ta hina leti nga hetisekangiki ti nga ha teka swilo hi ndlela yin’wana. Ti nga ha ringanisa ntirho wa hina ni wa van’wana. Ti nga ha ku, ‘Van’wana va endla swo tala swinene evutirhelini ku tlula ndlela leyi mina ndzi endlaka ha yona. Xana Yehovha a nga tsakisiwa njhani hi ntirho wa mina?’—Ringanisa 1 Yohane 3:19, 20.
10 Mianakanyo ya Yehovha ni tindlela takwe swi tlakuke swinene ku tlula swa hina. (Esaya 55:9) Hi vona ndlela leyi Yehovha a ma langutaka ha yona matshalatshala ya hina ha un’we-un’we eka 1 Vakorinto 12:14-26, laha vandlha ri fanisiwaka ni miri lowu nga ni swirho swo tala—mahlo, mavoko, milenge, tindleve ni swin’wana. Ehleketanyana hi miri wa xiviri. Vona ndlela leyi ku nga vaka vuhunguki ha yona loko wo pimanisa mahlo ya wena ni mavoko ya wena, kumbe u pimanisa milenge ya wena ni tindleve ta wena! Xirho xin’wana ni xin’wana xi tirha ntirho lowu hambaneke, kambe swirho hinkwaswo swi ni ntirho naswona i swa nkoka. Hilaha ku fanaka, Yehovha wa wu tlangela ntirho wa wena wa mbilu hinkwayo, ku nga khatariseki leswaku van’wana va endla swo tala kumbe va endla leswitsongo.—Vagalatiya 6:4.
11, 12. (a) Hikwalaho ka yini van’wana va nga ha titwaka onge va “tsanile” kumbe i va ‘xiyimo xa le hansi’? (b) Xana Yehovha u wu languta njhani ntirho wa hina?
11 Hikwalaho ka swikavanyeto leswi vangiwaka hi rihanyo leri nga nyawuriki, ku dyuhala, kumbe swiyimo swin’wana, minkarhi yin’wana van’wana va hina hi nga ha titwa onge hi “tsanile” kumbe hi vanhu ‘va xiyimo xa le hansi.’ Kambe ndlela yoleyo a hi yona leyi Yehovha a vonaka timhaka ha yona. Bibele ya hi byela: “Swirho swa miri leswi vonekaka swi tsanile ku tlula swin’wana hi swo leswi swi lavekaka. Swirho . . . leswi hi ehleketaka leswaku a swi kumbukiwi hi swi komba xichavo lexikulu . . . Kambe Xikwembu xi vumbetele miri, xi ri karhi xi nyika ku dzuneka lokukulu eka swirho leswi a swi pfumala ku dzuneka.” (1 Vakorinto 12:22-24) Kutani munhu un’wana ni un’wana a nga va wa risima eka Yehovha. Wa wu tlangela ntirho wa hina lowu hi wu endlaka hambiloko hi ri ni leswi hi kavanyetaka. Xana mbilu ya wena a yi ku susumeteli ku endla hinkwaswo leswi u nga swi kotaka eku tirheleni ka Xikwembu xo tano lexikulu ni lexi nga ni rirhandzu?
12 Kutani ke, leswi nga swa nkoka eka Yehovha, a hi ku endla swilo swo tala hilaha un’wana a endlaka hakona, kambe i ku endla leswi wena—moya-xiviri wa wena—wena hi wexe u nga kotaka ku swi endla. Leswaku Yehovha u teka matshalatshala ya hina tanihi ya nkoka swi kombisiwe hi ndlela leyi kombisaka rirhandzu leyi Yesu a tirhisaneke ni vavasati vambirhi lava hambaneke ha yona, emasikwini ya vutomi bya yena byo hetelela bya laha misaveni.
Ku Tlangela Nyiko Ya Wansati “Yo Durha Ngopfu”
13. (a) Hi swihi swiyimo leswi a swi ri kona loko Mariya a chela mafurha enhlokweni ni le milengeni ya Yesu? (b) Xana mafurha ya Mariya a ma durha ku fikela kwihi?
