Xiyenge 2
Misava Leyi Pfumalaka Ku Xaniseka
1, 2. Vanhu vo tala va ni langutelo rihi leri hambaneke?
HAMBI swi ri tano, timiliyoni ta vanhu emisaveni hinkwayo ti ni langutelo leri hambaneke hi ku helela. Va vona vumundzuku lebyinene bya vanhu. Va vula leswaku yona misava leyi, ku nga ri khale yi ta va yi nga ha ri na vubihi ni ku xaniseka hi ku helela. Va tiyiseka leswaku leswo biha swi ta susiwa hi ku hatlisa kutani ku simekiwa misava leyintshwa hi ku helela. Va tlhela va vula leswaku masungulo ya misava leyi leyintshwa ma karhi ma endliwa sweswi!
2 Vanhu lava va pfumela leswaku misava leyintshwa yi ta pfumala nyimpi, tihanyi, vugevenga, vuhomboloki ni vusweti. Yi ta va misava leyi nga riki na vuvabyi, gome, swirilo hambi ku ri rifu. Enkarhini wolowo vanhu va ta hetiseka kutani va hanya hi laha ku nga heriki hi ntsako eparadeyisini ya laha misaveni. Phela, lava feke va ta tlhela va pfuxiwa ivi va kota ku hanya hi laha ku nga heriki!
3, 4. Hikwalaho ka yini vanhu vo tano va tiyiseka hi langutelo ra vona?
3 Xana langutelo leri ra vumundzuku ro va norho ntsena, ku tlanga hi nkarhi ntsena? Doo, nikatsongo. Ri sekeriwe eka ripfumelo leri tiyeke swinene ra leswaku Paradeyisi leyi yi taka a yi siveleki. (Vaheveru 11:1) Hikwalaho ka yini va tiyiseka swonghasi? Hikuva Muvumbi wa vuako wa matimba hinkwawo u swi tshembisile.
4 Malunghana ni switshembiso swa Xikwembu, Bibele yi ri: “A ku wanga na rito rin’we ra marito hinkwawo lamanene lawa Yehova, Xikwembu xa n’wina, a ma vuleke henhla ka n’wina; kambe mi endleriwe hinkwawo, a ku wanga na rito rin’we.” “Xikwembu a hi munhu leswaku xi nga hemba . . . Xana hi yena la vulaka, kutani a nga endli, loyi a vurisaka, kutani a nga hetisisi?” “Yehova wa tinyimpi u hlambanyile, a ku: kunene lexi ndzi xi ehleketeke xi ta endlakala, ni lexi ndzi xi kaneleke xi ta humelela.”—Yoxuwa 23:14; Tinhlayo 23:19; Esaya 14:24.
5. Hi swihi swivutiso leswi faneleke ku hlamuriwa?
5 Hambi swi ri tano, loko xikongomelo xa Xikwembu a a ku ri ku simeka paradeyisi ya la misaveni leyi pfumalaka ku xaniseka, xo sungula, hikwalaho ka yini xi pfumelele swilo swo biha swi endleka? Hikwalaho ka yini xi rindze malembe ya tsevu wa magidi ku fikela sweswi xi nga si lulamisa leswi hoxeke? Xana malembe xidzana wolawo hinkwawo ya ku xaniseka ma komba leswaku kahle-kahle Xikwembu a xi hi khathaleli, kumbe ni leswaku a xi kona ke?