Lunghiselelo Ra Dyondzo Ya Buku Ya Bandlha Xiyenge 1: Vutihlamuleri Bya Mufambisi Wa Dyondzo
1 Dyondzo ya Buku ya Bandlha yi endla xiphemu xa nkoka eka nhluvuko wa moya wa vanhu va Yehova. Eka tin’hweti leti landzelaka, hi ta kambisisa swivumbeko swo hambana-hambana swa lunghiselelo ra Dyondzo ya Buku ya Bandlha ni ku xiya ndlela leyi hi nga pfunekaka ha yona. Eka nkandziyiso lowu hi lava ku languta ndlela leyi mufambisi wa dyondzo ya buku a nga endlaka dyondzo yi khutaza ni ku tiyisa ripfumelo ha yona.
2 Leswaku a humelela eku dyondziseni ka yena, mufambisi u fanele ku lunghiselela kahle. Tanihi xichudeni lexi tikarhataka xa Rito ra Xikwembu, a nga fanelanga a tiva nhlamulo ya xivutiso xin’wana ni xin’wana kambe u fanele a tlhela a twisisa mhaka leyi nhlamulo leyi yi nga yinene ha yona. Matshalatshala ya yena ma fanele ku va ku pfuna hinkwavo edyondzweni leswaku va tiva swivangelo swa tinhlamulo. (1 Pet. 3:15) Leswi swi ta engetela ku tlangela ka vona mhaka yoleyo.
TIPAKANI EKU FAMBISENI KA DYONDZO
3 Pakani yin’wana ya mufambisi i ku tirhisa mhaka leyi dyondziwaka ku tiyisa ripfumelo ra hinkwavo lava nga kona ni ku va khutaza ku lava ku endla ku rhandza ka Xikwembu hi laha ku engetelekeke swinene. (Ps. 110:3; 2 Vates. 1:3-5) Ku endla leswi, mufambisi u fanele ku yima eka tindhawu leti faneleke leswaku a ‘twarisa’ tinhla leti akaka ntshembo wa ntiyiso eka Yehova, Rito ra yena ni nhlengeletano ya yena. (Vagal. 6:6, Ref. Bi. nhlamuselo ya le hansi.) Swivutiso leswi vumbiweke hi vutlhari swi nga tirhisiwa ku humesa vuxokoxoko lebyi akaka ripfumelo loko nkarhi wu pfumela.
4 Pakani yin’wana i ku pfuna hinkwavo ku vona ndlela leyi va nga tirhisaka mhaka leyi hi ndlela leyi tirhaka. Xana va nga yi tirhisa njhani evutirhelini bya nsimu? Ku khutaza vamakwerhu kun’we ni lavantshwa? Ku tiyisa mindyangu ya vona na vona vini? Loko vafambisi va Dyondzo ya Buku ya Bandlha va lunghiselela dyondzo yin’wana ni yin’wana va fanele ku ringeta ku twisisa ndlela leyi tinhla to karhi edyondzweni ti tirhaka ha yona.
5 Rungula ro karhi ri nga ha tirhisiwa ku pfuna maxaka lama nga pfumeriki, vadyondzi-kulorhi kumbe vatirhi-kulorhi. Mhaka yin’wana yi nga ha pfuna lava nga eka mindyangu leyi avaneke kumbe eka mindyangu leyi nga ni mutswari un’we. Mufambisi a nga ha koka lava nga kona hi ku va pfuna ku anakanyisisa hi ndlela leyi va nga ha tirhisaka mhaka leyi kambisisiwaka hi ndlela leyi tirhaka. Mufambisi u fanele ku lwela ku hlayisa dyondzo yi tsakisa, a yi endla yi tlula ku hlanganisa mhaka hi swivutiso ni tinhlamulo ntsena.—Ringanisa 1 Vakorinto 14:9, 19.
KOMBISA NKHATHALELO WA MUNHU HI XIYEXE
6 Hi ku kombisa nkhathalelo wa munhu hi xiyexe eka un’wana ni un’wana entlaweni, mufambisi a nga khutaza ku hlanganyela hi xitalo. Lava nga ni tingana va nga ha averiwa ka ha ri emahlweni ku hlaya matsalwa kumbe va nga ha nyikiwa xivutiso ka ha ri emahlweni ku xi lunghiselela leswaku va hlamula. Hinkwavo va fanele ku lwela ku hlamula hi marito ya vona vini. Hi ku yingisela tihlamulo hi vukheta mufambisi a nga ha vona loko van’wana va lava mpfuno wa munhu hi xiyexe. A nga ha tirhisa van’wana lava nga ni ntokoto entlaweni, ku pfuna ku nyika munhu wo tano nyingiso.
7 Dyondzo ya Buku ya Bandlha i nkateko eka hina. Yi hi nyika nkarhi wo hlangana hi mintlawa leyitsongo ni ku kuma nyingiso wo tala wa munhu hi xiyexe. A hi fanelanga hi wu teka tanihi lowutsongo ku tlula minhlangano leyin’wana. Mufambisi wa Dyondzo ya wena ya Buku ya Bandlha u teka vutihlamuleri bya yena byi ri lebyikulu ku tirhisa dyondzo yin’wana ni yin’wana ku tiyisa ripfumelo ra wena eka Yehova ni ku aka ku tlangela ka wena malunghiselelo ya Xikwembu ya swa moya.