“Un’wana Ni Un’wana U Fanele A Hlaya Buku Leyi” — Watchtower LAYIBURARI YA LE KA WEB SITE

“Un’wana Ni Un’wana U Fanele A Hlaya Buku Leyi”

HI MUTSARI WA XALAMUKA! EPOLAND

Eku sunguleni ka ximumu xa 2003, buku leyi nge Dyondza Eka Mudyondzisi Lonkulu yi humesiwe hi tindzimi to tala emintsombanweni emisaveni hinkwayo. EPoland, buku leyi yo saseka leyi nga ni swifaniso swo tala yi amukeriwe hi ntsako lowukulu ku fana ni le tindhawini tin’wana. Hambileswi yi tsaleriweke vana, mapapila lama humaka eka vantshwa ni vanhu lavakulu ma kombisa leswaku buku leyi yi tsakeriwa hi vanhu hinkwavo. Hi leswi swin’wana leswi humaka eka mapapila ya kona.

“Hi mina Agata naswona ndzi ni nhungu wa malembe. Loko ndzi kuma buku leyi, hi ku hatlisa ndzi vone ndlela leyi Yehovha a ndzi khathalelaka ha yona. Ndzi rhandza ndzima ya vukombo ngopfu leyi nge, ‘Ku Yingisa Swi Nga Ku Sirhelela.’ A ndzi nga va yingisi minkarhi yin’wana vatswari va mina, kambe sweswi ndza swi tiva leswaku ndzi fanele ku cinca hikuva Yehovha u rhandza vana lava yingisaka.”

Marlena, nhwanyana wa 13 wa malembe hi vukhale, u tsale hi ku tsaka a ku: “Ndza swi tiva leswaku buku leyi yi tsaleriwe vana lavatsongo, kambe ndzi kholwa leswaku yi tsakisa munhu un’wana ni un’wana. Loko ndzi yi hlaya yi tiyisa ripfumelo ra mina eka Yehovha na Yesu. Hambi ku ri swilo leswi rharhanganeke swi hlamuseriwa hi ndlela yo olova. A ndzi hambani na yona. Naswona swifaniso swa yona swi sasekile! Swivutiso leswi nga etlhelo ka swifaniso leswi swi ta endla leswaku vana va lava ku tiva nhlamulo ya kona! Buku leyi ya tsakisa swinene, xisweswo ndzi yi hlaya hi vukheta. Ndza nkhensa swinene.”

Justyna, nhwanyana la nga ni 15 wa malembe, u hlamusela ndlela leyi buku leyi yi n’wi tsakiseke ha yona: “Tindzima leti ndzi ti hlayeke ti ndzi tsakise ngopfu lerova ndzi lava ku mi nkhensa hikwalaho ka nyiko leyi yo saseka ni leyi dyondzisaka swonghasi. Ndzi ehleketa leswaku un’wana ni un’wana u fanele a hlaya buku leyi—hambi ku ri vanhu lavakulu. Swikombiso leswi nga eka yona swa olova naswona swa twisiseka, ndzi vona onge hambi ku ri n’wana la nga ni lembe rin’we a nga yi twisisa. Nakambe swifaniso hi swoxe swi tamele rungula. Phela, ndza hluleka ku hlamusela ndlela leyi ndzi titwaka ha yona loko ndzi ri karhi ndzi hlaya buku leyi.”

Eunika na yena u phofula marito yo nkhensa malunghana ni buku leyi. Hambileswi a nga ni 19 wa malembe, u hlaya buku leyi leyintshwa hi ku hiseka naswona u vula leswaku “ya pfuna eka vantshwa.” Nakambe u tsale a ku: “Yi tamele nkongomiso lowu pfunaka evuton’wini bya siku ni siku—ekaya, exikolweni ni le vandlheni. Ndza mi nkhensa hikwalaho ka nyiko leyi.”

Maria, la nga ni n’wana wa lembe rin’we la vuriwaka Oliwia, loko a vona ndlela leyi xinhwanyetana xa yena xi swi tsakeleke ha yona swifaniso swa yona swa mivalavala, u ri: “Ndzi lava ku mi nkhensa swi huma embilwini hikwalaho ko humesa buku leyi yo hlawuleka leswaku yi dyondzisa vana. N’wana wa hina Oliwia u lava ku tshama a ri karhi a langute buku leyi. U lava hi n’wi xinga kutani hi n’wi hlamusela leswi nga endzeni kumbe eka tindzima ta yona. U tsakisiwa ngopfu hi xifaniso lexi nga eka tluka 83, lexi kombisaka vanhwanyana vambirhi va tinxaka leti hambaneke va angarhanile. Swifaniso swin’wana swi vonaka swi ri swa xiviri lerova wa swi khumba, a swi angarha ni ku swi n’wayitelela.”

Nakambe Maria u kandziyisa ndlela ya nkoka leyi buku leyi yi dyondzisaka ha yona, u ri: “Yi hlamusela timhaka ta nkoka malunghana ni rimbewu (matluka 58-60) ni ku xanisiwa ka vanhu (matluka 170-1). Hakunene i xitirho lexinene eka vatswari lava lavaka ku kurisa vana va vona hi vutlhari emisaveni leyi hombolokeke leyi nga ni makhombo yo tala swinene lama tumbeleke.”

Vakandziyisi va buku leyi nge Dyondza Eka Mudyondzisi Lonkulu va ni ntshembo wa leswaku buku leyi yi ta ku pfuna wena swin’we ni vana va wena leswaku mi vuyeriwa eka tidyondzo leti Mudyondzisi Lonkulu, Yesu Kreste, a ti dyondziseke vanhu kwalomu ka malembe ya 2 000 lama hundzeke.