13 Hi Ravuntlhanu nimadyambu, Nisan 8, Yesu u fike eBetaniya, ximutana lexitsongo lexi nga eriweni ra le vuxeni bya Ntshava ya Mitlhwari, kwalomu ka tikhilomitara tinharhu ku suka eYerusalema. Yesu a a ri ni vanghana lava rhandzekaka edorobeni leri—Mariya, Marta ni makwavo Lazaro. Yesu u ve n’wendzi emutini wa vona, kumbexana ko hlayanyana. Kambe hi Mugqivela nimadyambu, Yesu ni vanghana vakwe va dye swakudya swa siku ekaya ka Simoni, loyi a tshameke a va ni nhlokonho, loyi kumbexana a hanyisiweke hi Yesu. Loko Yesu a ha tshamile eswakudyeni, Mariya u kombise xiendlo xo titsongahata lexi a xi kombisa rirhandzu rakwe leri enteke eka wanuna loyi a pfuxeke makwavo eku feni. U faye ximbitana lexi nga ni mafurha yo nun’hwela, “yo durha ngopfu.” A ma durha hakunene! A ma durha 300 wa tidenari, leti ringanaka ni kwalomu ka muholo wa lembe hinkwaro. U chele mafurha lawa yo nun’hwela enhlokweni ya Yesu ni le milengeni yakwe. U tlhele a sula milenge yakwe hi misisi yakwe.—Marka 14:3; Luka 10:38-42; Yohane 11:38-44; 12:1-3.
14. (a) Xana vaapostola va titwise ku yini hi leswi endliweke hi Mariya? (b) Xana Yesu u n’wi lwele njhani Mariya?
14 Vadyondzisiwa a va hlundzukile! Va vutisa, ‘Mafurha lawa ma halateriwa yini ke?’ Leswaku a fihla ku navela ka yena ku yiva, Yudasi u vulavula onge u lava ku pfuna lava pfumalaka, a ku: “Hikwalaho ka yini mafurha lawa ma nga xavisiwanga hi tidenari ta 300, mali yi nyikiwa swisiwana, xana?” Mariya a nga hlamulanga nchumu. Hambiswiritano, Yesu u byele vadyondzisiwa vakwe a ku: “N’wi tshikeni, mi n’wi karhatela yini? U ndzi endlele ntirho lowo saseka [xivumbeko xa ka·losʹ]. . . . Ú endlile leswi a swi koteke, ú totile miri wa mina hi mafurha ndzi nga si lahliwa esirheni. Ndzi tiyisile ndzi ri ka n’wina: Emisaveni hinkwayo laha Evhangeli leyi yi nga ta twarisiwa kona, leswi a nga swi endla swi ta vuriwa na swona, a anakanyiwa ha swona.” Vona ndlela leyi marito ya Yesu ma faneleke ma tsakise mbilu ya Mariya ha yona!—Marka 14:4-9; Yohane 12:4-8.
15. Hikwalaho ka yini Yesu a tsakisiwe swinene hi leswi endliweke hi Mariya, naswona i yini leswi hi swi dyondzaka malunghana ni ntirho wa mbilu hinkwayo?
15 Yesu u tsakisiwe ngopfu hi leswi Mariya a swi endleke. Hi ku vona ka yena, u endle xiendlo lexi dzunekaka. Ntikelo wa nyiko ya swilo leswi vonakaka a wu nga ri wa nkoka eka Yesu, kambe lexi nga xa nkoka hileswaku “ú endlile leswi a swi koteke.” U tirhise nkarhi lowu kutani a nyikela hi leswi a koteke ku swi endla. Vuhundzuluxeri byin’wana byi hundzuluxela marito lawa hi ndlela leyi, “U endle hinkwaswo leswi a a ta swi kota,” kumbe “U endle leswi a swi ri ematimbeni yakwe leswaku a swi endla.” (An American Translation; The Jerusalem Bible) Ku nyika ka Mariya a ku ri ka mbilu hinkwayo hikuva u nyikele hi hinkwaswo leswi a ri na swona. Sweswo hi leswi ntirho wa mbilu hinkwayo wu nga swona.
“Swimalani Swimbirhi” Swa Noni
16. (a) Xana Yesu u swi kotise ku yini ku vona munyikelo wa noni leyi nga xisiwana? (b) Xana swingwece swa noni leyi a swi ri ni ntikelo wo tanihi kwihi?
