Maxangu Hinkwawo Ma Ta Hela Ku Nga Ri Khale!
Swi nga ha endleka leswaku u tshame u tivutisa xivutiso lexi nge, ‘Hikwalaho ka yini vanhu va xaniseka swonghasi?’ Phela se ku hundze magidi-gidi ya malembe vanhu va ri karhi va kayakayisiwa hi tinyimpi, vusweti, makhombo, vugevenga, vuhomboloki, vuvabyi ni rifu. Eka malembe ya dzana lama hundzeke, ku ve ni maxangu yo tala ngopfu ku tlula rini na rini. Xana maxangu lawa hinkwawo ma ta kala ma hela?
Nhlamulo leyi chavelelaka i ina, naswona nkarhi wa leswaku ma hela wu kwala nyongeni! Rito ra Xikwembu ku nga Bibele ri ri: “Lowo homboloka a nge he vi kona . . . Kambe lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu.” Xana ntsako wolowo va ta va na wona ku fikela rini? “Lavo lulama va ta dya ndzhaka ya misava, va ta tshama eka yona hi masiku.”—Pisalema 37:10, 11, 29.
Loko Xikwembu se xi byi susile vubihi ni ku xaniseka, misava yi ta cinciwa yi va paradeyisi. Leswi swi ta endla leswaku vanhu va kota ku hanya hilaha ku nga heriki, va hetisekile naswona va tsakile. Rito ra Xikwembu ri ri: “[Xikwembu] xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona.”—Nhlavutelo 21:4.
Emisaveni yoleyo leyintshwa, lava feke va ta pfuxiwa leswaku na vona va ta kuma mikateko yoleyo: “Ku ta va ni ku pfuxiwa ka lava lulameke ni ka lava nga lulamangiki.” (Mintirho 24:15) Hi yona mhaka leyi Yesu Kreste a byeleke mudyohi la hundzukeke kutani a kombisa ripfumelo eka Yena, a ku: “U ta va na mina eParadeyisini.”—Luka 23:43.
Swi Tise Ku Yini Leswaku Ku Va Ni Maxangu?
Leswi Xikwembu a xi lava leswaku vanhu va va ni vumundzuku lebyinene swonghasi, ha yini xi pfumelele leswaku ku va ni maxangu? Ha yini xi tshike vanhu va xaniseka nkarhi wo leha swonghasi?
Loko Xikwembu xi endla Adamu na Evha, xi va endle va hetisekile emirini ni le mianakanyweni. Xi va veke entangeni wa paradeyisi xi tlhela xi va nyika ntirho lowu tsakisaka. Bibele yi ri: “Xikwembu xi vona hinkwaswo leswi xi swi endleke, kutani waswivo, a swi ri swinene ngopfu.” (Genesa 1:31) Loko a va xi yingisile, a va ta va ni vana lava hetisekeke naswona misava hinkwayo a yi ta va yi ri paradeyisi, leyi vanhu va tshamaka eka yona hi ku rhula ni ntsako hilaha ku nga heriki.
Loko Xikwembu xi vumba Adamu na Evha, xi va nyike nyiko leyinene, ku nga ntshunxeko wa ku tihlawulela. A va nga endliwanga ku fana ni tirhoboto leti endlaka xin’wana ni xin’wana lexi n’wini wa tona a lavaka xona. Kambe, leswaku va tshama va tsakile, a va fanele va wu tirhisa kahle ntshunxeko wa vona wa ku tihlawulela—va yingisa milawu ya Xikwembu. Xikwembu xi ri: “Mina Yehovha, ndzi Xikwembu xa wena, Loyi a ku dyondziselaka ku ku pfuna, Loyi a ku fambisaka endleleni leyi u faneleke u famba hi yona.” (Esaya 48:17) Ku wu tirhisa hi ndlela yo biha ntshunxeko lowu wa ku tihlawulela, a ku ta vanga khombo hikuva vanhu a va nga tumbuluxiwanga leswaku va tihanyela va nga kongomisiwi hi Xikwembu. Bibele yi ri: “Ndlela ya munhu wa la misaveni a yi le ka yena. Munhu loyi a fambaka a nga ka a nga wu kongomisi nkondzo wa yena.”—Yeremiya 10:23.
Lexi vavisaka hi leswaku vatswari va hina vo sungula va vone onge swilo swi nga va fambela kahle hambiloko va hanya va nga kongomisiwi hi Xikwembu. Kambe loko se va nga ha lawuriwi hi vuhosi bya xona, Xikwembu xi tshikile ku va seketela naswona va ve vanhu lava nga hetisekangiki. Xisweswo va sungule ku tsana ku fikela loko va dyuhala ni ku fa. Leswi hi nga vana va vona, na hina hi velekiwa hi nga hetisekanga naswona ha fa.—Varhoma 5:12.
