‘A Ndzi Lava Ku Dyondza Swo Tala Hi Vukhongeri Bya Mina’

EKA ntirho wa yena wa matimu exikolweni, Ciara la nga ni malembe ya 12 hi vukhale, wa le Florida, eU.S.A., u hlawule nhloko-mhaka yo tsakisa ya matimu—ku xanisiwa ka Timbhoni ta Yehovha eJarimani ya Manazi. U ri: “Ndzi hlawule nhloko-mhaka leyi hikuva a ndzi lava ku dyondza swo tala hi matimu ya vukhongeri bya mina. A ndzi lava ku dyondza hi leswi humeleleke Timbhoni ta Yehovha loko ku dlayiwa Vayuda va le Yuropa hi Manazi.”

Endzhaku ko endla vulavisisi lebyikulu, Ciara u ake phiramidi hi mapulanga ya xivunguvungu, leyi yimelaka lapi ra tinhla tinharhu leri a ri endleriwe ku hlawulekisa Timbhoni ta Yehovha ekampeni. Ciara u damarhete swifaniso ni marito etlhelo ka phiramidi yoleyo. Xin’wana lexi a xi katseke kwalaho a ku ri marito yo vava kambe lama tiyisaka ripfumelo, lama tsariweke hi Wolfgang Kusserow, un’wana wa Timbhoni ta Yehovha, loko a nga si dlayiwa.—Vona Xihondzo xo Rindza (xa Xinghezi) xa September 1, 1985, tluka 14.

Nkombiso wa Ciara wa phiramidi wu swi veke erivaleni leswaku Timbhoni a ti nga fani ni vabohiwa van’wana, a ti ri ni lunghelo ro hlawula leswi ti swi lavaka: Loko a ti lo sayina tsalwa ra ku landzula ripfumelo ra tona, a ti ta va ti ntshunxiwile. Leswi Timbhoni ta Yehovha to tala swinene ti aleke ku sayina, i xikombiso xa leswaku ti tshembekile.

Ciara u vule leswaku u vuyeriwe ngopfu hi ku hlawula nhloko-mhaka leyi eka ntirho wa yena wa xikolo. Entiyisweni yi n’wi pfunile ku dyondza swo tala hi vukhongeri bya yena. U ri: “Ku nga khathariseki leswaku a ti ri ntlawa lowutsongo eJarimani hi nkarhi wolowo, Timbhoni ta Yehovha a ti ri ni ripfumelo leri tiyeke, leri ti pfuneke ku hlula nxaniso.”

Loko u ri muntshwa la nga Mbhoni ya Yehovha exikolweni, xana ti kona tindlela tin’wana leti u nga ti tirhisaka leswaku u vulavula hi matimu ya ripfumelo ra wena?