16 Endzhaku ka masiku ma nga ri mangani, hi Nisan 11, Yesu u hete siku hinkwaro a ri etempeleni, laha vuhosi byakwe byi ntlhontlhiweke ni ku tlhela a vutisiwa swivutiso swo tika leswi a a nga swi rindzelanga, mayelana ni swibalo, mpfuko-wa-vafi ni timhaka tin’wana. U sole vatsari ni Vafarisi, exikarhi ka swilo swin’wana leswi a va sola hi swona a ku ri leswaku va ‘dyelela tinoni ni mindyangu ya tona.’ (Marka 12:40) Hiloko Yesu a tshama ehansi, laha entiyisweni a ku ri eHubyeni ya Vavasati, laha hi ku ya hi ndhavuko wa Vayuda, a ku ri na 13 wa mabokisi yo hoxa mali. U tshame nkarhinyana, a ri karhi a langutisa hi vukheta loko vanhu va ri karhi va hoxa minyikelo ya vona. Van’wankumi lavo tala a va ri karhi va ta, kumbexana van’wana va ri lava tiendlaka lavo lulama, va tlhela va tidzunisa. (Ringanisa Matewu 6:2.) Yesu u langutisise wansati un’we. Munhu ntsena a a ta va a nga wu xiyanga nchumu lowu nga wa nkoka eka yena, kumbe eka nyiko ya yena. Kambe Yesu loyi a kotaka ku tiva timbilu ta vanhu van’wana, a a swi tiva leswaku a a ri “noni leyi a yi ri xisiwana.” Nakambe u tive ni leswaku a yi ri mali muni leyi a nyikeleke ha yona—“swimalani swimbirhi leswi lavaka ku ringana sente yin’we ntsena.”b—Marka 12:41, 42.
17. Xana Yesu u wu tekise ku yini munyikelo wa noni leyi, naswona hi dyondza yini eka Xikwembu hi ku nyika?
17 Yesu u vitane vadyondzisiwa vakwe va ta eka yena, hikuva a a lava leswaku va tivonela hi voxe dyondzo leyi a a ri kusuhi ni ku yi dyondzisa. “Yi humesile ku tlula hinkwavo lava nga hoxa mali exibyeni xa nhlengo,” ku vula Yesu. Hi ku vula ka yena, yi hoxe ku tlula hinkwavo lavan’wana loko va hlangene. “Ú humesile hinkwaswo leswi a a ri na swona”—swimalani swa yena swo hetelela. Hi ku endla tano, u tiveke emavokweni ya nkhathalelo wa Yehovha. Xisweswo munhu loyi a boxiwaka tanihi xikombiso xo nyikela eka Xikwembu hi loyi nyiko yakwe ya swilo leswi vonakaka a yi nga nyawuli. Hambiswiritano, emahlweni ka Xikwembu a yi ri ya risima!—Marka 12:43, 44; Yakobo 1:27.
Ku Dyondza Eka Ndlela Leyi Yehovha A Wu Langutaka Ha Yona Ntirho Wa Mbilu Hinkwayo
18. Xana hi dyondza yini eka ndlela leyi Yesu a va khomeke ha yona vavasati lavambirhi?
18 Eka ndlela leyi Yesu a va khomeke ha yona vavasati lavambirhi, hi dyondza tidyondzo letinene malunghana ni ndlela leyi Yehovha a wu langutaka ha yona ntirho wa mbilu hinkwayo. (Yohane 5:19) Yesu a nga ringanisanga noni leyi, na Mariya. Nkoka wa swingwece swimbirhi swa noni leyi a nga swi tekanga swi ri ehansi ka mafurha ya Mariya layo “durha ngopfu.” Tanihi leswi wansati un’wana ni un’wana a nyikeleke hi leswi a a ri na swona, tinyiko ta vona havambirhi a ti ri ta nkoka emahlweni ka Xikwembu. Kutani loko u tshuka u titwa u nga pfuni nchumu hikwalaho ka leswi u nga swi kotiki ku endla hinkwaswo leswi u lavaka ku swi endla eku tirheleni ka Xikwembu, u nga heli mbilu. Yehovha wa tsaka hi leswi u kotaka ku nyikela ha swona. Tsundzuka, Yehovha “o languta mbilu,” kutani u ku vona kahle ku navela ka mbilu ya wena.—1 Samuwele 16:7.
19. Hikwalaho ka yini hi nga fanelanga hi avanyisa leswi van’wana va swi endlaka entirhweni wa Xikwembu?
19 Langutelo ra Yehovha hi ntirho wa mbilu hinkwayo ri fanele ri khumba ndlela leyi hi langutanaka ni leyi hi khomanaka ha yona. Swi ta va swi nga kombisi rirhandzu ku xopaxopa matshalatshala ya van’wana kumbe ku pimanisa ntirho wa munhu un’wana ni wa un’wana! Lexi vavisaka, Mukreste un’wana u tsarile a ku: “Minkarhi yin’wana van’wana va vula leswaku loko u nga ri phayona a wu nchumu. Hina lava hi ngo lwa hi matimba leswaku hi kota ku tshama hi ri vahuweleri va Mfumo va nkarhi na nkarhi ‘ntsena,’ na hina ha swi lava ku tekiwa hi ri va nkoka.” A hi tsundzukeni leswaku a hi nyikiwanga matimba yo avanyisa leswaku ntirho wa Mukreste-kulorhi i wa mbilu hinkwayo kumbe e-e. (Varhoma 14:10-12) Yehovha wa wu tlangela ntirho wa mbilu hinkwayo wa un’wana ni un’wana, eka timiliyoni ta vachumayeri va Mfumo, kutani na hina hi fanele hi wu tlangela.
