Xana Hi Ta Va Ni Vumundzuku Lebyi Tsakisaka?

Vumundzuku i nhloko-mhaka leyi vanhu va yi tsakelaka swinene. I mani eka hina loyi a nga laviki ku tiva leswi hi nga ta va hi swi endla n’hweti leyi taka, lembe leri taka hambi ku ri eka malembe ya khume lama taka? Loko hi langutisisa vumundzuku hi vuenti, xana misava leyi yi ta va eka xiyimo xa njhani eka malembe ya 10, ya 20 kumbe ya 30 lama taka?

XANA u ni langutelo lerinene hi vumundzuku? Vanhu va timiliyoni va na rona naswona va avanyisiwe hi mintlawa yimbirhi: lava vulaka leswaku va ni swivangelo leswi twalaka swo tshemba leswaku swiyimo swi ta antswa ni lava languteleke ku va ni vumundzuku lebyinene hikwalaho ka leswi swin’wana leswi va nga ha vaka va swi rindzerile swi nga riki swinene.

Entiyisweni vanhu van’wana va anakanya leswaku vumundzuku a byi nge vi byinene. Van’wana va vona hi lava vhumbhaka hi ta vumundzuku byo dzwihala, lava tsakisiwaka hi ku vula leswaku Misava yi ta lovisiwa. Hi ku ya hi ndlela leyi va byi langutaka ha yona vumundzuku, vanhu lava nga ta pona, loko va ri kona, a va nge tati ni xandla.

Xana wena u byi languta njhani vumundzuku? Xana u langutele ndzoviso kumbe ku rhula ni nsirhelelo? Loko u langutele ku rhula ni nsirhelelo, xana ntshembo wa wena u wu sekele kwihi—ko va leswi u swi navelaka kumbe u ni vumbhoni lebyi tiyeke?

Ku hambana ni lava vulaka leswaku vanhu hinkwavo va ta lovisiwa, vakandziyisi va Xalamuka! a va kholwi leswaku vanhu hinkwavo va ta lovisiwa. Ku hambana ni sweswo, Bibele yi nyikela xivangelo lexi twalaka xo tshemba leswaku ku ta va ni minkarhi leyi tsakisaka swinene.

[Laha Xifaniso Xi Humaka Kona eka tluka 5]

U.S. Department of Energy photograph