Mhaka-nkulu—I Mfanelo Ya Ku Fuma
Hikwalaho ka yini Xikwembu xi nga herisanga Adamu na Evha kutani xi tiendlela vanhu van’wana? Xivangelo, hi leswaku mfanelo ya Xikwembu yo fuma vuako hinkwabyo a yi tlhontlhiwile. Kutani ku tlakuke xivutiso lexi nge: I mani la nga ni mfanelo yo fuma ni leswaku i mani mufumi wo lulama? Leswi vulaka leswaku: Xana swilo a swi ta va fambela kahle vanhu loko va nga fumiwi hi Xikwembu? Ndlela ya leswaku Xikwembu xi swi veka erivaleni leswaku swilo swi nga va fambela kahle vanhu loko va ri ehansi ka vuhosi bya xona kumbe loko va ri ehansi ka vuhosi bya vona vini, a ku ri ku va nyika nkarhi lowu eneleke wa leswaku va tifuma hi ku helela. Nkarhi lowu va nyikiweke wona wu va pfumelele ku ringeta tindlela hinkwato ta ku fuma, ta ikhonomi ni ta vukhongeri, va nga kongomisiwi hi Xikwembu.
Xana vuyelo byi ve byihi? Magidi ya malembe ya matimu ya munhu ma kombisa leswaku vanhu a va ya va ri karhi va xaniseka swinene. Eka lembe-xidzana leri hundzeke, vanhu va langutane ni maxangu yo tlurisa. Ku yayarheriwe timiliyoni ta vanhu hi nkarhi wa Nyimpi ya Misava ya Vumbirhi. Vanhu vo tlula 100 wa timiliyoni va dlayiwile etinyimpini. Vugevenga ni madzolonga swi lo vuya. Ku tirhisiwa ka swidzidzirisi ku andze ngopfu. Mavabyi lama tluletiwaka hi vuxaka bya rimbewu ma karhi ma hangalaka. Vanhu va makume ya timiliyoni va karhi va fa lembe na lembe hikwalaho ka ndlala ni vuvabyi. Kun’wana ni kun’wana, vutomi bya ndyangu bya hohloka ni ku tikhoma loko biha ku andzile. A yi kona hulumendhe ya vanhu leyi yi kotaka ku tlhantlha swiphiqo leswi. A yi kona ni yin’we leyi kotaka ku herisa ku dyuhala, vuvabyi ni rifu.
Xiyimo xa vanhu xi hilaha Bibele yi vuleke hakona malunghana ni minkarhi ya hina. Rito ra Xikwembu ri vula leswaku hi hanya “emasikwini yo hetelela” ya mafambiselo lawa ya swilo lawa ma fambisanaka ni “minkarhi ya mangava leyi swi nonon’hwaka ku langutana na yona.” Naswona hilaha Bibele yi vuleke hakona, “vanhu vo homboloka ni vaxisi va ta ya emahlweni va nyanya evubihini bya vona.”—2 Timotiya 3:1-5, 13.
Maxangu Ma Le Kusuhi Ni Ku Hela
Vumbhoni hinkwabyo byi kombisa leswaku hi le kusuhi swinene ni khombo leri nga tata hikwalaho ko ringeta ka munhu ku hanya a nga kongomisiwi hi Xikwembu. Swi lo dlaa, leswaku mhaka ya ku tifuma ka vanhu handle ka Xikwembu a yi nge pfuki yi humelerile. I vuhosi bya Xikwembu ntsena lebyi nga tisaka ku rhula, ntsako, rihanyo leri hetisekeke ni vutomi lebyi nga heriki. Hi yona mhaka leyi nkarhi wa leswaku Xikwembu xi herisa vuhomboloki ni ku xaniseka wu tshineleke swinene. Ku nga ri khale Xikwembu xi ta nghenelela etimhakeni ta vanhu, xi herisa mafambiselo lawa hinkwawo ya swilo lama nga tsakisiki.
Vuprofeta bya Bibele byi ri: “Emasikwini ya tihosi teto [mimfumo leyi fumaka sweswi] Xikwembu xa le tilweni xi ta veka mfumo lowu wu nga ta ka wu nga lovisiwi. . . . Wu ta pfotlosa kutani wu herisa mimfumo leyi hinkwayo [mimfumo leyi nga kona sweswi], kambe wona wu ta tshama hilaha ku nga riki na makumu.” (Daniyele 2:44) Dyondzo-nkulu leyi nga eBibeleni, i ya ku lweriwa ka vuhosi bya Yehovha, ku nga mfanelo ya yena yo fuma hi ku tirhisa Mfumo wa yena wa le tilweni. Loko Yesu a vulavula hi xikombiso xa ‘masiku yo hetelela,’ u te: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.”—Matewu 24:14.
Loko makumu ma fika, ku ta pona vamani? Bibele ya hlamula: “Lavo lulama hi vona lava nga ta tshama emisaveni, naswona lava va pfumalaka xisandzu hi vona lava nga ta sala eka yona. Loko ku ri lavo homboloka, va ta dlayiwa emisaveni.” (Swivuriso 2:21, 22) Lavo lulama hi lava va dyondzaka hi ku rhandza ka Yehovha va tlhela va ku endla. Yesu Kreste u te: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.” (Yohane 17:3) Ina, “misava ya hundza . . . kambe loyi a endlaka ku rhandza ka Xikwembu u tshama hi masiku.”—1 Yohane 2:17.
Handle ka loko ku kombisiwile, Matsalwa lama tshahiweke eka xiphephana lexi ma huma eka Vuhundzuluxeri Bya Misava Leyintshwa Bya Matsalwa Yo Kwetsima.