20. Hi swihi leswi hi ntolovelo swi nga swinene ku anakanya ha swona malunghana ni vagandzeri-kulorhi?
20 Kambe, ku vuriwa yini loko van’wana va vonaka va nga endli leswi nga ematimbeni ya vona evutirhelini? Ku hunguteka ka ntirho wa mupfumeri-kulorhi ku nga ha va xikombiso xa le rivaleni xa leswaku vakulu va fanele va nyikela mpfuno kumbe xikhutazo. Hi nkarhi lowu fanaka, a hi fanelanga hi rivala leswaku eka van’wana, ntirho wa mbilu hinkwayo wu nga ha tikomba wu fana swinene ni swingwece leswitsongo swa noni, ku ri ni mafurha ya Mariya layo durha ngopfu. Hi ntolovelo i swinene ku anakanya leswaku vamakwerhu va xinuna ni va xisati va n’wi rhandza Yehovha naswona rirhandzu rero ri ta va susumetela ku endla swo tala—ku nga ri switsongo—hilaha va nga kotaka hakona. Entiyisweni, ku hava nandza wa Yehovha wo tshembeka loyi a nga hlawulaka ku endla ntirho lowu nga nyawuriki, ku tlula hilaha a nga kotaka hakona, entirhweni wa Xikwembu!—1 Vakorinto 13:4, 7.
21. Hi wihi ntirho-vutomi lowu vuyerisaka lowu vo tala va wu nghenelaka, naswona hi swihi swivutiso leswi tlakukaka?
21 Hambiswiritano, eka vanhu va Xikwembu vo tala, ntirho wa mbilu hinkwayo wu vule ku nghenela ntirho-vutomi lowu vuyerisaka swinene—vutirheli bya vuphayona. Hi yihi mikateko leyi va yi kumaka? Naswona ku vuriwa yini hi hina lava hi nga si tshamaka hi phayona—xana hi nga wu kombisa njhani moya wa vuphayona? Swivutiso leswi swi ta kambisisiwa exihlokweni lexi landzelaka.
[Tinhlamuselo ta le hansi]
a Tanihi leswi Matiyasi a siveke Yudasi tanihi muapostola, vito rakwe—ku nga ri ra Pawulo—handle ko kanakana hi rona a ri fanele ri humelela eka lava nga eka maribye ya 12 ya xisekelo. Hambileswi Pawulo a a ri muapostola, a a nga ri un’wana wa lava 12.
b Xin’wana ni xin’wana xa swingwece leswi a xi ri lepton, ku nga xingwece xa Vayuda lexitsongo swinene ku tlula hinkwaswo, lexi a xi tirhisiwa ngopfu enkarhini wolowo. Ti-lepta timbirhi a ti ringana ni 1/64 wa muholo wa siku. Hi ku ya hi Matewu 10:29, xingwece xa assarion (lexi ringanaka ni ti-lepta ta nhungu), munhu a a ta swi kota ku xava swindzingiri swimbirhi, leswi a swi hlayiwa exikarhi ka swinyenyana swo xaveka swinene leswi a swi ri swakudya swa swisiwana. Kutani, noni leyi a yi ri xisiwana hakunene, hikuva yo va ni hafu ya mali leyi a yi laveka leswaku yi xava xindzingiri xin’we ntsena, leswi a swi nga ta olova leswaku yi endla swakudya swa nkarhi wun’we ntsena.
A Wu Ta Hlamurisa Ku Yini?
◻ Xana ku tirhela Yehovha hi mbilu hinkwayo swi vula yini?
◻ Xana xifaniso lexi nga eka 1 Vakorinto 12:14-26, xi swi kombisa njhani leswaku Yehovha a nga hi ringanisi ni van’wana?
◻ Xana hi dyondza yini malunghana ni ku nyika hi mbilu hinkwayo, eka nhlamuselo ya Yesu hi mafurha ya Mariya yo durha ni swingwece leswitsongo swa noni?
◻ Xana ndlela leyi Yehovha a wu langutaka ha yona ntirho wa mbilu hinkwayo yi fanele yi yi khumba njhani ndlela leyi hi langutaka van’wana ha yona?
[Xifaniso lexi nga eka tluka 15]
Mariya u nyikele hi leswi a a ri na swona, a chela miri wa Yesu hi mafurha layo “durha ngopfu”
[Xifaniso lexi nga eka tluka 16]
Swingwece swa noni—leswi nga nyawuriki kambe leswi nga swa nkoka emahlweni ka Yehovha